Sasamaan Pasowal to Sapaini?

1. Cima ko papasowal to sapaini to tao hani? Misamaanay?

PAKAYNI pasowal to sapaini anca sapalimoˈot to tao i, samaanay ko harateng iso hani? Cowa ka pasangaren ko roma tamdaw, o roma tamdaw cowa ka rihaday ko falocoˈ. Ano o mananto ko pakayraan ita, nolatekay oha papasowal kita to sapaini to tao. Misamaanay hani? Samanen o tahapinangan no Krisciyang i, o masasiolahay sanay ci Yis, maolahay kita to salikaka a cecay pakayraan i, itini pisaali nangra pasowal to sapaini. (Yohani 13:35) O roma i, masowalay no Fangcalay Cudad, nai falocoˈen ita a palimoˈot ko widang, wa matongal ko kalawidang ita i cingranan.—Taneng 27:9 ato roma pihongyak.

2. Pairaen ko masamaanay a inaneng no malohemay malitengay hani? Misamaanay? (Nengnengen ko sapatongal lalakaw “Itini Mitosilay ato Nikaˈorip a Saˈopo Pasowal to Sapaini.”)

² Mangalefay misaali ko malohemay malitengay mafanaˈ to sasamaan pasowal to sapaini, samanen minilnilan ni Yihofa aci Yis cangra pakaen to kasakopang. (1 Pitiro 5:2, 3) Mikimad cangra itini kasakopang, misalalangian to Fangcalay Cudad a pasowal to sapalimoˈot. O roma i, pasowalho to sapaini cangra to kasasiroma a salikaka, mahawpay ko miliyasay ci Yihofaan a tamdaw. Mihaenay, malohemay malitengay ato kita maemin sasamaan pasowal to sapaini ngaˈ o ciepocay hani?

3. (1) Sasamaan kita minanam pasowal to sapaini? (Isaya 9:6; nengnengen ko sapatongal lalakaw “Mitodong ci Yisan Pasowal to Ciepocay a Sapaini.”) (2) Oniya lalakaw mamilengo to manan?

³ Pakayni to sasamaan pasowal to sapaini, mikitini i maˈoningay i Fangcalay Cudad a tamdaw adihayay ko mamananam ita. Tinakoen ci Yis, o tada sangaˈayay a sapaini ningra, o ‘ciinanengay a palimoˈotay’ hananay a pangangan cingra. (ˈOsien ko Isaya 9:6.) Oniya lalakaw mamilengo: Ano micangacang ko tao kitanan to sapaini i, sasamaan ko demak ita? Ano talaˈayaw kita palimoˈot to tao i, sasamaan ko demak hani? Misamaanay itini matatodongay a tatokian i, tano matatodongay a pakayraan pasowal to sapaini hano o masakalimlaan hani?

ANO MICANGACANG KO TAO TO SAPAINI ITA

4-5. Ano ira ko tamdaw micangacang kitanan to sapaini i, haharatengen ita ko manan? Patinakoen a mitadtad.

⁴ Ano micangacang ko tao to sapaini ita i, samaanay ko harateng iso? Alatek pakasoˈlinay cingra tisowanan sanay ko harateng iso, mansa mahemekay kiso, sapitangsolaw sa pasowal cingranan to hamamisamaan ko demak. Kawra haratengenho ita: “Iraay ko tatodong ako itini toniya demak paini cingranan han?” Nolatekay, sangaˈayay a pakayraan padama to tao i, cowa ko pasowal to sapaini, ao padama cingranan itini toniya demak pakakilim to inanengay a tamdaw a pakafanaˈ cingranan.

⁵ Patinakoen, ano pakidemay ko adada no widang iso i, mikilimay cingra to milingatay a lalakaw, mahelaayto ko pina sapiadah a pakayraan, kawra sapilicayawho cingra tisowanan o manan a sapiadah a pakayraan ko ngaˈayay. Alatek iraay ko ngaˈayay a sapiadah a pakayraan sanay kiso, kawra cowa ko ising kiso, cowa ka pihatatanam to sasamaanen miadah ko tao. Itini toniya pakayraan i, padama kiso to widang mikilim to inanengay a tamdaw a pasowal to sapaini i cingranan, o sangaˈayay koni.

6. Misamaanay hano aka macaloh kita a paini to tao?

⁶ Soˈlin wa ngaˈay kita pasowal to tao to sapaini sanay ko harateng i, aka macaloh a pacaˈof cingranan. Misamaanay hani? Taneng 15:28 sanay: ‘O falocoˈ no moecelay a tamdaw midotimayho ngaˈ pacaˈofay.’ Soˈlin iraayto ko hacaˈof ita, kamayanho a mikilim to lalakaw, mitolon ato midotim, ikor ngaˈ pacaˈofen cingra. Mihaen ngaˈ o sapaini ita wa mahecad to harateng ni Yihofa. Dotoc nengnengen ita ko tinakoan no pairasolay ci Natan.

7. Mikitini to pairasolay ci Natan a tinakoan o manan ko mananamay iso?

⁷ Pasowalay ko Hongti ci Tafiti to pairasolay ci Natanan, sapatirengaw cingra to fangcalay sefi ni Yihofa. Tangsolay mifanaˈ ci Natan ci Tafitian ngaˈayay patirengen. Kawra, isalakatho ci Natan milicay ci Yihofaan ngaˈ cipinang to harateng ni Yihofa. Soˈlinay i, cowa ka papipatirengen ni Yihofa ci Tafiti to fangcalay sefi. (1 Rayray 17:1-4) Oniya demak paihkalay to ano ira ko tamdaw micangacang kitanan to sapaini i, ‘aka macaloh a somowal’ kita o citanengay konini.—Yakop 1:19.

8. Aka macaloh kita a pasowal to sapaini a roma lalangian o manan?

⁸ Aka macaloh kita a pasowal to sapaini to tao, iraayho ko roma a lalangian. Ano caka tatodong ko sapaini ita i, doedoen no tao ko sapaini ita a midemak, telocto i, cowa ka ngaˈay, itini toniya demak wa ciˈinorong kita. Mihaenay i, pasowal to sapaini to tao i, ka pisongilaˈ a misinanot.

TALAˈAYAW A PASOWAL TO SAPAINI TO TAO

9. ˈAyaw no papasowal to sapirikec i, isalakat wa cipinang ko malohemay malitengay to manan a demakan hani? (Kalatiya 6:1)

⁹ Ano ‘caka hapinang tahoriyac a mapolin’ ko salikaka i, wa talaˈayaw ko malohemay malitengay a mirikec cingranan. (ˈOsien ko Kalatiya 6:1.) Tatodong no ‘tahoriyac a mapolin’ i, o miciˈiwiay ko rakat, alatek wa midemak to pakidemay a raraw i noikor cingra. Mihaenay, o patosokan no malohemay malitengay oha papadama to mahaenay a salikaka materek i sakaˈorip a lalan. (Yakop 5:19, 20) Kawra, wa isalakat ko malohemay malitengay a cipinang to mirikecan nangra a salikaka o soˈlinay mapolinay itini pidokoan. Haratengen, mihayian ni Yihofa ko kahacecay a tamdaw pakayni i makapahay falocoˈ no niyah a misaˈosi. Nolatekay cowa ka hecad ko pipiliˈ no tao kitanan, midemak cingra to cowa ko kaolahan ni Yihofa a demak cowa ka saan. (Loma 14:1-4) Kawra, ano tahoriyac a mapolin ko cecay Krisciyang i pidokoan, sasamaanen no malohemay malitengay mirikec cingra hani?

10-12. Talaˈayaw mirikec i, sasamaan ko demak no malohemay malitengay? Tano tinakoen a mitadtad. (Nengnengen ko coka.)

¹⁰ Ano talaˈayaw ko malohemay malitengay mirikec to tamdaw i, wa tahalifa to pasangar. O manan hani? Sowal no tarokos ci Pawlo, oniya misaaliay to sarikec a tamdaw, alatek caka mahapinang tahoriyac a mapolin ko niyah, cowa ka hapinang ningra to miciˈiwiayto ko rakat no niyah. Mihaenay, sapipadamaaw toniya tamdaw madolo a micada to sapirikec i, wa talaˈayaw ko malohemay malitengay a misaday.

¹¹ Talaˈayaw a mirikec mahecaday tora ˈatekakay a sera a paloma to pinaloma, salakat mifowakan no maomahay ko sera, ikor mikosaman, salikor cefosenho to nanom. Mahecaday toni, ˈayaw no mamirikec ko malohemay malitengay i, salakat “fowakenho ko sera” o sangaˈayay. Tinakoen i matatodongay a toki ko malohemay malitengay, ciharateng to misaaliay to sapirikec a tamdaw, ikor ngaˈ fanaˈen cingra ira ko hasasowalen cingranan. Manaokaniw, ano maceriday ko malohemay malitengay paihkal to olah, ciharateng to tao, ikor hasasowalen ningra i, wa madoloto a mitemer to falocoˈ no marikecay a tamdaw.

¹² Ano masasowal i, padadotoc ko malohemay malitengay “mifowak to sera.” Ngaˈayay fanaˈen no malohemay malitengay cingra, mararaway ko kahacecay tamdaw, nolatekay misaaliay to sarikec no tao. (Loma 3:23) Damsayen kangodoen ko sasowalen, tano Fangcalay Cudad padama cingranan mihapinang to raraw no niyah. Mafanaˈ cingra ikor, ngaˈayayto a “mikosam” ko malohemay malitengay, kantangen ihkal a mifanaˈ cingranan, misamaan misalof ko niyah. Salikor, “mamicefos to nanom” ko malohemay malitengay. Papakahemeken ko malohemay malitengay to ngaˈayay a midemakan ningra, halo kalacafay cingranan a mitolon.—Yakop 5:15.

13. Sasamaan mafanaˈ ko malohemay malitengay to soˈlinay cipinang ko marikecay a tamdaw?

¹³ Nolatekay, mararaway ko kacipinang no marikecay a tamdaw to sowal no malohemay malitengay. Sakaecaaw ka mafekad ko hatiniay a demak, o malohemay malitengay damsayen mikangodo a milicay cingranan to pina a salicay, padama cingranan soˈlinay a cipinang, hanaca mafanaˈ misakadademak to sarikec.—Patnakay 12:11.

I MATATODONGAY A TATOKIAN, TANO MATATODONGAY A PAKAYRAAN PASOWAL TO SAPAINI

14. Ano maketerho i, cowa ka ngaˈay mirikec to tao, misamaanay hani?

¹⁴ Cowa ka lefot ko tamdaw, mansa nolatekay mararaway ko sasowalen ato demak no tao, pakararaway kitanan. (Kolosay 3:13) Sanay ko Fangcalay cudad, alatek pakaketeray ko tao kitanan. (Ifiso 4:26) Kawra ˈimeren ita ko niyah, aka a maketerho mirikec to tamdaw, misamaanay hani? Samanen ‘o keter no tamdaw cowa ka ngaˈay patalahkal to moecelay no Kawas.’ (Yakop 1:20) Ano caka piˈimer ko niyah i, mamangalef a tatiih ko demak. Cowa ka ngaˈay fanaˈen ko tao to nafalocoˈan ato harateng no niyah, cowa ka saan. Ngaˈayay i matatodongay a tatokian mifanaˈ cingranan. Tinakoen, rihadayto ko falocoˈ ikor ngaˈ, wa ciepocto ko sasowalen. Itini toniya pakayraan, ci Ilihu o ngaˈayay a taˈarawan. Samaanan ningra mirikec ci Yopu? Nengnengen ita.

15. Mikitini i taˈarawan ni Ilihu o manan ko mananamay ita? (Nengnengen ko coka.)

¹⁵ Makaniway a widang ni Yopu pinaay a romiˈad pakokot ci Yopuan, itira tora tatokian i, mihadidiay ci Ilihu mitengil to piˈading a sowal ni Yopu. Siniˈadaay ci Ilihu ci Yopuan, kawra maketerayho, samanen sapisawacayaw aca ni Yopu to cowa ka raraw ko niyah, hanaca milengo pakayni ci Yihofaan i, mararaway ko sowal ni Yopu. Soˈlin mahaen, kamayan ci Ilihu mihadidi mitengil to sowal no tao ikor ngaˈ pasowalay cingra, hanaca lopayˈay ko waywayan ningra a mikongodo ci Yopuan. (Yopu 32:2; 33:1-7) Mikitini i taˈarawan ni Ilihu mananamay ita, mitala to matatodongay a tatokian ngaˈ mirikec, hanaca tano matatodongay a pakayraan, tatodong i, paira to olah ato mikangodoay mihaen to demak.—Patnakay 3:1, 7.

PADADOTOC MISAˈICEL, PASOWAL TO SAPAINI, MICADAHO TO SAPAINI

16. Mikitini kita i ˈOlic 32:8 o manan ko mananamay hani?

¹⁶ Oniya lalakaw a lalangian a sinael sanay, wa mihimaw ci Yihofa kitanan, mikayat kitanan romakat to rarakaten a lalan. (ˈOsien ko ˈOlic 32:8.) O tatodong i, papadadotoc ci Yihofa padama kitanan, paini kitanan, padamaho kitanan misakadademak. O taˈarawan ni Yihofa tada padihkoay to falocoˈ no mita! Ano paini kita to tao i, todongen ci Yihofa, pasowal to sapaini ikor padadotoc ciharateng to tao, padamaho cingranan misakadademak to sapaini.

17. Misalalangiay ko malohemay malitengay to Fangcalay Cudad a mipaini, sasamaan a palemed to tao? (Isaya 32:1, 2)

¹⁷ Nohatini tada misaaliay kita micada to sapaini no tao, papasowalho to sapaini to tao. (2 Timoti 3:1) Ano misalalangiay ko malohemay malitengay to Fangcalay Cudad a mipaini, wa ‘mahecad to ˈalo itini makedalay a pala’ cangra, pasinoway to tao. (ˈOsien ko Isaya 32:1, 2.) Mafanaˈay ko widang ita to sapitengilaw kita to manan, kawra oha tatengilen no mita a demak fanaˈen ningra kita, o sowal nangra ‘malecaday o ekim a lingko mitelian i linkim a piyar,’ tada ciepocay koni. (Taneng 25:11) Nanay padadotoc kita misaˈicel, minanam a pasowal to ciepocay a sapaini, misamiming ko falocoˈ micada to sapaini.