Pakasoˈlinen to Maolahay ci Yihofa Tisowanan

1. Isalakat misamaanay hano misetek kiso to falocoˈ patafang ci Yihofaan? (Nengnengen ko coka.)

MAHARATENGAYHO iso isalakat hano mipatafang ci Yihofaan kiso hani? Mihaen ko demak kiso samanen mafanaˈayto kiso ci Yihofaan, matongal matongalay ko olah Cingranan. Itini satolon iso i, mikiˈokay to mamidofdof to araaw Ningra paisalakaten i no kaˈorip, mikiˈokayho to mamisarocod to falocoˈ, misarocod to harateng, misarocod to ˈicel, tano emin a ˈorip padadotoc maolah Cingranan. (Marko 12:30) Naitiya misatapang, o olah iso ci Yihofaan to romiˈamiˈad matongalay. Nohatini ano ira ko tamdaw milicay tisowanan: “Soˈlinay maolah kiso ci Yihofaan han?” Maedeng cowa ko cacisasa kiso a pasowal: “O kaolahan ako o ci Yihofa!”

2-3. Makalimay ci Yihofa kitanan pakasoˈlin to maanan hani? (Yirimiya 31:3)

² Kawra ano ira ko milicayay tisowanan: “Maolahay ci Yihofa tisowanan sanay kiso han?” O sapacaˈof iso wa cisasaho han? Harateng iso cowa ka citatodong ko niyah kaolahan ni Yihofa sanay han? Iraay ko fafahiyan salikaka cowa ka raheker ko kaemangan kaˈorip ningra, sanay cingra: “Mafanaˈay kako to maolahay kako ci Yihofaan, cowa ka cisasa kako tonini, kawra maceriday kako cisasa to soˈlinay maolah ci Yihofa takowanan.” Mihaenay, maolahay ci Yihofa tisowanan han?

³ Makalimay ci Yihofa pakasoˈlin kiso to maolahay Cingra tisowanan. Isalakat o ci Yihofa ko misolotay tisowanan tayra i tatihi Ningra. Ikor, mamipatafang mipaputisem kiso itiya i, pafelian Ningra kiso to cecay tada o masakalimlaan a sapatelong, oya madimadiay Ningra a olah. (ˈOsien ko Yirimiya 31:3.) O mahaenay a olah o tangongolay halafinay a olah. Mihaenay ci Yihofa to madimadiay Ningra a sikawdan to mahaenay a olah, mansa o pinengneng Ningra cangranan o ‘masakalimlaan a hafay.’ (Malaki 3:17) Mihaenay, o pinengneng Ningra tisowanan tada masakalimlaan. Tarokos ci Pawlo cowa ka cisasa to olah ni Yihofa cingranan, pakasoˈlinay cingra a pasowal: ‘Pakasoˈlinay kako, ano o patayto, maˈoripay, o coyohto, o sifoto, o aniniayto a demak, o noikoranto a demak, o ciˈicelayto, o ˈakawangay, o tangongolay, o masamaamaanay a masangaˈay, cowa ko papakaconged to olah no Kawas kitanan.’ (Loma 8:38, 39) Makalimay ci Yihofa tisowanan ira ko mahaenay a pakasoˈlinay falocoˈ. Oniya lalakaw mamilengo, hano paˈicel kita to mahaenay pakasoˈlinay falocoˈ, ato sasamaan ko demak ita.

HANO PAKASOˈLIN TO MAOLAHAY CI YIHOFA KITANAN

4. Sasamaan kita micoˈay to tatiihay halaka ni Satan hani?

⁴ Ano pakasoˈlin kita to maolahay ci Yihofa kitanan i, wa ngaˈayto micoˈay to ‘tatiihay halaka’ ni Satan. (Ifiso 6:11) Tano kihcod a pakayraan ci Satan papiliyas kitanan ci Yihofa. O cecay tatiihay halaka ningra i, miyakayakay to mangah a pasowal to cowa ka maolah ci Yihofa kitanan. Aka a matawal, o layong maceriday miˈodis to cowa ka ciˈicel a ˈaˈadopen, ano ci Satanto i, mahecaday, wa i kalonayan ita cingra a miˈodis kitanan. Ano mararom kita to nalifetan isaˈayaw i, ano marawraw no pasangar nohatini, anca macariraw to noikoran a demak i, wa miˈodisto cingra kitanan. (Taneng 24:10) Kawra ano haratengen ita to maolahay ci Yihofa kitanan, hanaca padadotoc a paˈicel to mahaenay a demak a pakasoˈlinay falocoˈ, wa irato ko ˈicel ‘tanektek tomireng a micoˈay’ ci Satanan ato tatiihay halaka ningra.—1 Pitiro 5:8, 9; Yakop 4:7.

5. Misamaanay hano cisaali kita to olah ni Yihofa kitanan, misalimla kitanan hani?

⁵ Pakasoˈlinay kita to maolahay ci Yihofa kitanan, wa ngaˈayto maingid Cingra. Hano mahaen ko sowal hani? Pafelian ni Yihofa kita to olah ato cisaaliay to olah. Ano macada ita ko olah i, ciharatengay tano olah a patikol to olah. Mansa, ano macada ita to maolahay ci Yihofa kitanan, misalimla kitanan, wa matongalto ko olah Cingranan. (1 Yohani 4:19) Ano matongal ko olah ita ci Yihofaan, wa matongal ko olah ni Yihofa kitanan, malecad to sowal no Fangcalay Cudad: ‘Ka piingid kamo to Kawas, aingiden no Kawas kamo.’ (Yakop 4:8) Mihaen i, sasamaan kita paˈicel to pakasoˈlinay falocoˈ, pakasoˈlin to maolahay ci Yihofa kitanan hani?

SASAMAAN KO DEMAK NGAˈ PAKASOˈLIN TO MAOLAHAY CI YIHOFA KITANAN

6. Sapakasoˈlinaw to maolahay ci Yihofa kitanan, sasamaan a mitolon hani?

⁶ Ihkalen ko satolon, ka padadotoc mihaen ko demak. (Luka 18:1; Loma 12:12) Ngaˈayay kiso to cecay romiˈad kinapinapina a micangacang ci Yihofaan a padama tisowanan, tano Ningra a noka pinengneng a minengneng to niyah. Manaokaniw, ano madoloay kiso miroroh to niyah, alatek wa pasangarto a micada to pinengneng ni Yihofa tisowanan. Kawra haratengen, o falocoˈ ni Yihofa mikikakaayto no miso. (1 Yohani 3:19, 20) Mikikakaay ko kacipinang Ningra tisowanan, o kangaˈayan iso alatek cowa ka ˈaraw no niyah, kawra maˈaraway ni Yihofa maemin. (1 Samuil 16:7; 2 Rayray 6:30) Mansa, pasayni kiso ci Yihofaan a ‘mihadak to nafalocoˈan,’ hanaca cangacangen Cingra padama tisowanan pakasoˈlin to olah Ningra tisowanan. (ˈOlic 62:8) Ikor, oha mamisakadademak kiso to mahecaday i satolon a waywayan, sakadademaken ko ilaenoay a sapaini.

7-8. O ˈOlic a sinael sasamaan padama kitanan paˈicel ko pakasoˈlin to olah ni Yihofa?

⁷ Pakasoˈlinen ko sowal ni Yihofa. Mikayatan Ningra ko miˈoningay to Fangcalay Cudad a tamdaw ihkalay a mitadtad to o masamaanay a Kawas Cingra. Ci Tafiti itiniay i ˈOlic tano mitemeray to falocoˈ no tamdaw a pakayraan a mitadtad ci Yihofaan: ‘Mamiingid ci Yihofa to makesemay mararomay ko falocoˈ a tamdaw, milidong to matoleday a tamdaw.’ (ˈOlic 34:18, ato roma pihongyak.) Ano matoled ko falocoˈ iso i, alatek awaay ko cipinangay tisowanan a tamdaw, wa saan a miharateng, awaay ko cimacima a tamdaw to papadama tisowanan. Kawra mikiˈokay ci Yihofa, i mahaenay a tatokian wa itini Cingra i tatihi iso, samanen mafanaˈay Cingra nohatini cisaaliay kiso to sapadama Ningra. Ci Tafiti itiniay i roma ˈOlic sanay a pasowal ci Yihofaan: ‘Nanay paroen Iso ko losaˈ ako i tafolod Iso.’ (ˈOlic 56:8) Tada ciharatengay ci Yihofa tisowanan, mafanaˈay Cingra to milifetan no miso, mafanaˈay to marorayay kiso a mararom. O kahacecay iso a losaˈ cowa ka matawal Ningra, cowa ka pisakahmaw minengneng tisowanan, mahecad to cecay tamdaw milakowit to tafotafokan, i tafoloday a kahacecay a teraˈ a nanom pakayni Cingranan tada o kalimlaan. Roma i, ˈOlic 139:3 sanay: ‘Kiso [ci Yihofa] mafanaˈay to kihcod waywayan no mako.’ Ano o mananto ko demak no miso, maˈarawayto ni Yihofa maemin, kawra o misinanotan Ningra i, o kangaˈayan a midemakan no miso. (Hipray 6:10) Pakayni sapipakahemekaw no miso Cingranan a mihadakan iso a kihcod, itini pinengneng Ningra sahtoay o masakalimlaan.a

⁸ Pakayni toniya mihinomay a sinael, mahecaday mihaenay ci Yihofa to sowal: “Nanay mafanaˈ kiso Takowanan, tangongolay ko olah Ako tisowanan, ciharatengay tisowanan.” Kawra sanay ko isaˈayaway a fatac, misakaniw ci Satan tisowanan, cowa ka olah ci Yihofa tisowanan sanay. Mansa, ano misatapang kiso cisasa ci Yihofaan i, salalicayen ko niyah: “O cima ko pakasoˈlinan ako hani? O ‘makaniway a wama’ ci Satan han? Anca o ‘mitooray to soˈlinay kimad a Kawas’ ci Yihofa han?”—Yohani 8:44; ˈOlic 31:5 ato roma pihongyak.

9. Pafelian ni Yihofa ko maolahay Cingranan a tamdaw to o manan a sakiˈok? (Kasadakan 20:5, 6)

⁹ Saharateratengen samaanen ni Yihofa micada to maolahay Cingranan a tamdaw. Nengnengen hena, hananay ni Yihofa ci Mosi a pasowal. (ˈOsien ko Kasadakan 20:5, 6.) Mikiˈokay ci Yihofa, Pakayni to maolahay Cingranan a tamdaw, paihkal to madimadiay a olah. Mihaenay, pakayni maolahay Cingranan a tamdaw, madimadiay a Kawas, cowa ka eca ka olah cangranan. (Nihimiya 1:5) Ano cisasa kiso to maolahay ci Yihofa tisowanan, oha salalicayen ko niyah: “Maolahay kako ci Yihofaan han?” Dotoc, haratengen koniya mikiˈokan ni Yihofa: Ano maolah kiso Cingranan, halo misaˈicel a pakahemek Cingranan, mihaen wa tada maolah Cingra tisowanan. (Taniil 9:4; 1 Korinto 8:3) Mahaenay i, ano caka cisasa kiso to maolahay ko niyah ci Yihofaan, misamaanay hano cisasa to olah ni Yihofa tisowanan hani? Ngaˈay pakasoˈlinen kiso, wa tano madimadiay a olah ci Yihofa micada tisowanan, cowa ko mamiliyas tisowanan.

10-11. Makalimay ci Yihofa samaanay kiso minengneng to sapatefoc? (Kalatiya 2:20)

¹⁰ Dotimen ko kalaliting iso to sapatefoc. Mipatafangan ni Yis a sapatefoc o sapafeli ni Yihofa to tamdaw a masakalimlaan a sapatelong. (Yohani 3:16) Oniya sapatelong sapafeli tisowanan han? Hayi! Haratengen ko nalifetan no tarokos ci Pawlo. ˈAyaw no malo Krisciyang i, na midemakay cingra to roma pakidemay a raraw. Mala Krisciyang ikor, kamayan padadotoc malaˈodot to kalonayan no niyah. (Loma 7:24, 25; 1 Timoti 1:12-14) Kawra tada pakasoˈlinay cingra, o sapatefoc o sapafeli ni Yihofa cingranan a sapatelong. (ˈOsien ko Kalatiya 2:20.) Haratengen, o sowal ni Pawlo o ci Yihofa ko mikayatay cingranan a miˈoning, o mikayatan ni Yihofa ko tamdaw mitilid to kahacecay a sowal sahtoay o sapakafanaˈ kitanan. (Loma 15:4) Mihaenay, makalimay ci Yihofa to pinengneng iso to sapatefoc o sapatelong Ningra tisowanan. Ano mahaen ko pinengneng iso to sapatefoc i, mamatongal ko pakasoˈlin iso to tada maolahay ci Yihofa tisowanan.

¹¹ Tada miakoˈiday kita miocoran ni Yihofa ci Yis tayni i fafekang no sera, pakayni kitanan kinafalah to ˈorip. Kawra tayni i fafekang no sera ci Yis i, pakayniay i sapakafanaˈaw to tamdaw to soˈlinay kimad no Kawas. (Yohani 18:37) O cecay soˈlinay kimad: I kakarayan Wama ci Yihofa tada o maolahay ciharatengay to wawawawa Ningra.

SAMAANAY CI YIS PADAMA KITANAN PAKASOˈLIN TO MAOLAHAY CI YIHOFA KITANAN

12. Pakayni to masamaanay a Wama ci Yihofa, hano oha papakasoˈlin kita to sowal ni Yis?

¹² I fafekangho no sera ci Yis i, makahiay mifanaˈ to tamdaw to o masamaanay a Wama ci Yihofa. (Luka 10:22) Ngaˈayay kita pakasoˈlin to sowal ni Yis, samanen ci Yis kalacafay ci Yihofaan i kakarayan a tatokian mataˈlifay ko masaˈokay efan a mihecaan. (Kolosay 1:15) Mafanaˈay ci Yis tada maolahay ko i kakarayan Wama cingranan, maˈarawayho ko Wama paihkal to tangongolay a olah to madimadiay a coyoh ato i fafekangay no sera a wawawawa. Mihaen i, samaanay ci Yis padama to tao pakasoˈlin to maolahay ci Yihofa cangranan hani?

13. Makalimay ci Yis sasamaan ko pinengneng ita ci Yihofaan?

¹³ Makalimay ci Yis kitanan pahecad cingranan a minengneng ci Yihofaan. I Krisiya Ratoh a Cudad i, pangangan ni Yis to o “Wama” ci Yihofa mataˈlifay ko 160 ko adihay. Tinakoen masasowal to nisawawaan i, hananay ni Yis pangangan ci Yihofa ‘i kakarayan a Wama namo.’ (Matay 5:16; 6:26) Sanay ko sowal no 《精讀本》注釋 i Matay 5:16: “ˈAyaw ni Yis, o sikawdan no Kawas misakadademak to adihayay kasapaan a saaroˈan a pangangan ci Yihofaan, mahawpay ko ‘Malefotay ko ˈIcel a Kawas’ ‘Saˈakawangay a Tapang’ ato ‘Tadamaanay a Misangaˈay,’ kawra maceriday ci Yis tano “Wamaaw” oniya kantangay kalo a sowal a mipangangan to Kawas, paihkalay koni o Kawas ato kalalaˈed no midokoay Cingranan a tamdaw, mahecad to wama ato wawa makakedec ko kalalaˈed.” Mansa, makalimay ci Yis mahapinang ita tada maolahay ci Yihofa kitanan, mahecad to cisidaˈitay a wama tada ciharatengay maolahay to wawa no niyah. Dotoc, nengnengen ita o “Wama” hananay ni Yis a pangangan ci Yihofaan a tosa tinakoan.

14. Samaanay ci Yis mitadtad, kita o kahacecay tamdaw i pinengneng no kakarayan Wama sahtoay o masakalimlaan hani? (Matay 10:29-31) (Nengnengen ko coka.)

¹⁴ Isalakat, sinanoten ko misowalan ni Yis itini Matay 10:29-31. (ˈOsien.) O ˈalic cowa ko mamaolah anca cowa ka pidoko ci Yihofaan, kawra o mahaenay a ˈalic soˈlin matefad i fafekang no sera, mafanaˈay ko i kakarayan Wama ita. Soˈlin mahaen i, pakayni toya madimadiay ato midokoay Cingranan a tamdaw, mangalefay ci Yihofa misalimla ato maolah a midimokos. Roma i, sanay ci Yis: ‘Ano o fokesto namo maeminay a misaˈosi.’ Pakayni toniya sowal, mahaenay ko sowal no 注釋 i 30 sinael: “Tada cipinangay ci Yihofa kitanan, ano mimingayto a demak mafanaˈay Cingra. Mansa pakasoˈlinen ita, padadotocay ciharateng Cingra to kahacecay mikotoday ci Kristoan a tamdaw.” Mansa, makalimay ci Yis pakasoˈlin kita, o kahacecay a tamdaw i pinengneng no kakarayan Wama sahtoay o masakalimlaan.

15. Pakayni to i kakarayan Wama ci Yihofa, mikitini sowal ni Yis i Yohani 6:44 mananamay iso ko manan?

¹⁵ Nengnengen ko saka tosa tinakoan. (ˈOsien ko Yohani 6:44.) I kakarayan Wama iso misolotay tisowanan, ho mafanaˈ kiso to soˈlinay kimad. Misamaanay hano soloten Ningra kiso isalakat hani? Samanen manengnengay Ningra ko falocoˈ iso iraay ko matatodongay a harateng. (Dmak 13:48) Masowalay no Yohani 6:44 《精讀本》注釋, pasowal ci Yis toniya sowal i, alatek maharatengay ko i Yirimiya Cudad a sinael, oya lalangian sinael noniya lalakaw: ‘Tano madimadian Ako a olah a misolot tisowanan tayni i katihi Ako [mahongyakayho to “padadotocay Kako paihkal to madimadiay a olah tisowanan”].’ (Yirimiya 31:3 ato roma pihongyak; nengnengen ko Hosiya 11:4.) Haratengen o manan ko tatodong nonini? Sidaˈitay a Wama padadotocay a misinanot tisowanan, mikilim to kangaˈayan no miso. Soˈlin cowa ka hapinang ko kangaˈayan no niyah, kawra maˈaraway Ningra.

16. (1) O manan ko sapakafanaˈ ni Yis kitanan? Misamaanay hano pakasoˈlin kita to sowal ningra? (2) Sasamaan kiso paˈicel to pakasoˈlinay falocoˈ, pakasoˈlin ci Yihofaan to misaalian iso a Wama hani? (Nengnengen ko sapatongal lalakaw “Kita Kahacecay Tamdaw Misaaliay to Mahaenay Cisidaˈitay a Wama.”)

¹⁶ Panganganan ni Yis ci Yihofa to o Wama ita, sanay cingra: “Cowa aca ko Wama ako ci Yihofa, o Wama iso. Mikiˈokay kako tisowanan, maolahay Cingra tisowanan, tada ciharatengay tisowanan.” Mihaenay, ano cisasa kiso to maolahay ci Yihofa tisowanan hokira, salalicayen ko niyah: “Soˈlin tada cipinangay ci Yis to i kakarayan Wama, pasowal to tamdaw to soˈlinay kimad, mihaen i, iraay ko maanan lalangian ako ho caka pakasoˈlin to sowal ningra hani?”—1 Pitiro 2:22.

PADADOTOCEN PAˈICEL KO PAKASOˈLINAY FALOCOˈ

17. Hano papaˈicel kita to pakasoˈlinay falocoˈ, pakasoˈlin to maolahay ci Yihofa kitanan hani?

¹⁷ Oha padadotocen ita paˈicel ko pakasoˈlinay falocoˈ, pakasoˈlin to maolahay ci Yihofa kitanan. Isaˈayaway fatac masowalayto, tada misafakofakoay ci Satan, tano kihcod a pakayraan ho eca ka pidoko kita ci Yihofaan. Sapifiyoraw to misetekay ita a falocoˈ, padadotocay ci Satan miˈodis to pakasoˈlinay falocoˈ ita, ho cisasa kita to olah no Kawas. Aka a papilaˈosien ci Satan toniya demak!—Yopu 27:5.

18. Sasamaan kiso paˈicel to pakasoˈlinay falocoˈ, pakasoˈlin to maolahay ci Yihofa tisowanan?

¹⁸ Ano sapitongalaw to pakasoˈlinay kiso to maolahay ci Yihofa tisowanan, ka padadotoc a mitolon, micangacang Cingranan padama tisowanan a mihapinang to hano maolah Cingra tisowanan. Songilaˈen a misaharaterateng ko miˈoningay to Fangcalay Cudad itini sakayat no fangcalay saocor, samaanay mitadtad to olah ni Yihofa tisowanan. Haratengen, ano maolahay kiso ci Yihofaan, mamaolah ci Yihofa tisowanan. Songilaˈen a midotim ko sapatefoc hano o sapafeli ni Yihofa tisowanan a sapatelong. Roma i, pakasoˈlinenho ko sowal ni Yis, o ikakarayan Wama iso han ko pinengneng ci Yihofaan. Mihaen, ano iraay ko milicayay tisowanan: “O harateng iso maolahay ci Yihofa tisowanan han?” Wa ngaˈay tanoktok kiso a pasowal: “Pakasoˈlinay kako to maolahay Cingra takowanan, to romiˈamiˈad misaˈicelay kako a misawacay to maolahay kako Cingranan!”