Samaanay ci Yihofa Padama Kitanan Padadotoc Mihadidi

1. Misamaanay hano mamihadidi kita hani? Cima ko papadama kitanan? (1 Pitiro 5:10)

ITINI toniya salikoray a romiˈad, mamihadidi ko finawlan ni Yihofa. Misamaanay hani? O roma tamdaw halafinayto a adada, o roma i, mapatayay ko salawina, anoca tahalifaay to pisafelit no paro no lomaˈ anca saroeroho no sifo. (Matay 10:18, 36, 37) Kawra, hamaan a calemcem, ano o mananto ko masiˈayaway iso a pasangar i, papadamaen ni Yihofa kiso a mihadidi.—ˈOsien ko 1 Pitiro 5:10.

2. O Krisciyang hano ngaˈay padadotoc mihadidi hani?

² O mihadidiay hananay i, ano tahalifa ko tamdaw to saconged, saroero, sapalifet anca sakayhid, kamayan matomes ko hatokel, kodait a mihadidi. Ngaˈay padadotoc ko Krisciyang a mihadidi, cowa ko mitiˈeray to niyah, ao mitiˈeray ci Yihofaan, samanen papafelien Ningra kita to ‘kasapaan a ˈicel.’ (2 Korinto 4:7) Oniya lalakaw mamilengo to sepatay nai ci Yihofaan a sidaˈit, wa ngaˈay padama kitanan padadotoc a mihadidi, mamilengoho to sasamaan kita misakadademak toniya sidaˈit.

MITOLON

3. O satolon hano o kasapaan sidaˈit hani?

³ O mitolonay o sapafeli ni Yihofa kitanan a kasapaan sidaˈit, padama kitanan padadotoc mihadidi. Soˈlin o ciraraway a tamdaw kita, kawra makahiay ci Yihofa mitengil to sowal ita, paira to halalan ita masasowal Cingranan. (Hipray 4:16) Haratengen hena, ano ihacowa a tatokian, tano masamaanay a sasowalen, ngangaˈay kita pakayni i kihcod a demak mitolon ci Yihofaan. Ano icowato kita, ano cecayto anca marofoay i kapalitan, matengilayto ni Yihofa ko satolon ita. (Yona 2:1, 2; Dmak 16:25, 26) Soˈlin tada macariraway kita, hato fokil sanayto sasamaan pasowal to nafalocoˈan no niyah itini i satolon, kamayan cipinang ci Yihofa to manan ko sowal ita. (Loma 8:26, 27) O satolon soˈlinay o sapafeli ni Yihofa kitanan a kasapaan sidaˈit!

4. Micangacang kita ci Yihofaan padama kitanan padadotoc mihadidi, mihaen ko demak hano matatodongay to araaw Ningra hani?

⁴ Itini Fangcalay Cudad mikiˈokay ci Yihofa kitanan, ‘ano doedoen ita ko araaw Ningra micangacang to manamanan, oha tatengilen Ningra ko sowal ita.’ (1 Yohani 5:14) Mihaenay, ngangaˈay kita micangacang ci Yihofaan padama kitanan padadotoc mihadidi han? Ngaˈayayto! Mihaen to demak matatodongay to araaw Ningra. Hano haenen ko sowal hani? Sanay ci Yihofa, ano itini sapalifet padadotoc mihadidi kita, oha ngangaˈay Cingra pacaˈof to pilikaf ni Akoma Satan Cingranan. (Taneng 27:11) Roma i, sanayho ko Fangcalay Cudad, makalimay ci Yihofa ‘misakadademak to ˈicel padama to misarocoday madimadi Cingranan a tamdaw.’ (2 Rayray 16:9) Mihaenay pakasoˈlinen ita, iraay ko ˈicel ato kalim ni Yihofa padama kitanan padadotoc mihadidi.—Isaya 30:18; 41:10; Luka 11:13.

5. O satolon hano papadama kitanan milifok to sakarihaday no falocoˈ hani? (Isaya 26:3)

⁵ O sowal no Fangcalay Cudad, ano pakayniay kita i pasangar no niyah a mitolon micangacang to Kawas, ‘papafelien no Kawas to mataˈlifay to maharatengay no tamdaw a rihaday,’ o mahaenay a rihaday mamidipot to falocoˈ ato ponoˈ no mita. (Filipi 4:7) O mahaenay a rihaday tada masakalimlaan, cowa ko tano niyah a pakayraan a malifokto. Haratengen hena, ˈalomanay cowa pidoko to Kawas a tamdaw tahalifa to pasangar i, tatano masakenakenaay a pakayraan cangra sapilifokaw to rihaday no falocoˈ. Kawra mihaen to demak o masakatalawanto, samanen ano mihaen ko demak madoloayto a mafiyor ni Satan ko ponoˈ. (Nengnengen ko Matay 12:43-45.) Kawra, ano masamaanto ko pasangar, mitolon kita ci Yihofaan, misarocod a mitiˈer Cingranan, mamilifokto to mikiˈokan Ningra pafeli to tamdaw a ‘midaˈocay a rihaday.’ (ˈOsien ko Isaya 26:3.) Alatek padamaen ni Yihofa kita maharateng ko roma a sinael. Oniya sinael wa patalipaˈelal kitanan, ciharatengay ci Yihofa kitanan, makalimay padama kitanan. Maharateng koniya mihinomay to falocoˈ no tamdaw a sowal, cowato ko cacariraw kita, wa irato ko soˈlinay a rihaday.—ˈOlic 62:1, 2.

6. Sakaciepocaw no satolon i, sasamaan ko demak iso hani? (Nengnengen ko coka.)

⁶ Sasamaan ko demak iso? Mihadidi to sapalifet i, ‘patoroden ko karetengay a ˈinorong ci Yihofaan,’ cangacangen Cingra pafeli tisowanan to rihaday. (ˈOlic 55:22) Roma i, tolonen Cingra pafeli tisowanan to taneng, ho mafanaˈ kiso to sasamaan a miremo to masiˈayaway a pasangar. (Taneng 2:10, 11) Cowa aca ko pingitangit to Kawas, i satolon mamiakoˈidho Cingranan. (Filipi 4:6) Kilimen ko sapadama ni Yihofa tisowanan a wacay, halo pakayni toniya demak a miakoˈid Cingranan. Aka papiapohen ko sapalifet to mata a misakahmaw to sapafeli ni Yihofa a sapalemed.—ˈOlic 16:5, 6.

O KIMAD NO KAWAS

7. Mikingkiw to Fangcalay Cudad hano papadama kitanan a padadotoc mihadidi hani?

⁷ O Kimad no Kawas Fangcalay Cudad papadama kitanan padadotoc a mihadidi, samanen adihayay ko sinael a misawacay kitanan, wa damaen ni Yihofa kita. Nengnengen ko cecay tinakoan, itini Matay 6:8 sanay ci Yis: ‘Cowaho ka picangacang kamo, o Wama namo mafanaˈayto o manan ko saali namo.’ Ci Yis mikikakaay to cimaanan a cipinang ci Yihofaan, mansa o sowal ni Yis padamaay kitanan a pakasoˈlin, ano misiˈayaw to pasangar i, cipinangay ci Yihofa to o manan ko saali no mita, papadamaen Ningra kita. I Fangcalay Cudad adihayay ko mahaenay a sowal ni Yihofa, oniya sakiˈok wa paˈicel to pisetek no falocoˈ ita, padama kitanan padadotoc a mihadidi.—ˈOlic 94:19.

8. (1) Patinakoen a mitadtad, o manan a safalod no Fangcalay Cudad papadama kitanan padadotoc a mihadidi? (2) Sasamaan ko demak ita ngaˈ, wa madoloto pakaharateng to safalod no Fangcalay Cudad hani?

⁸ O safalod no Fangcalay Cudad mahawpay ko ciepocay a taneng, ngaˈayay mikayat kitanan citaneng ko pisaˈosi, padama kitanan padadotoc a mihadidi. (Taneng 2:6, 7) Tinakoen, pakalalokay ko Fangcalay Cudad kitanan, misarocod maˈorip to romiˈamiˈad, aka a pakidem macariraw to noikoran a demak. (Matay 6:34) Ano palahad kita to ngaˈayay a nanaman, misongilaˈ a mikingkiw toniya sinael hanaca malalok a midotim, ano ira ko saali i, wa madoloto pakaharateng kita toniya safalod.

9. Mikingkiw to maˈoningay i Fangcalay Cudad samaanay padama kitanan?

⁹ Miˈoningayho ko Fangcalay Cudad o roma tamdaw samaanay mitiˈer ci Yihofaan, ato samaanay milifok to sapadama Ningra. (Hipray 11:32-34; Yakop 5:17) Midotim kita toniya maˈoningay wa pakasoˈlinto kita, ci Yihofa ‘o pikiˈadingan no mita, o ˈicel no mita; tahalifa kita to pasangar i, oha mamilifok to sapadama Ningra.’ (ˈOlic 46:1) Roma i, midotim to demak noniya madimadiay sikawdan ngangaˈay pakalalok kitanan mitodong cangranan, i pasangar paihkal to pakasoˈlinay falocoˈ, padadotoc a mihadidi.—Yakop 5:10, 11.

10. Sakaciepocaw i Kimad no Kawas, sasamaan ko demak iso hani?

¹⁰ Sasamaan ko demak iso? ˈOsien ko Fangcalay Cudad to romiˈamiˈad, hanaca tiliden ko sakaciepoc tisowanan a sinael. Ngaˈayay kiso to papacem miˈosi to pakaromiˈaday a sinael, mihaen i, wa misaromiˈad kiso mapakalalok no Fangcalay Cudad. Ciepocay koniya pakayraan sanay ko ˈalomanay tamdaw, mahaenay ko tinakoan no fafahiyan salikaka ci Mari.a Mihimaway cingra to ciadadaay to ekang a wama wina, tahira i kapatayan nangra, itiya toya tatokian i, samaanay ko demak ningra hani? Sowal sa cingra: “To romiˈamiˈad a papacem miˈosiay kako to Romiˈamiˈad Miasip a Midotim to Sinael, halo misongilaˈ a midotim. Padamaay takowanan a misamacay i ci Yihofaan ato sapakafanaˈ Ningra a kalimlaan soˈlinay kimad, cowa ka haharateng sa to niyahan ato pasangar no niyah.”—ˈOlic 61:2.

SALIKAKA

11. Misamaanay ci Yihofa pakayni i salikaka padama kitanan padadotoc a mihadidi?

¹¹ Pakaynian ni Yihofa i polong kasacefang no salikaka padama kitanan padadotoc a mihadidi. Tahasiˈayaw kita to pasangar i, maharateng ita ko polong a salikaka ‘tahalifaay to malecaday a pades,’ cowato ka hato awaay ko tatiˈeren ita a matoˈol. (1 Pitiro 5:9) Ano o mananto ko masiˈayaway ita a pasangar, wa ngaˈay pakasoˈlinen, iraay ko salikaka tahalifaay to hatiniay a sapalifet, hanaca madimadiay itini i sapalifet. Paihkalay konini, oha ngangaˈay kita padadotoc a mihadidi!—Dmak 14:22.

12. Sasamaan ko salikaka padama kitanan hani? Sasamaanen ita padama cangra hani? (2 Korinto 1:3, 4)

¹² Papakalaloken no salikaka kita, padama kitanan padadotoc a mihadidi. Tarokos ci Pawlo iraay ko hatiniay a nalifetan, mapalit cingra i, pakalalokay a mihinom ko salikaka cingranan, midimokosayho to kaˈorip ningra. Tada miakoˈiday ci Pawlo cangranan, halo i tikami masowalay ko ngangan nangra a maemin. (Filipi 2:25, 29, 30; Kolosay 4:10, 11) Anini mahecadayto, tahasiˈayaw kita to sapalifet i, wa pakalalok ko salikaka a mihinom kitanan; ano misaali cangra to sapadama i, wa padamaen ita cangra.—ˈOsien ko 2 Korinto 1:3, 4.

13. O manan ko padamaay to fafahiyan salikaka ci Mayaan padadotoc mihadidi?

¹³ Itiniay i Rowasiya a fafahiyan salikaka ci Maya naitiniay i salikaka tahacada to sapakalalok. 2020 miheca, maniknikay ko lomaˈ ningra a mikinsa, ikor pakayniay cingra i paladaˈ to tao to ngaˈayay lihaf no Fangcalay Cudad a maliclic. Sanay ci Maya: “To cecay a liyad, tada marorayay ko falocoˈ ako, patingwaay ko salikaka, patikami takowanan a mifanaˈ to maolahay cangra takowanan, mafanaˈayto kako itiniay kita i ciolahay a taˈangayay paro no lomaˈ, ikor no 2020 miheca i, matongalay ko pakasoˈlin ako tonini.”

14. Sasamaan ko demak ita, ngaˈ milifok to sapakalalok no salikaka hani? (Nengnengen ko coka.)

¹⁴ Sasamaan ko demak iso? Ano misiˈayaway kiso to sapalifet, aka a piraay to salikaka. Ceriden kalacafay cangra, hanaca kalikien mikilim ko malohemay malitengay a micangacang to sapadama nangra, samanen o ‘pikiˈadingan to faliyos ato ˈorad a kitiraan’ cangra. (Isaya 32:2) Roma i, ngaˈayay kiso padama toya misiˈayaway to mahecaday pasangar a salikaka, mihaen wa padama tisowanan padadotoc a tawlik, tano matatodongay harateng ko pinengneng to pasangar no niyah.—Dmak 20:35.

SAPAFELI NO KAWAS A HATOKEL

15. Hanoikor a hatokel samaanay a padama ci Yisan? Samaanay padama kitanan hani? (Hipray 12:2)

¹⁵ Pafelian ni Yihofa kita to tanoktokay a hatokel, padama kitanan padadotoc a mihadidi. (Loma 15:13) Haratengen, samanen iraay ko hatokel ni Yis, mansa ngaˈay cingra mihadidi to pakidemay a sapalifet. (ˈOsien ko Hipray 12:2.) Mafanaˈay cingra ano madimadi ko niyah, wa ngaˈay paˈdil to fangcalay ngangan ni Yihofa. O roma i, fanekfekay a hinatala cingra miliyaw a malacafay to ikakarayanay a Wama, ato ikakarayan a Kitakit no Kawas kalacafay to salikaka ningra a mala Hongti. Mihaenay, o sapafeli no Kawas kitanan a hatokel o manan hani? Itini faelohay a likakawa no Kawas tahadaˈoc a maˈorip. Nohatini ano o mananto ko macadaay ita a sapalifet toniya hekal ni Satan i, ano pairaen ita ko hatiniay a hatokel, wa irato ko ˈicel padadotoc a mihadidi.

16. Sapafelit ni Yihofa a hatokel samaanay padama to fafahiyan a salikaka padadotoc a mihadidi? Mikitini i sowal ningra mananamay iso ko manan hani?

¹⁶ O fafahiyan salikaka ci Ayla itiniay i Rowasiya, malepetay ko faˈinay ningra, hanaca ˈayaw no pisawkit i mapalitayto. O faelohay hekal a makapahay hatokel samaanay padama cingranan. Sanay ci Ayla: “Mitolon ato midotim to noikoran makapahay a hatokel, padamaay takowanan miremo to matoleday a harateng. Pakasoˈlinay kako to wa ngaˈayto ko hanoikoran a demak, salikor o papakalowid kita aci Yihofa.”

17. Sasamaan ko demak ita ngaˈ, paihkal to misalimlaay kita to sapafeli ni Yihofa a hatokel? (Nengnengen ko coka.)

¹⁷ Sasamaan ko demak iso? Palaken ko toki a miharateng to sapafeli ni Yihofa kitanan a makapahay hatokel. Ngaˈay haratengen iso itini makapahay lakoing ko niyah, malacafay to ngaˈayay widang ato salawina milayap to kasemeran nokaˈorip. Palalinien to sapalemed no ikor, o malifaay ita nohatini a pasangar sahtoay o ‘kahmaway cecayay aca a liyad.’ (2 Korinto 4:17) O roma i, mamisaˈicel kita paladaˈ to tao to mikiˈokan no Kawas. Haratengen hena, cowa ka pidoko ci Yihofaan a tamdaw marorayay ko kaˈorip nangra! Mahecaday cangra kitanan maˈorip i hekal ni Satan, adihayay ko masiˈayaway a pasangar, kawra cowa ka fanaˈ cangra to sapafeli ni Yihofa a makapahay hatokel. Alatek kantangay aca tano pina a sowal kiso, mamikidat to sakafanaˈaw nangra, sakacipinangaw to sapafeli ni Yihofa a makapahay hatokel.

18. Misamaanay hano pakasoˈlin kita to mikiˈokan ni Yihofa hani?

¹⁸ Malaˈosiayto mihadidi to adihayay a sapalifet ikor, hananay ni Yopu ci Yihofa: ‘Nohatini mafanaˈayto kako o malefotay ko ˈicel Iso, o dademaken Iso a demak, malaˈosiay a maemin.’ (Yopu 42:2) Mahecad to sowal ni Yopu, awaay ko manan a demak to hamamiconged ci Yihofaan palaˈosi to mikiˈokan Ningra. Pakasoˈlin tonini a demak i, wa irato ko ˈicel ita padadotoc a mihadidi. Patinakoen, adadaay ko cecay a tamdaw, adihayay ko mikiliman ningra a ising, cowa ka adah ko adada ningra, teloc i, matoleday ko falocoˈ ningra. Kawra ikorto i, iraay ko cinalifetan ngaˈayay tiˈeren a ising, mahelaayto ko lalangian no adada ningra, mifanaˈay to sasamaan cingra miadah, tangsol sanay mahepolto ko ˈinorong ningra. Soˈlin cowa ka tangsol sa a maadah ko adada ningra, kawra nohatini iraayto ko hatokel ningra. Mafanaˈay cingra oha ngangaˈay a maadah ko niyah, mansa wa ngaˈayto padadotoc a mihadidi. Mahecaday toni, ano pakasoˈlin kita wa malaˈosi ko faelohay hekal no Kawas, ngaˈayto kita tahatolas a mihadidi.

19. Sasamaan ko demak ita ngaˈ tahatolas ko pihadidi hani?

¹⁹ Mikitini toniya lalakaw mananamay ita, sepatay ko sapafeli ni Yihofa kitanan a sidaˈit, ngaˈay padama kitanan padadotoc a mihadidi. Ano misongilaˈ kita mitolon, misongilaˈ miˈosi to Kimad Ningra, masasipakalalok to salikaka, pakayni hanoikor a hatokel ira ko tanoktokay a pakasoˈlinay falocoˈ, wa padamaen ni Yihofa kita miremo to kahacecay a pasangar, tahira i kalahdawan no hekal ni Satan ato pades a romiˈad.—Filipi 4:13.