Mikangodo to Tao

1. Misamaanay hano makalim kangodoen no tao kita hani? (Taneng 22:1)

KITA kahacecay a tamdaw makalimay kangodoen no tao, samanen o matatodongay a saali no tamdaw konini. Ano mikangodo ko tao kitanan, wa mahemeken ko pising raheker ko falocoˈ. Mansa sanay ko Fangcalay Cudad: ‘Tahacada to mikangodo ikakaay to tahacada to ekim ato linkim.’—ˈOsien ko Taneng 22:1.

2-3. (1) Nolatekay mikangodo to tao hano cowa ka dolo hani? (2) Oniya lalakaw mamilengo to manan?

² Nolatekay mikangodo to tao cowa ka dolo. O cecay lalangian i, madoloay kita maˈaraw ko dangoc no tao. Roma a lalangian i, itini kaˈoripan ita a lintad, ˈalomanay ko tamdaw cowa mikangodo to tao. Kawra cowa ka ngaˈay mihaen ko waywayan ita, misamaanay hani? Samanen makalimay ci Yihofa kitanan mikangodo to ‘masakenakenaay a tamdaw.’—1 Pitiro 2:17.

³ Oniya lalakaw mamilengo mikangodo to tao o manan ko tatodong, ato sasamaan kita mikangodo to paro no lomaˈ, salikaka ato cowa ko Krisciyang a tamdaw. Oniya lalakaw wa misongilaˈ a mitadtad, sasamaan kita i cowa ka dolo a pakayraan mikangodo to tao.

MIKANGODO TO TAO O MANAN KO TATODONG?

4. Mikangodo to tao o manan ko tatodong hani?

⁴ Mikangodo to tao a tatodong i, pakayniay i capeling no cecay a tamdaw, malaˈosiay a demak anca o saaroˈan a misakareteng cingranan, hanaca tano mikangodoay a waywayan micada cingranan. Mihaenay i, mikangodoay milingatay to samaanay kita minengneng to tao ato samaanay micada to tao. Haratengenho, o mikangodoay hananay nai mikifalocoˈay.—Matay 15:8.

5. O manan ko mikowaday kitanan mikangodo to tao hani?

⁵ Makalimay ci Yihofa kitanan mikangodo to tao, tinakoen makalimay Cingra kitanan mikangodo to ‘cifangdangalay no hekal.’ (Loma 13:1, 7) Kawra o roma a tamdaw alatek wa saan ko sowal: “Ano citatodongay ko tao kangodoen ako i, mamakalim kako mikangodo cingranan.” Samaanay ko harateng iso hani? Malo sikawdan ni Yihofa, mikangodo kita to tao, cowa ko pakayniay i ngaˈayay tatiihay ko midemakan no tao. Mikangodo kita to tao, samanen o maolahay kita ci Yihofaan, makalimay midemak to kaolahan Ningra a demak.—Yosuwa 4:14; 1 Pitiro 3:15.

6. Ano cowa pikangodo ko tao kitanan, ngangaˈayho kita mikangodo to tao han? Tadtaden hena. (Nengnengen ko coka.)

⁶ Sanay ko harateng no roma tamdaw: “Soˈlin cowa pikangodo kora tamdaw takowanan, kamayan mikangodo kako cingranan, soˈlinay madangar konini han?” Hayi, mamadangar konini, nengnengen ko pina tinakoan. Pakangodoan no wama ci Sawlo ci Yonatan ikaˈayaw no ˈalomanay. (1 Samuil 20:30-34) Kawra kamayan mikangodo ci Yonatan ci Sawloan, kalacafay cingranan a mifolaw, tangasa mapatay i pifolawan cingra. (Kasadakan 20:12; 2 Samuil 1:23) Sakakaay Saysi ci Ili na pakidemay ko pirikec ci Hanaan, samanen malasangay cingra sanay ci Ili, kawra kamayan mikangodo ci Hana a pacaˈof ci Ilian. Mihaen ko demak ni Hana cowa ko madoloay, samanen mafanaˈay ko ˈalomanay, cowa ko ngaˈayay a Sakakaay Saysi ato wama ci Ili. (1 Samuil 1:12-18; 2:22-24) Tarokos ci Pawlo itini i Atin, milikafay ko itiraay tamdaw cingranan, ‘sa caciyaw’ sanay cingra. (Dmak 17:18) Soˈlin mahaen, kamayan mikangodo ci Pawlo cangranan, damsayay ko sasowalen cangranan. (Dmak 17:22) Oniya tinakoan paihkalay, soˈlin cowa ka madolo ko pakayraan, ano maolah kita ci Yihofaan, mikifalocoˈ mikangodo Cingranan, ngangaˈayho kita mikangodo to tao. Dotoc mamilengo, o cima ko kakangodoen ita, ato hano kakangodoen cangra.

MIKANGODO TO PARO NO LOMAˈ

7. Misamaanay mikangodo to paro no lomaˈ hano cowa ko madoloay hani?

⁷ Hano cowa ko madoloay? To romiˈamiˈad malacafayay maˈorip ko paro no lomaˈ, maˈaraway ko kangaˈayan ato dangoc no paro no lomaˈ. O roma paro no lomaˈ iraay ko adada, pasangaray dimokosen; o roma paro no lomaˈ madoloay pakidem a cariraw, pasangaray kalacafayen; o roma i, o sasowalen ato midemakan midokaˈay to tamdaw. O mahaenay a pakayraan alatek pasangaray makakangodo ko paro no lomaˈ, telocto i, nao rihadayay sinowayay a lomaˈ, ˈarawhan sasifod sanay awaayto ko dipayal. O paro no lomaˈ mahecaday to tireng no tamdaw. Adada no tamdaw i, cowato ka tariktik ko tatirengan. Mahecaday, ano cangoˈotay ko mikangodoay no paro no loma, awaayto ko dipayal no paro no lomaˈ. Kawra o adihayay a adada maherek mipaising ikor, palidlid sato a maadah, oha maminanam ko paro no lomaˈ a makakangodo halo kalangaˈay ko kalalaˈed.

8. Hano mikangodo to paro no lomaˈ tada masakalimlaan hani? (1 Timoti 5:4, 8)

⁸ Hano mamikangodo to paro no lomaˈ? (ˈOsien ko 1 Timoti 5:4, 8.) Masowalay ni Pawlo i 1 Timoti, sasamaan ko paro no lomaˈ masasiciharateng, o sowal ningra mikangodo kita to paro no lomaˈ sakakaay a lalangian cowa ko pakayni i ˈinorong, ao papatalahkal to ‘madimadiay midoko a pakayraan,’ tatodong i, mikangodo kita to paro no lomaˈ milingatay to midokoay demak sanay ko pinengneng ita, hano mahaen ko sowal hani? Samanen o limasmas no paro no lomaˈ o ci Yihofa ko patirengay. (Ifiso 3:14, 15) Mikangodo kita to paro no lomaˈ, o mikangodoay to patirengay to paro no lomaˈ a Kawas ci Yihofa. Iraay ko lalangian ita a mikangodo to paro no lomaˈ no niyah.

9. O mararamoday sasamaan makakangodo hani? (Nengnengen ko coka.)

⁹ Sasamaan mikangodo to paro no lomaˈ? Mikangodoay to fafahi a faˈinay, ano i papotalto anca i lomaˈto, mamisalimla to fafahi, hato misaodoˈan ko niyah wasa ko fafahi. (Taneng 31:28; 1 Pitiro 3:7) Cowa ka misetiˈ cingra a mapoˈi to fafahi, cowa pakangodo to fafahi, hato misafayaˈan ko niyah sa ko fafahi. Itiniay i Arkentin a faˈinayan salikaka ci Ariela sanay cingra: “Samanen adadaay ko fafahi ako, nolatekay o sasowalen ningra midokaˈay takowanan. Ano mahaen i, patalipaˈelalay kako to niyah, cowa ko mahaen ko nafalocoˈan ningra. Ano marawraw ko pakayraan i, miharatengay kako to 1 Korinto 13:5, patalipaˈelalay ko sinael takowanan, aka a tano mariˈangay a sowal a pacaˈof, pafeliayho takowanan to ˈicel, padadotoc tano mikangodoay a waywayan masasowal to fafahi.” (Taneng 19:11) O mikangodoay to faˈinay a fafahi, wa tano tawlikay a sasowalen a milengo to faˈinay. (Ifiso 5:33) Cowa ka milikaf cingra to faˈinay, cowa ka mapoˈi to faˈinay, samanen mafanaˈay cingra o mahaenay a waywayan mahecaday to citaˈiay a marad, mamipalak to raramod no niyah. (Taneng 14:1) O cecay itiniay i Itali a fafahiyan salikaka, o faˈinay ningra maceriday a macarirawen. O sowal ningra: “Nolatekay, o faˈinay ako pakidemay ko pinengneng to awaay ko maanan a demak saan ko harateng ako, mansa pasangaray kako mikifalocoˈ a mikangodo cingranan, mikitini i sasowalen ako ato pising madoloay mahapinang toniya demak. Kawra ikorto i, maceriday kako kalacafay to mafanaˈay mikangodo to tao a tamdaw, mihaen madoloayto kako tano mikangodoay a waywayan micada to faˈinay.”

10. Malo wawaay sasamaan mikangodo to wama wina hani?

¹⁰ Kaemangay, mamidofdof to patirengan no wama wina a rikec no lomaˈ. (Ifiso 6:1-3) Kangodoen a masasowal to wama wina. (Kasadakan 21:17) Malitengto ko wama wina ikor, malo wawaay oha mamisarocod ciharateng a midimokos cangranan. Nengnengen ko tinakoan no fafahiyan salikaka ci Mariya. Cowa ko Misawacayay Tamdaw ni Yihofa ko wama ningra, adada cingra ikor kaliketeray, tada marorayay ci Mariya midimokos cingranan. Sanay ci Mariya: “Mitolonay kako micangacang to sapadama ni Yihofa, cowa aca i falocoˈ a mikangodo to wama, i sasowalen ato waywayan paihkalay to mikangodo. O harateng ako, ano palimoˈotan ni Yihofa takowanan mamikangodo to wama wina, oha papafelien Ningra to ˈicel kako mihaen to demak. Ikor mahapinangay ako, soˈlin cowa ka falic ko wama, kamayan kako mikangodo cingranan.” Haratengen, itini i cowa ka dolo a pakayraan kita, kamayan misaˈicel mikangodo to paro no lomaˈ, mihaen o mikangodoay kita to kakarayan Wama ci Yihofaan.

MIKANGODO TO SALIKAKA

11. Mikangodo to salikaka, nolatekay hano cowa ko madoloay hani?

¹¹ Hano cowa ko madoloay? Soˈlin misarocoday ko salikaka midoedo to palinian no Fangcalay Cudad maˈorip, kawra nolatekay o roma salikaka pakararaway, paoraf kitanan, anca cowa ka cisidaˈit kitanan. Ano iraay ko lalangian ita a maketer to salikaka, sapipadadotocaw mikangodo cangranan cowa ko madoloay. (Kolosay 3:13) Ano mahaen, sasamaan ko demak ita hani?

12. Hano mamikangodo kita to salikaka hani? (2 Pitiro 2:9-12)

¹² Hano mamikangodo to salikaka hani? (ˈOsien ko 2 Pitiro 2:9-12.) Itini saka tosa tikami ni Pitiro sanay, itiyaay a kasakopang no Krisciyang o roma tamdaw mitonganganay to ‘ciˈdilay a tamdaw,’ o malohemay malitengay no kasakopang. Dotoc masowalay ni Pitiro, maˈaraway no coyoh koniya demak i, samaanay ko harateng. Saan cingra, onini a coyoh ‘samanen mikangodoay ci Yihofaan,’ mansa cowa ka somowal to milikafay a sowal. Soˈlin misatakaraway koya tamdaw, kawra malefotay a coyoh cowa pakayni toniya demak eca ka pikangodo cangranan, cowa ka tano tatiihay a sasowalen a mirikec cangranan. Patorodan no coyoh koniya demak ci Yihofaan, papirikec a misawkit Cingra cangranan. (Loma 14:10-12; nengnengen ko Yuta 9.) Saharateratengen, mitowakangay to malohemay malitengay a tamdaw, mikangodoay ko coyoh, pakayra tora maolahay ci Yihofaan a salikaka, wa mangalef ko nika ngodo ita cangranan, cowa ka hatira han? Itini i kasakopang kita ‘talaˈayaw a makakangodo,’ paihkalay koni to mikangodoay kita ci Yihofaan.—Loma 12:10.

13-14. Sasamaan kita mikangodo to salikaka hani? Patinakoen hena. (Nengnengen ko coka.)

¹³ Sasamaan mikangodo to salikaka? Malohemay malitengay, ceriden tano olah a pakafanaˈ to tamdaw. (Filimon 8, 9) Ano mamipalimoˈot kamo to tamdaw, haratengen pairaen ko sidaˈit, hamaan mangolaw mihaen to demak. Fafahiyan salikaka, wa ngaˈay kamo paira to dipayal ato mikangodoay i kasakopang. O cecay pakayraan i, aka pitengil, cowa ka pasowal to misaosanayay anca mitonganganay to tamdaw. (Titus 2:3-5) Kita kahacecay tamdaw ngangaˈay madadama to malohemay malitengay, hanaca paihkal to miakoˈiday cangranan, samanen misongilaˈay cangra misikay to saˈopo, misaˈicel mikerid to mitosilay, misarocodayho padama toya ‘mapolinay’ a tamdaw.—Kalatiya 6:1; 1 Timoti 5:17.

¹⁴ Nengnengen ko nalifetan no fafahiyan salikaka ci Rocio. Kinacecayay, o malohemay malitengay painiay cingranan, ikor pasangarayto cingra mikangodo tora malohemay malitengay. Sanay ci Rocio: “Pakidemay ko saali ningra takowanan sanay ko harateng ako, mansa i lomaˈ kako maceriday milikaf cingranan. Soˈlin ikaˈayaw no tao kako i, hato awaay ko manan, kawra i falocoˈ ako o mararaway cingra, cowa ka pitengil to sowal ningra.” O manan ko padamaay ci Rocioan a misalof hani? Sowal ningra: “Miˈosi kako to Fangcalay Cudad i, maˈosiay ko 1 Tisalonika 5:12, 13. Mahapinangay ako cowa ka hecad kako to misowalan no sinael a mikangodo toniya faˈinayan salikaka, mansa cowa ka rihaday ko makapahay falocoˈ ako. Mitolonan ako ci Yihofa, mikitini mitepangan no likakawa ita, mikilimay kako to padama takowanan misalof to waywayan a lalakaw. Salikor cipinangayto kako, cowa ko mararaway korira faˈinayan salikaka, ao misatakaraway ko waywayan ako. Nohatini cipinangayto kako, mikangodo kako to tao milingatay to misapoeneray kako hokira. Manaokaniw papadadotocho kako a macakat, kawra mahapinangayto ako, ano misaˈicel ko niyah mikangodo to tao, mangalefto ko nika ngaˈay ako to kalalaˈed ci Yihofaan.”

MIKANGODO TO COWA KO KRISCIYANG A TAMDAW

15. Mikangodo to cowa ko Krisciyang a tamdaw, nolatekay hano cowa ko madoloay hani?

¹⁵ Hano cowa ko madoloay? Ano mitosil i, maceriday kita malitemoh ko cowa ka olah to soˈlinay kimad a tamdaw. (Ifiso 4:18) O roma tamdaw mafiyoray no kalomahadan, mapiliˈay mitengil to mitenakan ita a lihaf. I picudadan anca i katayalan, o singsi anca tawki alatek pakidemay ko saali, o cafay micudad anca cafay matayal alatek pasangaray kalacafayen. Palidlid sato i, alatek pasangarto kangodoen ita koniya cowa ko Krisciyang a tamdaw.

16. Hano mamikangodo to cowa ko Krisciyang a tamdaw hani? (1 Pitiro 2:12; 3:15)

¹⁶ Hano mamikangodo to cowa ko Krisciyang a tamdaw? Haratengen, misinanotay ci Yihofa sasamaan kita micada to cowa ko Krisciyang a tamdaw. Tarokos ci Pitiro patalipaˈelalay kitanan, o roma tamdaw maˈaraw ko ngaˈayay waywayan no mita i, alatek mamatemer ko falocoˈ nangra, telocto i, ‘panokayay to ˈdil to Kawas.’ Mihaenay, palimoˈotay cingra kitanan midopo to pihakelongan no niyah i, ‘damsayen ko waywayan,’ ‘tangongol ko pikangodo’ to tamdaw. (ˈOsien ko 1 Pitiro 2:12; 3:15.) Ano pitadtad kita to pihakelongan to hankang anca roma tamdaw i, kangodoen cangra, mahecad kita itini kaˈayaw no Kawas. Samanen, o manan ko sowal ita ato samaanay ko sowal ita, mitengilan minengnenan no Kawas. Miharateng toniya demak, wa ciˈicel kita mikangodo to cowa ko Krisciyang a tamdaw.

17. Sasamaan mikangodo kita to cowa ko Krisciyang a tamdaw hani?

¹⁷ Sasamaan mikangodo to cowa ko Krisciyang a tamdaw? Mitosil i, hamaan o malo idahiay a tamdaw, hamaan pakayni i cowa ka fanaˈ cangra to Fangcalay Cudad a misakahmaw cangranan. Haratengen, itini pinengneng ni Yihofa o masakalimlaan cangra, iraay ko ngaˈayay nangra to hahatatanamen ita. (Hakay 2:7; Filipi 2:3) Ano ira ko tamdaw pakayni pihakelongan iso a milikaf tisowanan, aka pacolien, pakangodo a milikaf cingranan. (1 Pitiro 2:23) Ano cowa ka tatodong ko sowal iso i, tangsolen miliˈay. Roma i, sasamaan kiso i katayalan mikangodo to tao hani? Malalok a matayal, tawliken a minengneng ko mikeriday ato cafay matayal. (Titus 2:9, 10) Malalok kiso a matayal, cowa pisamangah misakaniw to tamdaw, ano mihayda ko tao tisowanan hokira, mamihaday ci Yihofa tisowanan.—Kolosay 3:22, 23.

18. Misamaanay mikangodo to tao hano o ciepocay hani?

¹⁸ Soˈlinay adihayay ko lalangian ita a mikangodo to tao! Mikangodo kita to paro no lomaˈ ato salikaka, o mikangodoayto i kakarayan a Wama ci Yihofaan. Mikangodo kita to cowa ko Krisciyang a tamdaw, alatek pakayni i makapahay a waywayan no mita a matemer cangra, ho panokay to ˈdil cangra i Kawas. Soˈlin cowa pikangodo ko tao kitanan, wa kamayan misaˈicel kita a mikangodo cangranan o ciepocay koni. Misamaanay hani? Samanen wa palemeden ni Yihofa kita, mikiˈokay Cingra saan: ‘Mikangodoay Takowanan, wa mikangodo Kako cingranan.’—1 Samuil 2:30.