LALENGOEN LALAKAW 28
RADIW 88 Pakafanaˈen Kako to Lalan Iso
Sasamaan Micangacang to Sapaini?
‘Micangacangay to sapaini i, o citanengay.’—TANENG 13:10.
KALIMLAAN NO LALAKAW
Nengnengen sasamaan kita a midemak ngaˈ, milifok to epoc nai sapaini.
1. Sakacitanengaw ko pisaˈosi i, sasamaanen ita ko demak? (Taneng 13:10; 15:22)
SAKACITANENGAW ko pisaˈosi no mita, nanay o pisaˈosi no niyah ira ko ngaˈayay minaroˈan. O Kimad no Kawas mifanaˈay, sapalaˈosiaw toniya patosokan, wa micangacang kita to sapaini.—ˈOsien ko Taneng 13:10 ato roma pihongyak; 15:22 ato roma pihongyak.
2. Papidemakan ni Yihofa kita to manan a demak hani?
2 Cima ko papafeli kitanan to sangaˈayay sapaini hani? O ikakarayan a Wama ci Yihofa, pasowalay Cingra kitanan: ‘Papahapinangen Ako kiso to demak, mikayat tisowanan romakat to rarakaten a lalan; mamihimaw Kako tisowanan, sapapilimoˈotaw tisowanan.’ (ˈOlic 32:8) Oniya sowal paihkalay, ciharatengay ci Yihofa kitanan, wa pafeli Cingra kitanan to tada matatodongay a sapaini, padamaho kitanan misakadademak to sapaini.a
3. Oniya lalakaw mamilengo to manan hani?
3 Sapilifokaw to epoc nai sapaini ni Yihofa i, saharateratengen ita: (1) O manan ko papalahaden ako a capeling? (2) Wa o cimacima a salikaka ko cacangacangen ako a mipaini? (3) Tatano masamaanay a harateng no mako a micangacang to sapaini? (4) Misamaanay hano aka papipatadoen ko tao to niyah a misaˈosi hani? Oniya lalakaw mamikitini i Kimad no Kawas a pakahela to sapacaˈof toniya sepatay a salicay.
PALAHADEN KO MANAN A CAPELING?
4. Sakaciepocaw mikitini i sapaini ni Yihofa, misaaliay kita to manan tosaay a capeling?
4 Mamisapoener kita a misamiming ko falocoˈ ngaˈ, mikitini i sapaini milifok to epoc. Ira ko mahaenay tosaay a capeling a tamdaw, mamihayi ko niyah to cangoˈotay ko nalifetan ato sifanaˈ, mitadiˈec to niyah cowa ko citanengay ko pisaˈosi. Ano cangoˈot kita toniya tosa a capeling i, o mananto ko sapaini ni Yihofa nai Fangcalay Cudad, cowa ko mamitengil kita, telocto i, cowa ko mamilifok to sapadama Ningra. (Mika 6:8; 1 Pitiro 5:5) Kawra, ano misapoeneray a misamiming to falocoˈ kita i, wa madoloto kita a mitengil to pakaynian ni Yihofa i Fangcalay Cudad a sapaini, mamilifokho to taˈangayay a epoc.
5. Ci Tafiti alatek pakayniay i manan a demakan a misatakaraw?
5 Saharateratengen ko tinakoan ni Tafiti, soˈlin malaˈosiay ningra ko adihayay tadamaanay a demak, kawra cowa pakayni toniya demak cingra a misatakaraw. Kaemangho cingra i, pakayniay to inaneng no ongkak ko sakacingangan ningra, masiwkayay cingra midatok i kaˈayaw no hongti. (1 Samuil 16:18, 19) Manilnil ci Tafiti malo hongti ikor matomesay ko fangcalay saocor, mala o inanengay a tamdaw. (1 Samuil 16:11-13) Mapadikay ningra ci Koliyat, ikor malowiday ningra ko adihayay a folaw, mapakasemeray no ˈalomanay tamdaw. (1 Samuil 17:37, 50; 18:7) O cecay misatakaraway a tamdaw ano malaˈosiay ko adihayay tadamaanay a demak, ikor alatek cowa ka sapitengilaw cingra to sapaini no cimacima a tamdaw. Kawra, cowa ka mahaen ci Tafiti.
6. Sasamaan kita mafanaˈ ci Tafitian makahi mitengil to sapaini no tao? (Nengnengen ko coka.)
6 Mala hongti ci Tafiti ikor, maceriday mitengil to sapaini no tao. (1 Rayray 27:32-34) Naitiyaho mahaenay aca ko demak ningra, hanaca cowa kono faˈinayan aca ko mitengilan ningra, mitengilayho to sapaini no fafahiyan, tinakoen ci Apikail. Cowa ka hecad ci Tafiti to faˈinay ni Apikail ci Napalan. Pakidemay ko riˈang ni Napal, misatakaraway, awaay ko miakoˈiday falocoˈ, nikawrira ci Tafiti o misapoeneray a tamdaw. Mitengilay cingra to sowal ni Apikail, telocto i, cowa ka pidemak cingra to pakidemay a raraw.—1 Samuil 25:2, 3, 21-25, 32-34.
Misapoeneray ci Tafiti micada to sapaini ni Apikail (Nengnengen ko saka 6 fatac)
7. Wa ngaˈay kita mikitini ci Tafitian minanam to manan hani? (Patnakay 4:13) (Nengnengen ko coka.)
7 Ngangaˈay kita mikitini ci Tafitian minanam to kalimlaan a kimad. Tinakoen, ano soˈlin irato ko inaneng ato fadangalan no niyah, mafanaˈayto to kihcod ko niyah, cowato pisaali to sapaini no tao aka ka saan. Pahecaden ci Tafitian, ano o ngaˈayay ko sapaini no tao i, o cimato ko painiay, mamakahi kita a micada. (ˈOsien ko Patnakay 4:13.) Mihaen, ecato ka pakidem ko raraw no mita, midokaˈ to niyah ato tao.
Ano o ngaˈayay a sapaini, o cimato ko pasowalay, wa makahi kita a micada (Nengnengen ko saka 7 fatac)d
WA O CIMACIMA A SALIKAKA KO CACANGACANGEN ITA A MIPAINI
8. Ci Yonatan hano ngaˈay pafeli ci Tafitian to matatodongay a sapaini hani?
8 Pakayni micangacang to sapaini i, wa ngaˈay kita mikitini ci Tafitian minanam to manan hani? O misalalicayan ningra a tamdaw i, ngaˈayay ko kalalaˈed ci Yihofaan, hanaca cipinangay to masiˈayaway ni Tafiti a pasangar, iraay ko milingatay a sifanaˈ ato milifetan. Tinakoen kinacecayay, sakafanaˈaw ci Tafiti to hangangaˈay patatikol ko ngaˈayay a kalalaˈed ci Sawloan, oranto i, mikiliman ningra ko wawa ni Sawlo ci Yonatan micangacang to sapaini. Matatodongay ko mikiliman ningra a tamdaw, samanen maolahay ci Yihofa ci Yonatanan, hanaca tada cipinangay ci Sawloan. (1 Samuil 20:9-13) Itini toniya pakayraan i, sasamaan kita minanam ci Tafitian hani?
9. Ano misaali kita to sapaini i, ngaˈayay kilimen ko cima hani? (Taneng 13:20)
9 Ano masiˈayaw ita ko pasangar, misaali to sapaini no tao i, o milicayan ita a tamdaw o maolahay ci Yihofaan ato iraay ko nalifetan a tamdaw o sangaˈayay koni.b (ˈOsien ko Taneng 13:20.) Tinakoen, ano mikilim ko faˈinayan salikaka to matatodongay hararamod i, o cima ko cacangacangen ningra a mipaini hani? Ano o cowaho ka ciraramod a tamdaw pakayni i safalod no Fangcalay Cudad a mipaini cingranan, o ngaˈayay koni. Kawra, ano o ciraramoday a Krisciyang matenesay rahekeray ko raramod, hanaca cipinangay toniya cowaho ka ciraramod a faˈinayan salikaka, o mamangalef cangra pasowal to matatodongay ciepocay a sapaini.
10. Dotoc o manan ko lalengoen hani?
10 Isaˈayaway a fatac malengoayto, papalahaden ita ko manan tosa a capeling, ato o cimacima ko cacangacangen a mipaini. Dotoc a lalakaw wa milengo, papairaen ko masamaanay a harateng ita micangacang to sapaini, ato papipatadoen ko tao to niyah a misaˈosi hokira.
TATANO MASAMAANAY A HARATENG MICANGACANG TO SAPAINI?
11-12. (1) Micangacang to sapaini no tao i, hamaan paira kita to masamaanay a harateng? (2) Tahasiˈayaw to masakalimlaan a sasaˈosien i, samaanay ko demak ni Rihopoam hani?
11 Nolatekay, o cecay tamdaw hato micangacangay to sapaini, kawra masaˈosiayto ko falocoˈ ningra. Sapitengilaw aca to pihaday no tao, cowa ko mikifalocoˈay a micangacang to sapaini no tao. Ano kitato i, cowa ka ngaˈay mahaen ko pinangan a micangacang to sapaini. Nengnengen ko tinakoan no Hongti ci Rihopoam.
12 Mikotay ci Rihopoam to wama ci Solomonan mala hongti no Israil i, macowatay ko kitakit a cihafay, kawra o tamdaw itiya ˈaretengan nanay to sapafeli ni Solomon a ˈinorong. Mikilimay cangra ci Rihopoam a papiˈesal cingranan to ˈinorong nangra. Hananay ni Rihopoam a mifanaˈ cangra, misaaliay to toki ko niyah a miharateng. I satapang ngaˈayayho ko midemakan ningra, mikiliman ningra koya midamaay ci Solomonan a sikawdan micangacang to sapaini. (1 Hongti 12:2-7) Ka adayayan i, cowa ka cadaen ningra ko sapaini no matoˈasay. Misamaanay hani? Na maherekayto ci Rihopoam misaˈosi to sasamaan ko demak, sakafanaˈaw aca to iraay ko pihayda a tamdaw hokira? Ano mahaenay a harateng ningra i, oya kalacafayay cingranan molahad a kapah a sapaini, maedeng matatodongay to harateng ningra. (1 Hongti 12:8-14) Midoedoan ni Rihopoam ko sapaini noniya kapah a pacaˈof to finawlan ikor, ˈalomanay ko misafelitay cingranan, telocto i, malalicinowasayto ko kitakit. Ikorto i, padadotocay ko pades ni Rihopoam.—1 Hongti 12:16-19.
13. Sasamaan mafanaˈ to matatodongay ko harateng no niyah hani?
13 Mikitini i nalifetan ni Rihopoam mamananam ita ko manan hani? Papairaen ko matatodongay a harateng a micangacang to sapaini. Sasamaan a mafanaˈ to matatodongay ko harateng no niyah hani? Ngaˈayay licayen ko niyah: “Ano o sapaini no tao cowa ko kaolahan no mako, wa tangsol han ako a milalang han?”
14. Tahatengil kita to sapaini no tao i, haharatengen ko manan hani? Patinakoen a mitadtad. (Nengnengen ko coka.)
14 Nengnengen ita ko cecay tinakoan. O cecay faˈinayan salikaka iraay ko katayalan, soˈliˈlin ˈakawangay ko lifon, kawra halafin a malaliyas to paro no lomaˈ. Mikiliman noniya faˈinayan salikaka ko malohemay malitengay malalengo toniya demak, misalalangian no malohemay malitengay ko safalod no Fangcalay Cudad patalipaˈelal toniya faˈinayan salikaka, sakakaay ˈinorong no tawki no lomaˈ i, mamidimokos to nafalocoˈan a saali no paro no lomaˈ. (Ifiso 6:4; 1 Timoti 5:8) Kawra, cowa ka kahi koniya faˈinayan salikaka micada to sapaini no malohemay malitengay. Ikor ˈalomanay ko milicayan ningra i kasakopang, tahira iraay ko tamdaw mihayi cingranan micada tora tayal. Oniya faˈinayan salikaka soˈlinay micangacang to sapaini, anca masaˈosiayto i falocoˈ ningra, o pikilim aca to pihayda no tao hokira? Haratengen, misafakofakoay ko falocoˈ ita. (Yirimiya 17:9) Nolatekay, cowa ko kaolahan no mita a sapaini, tada o saali kora.
Soˈlinay a micangacang kita to sapaini han? Anca misaaliay to sapihayda no tao han? (Nengnengen ko saka 14 fatac)
HANO AKA PAPISAˈOSIEN KO TAO TO NIYAH HANI?
15. Aka midemak kita to manan a raraw? Misamaanay?
15 Isaˈayaway a fatac malengoayto, ˈayaw no hamamisaˈosi i, nengnengen ko Fangcalay Cudad hanaca licayen ko matenesay a Krisciyang. Roma i, papipatadoen ko tao a misaˈosi kitanan aka mihaen to demak. Tinakoen, o roma tamdaw alatek milicayay to pakasoˈlinan nangra a tamdaw: “Ano o kako kiso i, sasaman ko demak iso hani?” O roma tamdaw alatek cowa ka pisaharaterateng, maˈaraw ko tao to samaanay ko demak i, todong sanay a midemak. Haratengen, kita o kahacecay tamdaw oha mamitamorong to ˈinorong no niyah, o niyah ko hamamisaˈosi.—Kalatiya 6:4, 5.
16. Pakayni to na mipatafangan to samiyay a titi, i Korintoay a Krisciyang tahalifaay to manan a demak hani? Pakayni to sakakomaenaw to mahaenay a titi, o cima ko hamamisaˈosi hani? (1 Korinto 8:7; 10:25, 26)
16 Nengnengen ko cecay tinakoan. Isaka 1 hahekalan, o roma mipaˈacaan i icifa a titi i, alatek nano mipatafanganto to samiyay. Ngangaˈay komaen ko Krisciyang to mahaenay a titi han? Pakayni toniya salicay, hananay ni Pawlo ko Korinto kasakopang a salikaka pasowal: ‘Mafanaˈay kita to samiyay cowa ka samaan, mafanaˈayho to cecayay aca ko soˈlinay a Kawas.’ (1 Korinto 8:4) Misalalangian toniya demak i, o roma tamdaw sanay a miharateng, o mipaˈacaan i icifa a titi i, soˈlin na mipatafanganto to samiyay, wa ngaˈay a komaen sanay. O roma tamdaw cowa ka kahi komaen to hatiniay a titi, ano eca i, macariraway ko makapahay falocoˈ nangra. (ˈOsien ko 1 Korinto 8:7; 10:25, 26.) Ano komaento anca cowato i, o niyah ko misaˈosi tonini. Ci Pawlo cowa paini to i Korintoay a Krisciyang a patado to tao a misaˈosi, cowa paini cangranan a mitodong to saˈosi no tao. Cangra i, ‘wa pakayni i demak no niyah a patorod i Kawas.’—Loma 14:10-12.
17. Hano caka ngaˈay mitodong to pisaˈosi no tao a midemak hani? Tinakoen a mitadtad. (Nengnengen ko coka.)
17 Alatek wa masiˈayaw ita ko mahecaday a pakayraan, tinakoen o kahacecay a Krisciyang wa misaˈosi ko niyah toha mamicada to midiyosan i remes a dafong.c Soˈlin o milingatay to sifanaˈ no ising cowa ka dolo a cipinang maemin, kawra o niyah ko hamamisaˈosi, samanen o kakalaˈed ita aci Yihofa o niyah a ˈinorong konini. (Loma 14:4) Ano todong han ita ko pisaˈosi no tao a midemak, wa cowato ko malo citanengay a tamdaw kita. Ano todongen ita ko Fangcalay Cudad a misaˈosi ngaˈ, ngaˈay palahad to pafafidaˈay a inaneng. (Hipray 5:14) Sasamaan ko demak hani? Ihacowa a tatokian micangacang to sapaini hani? Isalakat mikilim kita to lalakaw, ikor ngaˈ licayen ko matenesay a Krisciyang, itini to mahaenay pakayraan sasamaan misakadademak to safalod no Fangcalay Cudad.
Talaˈayawho kita mikilim to lalakaw, ikor ngaˈ micangcang to sapaini (Nengnengen ko saka 17 fatac)
SAˈICELEN MICANGACANG KO SAPAINI
18. Hano mafanaˈ kita to o ciolahay a Wama ci Yihofa hani?
18 Pakasoˈlinay ci Yihofa kitanan, ho ngaˈay ko niyah a misaˈosi. Sapipadamaaw kitanan citaneng ko pisaˈosi i, pafelian Ningra kita to Kimad Ningra o Fangcalay Cudad, pafeliayho kitanan to matenesay a widang, padama kitanan misakadademak to safalod no Fangcalay Cudad. Adihayay ko midemakan Ningra kitanan, tada o ciolahay a Wama! (Taneng 3:21-23) Sasamaan kita paihkal to miakoˈiday a falocoˈ Cingranan hani?
19. Misamaan ko demak ita ngaˈ pakahemek ci Yihofaan hani?
19 Haratengen, o Krisciyang a wama wina i, makalimay padadotoc lomahad ko wawa no niyah, palahad to misimsimay a harateng, malo citanengay ko demak a tamdaw. Malecaday ci Yihofa hinatala kitanan. Mihaenay, nanay misaˈicel kita micangacang to sapaini, halo citaneng ko pisaˈosi. Mihaen ngaˈ malo o matenesay a Krisciyang kita, ngaˈay pakahemek ci Yihofaan.
RADIW 127 Nanay O Kaolahan Iso Kako
a I Fangcalay Cudad, nolatekay o “sapaini” ato “sapalimoˈot” (sapirikec) malecaday. Itini toniya lalakaw ato dotoc a lalakaw, oniya tosa tilid malecaday ko tatodong.
b Ano misiˈayaw iso a pasangar milingatay to kicay, paisingay a demak, alatek mamikilim kita to cowa ko salikaka a tamdaw micangacang to sapaini.
c Sakapinangaw to adihayay i, nengnengen ko Layapen ko Midaˈocay ˈOrip! saka 39 fedengan saka 5 kalimlaan ato “Malalitingay a Lalakaw”
d TATODONG NO COKA: I saˈopo no malohemay malitengay, o cecey malohemay malitengay cowa ka ngaˈay ko sasowalen. Ikor, o cecay kaemangay a malohemay malitengay mirikecay cingranan.