NALIFETAN NO TAMDAW
‘Pakalowid ato Mapadikay no Kalalood Sahtoay Itiniay ci Yihofaan’
2010 miheca saka 1 folad 28 romiˈad, oya lietecay o kasienawan a romiˈad. Tahiraayto kako i Frans makapahay hato o coka a maci, o Steraspaw. Kawra, o katayni ako cowa ko miliwkoay, ao malacafayay to roma faˈinayan salikaka tayra i Fadangalan no Tamdaw a Hoing i Iwropa, paˈading to Misawacayay Tamdaw ni Yihofa. O lalangian noniya pipaˈading i, o saali no sifo no Frans mamipasata to 6,400 efan payci no Iwropa ko Misawacayay Tamdaw ni Yihofa. Oha pakalowid kita toniya paˈading, misawacay to cowa ka matatodong ko saali no sifo no Frans. Coko no payci aca a demak, o masakalimlaan i, milingatay to fangcalay ngangan ni Yihofa koni, ato ngangan no finawlan Ningra ato midokoay a demak. Mafekaday i saˈopo no hoing a demak paihakalay, ‘pakalowid ato mapadikay no kalalood sahtoay itiniay ci Yihofaan.’ (1 Samuil 17:47) Nohatini, pasowalen ako kamo toniya demak.
1999 miheca, misaaliay ko sifo no Frans to Misawacayay Tamdaw ni Yihofa a fenpo i Frans, pakayni to 1993-1996 miheca macadaay niyam a sapakiyaho o papasataen sanay. Itini kami i Frans pasayni i hoing a mipaˈading, kawra cowa ka sadafdaf ko pisawkit. Mapadikay kami i saˈakawangay a hoing ikor, o sifo no Frans mialaay to payci no fenpo naitini i kingko, mataˈlifay ko 450 efan a payci no Iwropa. O salikorayto ita a harateng i, misingsiay kami to Fadangalan no Tamdaw a Hoing i Iwropa a mipaˈading. ˈAyaw no pisawkit, misaaliay ko Fadangalan no Tamdaw a Hoing i Iwropa tamiyanan, ato sifo no Frans mirienang to saˈopo no hoing. O misikayay toniya saˈopo a tamdaw i, o Fadangalan no Tamdaw a Hoing i Iwropa ko miocoray, o araaw i, ˈayawho no pisawkit i, oha malaliˈay to lacongis.
Maharatengay niyam o Fadangalan no Tamdaw a Hoing i Iwropa wa miroero tamiyanan, papipasata tamiyanan to pina a payci. Kawra ihkalay kita a cipinang, ano cecayay aca a payci no Iwropa ko sapasata, misafelitay koni to safalod no Fangcalay Cudad. O sapakiyaho no salikaka pakayni midama to Kitakit no Kawas, mansa oniya payci coko han no sifo. (Matay 22:21) Soˈlin mahaen i, kangodoen niyam ko hoing, kamayan kami mirienang toniya saˈopo no hoing.
2010 miheca, o kapot no holic niyam i kaˈayaw no Fadangalan no Tamdaw a Hoing i Iwropa a pasasing
Oniya saˈopo no hoing itiniay i Fadangalan no Tamdaw a Hoing i Iwropa makapahay a kasaˈopoan a malalengo. Mahecaday to miharatengan niyam, isalakat o taypiyaw no Fadangalan no Tamdaw a Hoing i Iwropa sanay, papipasata to Misawacayay Tamdaw ni Yihofa to pina payci pafeli to sifo no Frans. Fahal sanay maharateng niyam ko cecay salicay: “Mafanaˈay kiso han? O sifo no Frans mialaanto nangra ko 450 efan a payci no Iwropa niyam i kingko!”
Macekiday cingra minengneng to fingkosi no sifo, mihayiay cangra iraay ko hatiniay a demak. Ikor, taˈangayayto ko kafalic no waywayan ningra. Pakidemay cingra mirikec cangranan, hanaca tangsol sa mihererek toniya saˈopo no hoing. Itiyato i, mahapinangay ako, padamaan ni Yihofa koniya demak, tano cowa ka harateng niyam a pakayraan mifalic toniya demak! Miliyas kami toniya kasaˈopoan i, tada matemeray ko falocoˈ niyam, cowa pakasoˈlin to mafekaday a demak isawni.
2011 miheca saka 6 folad 30 romiˈad, o pisayfang no Fadangalan no Tamdaw a Hoing i Iwropa malowidayto kami. Milasilay ko hoing misaaliay ko sifo no Frans tamiyanan a pasata o mararaway, halo misaaliho cangranan patikol to mialaan a payci niyam, ato pafeli to wawa no payci! Oniya masakalimlaan a sayfang, tahanini i, kamayan a madipot ko Misawacayay Tamdaw ni Yihofa itini Frans mirienangay to matatodongay pidoko a fadangalan. Oya fahal sanay maharatengay niyam a salicay, mahecaday masetiˈay to ˈatongol ni Koliyat a fakeloh, mafalicay ko pisayfang a pakayraan. Hano pakalowid kami hani? Mahecad to sowal ni Tafiti ci Koliyatan: ‘Pakalowid ato mapadikay no kalalood sahtoay itiniay ci Yihofaan.’—1 Samuil 17:45-47.
Cowa konini aca ko kalowidan ita i hoing. Soˈlin tahasiˈayaw to ciˈicelay a sifo ato pisafelit no kalo a pihakelongan, tahanini i, itiniay kita i 70 saˈakawangay a hoing no kitakitan ato koksay a hoing 1,225 ko pakalowidan ita i hoing. Oniya pakalowid madipotay ko adihayay a fadangalan no mita, tinakoen misingsian ita ko matatodongay ko holic a pihakelongan, wa ngaˈay a mitosil, cowa ka piriengan to no kitakit a lisin, ato cowa pacomod to remes.
Itiya i, itiniay kako i Niwyok no Padaka a Congpo no Misawacayay Tamdaw ni Yihofa a matayal, kawra hano tayra i Iwropa padama to misayfangay hani? I satapangen ako a pasowal!
MAFIYORAY NO FANEKFEKAY FALOCOˈ NO WAMA WINA
O wama wina ako ci Ciyawci aci Lusie o saka 12 rayray no Kiliyat Picudadan a sito. 1956 miheca, i Iciyopiya a matayal cangra i hofocan kako. Pangangan nangra kako ci Filip, oniya ngangan naitiniay i paratohay ci Filip a ngangan. (Dmak 21:8) Saka 2 miheca, Iciyopiya a sifo makecengay ko mitosilay a demak no Misawacayay Tamdaw ni Yihofa. Soˈlin kaemangayho kako itiya, kawra ihkalay a maharateng ko milimekay kami a midoko to Kawas. Itiya i, mahemekan nanay kako. Kawra kaadayayan i, malaplapay kami itini 1960 miheca.
1959 miheca, palafangay ko salikaka ci Nasen Nolo i paro no lomaˈ niyam, itiya mikilomaˈay kami itini Iciyopiya a Atis Apipa
Orato i, mikeridan no wama wina kako, o fafahiyan kaka ako ci Coti, ato faˈinayan safa ci Laysli minokay tayra i Padaka, itiniay i Kansas a Wicita hananay a maci maˈorip. O fafahiyan kaka ato faˈinayan safa, sahtoay itini i Iciyopiya a hofocen. Minokay tayra i Padaka ikor, o wama wina ako kamayan maolahay to mitosilay a tayal, iraayho ko fanekfekay a falocoˈ no mikiriwiˈay manilnil mitosilay. Midoedoan nangra ko soˈlinay kimad a maˈorip, padamaayho tamiyanan a tatolo a wawa miharatengay to soˈlinay a kimad. 13 ko mihecaan ako mipaputisemayto. Ikor no tolo miheca, malinahay ko paro no lomaˈ niyam tayra i Arecipa no Milo, midama to itiraay a mitosilay tayal.
1974 miheca, 18 ko mihecaan ako i, macadaay ko sanilnil no fenpo no Milo, malacafay to sasepat faˈinayan salikaka malo mikiriwiˈay misakafahay. Maocoray kami tayra i Antis Lotok a mitosil, isaˈayaw awaayho ko tahiraay a mitosilay. O mitosilan niyam a tamdaw i, mahawpay ko somowalay to Keciwya a sowal, ato Aymara sowal a yincumin. Itiya i, miparakatay kami to taˈangayay a tosiya tayra icowacowaay a mitosil, ora tosiya malo o lomaˈ niyam. Panganganan niyam to “Tamina ni Nowa” kora tosiya, samanen hato taˈangayay a hako nengnengen. Maˈilolay kako to itiyaay makapahay nokaˈorip. Maceriday kami pasowal to ngaˈayay lihaf no Fangcalay Cudad to yincumin, mifanaˈ cangranan wa kaliki ci Yihofa palahdaw to nikaw, adada ato patay. (Paˈarawan 21:3, 4) ˈAlomanay ko itiraay a tamdaw, micadaay to ngaˈayay lihaf no Kitakit no Kawas.
1974 miheca, o “Tamina ni Nowa.”
TAYRA I CONGPO MATAYAL
1977 miheca, faˈinayan salikaka ci Aypote Selawte milisoˈay to Milo, o itiyaay a Malohemay Malitengay i Congpo a salikaka cingra. Pakalalokay cingra takowanan misingsi tayra i Congpo a matayal, mihaenanto ako ko demak. Toya miheca saka 6 folad 17 romiˈad, misatapangayto kako matayal itini Pitil no Prokelin. Dotoc a sepat miheca, itiniay kako i micingkiyatay a kapot ato mitomadaway a kapot matayal.
1979 miheca, mararamod toya romiˈad.
1978 miheca saka 6 folad, mirienangay kako to itiniay i Niwawliyang no Loisiana a koksay taykay, malitemohay ci Ilisapic Awaloni. Mahecad takowanan, o pakayniay i maolahay ci Yihofaan a wama wina ko palahaday ci Ilisapican. Itiya i, sepatayto miheca mala miceriday misakafahay cingra, hanaca makalimay cingra i hakelong no ˈorip miemin to toki matayal saki ci Yihofaan. Ikor no taykay, padadotocay kami mararinnak, caka halafin makakaolahay kami. 1979 miheca saka 10 folad 20 romiˈad, mararamodayto kami, misatapangay ci Ilisapic tayraay i Pitil matayal.
Mararamodto kami ikor, itiniay i Prokelin Sipanya sowal a kasakopang, tada maolahay ko itiraay a salikaka tamiyanan. Ikor, toloay ko mifalican niyam a kasakopang, ciharatengay ko kahacecay a kasakopang tamiyanan, midamaay to i Pitilay niyam a matayal. Miakoˈiday kami cangranan. Toniya pina miheca, maliteng malitengto ko wama wina niyam, misaaliay to adihayay sapadama, mansa miakoˈiday kami to padamaay tamiyanan a paro no lomaˈ ato widang.
1986 miheca, o Prokelin Sipanya sowal kasakopang a Pitilay salikaka.
MICOMOD TO KAPOT NO HOLIC
1982 miheca saka 1 folad, fahkaˈay kako maocor tayra i kapot no holic. Ikor no tolo miheca, mikeriday a salikaka halamhamay takowanan tayra i taykak, halo misiking to mingkiw no pingkosi. Itini picudadan no holic, fahkaˈay kako a mahapinang, itini Padaka ato romaroma kitakit, iraay ko roma pasalat no tamdamdaw, o pakayniay to Misawacayay Tamdaw ni Yihofa pakalowid to mipakokotay. I picudadan, malalengoay kami to pina masakalimlaan a sasawkit.
1986 miheca, manilnilay kako mala kantok no holic a kapot, 30 ko mihecaan ako itiya. Pakasoˈlinay ko likakawa takowanan, kalikoan ako koni, kawra pairaayho to taˈangayay saroero koni, samanen adihayayho ko demak to cowa ko kafanaˈan ako, o kafanaˈan ako i, oniya ˈinorong cowa ko madoloay a demak.
1988 miheca, malaˈosiay ako malo pingkosi. Kawra cowa ka hapinang ako, toniya pina miheca a sapakafanaˈ no taykak, maraay maraayayto ako ci Yihofa. O ˈakawangay a picudadan pairaay to maˈanofay misatakaraway a falocoˈ, hato ikakaayto ko inaneng ako to cowa ka picudad to taykak a tamdaw. O ngaˈayay i, patalipaˈelalay ko fafahi ako, itini sapadama ningra, patikol kako to ˈayaw no micudad to taykak i pidokoan a ngaˈayay nanaman. Soˈlin mapalakay ko toki, kawra miliyaway kako miingid ci Yihofaan. Mikitini to nalifetan no niyah mahapinangay ako, o epoc no ˈorip cowa pakayniay to nika adihay no sifanaˈ. Papairaen ita ko ngaˈayay noka kalalaˈed ci Yihofaan, tangongol ko olah Cingranan ato finawlan Ningra, mihaen ngaˈ ciepoc ko kaˈorip no mita.
PAKAYNI INO HOLICAN A PAKAYRAAN PATIRENG TO FADANGALAN A MITENAK TO NGAˈAYAY LIHAF
Micodiyapto kako itini picudadan no holic ikor, misamacayay mikerid to kapot no holic a tayal, pakayni i Pitil mihadak tono holic a sapadama. Misatapangay kako itini hoing paˈading to fadangalan no likakawa no Kawas. Iraay ko pasangar no tayal ako, samanen padadotocay macakat ko likakawa no Kawas, hanaca kaliki kalikiay ko nika falic. Tinakoen, halafinay a mihecaan, palilam kita to cudad i, wa pasowal to tamdaw pakiyaho to mimingay a payci, kawra i 1990 miheca, o Malohemay Malitengay i Congpo misatapangay mifalic to hatiniay a demak, halo mitahidang to kapot no holic to sapadama. Mikitiya misatapang, to emin a cudad cowato ka papaycien a palilam. O hatiniay a sapisalof midoloay to katayalan no Pitil ato i kilacay, padamaayho to likakawa misaysay to pasataay a demak. Itiya sanay ko roma tamdaw, cowa papayci palilam to cudad, salikor mamipalak to emin a payci no likakawa, miconged to kacakat no mitosilay a tayal, kawra cowa ka mahaen ko teloc. Mikitiya i 1990 miheca tahanini, padadotocay a matongal ko Misawacayay Tamdaw ni Yihofa. Anini, o tamdamdaw kamayan cowa ka papayci a micada to cihaleday to pakasoˈlinay falocoˈ a kakaenen. Toniya pina miheca, maˈaraway ako ko nika falic no likakawa. Mahapinangay ako, ano awaay ko sapafeli ni Yihofa a ˈicel, ato sakayat no madimadiay citanengay a koli i, o hatiniay a sasalof cowa ko mamalaˈosi.—Kasadakan 15:2; Matay 24:45.
Ngangaˈay kita misaliyaliyaw a pakalowid, cowa ko ˈicel aca no pingkosi. O hankang ato tapang no sifo maceriday pakaˈaraw to makapahay waywayan no finawlan no Kawas, makahiay a padama kitanan. Tinakoen, 1998 miheca, tatoloay Malohemay Malitengay i Congpo ato fafahi nangra mirienangay to kasapala taykay no Kopa. Madaˈmaˈay cangra a militemoh to tamdaw, paihkal to mikangodoay, oniya demak palahdawayto to pisakakinih no tapang no sifo to Misawacayay Tamdaw ni Yihofa. O makapahay waywayan nangra ikakaay to masasoˈaraw a sowal a ciˈicel.
Kawra nolatekay, ‘pakayni ino holican a pakayraan patireng to fadangalan a mitenak to ngaˈayay lihaf.’ (Filipi 1:7) Tinakoen, halafinayto a mihecaan, itini Koriya ato Iwropa a kitakit, cowa pihayda cangra tano makapahay falocoˈ a milalang mala sofitay a tamdaw, misingsi to roma pakayraan maladademakay no sifo. Telocto i, itini Koriya mataˈlifay ko 19,000 a faˈinayan salikaka mapalitay, itini Iwropa, 18,000 ko faˈinayan salikaka mapalit.
2011 miheca saka 7 folad 7 romiˈad, o Fadangalan no Tamdaw a Hoing i Iwropa itini Payateyang mipakokot to Arminiya midemakay to masakalimlaan a sasawkit, misaali to polong Iwropa a kitakit pakayniay i makapafay falocoˈ caka mala sofitay a tamdaw paira to mikotayay to sakalasofitay a pakayraan. 2018 miheca saka 6 folad 28 romiˈad, i Koriya a hoing mahaenay ko sasawkit nangra. Pakayniay i kodait no kapah salikaka pakalowidayto cangra, ano ira ko roma tamdaw misawad to misatenokay a pakayraan, awa ko hatiniay makapahay minaroˈan.
Sapipaˈadingaw to fadangalan no likakawa no Kawas i, i Congpo ato icowacowaay a fenpo a kapot no holic kamayan a malalok matayal. Icowacowaay a kitiraan i, iraay ko salikaka misafelitan no sifo, kalikoan no niyam itini hoing paˈading to fadangalan nangra. Ano misamaanto ko teloc no sapakokot, makapahay ko pisawacay ita itini cifadangalay a mikowanay ato ˈalomanay. (Matay 10:18) Ano paˈading kita itini i hoing i, misakadademakay kita to Fangcalay Cudad, o sapafeli ita a lalakaw mahawpay ko sinael, mansa o hankang, dademakay no sifo, o sinfon ato ˈalomanay tamdaw iraay ko hatoki cipinang to lihaf no Fangcalay Cudad. Roma i, iraay ko hatoki no tamdamdaw mafanaˈ to Misawacayay Tamdaw ni Yihofa, cipinang to lalangian no pihakelongan no mita. O roma matatodongay waywayan a tamdaw malo salikakaayto no mita!
AKOˈIDAY, YIHOFA!
Itini toniya 40 a miheca, malikoay kako kalacafay to icowacowaay a fenpo a salikaka matayal, misaysay tono holic a demak, iraayho ko kalikoan ako itini adihayay ˈakawangay a hoing ato kaˈayaw no sifo a tapang paˈading to fadangalan no finawlan no Kawas. Masemeray kako to i Congpoay ato i fenpoay itini kapot no holic matayalay a salikaka, maolahay kako cangranan. Miakoˈiday kako ci Yihofaan pafeli to adihayay a sapalemed, ciepoc ko hakelong no ˈorip no mako.
O fafahi ako ci Ilisapic toniya 45 miheca i tatihi ako malacafay, milifetay to mahemekay ato marorayay i nokaˈorip. Adadaay cingra, awaay ko ˈicel a malonay, kawra kamayan madimadiay a midama takowanan, tada miakoˈiday kako cingranan.
Matinakoay no niyam, tadiˈecen ko ˈicel no niyah cowa ko papakalowid. Mahecad to sowal ni Tafiti: ‘Ci Yihofa o ˈicel no finawlan Ningra.’ (ˈOlic 28:8) Soˈlinayto, ‘pakalowid ato mapadikay no kalalood sahtoay itiniay ci Yihofaan!’