LALENGOEN LALAKAW 41
RADIW 108 Madimadiay Olah no Kawas
O Tahadaˈocay ko Olah ni Yihofa
‘Aakoˈiden ci Yihofa, samanen tada ngaˈayay Cingra; o tahadaˈocay ko madimadiay a olah Ningra.’—ˈOLIC 136:1.
KALIMLAAN NO LALAKAW
Sowal no Fangcalay Cudad o tahadaˈocay ko olah ni Yihofa. Haratengen ita koniya demak, ano tahasiˈayaw to sapalifet i, wa pakaremo to matoleday a falocoˈ.
1-2. Tahalifa to pasangar i, samaanay ko harateng no ˈalomanay a Krisciyang hani?
TAˈANGAYAY ko fali, macowacoˈay ko riyar, ngoyangoy sanay ko tamina i riyar. Ano caka tefaden ko ˈenor i riyar, patanoktok to tamina i, wa mafiyor no taˈangayay fali ko tamina, wa matahepo no tapelik.
2 Tahasiˈayaw kiso to mahaenay o faliyos a sapalifet i, alatek o harateng iso mahecaday to tamina a mangoyangoy. Alatek sakacecay a romiˈad pakasoˈlinay to maolahay ci Yihofa tisowanan, midama tisowanan. Kawra sakatosato a romiˈad cisasato ko harateng iso soˈlinay mafanaˈ ci Yihofa to malifaay no miso hokira. (ˈOlic 10:1; 13:1) Anoca pasowalay ko widang to mihinomay a sasowalen, ho parihaday to falocoˈ iso. (Taneng 17:17; 25:11) Kawra caka halafin i, misatapangto kiso cisasa to olah ni Yihofa tisowanan, hato mifalahanto Ningra kiso saan. Mihaenay, tahalifa to sano faliyosay a pasangar i nokaˈorip, sasamaan ko demak ngaˈ mahecad to mitefadan ko “ˈenor no tamina” hani? Sakoniya sowal i, sasamaan kiso pakasoˈlin to maolahay ci Yihofa tisowanan, o dadamaen Ningra kiso, halo mitawmec to hatiniay a harateng hani?
3. Madimadiay a olah o manan ko tatodong hani? Paihkal to madimadiay a olah o sangaˈayay a taˈarawan ci Yihofa, hano saan ko sowal hani? (ˈOlic 31:7; 136:1) (Nengnengen ko coka.)
3 Tahalifa to sapalifet i, sasamaan ko demak ngaˈ mahecad to “mitefad to ˈenor no tamina” hani? O haharatengen ko madimadiay a olah ni Yihofa tisowanan. (ˈOsien ko ˈOlic 31:7; 136:1.) ‘Madimadiay a olah’ i kalalaˈed no tamdaw, iraay ko tangongolay padadotocay a olah sanay. Pakayni paihkal to madimadiay a olah, o sangaˈayay a taˈarawan ci Yihofa. Sowal no Fangcalay Cudad iraay ko ‘madimadiay tangongolay a olah’ ni Yihofa. (Kasadakan 34:6, 7) Sanayho ko Fangcalay Cudad pakayni to micangacangay Cingranan a tamdaw ‘matomesay ko madimadiay a olah’ ni Yihofa cangranan. (ˈOlic 86:5) Mikitini toniya sinael mahapinangay iso ko manan hani? Cowa ko mamifalah ci Yihofa to madimadiay a finawlan Ningra! Tahasiˈayaw to sano faliyosay a sapalifet i, haratengen ci Yihofa madimadiay ko olah Ningra tisowanan, papadama tisowanan tanektek caka ngiyangi, mahecad to ˈenor patanoktok to tamina.—ˈOlic 23:4
Ano ira ko faliyos i, tefaden ko ˈenor ngaˈayay patanoktok to tamina, ho eca ka matahpo no tapelik. Mahecadayto, tahalifa to sapalifet i, pakasoˈlin kita to maolahay ci Yihofa kitanan, wa tanoktok a caka ngiyangi (Nengnengen ko saka 3 fatac)
“IRAAY KO MADIMADIAY A OLAH NI YIHOFA,” O TAˈENENGAN A KIMAD NO FANGCALAY CUDAD
4. (1) O manan ko taˈenengan a kimad no Fangcalay Cudad? Patinakoen hena. (2) Hano pakasoˈlin kiso toniya kimad?
4 Ano makalimay kiso itini sapalifet tanoktok ko niyah i, wa haratengen: “Iraay ko madimadiay a olah ni Yihofa” o taˈenengan a kimad no Fangcalay Cudad konini. Pakayni to taˈenengan a kimad no Fangcalay Cudad, o manan ko maharatengay iso hani? Alatek maharateng iso: O ngangan no Kawas ci Yihofa; o foseniˈan a Wawa no Kawas ci Yis; mapatayay a tamdaw awaayto ko kafanaˈan; ano ikor o cikiw wa mala lakoingto; o malefotay a tamdaw wa itini i lakoing tahadaˈoc a maˈorip. (ˈOlic 83:18; Patnakay 9:5; Yohani 3:16; Paˈarawan 21:3, 4) Pakasoˈlinayto kiso toniya kimad ikor, cowato ko mamangiyangi kiso, misamaanay hani? Samanen mafanaˈayto kiso oniya kimad iraay ko soˈlinay a wacay. Dotoc mamilengo ko lalakaw, haratengen “iraay ko madimadiay a olah ni Yihofa,” o taˈenengan a kimad no Fangcalay Cudad, sasamaan a padama tisowanan palahdaw to sasa no falocoˈ, ho pakasoˈlin to cowa ko kafanaˈ aca ni Yihofa to nalifetan iso, ciharatengayho tisowanan.
5. Sowalen hena samaanay kiso misalof to mararaway a kimad.
5 Salakat minanam to Fangcalay Cudad i, o manan ko pakayraan iso mifalah to mararaway a kimad hani? Alatek palalinien iso to isaˈayaway mananamay iso a pidoyongan a kimad ato Fangcalay Cudad. Tinakoen, alatek na pakasoˈlinay kiso o malefotay a Kawas ci Yis, kawra matongal ko nika fanaˈ to sifanaˈ no Fangcalay Cudad, misatapangay kiso miharateng: “Matatodongay koniya kimad han?” Mikingkiw kiso to wacay no Fangcalay Cudad ikor, mahapinang iso cowa ko Kawas ci Yis. Oranto i, falahanto iso ko mararaway a kimad, micada to soˈlinay kimad no Fangcalay Cudad, pakasoˈlin ci Yis o ‘foseniˈan a Wawa’ no Kawas, ‘itini kihcod a masangaˈay, o sakakaay a wawa cingra.’ (Yohani 3:18; Kolosay 1:15) Manaokaniw, halafinayto kiso pakasoˈlinto mararaway a kimad, pasangaran nanay a misalof. (2 Korinto 10:4, 5) Kawra misalof ikor, falahento iso ko mararaway a kimad.—Filipi 3:13.
6. Hano pakasoˈlin kiso to madimadiay a olah ni Yihofa o midaˈocay han hani?
6 Mahecad to macadaay iso a roma soˈlinay kimad no Fangcalay Cudad, ‘iraay ko madimadiay a olah ni Yihofa’ o taˈenengan no soˈlinay kimad no Fangcalay Cudad. Soˈlin mahaen, ano tahalifa kiso to sapalifet a cisasa to olah ni Yihofa tisowanan i, ngaˈayay tano mahecaday a pakayraan a paˈicel to pakasoˈlinay falocoˈ a mifalah to cisasaay a falocoˈ. Ngaˈayay licayen iso ko niyah: “O harateng ako iraay ko wacay han? Ikor i, ngaˈayay palalinien iso ko harateng no niyah ato ˈOlic 136:1 nonini a lalakaw. Haratengen hena, o olah ni Yihofa hano o ‘madimadiay a olah’ han hani? Misamaanay ‘tahadaˈocay ko madimadiay a olah Ningra’ kinatosa poloˈ enem ko misaliyawliyaw a masowal itini toniya ˈOlic hani? Sinanoten a miharateng wa mahapinang iso, hato awaay ko kapo ko niyah i pinengneng ni Yihofa, cowa ka citatodong milifok to olah Ningra, mahaenay a harateng tada mararaway. Oha mamisaˈicel mifalah toniya mararaway a harateng, mahecad to pifalah iso to romaroma mararaway kimad!
7. Iraayho ko romaroma a sinael paihkal to maolahay ci Yihofa kitanan hani?
7 Iraayho ko adihayay a wacay no Fangcalay Cudad paihkalay to tangongolay ko olah ni Yihofa kitanan, tinakoen pasowalan ni Yis ko nisawawaan: ‘Ikakaay ko kalimlaan namo to ˈalic!’ Na pasowalay ci Yihofa to finawlan Ningra: ‘Wa patanoktoken Ako kiso, papadamaen Ako kiso, wa tano moecelay a kawanan kamay midama tisowanan.’ (Matay 10:31; Isaya 41:10) Haratengen, ‘alatek wa ikaka ko kalimla namo to ˈalic’ cowa ka saan ci Yis, ao ‘ikaka ko kalimla namo to ˈalic’; ‘alatek wa padamaen Ako kamo; cowa ka saan ci Yihofa, ao ‘wa padamaen Ako kiso.’ Soˈlinayto ko sowal Nangra. Tahasiˈayaw to sapalifet i, ano cisasa kiso to olah ni Yihofa tisowanan i, ˈosien konini a sowal cowa ko sakangaˈayaw aca no falocoˈ iso, oha papakasoˈlin kiso to maolahay ci Yihofa tisowanan, samanen oniya sowal no sinael sahtoay o soˈlinay a sowal. Mitolon kiso ci Yihofaan padama tisowanan palahdaw to cisasaay a falocoˈ, malalokho midotim toniya sinael, wa mikifalocoˈ a mihayi to sowal no 1 Yohani 4:16, sanay ko sinael: ‘Mafanaˈayto a pakasoˈlin kita to olah ni Yihofa kitanan.’a
8. Ano cisasa kiso to olah ni Yihofa tisowanan, sasamaan ko demak hani?
8 Nolatekay ano cisasa kiso to olah ni Yihofa tisowanan, sasamaan ko demak hani? Ngaˈayay palalinien iso ko niyah a harateng ato kafanaˈan iso ci Yihofaan. Haratengen, ano palalinien ko kafanaˈan iso ci Yihofaan, o harateng no niyah cowa ka ngaˈay tiˈeren. Mihaenay, o kafanaˈan iso ci Yihofaan o manan hani? Misaliyaliyaway ko Fangcalay Cudad a somowal, maolahay ci Yihofa to finawlan Ningra. Ano cisasa kita toniya taˈenengan soˈlinay kimad, o cowa pakasoˈlin to olah o masakalimlaan a capeling ni Yihofa.—1 Yohani 4:8.
SONGILAˈEN MIHARATENG KO OLAH NI YIHOFA TISOWANAN
9-10. Itini Yohani 16:26, 27, sanay ci Yis: ‘O Wama tangongolay ko olah Ningra tamowanan.’ O ikaˈayaway a sinael, o manan ko milengoan ni Yis hani? (Nengnengen ko coka.)
9 Ngangaˈayho kita pakayni i roma a sowal ni Yis, matongal ko kacipinang to olah ni Yihofa kitanan. Hananay ni Yis ko nisawawaan a pasowal: ‘O Wama tangongolay ko olah Ningra tamowanan.’ (ˈOsien ko Yohani 16:26, 27.) Pasowal ci Yis toniya sowal cowa ko sapipakalalokaw aca to nisawawaan. Ikaˈayaway sinael paihkalay, milengoay ci Yis to mitolonay a demak.
10 Tada cipinangay ko nisawawaan ci Yisan a malawidang cingranan, mansa patatikol cingra a maˈorip ikor, alatek o nisawawaan mitolonay cingranan. Saan cangra miharateng, ano tangongolay ko olah ni Yis cangranan, oha mamitengil to picangacang nangra, hanaca mifanaˈ cangra to saali i kakarayan Wama. Kawra o sowal ni Yis, wa pakayni i ngangan ningra a mitolon, ao cowa ko pasayra cingranan a mitolon. (Yohani 16:23, 24) Misamaanay hani? O sowal ni Yis: ‘O Wama tangongolay ko olah Ningra tamowanan.’ O sowal ni Yis paihkalay, tangongolay ko olah ni Yihofa kitanan. Mansa wa mitengil to satolon no mita. O milingatay to satolon a taˈenangan no soˈlinay kimad. Paifalocoˈen ko sowal ni Yis. Padadotoc a mikingkiw to Fangcalay Cudad i, wa matongalto ko kacipinang iso ci Yisan a maolah cingranan. (Yohani 14:21) Kawra mahecad to saka 1 hahekalan a nisawawaan, mitolon kiso ci Yihofaan a mifanaˈ to nafalocoˈan Cingranan, samanen mafanaˈay kiso to tangongolay ko olah Ningra tisowanan. Ano mihaen ko demak iso i, o paihkalay to pakasoˈlinay kiso tonini a demak.—1 Yohani 5:14.
Ngaˈayay kiso tano pakasoˈlinay falocoˈ mitolon ci Yihofaan, samanen mafanaˈay kiso to tangongolay ko olah Ningra tisowanan (Nengnengen ko saka 9-10 fatac)b
OHA CACIPINANG KITA TO HANO IRA KO SASA NO HARATENG
11. Ano cisasa kita to olah ni Yihofa i, hano mamahemek ci Satan hani?
11 Hano cisasa kita to olah ni Yihofa kitanan hani? Alatek wa isalakat kiso miharateng, oniya sasa ci Satan ko pairaay. Soˈlinayto o cecay lalangian konini, samanen sanay ko Fangcalay Cudad ciharatengay ci Akoma ‘sapitaˈemodaw kitanan.’ (1 Pitiro 5:8) Samanen pakayniay i olah ni Yihofa, mansa pafeliay kitanan to sapatefoc. (Hipray 2:9) Kawra, papiharatengan ni Satan kita cowa ka citatodong kita milifok to epoc no sapatefoc, cowa ka citatodong micada to olah ni Yihofa. Saharateratengen, ano cisasa kita to olah ni Yihofa i, cima ko mamahemek hani? Ci Satan. Ano pakayniay kita i sapalifet misawad midoko ci Yihofaan, o nima a mihalakaan mamalaˈosi hani? Oni Satan. Sapisakaniwaw ci Satan kitanan mapiliˈay ci Yihofa kitanan, cowa ko mamaolah kitanan, kawra o ci Satan ko cowa ka citatodong milifok to olah ni Yihofa. Mahapinang ita ko ‘tatiihay a halaka’ ni Satan i, wa ngaˈay misetek to falocoˈ ita ‘micoˈay ci Akomaan.’—Ifiso 6:11; Yakop 4:7.
12-13. O raraw hano paira to sasa no mita, to olah ni Yihofa kitanan hani?
12 Cisasa kita to olah ni Yihofa, iraayho ko roma a lalangian, hofoc han iraayto a raraw. (ˈOlic 51:5; Loma 5:12) Mipalakay ko raraw to kakalaˈed ita ato Kawas, mapalakayho ko falocoˈ ato tireng no mita.
13 Pakayni to pifiyor no raraw, madoloay a pira to tatiihay a harateng, tinakoen miroroh to niyah, caciraw, mangodoay ato cowa ka rihadayen. Ano mararaw kita i, alatek pairaayto hatiniay a harateng. Kawra ano maharateng ita cowa ko malefotay a tamdaw ko niyah i, alatek ira ko mafasaway a harateng. Satapang misangaˈ ci Yihofa kitanan i, cowa ka sapiemetaw ko raraw kitanan, cowa ka sakairaaw to tatiihay a harateng no mita. (Loma 8:20, 21) Kawra pakayniay i raraw, pasangaran kita miemet to harateng ato nafalocoˈan, mahecaday to mafetas ko kalileng no tosiya ikor pasangaray ongitengen. Mihaenay, nolatekay cisasaayto kita to olah ni Yihofa. Ano mahaenay i, haharatengen ita ci Yihofa ‘o tadamaanay a Kawas, oha kakangodoen no tamdaw,’ tano madimadiay a olah Ningra micada toya maolahay Cingranan, midofdofay to limoˈot Ningra a tamdaw.—Nihimiya 1:5.
14. Midotim to milingatay to sapatefoc a soˈlinay kimad, sasamaan padama kitanan palahdaw to cisasaay a falocoˈ, pakasoˈlin to maolahay ci Yihofa kitanan hani? (Loma 5:8; nengnengen ko sapatongal lalakaw “Sinanoten Hamaan ‘Masakaniw no Raraw.’”)
14 Nolatekay, alatek cowa ka citatodong kita milifok to olah ni Yihofa. Soˈlinay cowa ka lefot kita, samaan a misaˈicel kita, awaay ko ˈinorong ni Yihofa maolah kitanan. Kawra maolah ci Yihofa kitanan cowa ka pilingat to citatodongay kita hokira, maolahay Cingra kitanan, mansa pafeliay to sapatefoc, misodod to raraw ita. Tadamaanay ko olah Ningra! (1 Yohani 4:10) Haratengenho, ocoran ni Yihofa ci Yis tayni i fafekang no sera, o mamilidong to mararaway a tamdaw, cowa ko malefotay a tamdaw. (ˈOsien ko Loma 5:8.) Awaay ko cimacima a tamdaw to malefotay ko demak, cowa pihaen ci Yihofa misaali kitanan. Soˈlin mafanaˈayto kita o raraw pairaay to sasa to olah ni Yihofa kitanan, mansa seteken ita ko falocoˈ malaˈodot to raraw, hamaan papiemeten ko raraw no mita.—Loma 7:24, 25.
PILIˈEN A MADIMADI CI YIHOFAAN
15-16. Ano padadotoc kita madimadi ci Yihofaan, oha ngangaˈay pakasoˈlin to manan hani? Misamaanay? (2 Samuil 22:26)
15 Makalimay ci Yihofa matatodong ko saˈosi ita, ‘kedecen a mitiˈer Cingra.’ (Limoˈot. 30:19, 20) Ano mihaen ko demak ita, wa madimadi ci Yihofa kitanan. (ˈOsien ko 2 Samuil 22:26.) Ano madimadi kita ci Yihofaan i, wa pakasoˈlinto, ano o mananto ko malitemohay a pasangar, papadama Cingra kitanan a mihadidi tahatolas.
16 Oniya lalakaw padama kitanan mihapinang, soˈlin tahasiˈayaw to pasangar no hakelong no ˈorip, kamayan kita tanoktok caka ngiyangi, mahecad patanoktoken no ˈenor ko tamina, samanen pakasoˈlinay kita, tangongolay ko olah ni Yihofa kitanan, wa damaen Ningra kita. O taˈenengan a kimad no Fangcalay Cudad konini. Mihaenay, ano cisasaay kita to olah ni Yihofa i, haratengen samaanay ko kafanaˈan iso a Kawas, hamaan samacayen ko harateng no niyah, nanay maharateng no mita tahadaˈocay ko madimadiay a olah ni Yihofa, hanaca padadotoc mitawmec toniya masakalimlaan a soˈlinay kimad no Fangcalay Cudad.
RADIW 159 Paˈodingaren ci Yihofa
a Adihayayho ko sinael paihkalay to olah ni Yihofa kitanan, mahawpay ko Limoˈot 31:8; ˈOlic 94:14; Isaya 49:15.
b TATODONG NO COKA: O cecay faˈinayan salikaka mitolonay ci Yihofaan padama cingranan, ho ngaˈay cingra midimokos to adaday a fafahi, ato pasifanaˈ to fafahiyan a wawa maolah ci Yihofaan, micangacangay cingra ci Yihofaan pafeli cingranan to taneng a paririˈ to paro no lomaˈ.