Ano Icowaayto Kita “Palomaen,” Padamaen ni Yihofa Kita Ira ko “Minaroˈan Itira”

Ci Maci aci Ankaytelin itiniay i 1979 miheca mirienangay to Kiliyat Picudadan. Mitakci cangra i, matengilay nangra ko sowal no singsi ci Cike Litefo faˈinayan salikaka masowalay iˈayaw a fatac. Micudiyap ikor, “palomaen” cangra itini i Iran, Mawliciwse, Miyanmar, Tansangniya, Okanta ato Cail, tatodong i, o maocoray cangra tayra tora pala a matayal. Kinacecay “mapaloma cangra, mifaˈenotan, miliyaw a palomaen,” oniya sowal tada mapakalalokay cangra. Nengnengen ita ko nalifetan nangra.

Samaanay kamo mafanaˈ to soˈlinay kimad hani?

Maci: Itini Saka Tosa Lalood no Hekal a tatokian, itiniay i Polan ko wama ako, maˈaraway ningra ko adihayay makaniway a demak i Tingsokiyo. Kawra kamayan cingra macerid somowal: “Pakasoˈlinay kako iraay ko soˈlinay kimad toniya hekal!” Matatodongay ko sowal ningra. Kinacecayay, miˈacaay kako to adihayay matelangay a cudad, iraay ko cecay landaway a cudad Mikayatay to Hasakatoedaw no ˈOrip a Kimad. Oniya lalangian tada misolotay takowanan, oranto i, toya dadaya malahciayto ako a minengneng koniya cudad. Sakatosa romiˈad a papacem, pakasoˈlinay kako makilimayto ako ko soˈlinay kimad!

Mikitini 1972 miheca 4 folad, adihayayto ko maˈosiay ako ko Misawacayay Tamdaw ni Yihofa a mitepangan lalakaw, oniya lalakaw pacaˈofay takowanan to adihayay a salicay no Fangcalay Cudad. Mahecaday kako to sapatinako ni Yis a misasingdiay sanay ko harateng ako. Mahelaay noya misasingdiay ko masakalimlaan a odoˈ ikor, mieminan paˈaca ko hafay ningra a miˈaca tora odoˈ. Mahaenay kako, “sapiˈacaaw” to soˈlinay kimad oniya masakalimlaan a odoˈ, “paˈacaan” ako, misawadanto ko mitakci to taykak mala ising a patosokan. (Matay 13:45, 46) Ikor, i 1972 miheca 12 folad 10 romiˈad mipaputisemayto kako.

Mipaputisem kako ikor to ilalomaˈ no cecay miheca, o wama wina ato faˈinayan safa micadaay to soˈlinay kimad halo mipaputisemayto. 1973 miheca 7 folad, misatapangay kako malo miceriday misakafahay. I kasakopang ako ˈalomanay ko fanekfekay a misakafahay, o cecay i, ci Ankaytelin, maolahay cingra ci Yihofaan, maolahay kako cingranan. Ikor makakaolahay kami, i 1975 miheca mararamoday kami. Ikor, matayal kami itini Retin a Steromsunte sepatay miheca. Tada makapahay koniya niyaroˈ, hanaca ˈalomanay ko tamdaw sapinanamaw to Fangcalay Cudad.

Ankaytelin: Mitakciho ko wama ako to taykak i Stekemol i, mafanaˈayto to soˈlinay kimad. Na hofocen toloayho a folad kako, miˈorongan ningra kako mirienang to saˈopo ato mitosil. Cowa ka hemek ko wina, sapisawacayaw to mararaway ko Misawacayay Tamdaw ni Yihofa. Kawra awaay ko pakayraan ko wina ako a misawacay, mansa ikor micadaay cingra to paputisem. 13 ko mihecaan ako mipaputisemayto, 16 ko mihecaan misatapangay to misakafah. Ikor malinahay kako tayra i Omoaw, samanen misaaliay to ˈalomanay mitosilay itira, itiraay kako a misatapang malo mikiriwiˈay misakafahay.

Mararamod ikor, kako aci Maci kalacafay padama to roma tamdaw mafanaˈ to soˈlinay kimad. O cecay i, moetepay ira ko pina mihecaan a fafahiyan, ci Miwae ko ngangan ningra. Minanam to Fangcalay Cudad ikor, misawadan ningra ko miontoay a tayal, ikor kalacafayay to fafahiyan safa ako malo misakafahay. 1984 miheca, malacafayay cangra tayra i Kiliyat Picudadan. Nohatini itiniay cangra i Ekuwato malo mikiriwiˈay manilnil a mitosilay.

Na maocor kamo tayra i cowa ka hecad a pala matayal, samaanay madangar namo “ano icowato palomaen, itira ko minaroˈan” hani?

Maci: Maceriday kita “palinah a mipaloma” tayra i faelohay a katayalan, kawra malinahho i, misaˈicelayto kami “palamit” i ci Kristoan, misaˈicel a mitodong cingranan, mangalef minanam to misapoeneray a taˈarawan ningra. (Kolosay 2:6, 7) Tinakoen, mamisaˈicel kita cipinang to itiraay a harateng no salikaka, mitanam a cipinang to serangawan ato pidemakan a pakayraan nangra, cowa pisaali cangranan pahecad tamiyanan. Mahapinang niyam, ano mangalef ko pitodong niyam ci Yisan, mahecad to ‘mipalomaan itini lawac no nanom’ a kilang, ano icowato a matayal wa ngaˈayto ko minaroˈan.—ˈOlic 1:2, 3.

Ankaytelin: Mapalinah ko cecay a kilang a mapaloma i, sapadadotocaw a lomahad, misaaliayho to dihkoay a cidal. Ci Yihofa i, o “cidal” no mita. (ˈOlic 84:11) Pakaynian Ningra i matomesay ko olah a salikaka padihko tamiyanan. Tinakoen, naitiniay kami i Iran Tehran a kasakopang matayal. Soˈlin cowa ka ˈaloman ko itiraay a salikaka, kawra hinapaladaˈay cangra, maharatengay ako i lintad no Fangcalay Cudad a tamdaw paihkal to hinalafangay a waywayan. Ciharatengay kami padadotoc itini i Iran, kawra 1980 miheca 7 folad, o sifo no Iran mikecengay to demak no Misawacayay Tamdaw ni Yihofa, mapacieciayho kami ilalomaˈ no 48 tatokian a miliyas, o hakatayraan niyam o Caier no Afrika (o Kangko hananay anini).

Mafanaˈ kako tatayra i Afrika, tomangicayto. Matalaway kako, samanen matengilay ako adihayay ko ˈoner ato midengaay adada i Afrika. Kawra tatosa halafinay itira matayal a widang pasowal takowanan: “Cowaho ka tayra kiso i, o manan ko katalawan? Tayra kiso i, wa maolahto to Afrika.” Matatodongayto ko sowal nangra. O ciolahay ko itiraay a salikaka, lopayˈayho cangra. Itira matayal 6 miheca ikor, samanen o pikeceng no sifo, mamiliyasto kami, kawra itiya matawaayto kako. Mafanaˈay kako to harateng no niyah cowato ka hecad to ˈayaw no 6 miheca, samanen mitolonan ako micangacang ci Yihofa: “Nanay paitinienho kami i Afrika!”

Matayal kamo saki ci Yihofaan toniya pina miheca, iraay ko manan a ngaˈayay nalifetan ato sapalemed han?

Maci: Samanen itini to cowa ka hecad a pala a matayal, malikoay kami kalacafay to icowacowaay a kitakit, ato serangawan a mikiriwiˈay manilnil a mitosilay malo ngaˈayay widang. Itini roma a pala, iraay ko hatoki niyam pakafanaˈ to ˈalomanay pakingkiwan. Nolatekay, kako ato fafahi makairaay ko 20 a pakingkiwan. O olah ato hinalafangay no Afrika salikaka tada patemeray to falocoˈ niyam. Tinakoen, manikaway ko salikaka itini i Caier, milisoˈ kami to kahacecay a kasakopang i, itini sanay i tosiya no niyah a mafotiˈ, kawra kamayan a hinapaladaˈen cangra micada tamiyanan, misongilaˈ a midimokos to kihcod a saali niyam. O midemakan nangra ‘mataˈlifayto ko ˈicel nangra.’ (2 Korinto 8:3) Romiˈamiˈad “ˈayaw no fotiˈ a tawcikel” o mikiriwiˈay a sapalemed. Malalengo kako aci Ankaytelin to mafekaday toya romiˈad a demak, halo miakoˈid ci Yihofaan midimokos tamiyanan.

Ankaytelin: Pakayni takowanan, itini kasacefang no salikaka i paro no kakarayan a maˈorip, o taˈangayay a sapalemed. Minanam kami to Pirsiya, Frans, Lukanta, ato Swahili a sowal, matinakoayho ko cowa ka hecahecad a serangawan. Roma i, pahatatanamayho kami to faelohay salikaka, mafanaˈ to ˈalomanay a widang, halo ‘macalafay cangranan midoko’ ci Yihofaan.—Cifaniya 3:9.

Maˈaraw niyam ko misangaˈan ni Yihofa tada kasemeranto. Ano macadato ko faelohay a sanilnil i, hato mikeriday ci Yihofa tamiyanan a miliwko sanay ko harateng niyam. Ano cowa ko Cingra i, i hakelong no ˈorip niyam wa awa ko adihayay kalimlaan a nalifetan.

Tahasiˈayway kamo to manan a pasangar? Samaanay kamo a miremo?

Maci: Toniya pina miheca malifongay kami. Ci Ankaytelin kinapinaay tahasiˈayaw to kacalohan a pasangar, oha mamipatokad cingra. O roma i, matoˈas matoˈasayto ko wama wina, calemcemayho kami cangranan. Kawra o safa niyam makahiay midimokos to wama wina, hanaca cowa ka ngaliwngiw, mihadidiay tano olah midemak. Miakoˈiday kami cangranan. (1 Timoti 5:4) Samanen maraayay ko kaitiraan, citolasay ko sapadama niyam to wama wina, mansa nolatekay mirorohay to niyah ko falocoˈ, makalimay sapipadamaaw to wama wina ko niyah.

Ankaytelin: 1983 miheca, itini kami i Caier a matayal i, pakidemay ko adada no mako. Sanay ko ising ci Macian: “Tangsolen iso cingra a paliyas toniya kitakit!” Oranto i, saka tosa romiˈad miliyasayto kami, minokay tayra i Reitin. Kawra o mikalican niyam o miˈorongay to dafong a hikoki, onini aca ko hapakayraan niyam a minokay.

Maci: Cowato ko mamaadah sanay ko ising ci Ankaytelinan, harateng niyam cowato ka ngaˈay malo mikiriwiˈay manilnil a mitosilay, mansa mararomay kami a tomangic. Kawra cowa ka haraterateng, maadahayto ko adada ni Ankaytelin. Ikor no cecay miheca, patikolay kami tayra i Caier. Manilnilay kami tayra i Lupenpasi, i Swahili sasowalen a kasakopang matayal.

Ankaytelin: I Lupenpasi matayal i, mapatayay i tiyad ko wawa ako. Soˈlin cowa ko sakaciwawaaw kami, kawra malahdaw koniya wawa pakararomay takowanan. Itiya tora liyad i, pafelian ni Yihofa kami to cowa ka harateng niyam a sapatelong. O misikayay niyam a pakingkiwan matongalay to isaˈayaway, ilalomaˈ no cecay miheca o mitosilay no kasakopang na 35 nohatini i, 70 ko tamdaw, mirienangay to saˈopo a tamdaw na 40, nohatini i, 220 ko tamdaw. Misarocoday kami to mitosilay a tayal, milifokay to sapalemed ni Yihofa, telocto i, taˈangayay ko sahinom. Kawra, maceriday maharateng niyam hanaca milengo to malahdaway niyam a wawa. Mafanaˈay kami i faelohay a hekal wa palahdawen ni Yihofa ko mararomay falocoˈ niyam, tada hinatalaay kami.

Maci: Ikor to cecay liyad, ci Ankaytelin awaayto ko ˈicel a malotayen, pasowalan no ising kako o sakasepatto a liyad ko ekang no tinaˈi, oha mamipatokad. Kawra nohatini maadahayto kako, ci Ankaytelin kamayan a misarocod matayal saki ci Yihofaan.

Soˈlin, cowa ko kami aca ko tahasiˈayaway to sapalifet. 1994 miheca o kapapatay no finacadan no Rowanta malahci ikor, tayra kami milisoˈay to ˈalomanay salikaka i pikidihingan no tahapadesay. Maˈaraw cangra i pasangaray pakayraan kamayan padadotoc a mihadidi, paihkal to pakasoˈlinay falocoˈ ato hinalafangay a waywayan, pakasoˈlinayto kami to soˈlinay iraay ko ˈicel ni Yihofa midimokos to finawlan Ningra, padama cangranan miremo to masakenakenaay a sapalifet.—ˈOlic 55:22.

Ankaytelin: O roma masiˈayaway niyam a sapalifet i 2007 miheca. Mirienangay kami to pipatafangay a kimad to fenpo no Okanta ikor, kalacafayay to roma mikiriwiˈay manilnil a mitosilay ato i Pitilay a salikaka tayra i Nairopi no Kenya. Mangata tayhira i lawac no Kenya i, iraay ko cecay tolako miˈafasayto lalan niyam a misongtol to tosiya niyam. O parakatay ato lalima salikaka mapatayay, iraayho ko cecay fafahiyan salikaka tahira i pipaisingan ikor, mapatayayto. Tada maˈilolay kami toniya widang, hinatalaay itini lakoing miliyaw malalitemoh cangranan.—Yopu 14:13-15.

Soˈlin maadahayto ko dokaˈ no tireng ako, kawra kako aci Maci atoya romaroma maroˈay i paliding a tamdaw ikor iraayto ko dokaˈ no falocoˈ. Nolatekay macekiday kako to lafii, hato caciadadato ko falocoˈ, mahaenay a harateng katalawanto. Kawra padadotocay kami mitolon ci Yihofaan, macerid miˈosi a midotim to kaolahan a sinael, padamaay koni parihaday to falocoˈ niyam. Roma i, padamaay ko ising tamiyanan. Nohatini ngaˈayayto ko pakayraan niyam, micangacangay kami ci Yihofaan a mihinom padama to mahecaday ko pasangar a salikaka.

Masowal to samaanay miremo to sapalifet i, o sowal namo “mahecaday to fitaˈol” ko niyah misamadahan ni Yihofa miˈamet i kamay. O manan ko tatodong hani?

Maci: O pinangan no sasowalen no Swahili koni. Ano miˈamet ko tamdaw to fitaˈol i, misamadahay minaˈon, matalaw kapelaˈan no fitaˈol. O harateng niyam mahecaday ci Yihofa mihaen micada tamiyanan, itini kahacecay a saaroˈan i harateng niyam misamadahan ni Yihofa miˈamet i kamay ko niyah, ho madipot Ningra. Awaay ko manan kacangoˈotan niyam, nolatekay o iraay niyam mataˈlifayto saali niyam. Roma i, Malohemay Malitengay i Congpo tada siniˈadaay tamiyanan, matinakoay niyam ko kaolah ato pidama ni Yihofa.

Ankaytelin: Maharatengay ako ko cecay a tinakoan to pidimokos ni Yihofa. O cecay romiˈad macadaay ako ko tingwa, o wama ako i Reitin pakidemay ko adada a miniwing. Itiya o kangaˈayho no lifong ni Maci, kamayanho awa ko ˈicel no tireng. Awaay ko payci niyam sapiˈaca to sapikalic to hikoki a paya, mansa sapipaˈacaaw to tosiya. Itiya i, macadaay niyam ko tosa a tingwa. O cecay a mararamoday pakatengil to pakayraan niyam, patingwaay sapipadamaaw cangra tamiyanan miˈaca to cecay sapikalic to hikoki a paya. O roma tingwa i, o matoˈasay fafahiyan salikaka, pasowal cingra iraay ko mahopeday no niyah a payci, oha sapafeli to cisaaliay a salikaka. Ilalomaˈ no pina ehon i, padamaay ci Yihofa tamiyanan miremo to pasangar!—Hipray 13:6.

Mitikol miharateng to 50 miheca miemin to toki matayal, mananamay namo ko manan hani?

Ankaytelin: Mananamay ako, ‘ano padadotoc a rihadayen, misarocod a mitiˈer [ci Yihofaan] i, o caciˈicelto.’ Pakasoˈlinay kami Cingranan to hamamipadama Cingra tamiyanan. (Isaya 30:15; 2 Rayray 20:15, 17) I kahacecay a saaroˈan niyam misaˈicelay kami matayal saki ci Yihofaan, telocto i, matomesay ko sapalemed, oniya sapalemed i roma a demakan i, cowa ko mamalifok niyam.

Maci: Mananamay ako a masakalimlaan i, ano o mananto ko malitemohay a demak, oha mamitiˈer ci Yihofaan, nengnengen toha sasamaan Cingra padama takowanan. (ˈOlic 37:5) To kahacecay palaˈosiay ci Yihofa to mikiˈokan no Niyah, padama takowanan miremo to pasangar. Nohatini, itiniay kami i Pitil no Miyanmar matayl. Itini faelohay a saaroˈan, kamayan maˈaraw niyam to padadotocay ci Yihofa midama tamiyanan.

Mahemekay kami pakaˈaraw to ˈalomanay kaemangay ciharatengay matongal a matayal saki ci Yihofaan, makalimay kami mahecad cangra tamiyanan, matinako ko madimadiay a olah ni Yihofa. Pakasoˈlinay kami, ano icowato cangra a mapaloma, wa padamaen ni Yihofa cangra ira ko minaroˈan itira.