Pinengnengan to lalakaw no Mitosilay ato Nikaˈorip Rayray no Saˈopo
SAKA 6 FOLAD 3-9 ROMIˈAD
O ODOˈ KO KIMAD NO KAWAS | KALATIYA 4-6 FEDENGAN
O Cecay Kalimlaan a Sapatinako
(Kalatiya 4:24, 25) O sapatinako konini. Onini a tatosaay a fafahiyan i, o todong no tosaay a katatelekan. O cecay nonini i, nai Sinay a lotok a masadak. Ci Hakar konini. O nihofocan ningra i, o kuli a maemin. 25 O todong no i Arapiyaay a Sinay a lotok ci Hakar. O tatodong no aniniay a Yirusalim cingra. Nawhani malakuli cingra ato wawa ningra.
it-2 574 fiedac 5 fatac
Hakar
O sowal no tarokos ci Pawlo iraay ko sapatinako a tatodong noni maˈoningay sanay. Ci Hakar o sapatinako to ˈaˈirangan a Israil tamdaw, itiniay i lotok no Sinay patireng to Rikec a katatelekan aci Yihofa, malo no Kawas a finawlan; ilaeno noni katatelekan “mihofocan wawa o kuli a maemin.” Tona o ciraraway ko Israil tamdaw, cowa ka masaheci nangra mitoor ko Rikec a katatelekan. Telocto i, cowa ka mala pasalatay a tamdaw ilaeno no Rikec a katatelekan cangra, masawkitay no raraw, to mamapatay, mihaenay a malokuli cangra. (Yohani 8:34; Loma 8:1-3) Oya Yirusalim i lintad ni Pawlo, ci Hakar ko patinakoay. Patinako to ˈaˈirangan a Israil tamdaw, oniya finawlan ato wawa ningra o malakuliay. Kawra oya nai fangcalay saocor a hofocen a Krisciyang, o wawa noya “ikakarayanay a Yirusalim”, patinakoay to o fafahi no Kawas. Mahaen oya pasalatay a fafahiyan ci Sara, oniya “ikakarayanay a Yirusalim” cowa ka malakuli. O wawa ningra koya “ikakarayanay a Yirusalim”, pakayniay i kanonoˈan Wawa no Kawas a mapasalat cangra, kawra maroeroay no wawa noya malakuliay a wawa no Yirusalim, mahaen noka piroero ni Ismail ci Isakan. Nikawrira ci Hakar ato wawa ningra ci Ismail malaplapay, patinakoay toya ˈaˈirangan a Israil tamdaw mifalahanto ni Yihofa cangra, cowato ko finawlan no Kawas.—Kalatiya 4:21-31; nengnengen ko Yohani 8:31-40.
(Kalatiya 4:26, 27) Oya ikakarayanay a Yirusalim i, [o pasalatay] caay ko kuli, o ina ita cingra. 27 O sowal a matilid i Fangcalay Cudad i, “Kalipahak kiso o maˈasicay a fafahiyan! Pilekal a pangihaˈ a lipahak kiso o caay ka fanaˈ to ˈatˈat a fafahiyan! Nawhani ikaka no nika ˈaloman no wawa no caay piliyas ko faˈinay a fafahi ko nika ˈaloman no wawa no nisawadan no faˈinay a fafahiyan,” saan.
w14 10/15 10 fiedac 11 fatac
Pairaen ko Fanekfekay noka Pakasoˈlin to Hongti Kitakit no Kawas
11 Oya katatelek no Kawas aci Apraham, itiniay i teloteloc ningra a malaˈosi a milayap cangra to mikiˈokan a sera. Kawraan, malaˈosiayho i noˈadingoan a pakayraan. (Kalatiya 4:22-25) Sakakaay a teloc ni Apraham o ci Kristo, saka tosa i, oya 144,000 mapasimalay a Krisciyang ko mitoroan sanay ko sapatemer no Kawas ci Pawloan. (Kalatiya 3:16, 29; Paˈarawan 5:9, 10; 14:1, 4) Ya “teloc” noya “fafahiyan” i, oyanan “ikakarayanay a Yirusalim”, oyanan madimadiay a coyoh ko palaˈosiay toni ikakarayanay a likakawa no Kawas. (Kalatiya 4:26, 31) Pakayra toya katatelekan ni Apraham, o “teloc noni fafahiyan” o papalemed to tamdamdaw.
(Kalatiya 4:28-31) Salikakaaw, matiya ci Isak kamo. Nawhani o nano nisowalan no Kawas ko saka malawawa ningra kamo. 29 Nikawrira, iti:yaho i, kariˈangen no tamdawan a niharatengan a nihofocan a wawa ko nano [fangcalay saocor] a nihofocan a wawa. Mahaen ito anini. 30 Maan saan ko sowal i Fangcalay Cudad saw? “Fahfahen koya kuli a fafahiyan ato wawa ningra. Nawhani o wawa no kuli i, caay ka ngaˈay a mikapot to wawa no caay ko kuli [pasalatay a fafahiyan] a mirocok,” saan. 31 Orasaka, salikakaaw, caay ko wawa no kuli kita. O wawa no [pasalatay fafahiyan] kita.
Kadkaden ko Noˈadingoan Odoˈ
(Kalatiya 4:6) O sapahapinangaw no Kawas to nika o wawato Ningra kamo saka, ocoren no Kawas ko [fangcalay saocor] no Wawa Ningra a papicomod i falocoˈ ita a papi “Ama, Wamaaw!”
w09 4/1 13 fiedac
Mafanaˈay Kiso Han?
Mitolon ci Yis hano “Ama, Wamaaw” saan cingra ci Yihofaan hani?
Ora “ama” hananay no Arami a sowal tatodong, o “wama” anca “Wamaaw” o sanay. Kina toloay masadak i Fangcalay Cudad koni sowal, itiniay i pitolon ci Yihofaan a kalasaka dademaken. Hay, o manan ko tatodong nora “ama” sanay hani?
Fangcalay Cudad Hakacudad (no Padaka) saan a mitilid: “Itini i lintad ni Yis, to kalo a caciyaw no tamdaw “ama” hananay ko wama. Mihaen to sowal paihkalay to nika kedec no kalalaˈed no wawa ato wama a misakareteng to wama.” Caho ka fanaˈ ko wawa caciyaw i, salakatay a kafanaˈan no wawa a sowal koni. Kina cecayay mihaenan ni Yis “Ama, Wamaaw” hananay ci Yihofa i pitolon ningra, tiya ˈayaw no mamapatay to pina a tatokian itini i Kisimani.—Marko 14:36.
Fangcalay Cudad Hakacudad (no Padaka) somowalay, itini i lalintadan no Krisiya-Loma a mitilidan no hekal tamdaw a cudad, awaay maˈaraw ko mahaenay “ama” sanay a tilid, samanen mihaen a miama to Kawas hato cowa ko mangodoay a pakayraan sanay. Nikawrira mihaen ci Yis i pitolon ningra paihkalay to nika kedec no kalalaˈed ato Kawas. Onini “ama” sanay a tilid kina tosaay masadak i tikami ni Pawlo. Mahapinangay itini to kalasaka dademakay ko saka cecay hahekalan a Krisciyang. —Loma 8:15; Kalatiya 4:6.
(Kalatiya 6:17) Iikor nonini i, akato pakaroray ko cimacima namo i takowanan. Nawhani ira i tireng ako ko piˈdac no dokaˈ to kacipinangan to nika o kuli ni Kristo kako.
w10 11/1 15 fiedac
Mafanaˈay Kiso Han?
Sowal ni Pawlo to iraay i tireng ako ko piˈdac no dokaˈ to kacipinangan to nika o kuli ni Kristo kako sa cingra, o manan kora “piˈdac no dokaˈ” hani?—Kalatiya 6:17.
▪ Saka cecay hahekalan Krisciyang pakayra tora “piˈdac no dokaˈ” sanay a sowal ni Pawlo, alatek pinaay ko maharatengay nangra. Itini nolitengan ano macepet ko sofitay i piloodan, o mitakaway to dafong no sefi ato milaliway i pirofoan a mapalitay, mihaenan a micedet saka ira no piˈdac no dokaˈ i tireng nangra. O tamdaw ano ira ko matiniay a tahapinangan i, o mipakangodoay a demak kora.
Nikawrira, nolatekay o tadamaanay a tahapinangan hananay no roma a tamdaw minengneng koni. Nolitengan tano ninian a tahapinangan a paihkal to mitaˈongay to cimanan a kawas cangra. Patinakoen, o cecay Citing no Padaka sanay ko sowal: “O Siriya tamdaw ano patafangay to tireng i ci Hatatan aci Atakatisan a kawas i, mihaenan a micedet ko tahapinangan i kamay anca i liˈel nangra . . . O mitaˈongay ci Tiyonisosan a kawas i, micedetan ko sano papahay no ˈemoy a pinaloma.”
O sowal no ˈalomanay pakayra tora pidac i tireng ni Pawlo, tona kinapinapinaay a masetiˈ cingra saka materek ko matiraay a dokaˈ sanay. (2 Korinto 11:23-27) Kawra ora sowal ni Pawlo mitoroay tora nokaˈorip ningra a mala Krisciyang a ira ko mahecaday o pidac a mahapinang alatek.
Miˈosi to Sinael
(Kalatiya 4:1-20) Romasato a sowal ako i, yo o wawaho ko mamirocok to dafong no mama i, talacowa ono ningra koya dafong a maemin, nikawrira, malecad ato kuli cingra. 2 Nawhani makowan no midipotay ato misimaway koya wawa tangasa i nipatonekan no mama ningra a romiˈad. 3 Malecad tonini kita. Yo kaemangho ko pitoor ita to Kawas i, makowan no sifanaˈ no hekal kita. 4 Nikawrira, yo maraodto ko nipatonekan no Kawas a romiˈad i, ocoren no Kawas ko Wawa Ningra. Pakaynien Ningra i fafahiyan ko pihofoc cingraan. Makowan no Rikec ko ˈorip ningra. 5 Onini i, o sapitedalaw ningra to tamdaw a paliyas nai sakowan no Rikec. Ta mangaˈay kita a malawawa no Kawas. 6 O sapahapinangaw no Kawas to nika o wawato Ningra kamo saka, ocoren no Kawas ko todong no tireng no Wawa Ningra a [fangcalay saocor] a papicomod i falocoˈ ita a papi “Ama: Wamaaw!” titaanan. 7 Orasaka, caayto ko kuli kamo, o wawato no Kawas kamo. Tona o wawato no Kawas kamo saka, o papafelien no Kawas kamo to dafong Ningra. 8 Yo caho ka fanaˈ kamo to Kawas iti:yaho i, malakuli no caay ko soˈlinay a kawakawas. 9 Nikawrira, mafanaˈto kamo to Kawas anini. Ikaka ko nika fanaˈ no Kawas i tamowanan. Nawiro pasayra haca kamo i tadancaay, awaay ko epoc a lekakawa no lisin saw? Nawiro mangalay kamo a miliyaw a malakuli nangra saw? 10 Maˈimer kamo to romiˈad ato folad ato mihecaan ato kasaˈowac no mihecaan. 11 Maroray kako a miharateng tamowanan. Matalaw kako to kalasawadan noni tayalan ako i tamowanan. 12 Salikakaaw, ngitangiten ako kamo, nanay, matiya o falocoˈ ako ko falocoˈ namo. Nawhani matiya o falocoˈ namo ko falocoˈ ako. Awaay ko cecacecay aca a tatiihay a demak namo i takowanan. 13 Mato nika fanaˈ namo, o sakapipatenak ako i tamowanan isaˈayaw i, o nika adada no tireng ako. 14 Talacowa mapakaroray no adada ako kamo, nikawrira, caay piepec, caay ka ˈosi kamo takowanan. Matiya o mihamhamay to coyoh no Kawas, matiya o mihamhamay ci Yis Kristoan ko nipihamham namo i takowanan. 15 Talacowa sato koya lipahak namo itiyaho saw? Pasowal kako to pakayniay i tamowanan. O harateng namo itiya i, ano mamangaˈay a dicohen namo ko mata no tireng namo i, sapafelian sa kamo i takowanan kiyami? 16 Anini sa i, caay pikilif kako i tamowanan. Saka, malaˈada namo kako haw? 17 O nika lalok no tao a patenak i tamowanan i, caay ko soˈlinay a falocoˈ nangra. O sapalaliyasaw nangra titaanan to sakalalokaw namo to saki cangraan. 18 O ngaˈayay ko nika lalok namo to ngaˈayay a demak. Caay ka ngaˈay yo itira kako i tamowanan a cecay a malalok kamo. O nika rarid namo a malalok to ngaˈayay a demak ko ngaˈay. 19 Wawaaw ako, miliyaw haca kako a matiya o maˈatˈatay a misemsem tangasa i kasafacoan ni Kristo i falocoˈ namo. 20 Ano mamaedeng i, tayra sa kako i tamowanan ta mafalicto ko harateng ako to pakayniay i tamowanan. Nawhani marawraw ko falocoˈ ako a miharateng tamowanan.
SAKA 6 FOLAD 10-16 ROMIˈAD
O ODOˈ KO KIMAD NO KAWAS | IFISO 1-3 FEDENGAN
“Mikowanay a Limasmas ni Yihofa ato Demak”
(Ifiso 1:8, 9) Wata: ko nika tadamaan no siniˈada no Kawas i titaanan. Pakaynien no Kawas i talolongay a taneng ato fanaˈ 9 ko nipilaheci to nafalocoˈan Ningra a pahapinang i titaanan to pakakemoday a lalahecien ni Kristo a nisahalakaan Ningra a demak.
it-2 158 fiedac 4 fatac
Pakakemoday a Nisahalakaan
Misiya Hongti Kitakit. Misaheciay somowal ci Pawlo to pakayniay to maanan kora pakakemoday a nisahalakaan. Itini i Ifiso 1:9-11 mitihedakan no Kawas kora “pakakemoday a nisahalakaan”, sowal sa: “Ano maraodto ko romiˈad i, itiya a milaheci ko Kawas tonini a nisahalakaan Ningra a mipalacecay i ci Kristoan to ikakarayanay ato ihekalay a maamaan a nisangaˈan Ningra. Saka, mato nipipaliˈayaw no Kawas yo misangaˈ Cingra to hekal ko nipipiliˈ titaanan a palafinawlan Ningra pakayni i nika lacecay ita aci Kristo. Madoedo no masamaamaanay a demak ko nafalocoˈan no Kawas.” Oniniya pakakemoday a nisahalakaan milingatay to mikowanay a limasmas no Kawas, oiyaan Misiya Hongti Kitakit. Itira tora sinael “ikakarayanay” hananay, oyanan mamikapot ci Kristoan a milayap to Hongti Kitakit a tamdaw; ora “iseraay a maamaan” hananay, oyaan mamicada to sakowan no Hongti Kitakit a iseraay a tamdaw. Pasowal ci Yis to nisawawaan ‘pasifanaˈan kamo to pakakemoday a nisahalakaan’ sa i, mahapinangay o milingatay to Hongti Kitakit no Kawas koniya demak.—Marko 4:11.
(Ifiso 1:10) Ano maraodto ko romiˈad i, itiya a milaheci ko Kawas tonini a nisahalakaan Ningra a mipalacecay i ci Kristoan to ikakarayanay ato [iselaay] a maamaan a nisangaˈan Ningra.
w12 7/15 27-28 fiedac 3-4 fatac
“Misaˈopoay ci Yihofa to Finawlan Ningra”
3 Ci Yihofa pahecaday to araaw Ningra a dademak. Mankora, “maraodto ko romiˈad” i, midemakayto ko Kawas to ‘mikowanay a limasmas’ Ningra, palacecay to polong a nisangaˈan malo cecay taˈangayay a paro no lomaˈ. (ˈOsien ko Ifiso 1:8-10.) Oniya mikowanay a limasmas tosaay ko demak. Saka cecay i, palisopsopay to mapasimalay a Krisciyang, tayra i kakarayan milifok to midaˈocay ˈorip, itiniay i pikerid noˈadingoan a kakeridan nangra ci Yis Kristo a matayal. Itiniay isaka 33 miheca to Kocinsic misatapang palisopsop tora tatayra i kakarayan mikapot ci Kristoan a mikowanay a tamdaw, itiyaay a misatapang koni ‘mikowanay a limasmas.’ (Dmak 2:1-4) Tona kinafalahay to ˈorip ci Kristo, pasadak to sapatefoc, pala moecelayto hananay no Kawas ko mapasimalay Krisciyang, ngangaˈay milifok to midaˈocay ˈorip. Mahapinangayto nangra to mahemekay milayap ko Kawas cangranan, malo “wawa no Kawas.”—Loma 3:23, 24; 5:1; 8:15-17.
4 Saka tosa demak nora mikowanay a limasmas i, palisopsopay toya aitini iseraay a lakoing maˈorip a tamdaw, mamicada to sakowan no Misiya Hongti Kitakit ni Kristo cangra. Oya ‘taˈangayay ˈopo a tamdaw’, o salakatay to mamaˈorip i lakoing cangra. (Paˈarawan 7:9, 13-17; 21:1-5) Ilalomaˈ no pikowan ni Kristo to 1,000 miheca, masa walwalay a patikolay maˈorip a tamdaw, mamikapot cangra to taˈangayay ˈopo maˈorip i sera. (Paˈarawan 20:12, 13) Irato ko patikolay maˈorip a tamdaw miteko kitanan, o mamahapinangto ko nika kakelec no mita! Mahererekto ko 1,000 miheca i, “oya iseraay a tamdaw” mamicada to saikoray a sapalifet. Madimadiay tahatolas a tamdaw mamahemek ko Kawas a micada cangranan, malo iseraay a “wawa no Kawas” cangra.—Loma 8:21; Paˈarawan 20:7, 8.
Kadkaden ko Noˈadingoan Odoˈ
(Ifiso 3:13) Orasaka, nanay, caay ka toled ko falocoˈ namo to nika pades ako to saki tamowanan. O [sakaˈodingar] namo konini a maemin.
w13 2/15 28 fiedac 15 fatac
Remoen ko Sacoay, Milifok to Sakaˈodingaraw
15 Ano kodait kita midodof to araaw ni Yihofa i, papadama to tao a milifok to sakaˈodingar. Ta patikami ci Pawlo to Ifisoay kasakopang i, sanay ko sowal: “Orasaka, nanay, caay ka toled ko falocoˈ namo to nika pades ako to saki tamowanan. O [sakaˈodingar] namo konini a maemin.” (Ifiso 3:13) O nika pades ako o sakaˈodingar namo hano saan ko sowal ni Pawlo to Ifisoay a Krisciyang hani? Soˈliˈlin tahapades ci Pawlo, kawra kamayanay a makalim ko falocoˈ, kodait a matayal saki Ifisoay a Krisciyang. Ora nano demak ningra paihkalay to ciepocay ko nika malo Krisciyang, tada masaka limlaan. Ano sawad saan ci Pawlo to nika pades i, o romaromato a Krisciyang nao cowa ko masaka limlaan ko kalalaˈed aci Yihofa, mitosilay demak ato tokel no Krisciyang wa saan hakiya? Padadotoc a mihadidi ci Pawlo to pades, patahkalay to nika ciepoc no Kristokiyo, malo Krisciyang a mikinafalah to kihcod tada o ciepocay.
(Ifiso 3:19) Ano caacaay ko mamasongilaˈ no tamdaw a kafanaˈen ko olah ni Kristo i, nanay mafanaˈ kamo to olah ningra ta masongilaˈ no misongilaˈay a Kawas kamo.
cl 299 fiedac 21 fatac
“Kafanaˈen ko Olah ni Kristo”
21 Itini i Fangcalay Cudad no Krisiya a sowal, ora “kafanaˈen” sanay a tilid mahawpay ko “pakaynien i noka pilifet a mitanam” to maanan a demak sanay ko tatodong. Ano matira kiso ci Kristoan, awa ko ˈidi a mikinafalah to niyah, ciharateng to saali no tao, mikifalocoˈ a misodod to tamdaw, o mamafanaˈto to harateng ni Kristo. Pakaynien i soˈlinay a nilifetan no niyah, ‘mafanaˈ to mitaˈlifay to sifanaˈ a olah ni Kristo’. Misahecian ni Yis a mitodong ko Kawas. Aka a mapawan, ano hecaden ita ci Kristo i, o mamatongal ko noka piingid ci Yihofaan.
Miˈosi to Sinael
(Ifiso 1:1-14) O pakayniay i nafalocoˈan no Kawas a malatarokosay ni Kristo Yis kako ci Pawlo. Patilid kako i tamowanan o i Ifisoay a malacecayay aci Kristo Yis a soˈlinay ko falocoˈ a finawlan no Kawas. 2 Nanay mapalemed, maparihaday no Wama a Kawas ato Tapang a Yis Kristo ita kamo. 3 O aahowiden ita ko Wama a Kawas no Tapang a Yis Kristo ita. Nawhani pakaynien no Kawas i nika lacecay ita aci Kristo ko pipalemed titaanan to i kakarayanay a masamaamaanay a noˈadingoan a sapakalemed. 4 Iˈayaw no nika sangaˈ no hekal i, maherekto ko Kawas a mipiliˈ titaanan to sapalacecayaw titaanan aci Kristo a pala no Ningra. Ta makorac kita, ta awaay ko tatoroˈen Ningra a raraw ita. 5 Maolah ko Kawas i titaanan saka, pakaynien Ningra i ci Yis Kristoan ko pipalawawa titaanan. O nisahalakaan Ningra konini to sakalipahak Ningra. 6 O papahemeken ita ko Kawas to nika tadamaan no siniˈada Ningra. Nawhani padeteng sa Cingra a pafeli i titaanan to kaolahan Ningra a Wawa. 7 Pakayni i nika patay ni Kristo ko sakatedal ato sakahepol no raraw ita. 8 Wata: ko nika tadamaan no siniˈada no Kawas i titaanan. Pakaynien no Kawas i talolongay a taneng ato fanaˈ 9 ko nipilaheci to nafalocoˈan Ningra a pahapinang i titaanan, to pakakemoday a lalahecien ni Kristo a nisahalakaan Ningra a demak. 10 Ano maraodto ko romiˈad i, itiya a milaheci ko Kawas tonini a nisahalakaan Ningra a mipalacecay i ci Kristoan to ikakarayanay ato [iseraay] a maamaan a nisangaˈan Ningra. 11 Saka, mato nipipaliˈayaw no Kawas yo misangaˈ Cingra to hekal ko nipipiliˈ titaanan a palafinawlan Ningra pakayni i nika lacecay ita aci Kristo. Madoedo no masamaamaanay a demak ko nafalocoˈan no Kawas. 12 Orasaka, kami o saˈayaway a cifalocoˈ ci Kristoan ko papahemek to nika tadamaan no Kawas. 13 Halo amo a malafinawlan no Kawas. Matengilto namo ko soˈlinay a sowal, oya sapaˈorip tamowanan a Ngaˈayay a Ratoh. Saka, pasoˈlin kamo ci Kristoan. O matopaayto no Kawas kamo. O nano nisowalan no Kawas a [fangcalay saocor] ko sapitopa Ningra tamowanan to malo Ningra, 14 Onini a [Fangcalay saocor] ko kacipinangan ita to nika o mamalayap ita ko nano nisowalan no Kawas a sapafeli i finawian Ningra. O romasato, o kacipinangan ita konini to nika o mamisongilaˈ ko Kawas a mitedal to finawlan Ningra a pakonira. Orasaka, o hahemeken ita ko nika tadamaan no Kawas.
SAKA 6 FOLAD 17-23 ROMIˈAD
O ODOˈ KO KIMAD NO KAWAS | IFISO 4-6 FEDENGAN
“Caˈedongen a Maemin ko Nipafelian no Kawas a Sapilood a Rikoˈ”
(Ifiso 6:11-13) Caˈedongen a maemin ko nipafelian no Kawas a sapilood a rikoˈ to sakakiemel namo a misiˈayaw to safanaˈ no kakeridan no Palafoay. 12 Nawhani caay kono tamdawan ko nipilood ita. O milooday kita to tatiihay, o awaay a maˈaraw a mikowanay ato cisakowanay tonini a toˈmanay a hekal ato i kakarayanay a masamaamaanay a kawakawas. 13 Orasaka, caˈedongento ko nipafelian no Kawas a sapilood a rikoˈ. Ta ano ira ko karawrawan a romiˈad i, pakalowid kamo a micoˈay. Maedeng kamo a tomireng itira.
Kapah Tamdaw—Ka Tanektek a Miconged ci Akomaan
PALINIAN no tarokos ci Pawlo ko kaˈorip no Krisciyang to mangangataay pilood no sofitay to ˈada. Soˈlin o noˈadingoan ko pilood no mita, cowa ko soˈlinay, kawraan iraay ko ˈada materek. Ci Satan ato tatiihay coyoh mafanaˈay milood, taˈangayay ko ˈicel, sapilowidaw cangranan, cowa ko madoloay, mangalefay pasangar ko kapah a Krisciyang. Wa ngaˈay malowid no kapah koniya ciˈicelay a tatiihay coyoh han? Wa malowid nangra ko tatiihay coyoh, hanaca mangataayto a pakalowid! Pakalowid ko kapah tamdaw to ˈada, samanen pafelian ni Yihofa cangra to ˈicel. Cowa ko pitadiˈec aca nangra to Kawas, misadayayho a milood, mahecad o pahatatanaman a sofitay, micaˈedongay cangra to ‘sapafeli no Kawas polong a sapilood a rikoˈ.’—ˈOsien ko Ifiso 6:10-12.
(Ifiso 6:14, 15) Saka, pisaˈimer kamo a mipatala. Kao sowal no Kawas ko todong no safaked namo to tatelecan. Kao moecelay a pinangan no Kawas ko todong no sapatada namo to falohang. 15 Kao parihadayay a Ngaˈayay a Ratoh ko todong no cokap namo.
w18.05 28-29 fiedac 4, 7, 10 fatac
Kapah Tamdaw—Ka Tanektek a Micoged ci Akomaan
4 O minanaman ita a Kimad no Kawas, mahecaday o safaked to tatelecan, wa ngaˈay midipot to noˈadingoan ita, eca ka madokaˈ no mararaway sasowalen. (Yohani 8:31, 32; 1 Yohani 4:1) Mahecad o safaked to tatelecan ngaˈayay pakafit to karetengay a satada to falohang, ano matongal ko kaolah ita to soˈlinay kimad, wa madolo a micaˈedong to “sapatada to falohang,” makahi a midofdof to moecelay palinian no Kawas. (ˈOlic 111:7, 8; 1 Yohani 5:3) Cowa ka hatini aca, ano ihekal ko kacipinang ita to Kimad no Kawas, cowato ko mamangiyangi ko pasoˈlin no falocoˈ, timolo a milood to misafelitay a tamdaw.—1 Pitiro 3:15.
7 O moecelay a palinian ni Yihofa, mahecaday to satada no falohang, midipot to falocoˈ no mita. (Taneng 4:23) O sofitay no litengan, cowa ko tatano komaingay a marad ko sapisangaˈ to satada no falohang, mikotay to ˈatekakay a satada no falohang, mahecaday, cowa ko ngangaˈay kita tano niyah a palinian, mikotay to moecelay palinian ni Yihofa. Citolasay ko ˈicel ita a misaˈosi, awaay ko pakayraan midipot to niyah. (Taneng 3:5, 6) Mihaenay, ceriden ita misinanot to kapicaˈedong to noˈadingoan a satada no falohang, mihaen ngaˈ madipot ko falocoˈ.
10 Ano malalood ko sofitay misaaliay to ngaˈayay cokap, cicokap ko Krisciyang tinakoan a cokap, o sakangaˈay a patenak to rihadayay a ratoh. (Isaya 52:7; Loma 10:15) Kawraan, ano mitosil misaaliayho to timolo. 20 ko mihecaan ci Apu, sanay ko sowal: “Isalakat cowa ka timolo kako, tada mangodoay misawacay to cafay micudad, cowa ka fanaˈ to hano mangodo itiya. Kawra, nohatini mitosil to cafay micudad pairaay to hemek no mako.”
(Ifiso 6:16, 17) O romasato, kararid a mitatoy to sapatada o todong no pitiˈer namo ci Kristoan. Ta onini ko sapipadeng namo to nipaeferan no Palafoay a cinamalay a panaˈ a maemin. 17 Sakafongen ko kafong o todong no sapaˈorip no Kawas. Tatoyen ko funus o todong no nipafelian no [fangcalay saocor] a sowal no Kawas.
w18.05 29-31 fiedac 13, 16, 20 fatac
Kapah Tamdaw—Ka Tanektek a Micoged ci Akomaan
13 O paeferan ni Satan kitaanan a “cinamalay a panaˈ” o milingatay ci Yihofaan a mangah, tinakoen—cowa ka olah ci Yihofa tisowanan, awaay ko ciharatengay tisowanan, sanay a harateng. 19 ko mihecaan ci Iciyang, awaay ko kapo no niyah, sanay a miharateng, sanay ko sowal ningra: “Miraayay ci Yihofa takowanan, cowa ka kahi misawidang Cingra takowanan, sanay kako miharateng isalakat.” Ano ira ko mahaenay harateng i, samaanay ci Iciyang hani? Sanay cingra: “Mitongalay to pasoˈlin no falocoˈ ako ko saˈopo. Mirienang kako to saˈopo isaˈayaw aroˈ sanay i tadimocokan, cowa ka pacaˈof to salicay, awaay ko ciharatengay takowanan, sanay a miharateng. Kawra, misadayay to kako nohatini to lalakaw no saˈopo, ano masaˈopo i, kinapinaay kako pacaˈof to salicay. Mihaen to demak, cowa ko madoloay, kawra mihaen to demak ngaˈayay ko falocoˈ ako, pakalalokay ko salikaka takowanan. Ikor no masaˈopo, ano haratengen tada maolahay ci Yihofa takowanan.”
16 Mahecad o kafong ngaˈayay midipot to fongoh no sofitay, ‘o sakalidong a tokel’ wa ngaˈay midipot to kemoday falocoˈ, ato harateng no mita. (1 Tisalonika 5:8; Taneng 3:21) ‘O sakalidong a tokel’ padamaay kitaanan, misamocek to sakiˈok no Kawas, padamaayho kitaanan tano matatodongay harateng minengneng to masiˈayaway no niyah a pasangaray. (ˈOlic 27:1, 14; Dmak 24:15) Kawraan, ano saka ciepocaw no “kafong”, sakafongen i fongoh ngaˈ ngaˈay, cowa ko tatatiw han i kamay.
20 Patinakoan ni Pawlo ko sapafeli ni Yihofa a fonos, to o Kimad no Kawas. Kawra, wa minanam kita to inaneng a misaka dademak to fonos, ngaˈay tano Fangcalay Cudad a midama to pihakelongan ato misalof to harateng no niyah. (2 Korinto 10:4, 5; 2 Timoti 2:15) Wa samaan kita pacakat to inaneng a misaka dademak to Fangcalay Cudad hani? 21 ko mihecaan ci Saypasetian, sanay ko sowal: “Ano micekiw kako to Fangcalay Cudad i, mitilidan ko kaolahan ako a sinael i ciwming. Mihaen ko demak hato mingataay ko harateng no niyah ci Yihofaan.” O masowalay i fafekang ci Taniil, sanay ko sowal: “Ano miˈosi kako to Fangcalay Cudad i, mipiliˈan ko ngaˈayay padama to i kilacay tamdaw a sinael. Mahapinangay ako, ano mitosil maˈaraw no cilomaˈay to maolahay kako toniya sinael, misaˈicelayho padama cangranan, tada mahemekay mitengil.”
Kadkaden ko Noˈadingoan Odoˈ
(Ifiso 4:30) Aka pakararomen ko [fangcalay saocor] no Kawas. Nawhani o nitopaanto no Kawas kamo to [fangcalay saocor]. Onini a [fangcalay saocor] ko kacipinangan to nika o aira ko pitedalan no Kawas tamowanan a romiˈad.
it-2 187 fiedac 3 fatac
Makoracay
Fangcalay saocor. O naitiniay i Kawas a masadak ko fangcalay saocor, mitooray to nafalocoˈan ni Yihofa a dademak, milaheci to kihcod a araaw ni Yihofa. O fangcalay saocor i, o makoracay, fangcalay, sakadademakan no Kawas, mankora o “fangcalay saocor” anca “makoracay a saocor” han. (ˈOlic 51:11; Luka 11:13; Loma 1:4; Ifiso 1:13) O fangcalay saocor padamaay to tamdaw mitafo to makoracay, to fangcalay. Ano caka korac anca mararaw ko waywayan no nima i, o micoliay to fangcalay saocor cingra, “pakararomay” to fangcalay saocor. (Ifiso 4:30) Soˈlin cowa ka fanaˈ a miharateng ko fangcalay saocor, kawra patahkalay to makoracay a capeling no Kawas, mankora mafanaˈay a mararom hananay. O tamdaw ano padeteng sa midemak to tatiihay i, o mipadengay to namal no fangcalay saocor. (1Tisalonika 5:19) Ano caka falifalic cingra i, o pakararomayto to fangcalay saocor, o mamala ˈada no Kawas cingra. (Isaya 63:10) Isalakat pakararomay to fangcalay saocor a tamdaw, alatek ikorto pakidem pakidem ko nika tatiih, o milokesayto to fangcalay saocor cingra. Sowal ni Yis, o milokesay to fangcalay saocor a raraw, ano itini to aniniay lekakawa, anca noikoran a lekakawa, cowa ko mamahepol ko raraw sanay.—Matay 12:31, 32; Marko 3:28-30; nengnengen ko NOˈADINGOAN.
(Ifiso 5:5) Kafanaˈ kamo, o maˈodangay a tamdaw ato kaacekan ko demak a tamdaw ato maˈanofay a tamdaw (o maˈanofay hananay i, o cecay no pitaˈong to samiyay), o matiniay a tamdaw i, caay ko mamicomod to nikowanan ni Kristo ato Kawas a kitakit.
it-2 368 fiedac 6 fatac
Maˈanof ko falocoˈ
Paihkal to maˈanofay a waywayan. O maˈanofay tamdaw patalasekalay i nidemakan ningra a demak. Sowal sa ko mitiliday to Fangcalay Cudad a Yakopan, cipuyapuy ko ˈanof ningra i, mahofoc to raraw sanay. (Yakop 1:14, 15) Mihaenay haw i, o midemakan nora tamdaw patalasekalay to nika ˈanof ningra. Sowal no tarokos ci Pawlo, o maˈanofay hananay i, todong o mitaˈongay to samiyay sanay. (Ifiso 5:5) Ano ira ko ˈanof no tamdaw i, kala kawas hananay nangra kora mikaˈanofan nangra a dafong, ikakaan ko nika pisakalimla to misangaˈay a Tatapangan.—Loma 1:24, 25.
Miˈosi to Sinael
(Ifiso 4:17-32) Orasaka, o nano sowal no Tapang ko sapaˈicel ako a pasowal i tamowanan, akato ka matiya o demak no caay pitoor to Kawas a tamdaw ko demak namo. Awaay ko epoc no nisafalocoˈan nangra. 18 Nawhani toˈman ko falocoˈ nangra. O nika fukil ato nika ˈatekak no falocoˈ nangra ko sakaeca pikihar nangra to nipipafeli no Kawas to ˈorip cangraan. 19 Mafukilto cangra to ngodo. Saka, hakelong han nangra ko ˈanof no falocoˈ nangra a maˈotit a midemak to masamaamaanay a kaacekan a demak. 20 Nikawrira, caay ka matira ko pinanam namo to pakayniay ci Kristoan! 21 Nano matengilay namo ko pakayniay i Cingraan. Nano minanamay kamo i Cingraan. Mapakafanaˈayto kamo to soˈlinay a sowal ni Yis. 22 Orasaka, liyasen ko iti:yaayho a demak namo. Helongen a mifalah ko masaˈfitay no ˈanof a mamatekop a katelangay a pinangan namo. 23 Safaelohen ko falocoˈ namo. 24 Caˈedongen ko faelohay a pinangan, oya milecaday to pinangan no Kawas a masangaˈay. Mapahapinang konini i faelohay a ˈorip. Onini a faelohay a ˈorip i, o nika moecel ato nika fangcal no demak. 25 Orasaka, akato pisamangah a somowal. Kao soˈlinay a sowal ko sakalalicalicay namo a maemin. Nawhani o todong no caˈang no tireng ni Kristo kita a maemin. 26 Ano maketeketer kamo i, aka kao sakaciraraw namo ko keter namo. Aka ka tahaceremen ko keter namo. 27 Aka pangalaˈen ko kakeridan no Palafoay [Akoma]. 28 O mitatakaway a tamdaw i, akato pitakaw. O nika moecel no falocoˈ ningra a malalok a matayal ko ngaˈay. Ta ira ko sapaladaˈ ningra i pakoyoc a tamdaw. 29 Akato ko tatiihay ko sowal namo. Kao paˈicelay, o palatamdamdaway ato sakaciepoc no mitengilay a tamdaw a cecay ko sowal namo. 30 Aka pakararomen ko [fangcalay saocor] no Kawas. Nawhani o nitopaanto no Kawas kamo to [fangcalay saocor]. Onini a [fangcalay saocor] ko kacipinangan to nika o aira ko pitedalan no Kawas tamowanan a romiˈad. 31 Sawaden ko masamaamaanay a ˈintel ato maketeray ato mafirangay a falocoˈ. Aka piceliˈ, aka pilokes, aka piharateng to masamaamaanay a tatiihay. 32 Kasasiniˈadaˈada, kasasipaˈayaw kamo. Kasasihepol kamo to raraw a matiya o pihepol no Kawas to raraw namo pakayni ci Kristoan.
SAKA 6 FOLAD 24-30 ROMIˈAD
O ODOˈ KO KIMAD NO KAWAS | FILIPI 1-4 FEDENGAN
“AKA CARIRAW TO MAAMAAN”
(Filipi 4:6) Aka ka rawraw ko falocoˈ namo to maamaan a demak. I masamaamaanay a demak i, pitolon kamo. Pakaynien i nipiahowid no falocoˈ namo ko pipatalahkal to ngangitangiten namo i Kawas a milongoc.
w17.08 10 fiedac10 fatac
Saparihaday no Kawas Ikakaay no Niharatengan no Tamdaw
10 O manan ko papadama kitanan caka pakinali a cariraw, matinako ko saparihaday no Kawas hani? Itira i tikami ni Pawlo to Filipiay kasakopang paihekalay, miremo to cariraw a sangaˈayay a pakayraan i, o satolon. Mansa, ano cariraw ko falocoˈ i, pakaynien i satolon a mifowah to rawraw no falocoˈ. (ˈOsien ko 1 Pitiro 5:6, 7.) Pakasoˈlinen ko falocoˈ mitolon ci Yihofaan, samanen ciharatengay Cingra kitanan. Ngaˈayay akoˈiden ita ko Kawas a palemed kitanan. O mamadangar no Kawas a demak “ikakaay no nilongocan ato niharatengan ita”, paifalocoˈen ita koni, hongaˈ mapaˈicel ko nika pakasoˈlin to Kawas.—Ifiso 3:20.
(Filipi 4:7) Ta oya ikakaay no niharatengan no tamdaw a nano Kawas a rihaday ko mamisimaw to falocoˈ ato harateng namo pakayni i nika lacecay namo aci Kristo.
Saparihaday no Kawas Ikakaay no Niharatengan no Tamdaw
7 Tiya miˈosi ko Filipi salikaka toya tikami ni Pawlo i, maedeng maharatengay nangra ko nalifetan ni Pawlo aci Silas, to samaanay ci Yihofa tano caay ka harateng a pakayraan a padama cangranan. Patikamian ni Pawlo pasifanaˈ ko Filipiay a Krisciyang to manan hani? Aka macariraw, kapitolon sanay, hongaˈ malifok ko saparihaday no Kawas. Sinanoten, sanay ci Pawlo: “Ikakaay no niharatengan no tamdaw a nano Kawas a rihaday.” O manan ko tatodong hani? Mihaenan mihongyak no roma koni sinael “mikikakaay to nisahalakaan no tamdaw” sanay. Tatodong ni Pawlo, o saparihaday no Kawas mikikakaay ko nika kapah to niharatengan ita o sanay. Mankora, nolatekay tano tamdawan ita minengneng ko pasangar no niyah, awaay ko maamaan pakayraan a misaysay saan, kawra iraay ko pakayraan ni Yihofa, hanaca o tatano caay ka harateng ita pakayraan a mipadama kitanan.—ˈOsien ko 2 Pitiro 2:9.
Saparihaday no Kawas Ikakaay no Niharatengan no Tamdaw
16 O saparihaday no Kawas ikakaay to niharatengan ita. Ira ko hatiniay rihaday padama kitanan to manan hani? Sanay ko sowal i Filipi 4:7, pakaynian ci Yis Kristoan, “misimaw to falocoˈ ato harateng namo,” sanay. Ora “mamisimaw” sanay tilid, ono sofitay a sowal, mitoroˈay mapacorcoray ko sofitay a milaoc to maˈadipelay a niyaroˈ. O mahaenay a niyaroˈ ko Filipi, hato ngaˈayay ko fotiˈ no tamdaw ilalomaˈ no niyaroˈ. Mahecaday, ano ira ko saparihaday no Kawas, o ngangaˈay rihaday ko falocoˈ ato harateng ita, samanen mafanaˈay kita to ciharatengay ci Yihofa kitanan, mitokelay Cingra to sakahemekaw nokaˈorip ita. (1 Pitiro 5:10) Mafanaˈ tonini i, wa cowato ko mamapaekel no cariraw ato masomaday falocoˈ kita.
Kadkaden ko Noˈadingoan Odoˈ
(Filipi 2:17) Ano talaremeremes kako a malasapacakat to pitiˈer namo i Kawas i, lipahak ko falocoˈ ako. Mikapot kako i tamowanan a mapolong a lipahak.
it-1 693 fiedac 5 fatac
Sapacakat
Sapacakat a Epah. Tiya pacarcarto i Mikiˈokan a Pala ko Israil tamdaw i, sapacakat a epah pahakelongan a pacakat to romaroma a sapatoˈaya. (Saˈosi 15:2, 5, 8-10) Ora sapacakat a epah, mitaktakan i fafaˈed no pipatoˈayaan. (Saˈosi 28:7, 14; nengnengen ko Kasadakan 30:9; Saˈosi 15:10) Saan patikami ci Pawlo to i Filipiay a Krisciyang: “Ano talaremeremes kako a malasapacakat to pitiˈer namo i Kawas i, lipahak ko falocoˈ ako. Mikapot kako i tamowanan a mapolong a lipahak.” (Filipi 2:17) Patinakoay ci Pawlo to sapacakat a epah a paihkal to makalimay cingra patafang to niyahan. ˈAyaw no mamapatay cingra saan a patikami ci Timotian: “Maraodto ko romiˈad to pikinafalahan ako to ˈorip ako a malasapacakat. Maraodto ko romiˈad to piliyasan ako tonini a hekal.”—2 Timoti 4:6.
(Filipi 3:11) Nanay halo ako a lomowad a maˈorip [saka cecay noka patikol a maˈorip] nai patay saan ko falocoˈ ako.
w07 1/1 26 fiedac 5 fatac
Saka Cecay Noka Patikol a Maˈorip—Misatapangayto Nohatini!
5 Dotoc i, o ‘Israil no Kawas’ a mapasimalay tamdaw o tatayra i kakarayan, mikapot to tatapangan ci Yisan, milifok to ˈodingar, ‘midaˈoc a kalacafay to tatapangan’. (Kalatiya 6:16; 1 Tisalonika 4:17) O malifokay nangra a noka patikol a maˈorip o ‘saˈayaway a noka patikol a maˈorip’ anca o ‘saka cecay a noka patikol a maˈorip’ hananay. (Filipi 3:10, 11; Paˈarawan 20:6) Mahererekto ko ‘saka cecay noka patikol a maˈorip’ ikor, masa ˈofaˈofaday a iraay ko tokel midaˈoc a maˈorip a tamdaw o aitini i sera a patikol maˈorip. Mihaenay haw i, ano aitira i kakarayan ko tokel ita ha, anca aitini i sera a midaˈoc a maˈorip ha, maka ciharatengay kita to sakafanaˈaw tora ‘saka cecay noka patikol a maˈorip.’ O masamaanay a noka patikol a maˈorip koni hani? Ihacowaay a misatapang hani?
Miˈosi to Sinael
(Filipi 4:10-23) Tataˈang ko lipahak ako to nika lacecay ako ato Tapang. Nawhani talahekalto anini ko sapipadangananay a falocoˈ namo i takowanan. Talacowa sapipadangan kamo to hatiniay, nikawrira, awaay ko kangaˈayan namo a romiˈad. 11 O sakasaan ako i, caay ko nika cangoˈot ako. Nawhani o nano milifetay kako to masamaamaanay a demak a mafanaˈ a raheker. 12 Mafanaˈ kako tono cangoˈotay a ˈorip. Mafanaˈ kako tono kadofahay a ˈorip. Ano masamaamaanay a nika ˈorip, o nika fecol ato nika cahiw, o nika kadofah ato nika cangoˈot no ˈorip i, o nano milifetayto kako tonini a maemin. 13 Pakayni i ˈicel ni Kristo o paˈicelay takowanan ko sakapakafilo ako a misiˈayaw to masamaamaanay a demak. 14 Nikawrira, yo cangoˈot kako i, mipadang kamo i takowanan. Ngaˈayay konini a demak namo. 15 Mato nika fanaˈ namo o Filipi a tamdaw, yo miliyas kako to Makitoniya isaˈayaˈayawho ako a patenak to Ngaˈayay a Ratoh i, dengan o saˈopo namo ko mipadangay takowanan. Lecad sa kamo takowanan a macahiw ano eca i, marenec. 16 Yo itiraho kako i Tisalonika i, caay ka kinacecay, kinapinapi:na kamo a patayni to maamaan a mipadang to kacangoˈotan ako. 17 O sakasaan ako i, caay ko nipilongoc ako to sapafeli namo i takowanan. O kangalayan ako i, o nika tongal no nika lemed namo. 18 Adihayto ko nipafelian namo i takowanan. Marenecto kako a milayap to nipataynian ni Ipafrotitus a sapafeli namo. O cecay no fangsisay a sapacakat namo i Kawas konini, o kalipahakan, o karahekeran no Kawas a milayap. 19 O romasato, o papakaynien no Kawas i iraay i ci Yis Kristoan a tadamaanay a dafong ko sapipafeli Ningra to kacangoˈotan namo a maemin. 20 Nanay tahadaˈoc a mapahemek ko Wama ita a Kawas! Amin. 21 Ngaˈayho han a paratoh ko kahacecacecay no malacecayay aci Yis Kristo a finawlan no Kawas. Ngaˈayho saan i tamowanan ko kapot ako a salikaka. 22 Ngaˈayho saan i tamowanan ko itiniay a salikaka a maemin. Mahaen ko ilomaˈay no hongti a tamdaw a maemin a ngaˈayho saan i tamowanan. 23 Nanay mapalemed no Tapang kamo a maemin.