Pinengnengan to lalakaw no Mitosilay ato Nikaˈorip Rayray no Saˈopo
SAKA 9 FOLAD 2-8 ROMIˈAD
O ODOˈ KO KIMAD NO KAWAS | HIPRAY 7-8 FEDENGAN
Malo Midaˈocay a Saysi Matira ci Milkicitikan
(Hipray 7:1, 2) Hongti no Salim ci Milkicitik. O citodongay to cingra a matayal tono Satadamaanay a Kawas. Yo minokay ci Apraham tona milowid to kakitakitaan i, litemohen ni Milkicitik ci Apraham a mipalemed. 2 Pafelien ni Apraham cingra to cecay no moetepay no nialaan ningra i kalaloodan a kalomaamaan. (O saka cecay a tatodong no ngangan ni Milkicitik i, o Moecelay ko falocoˈ a Hongti sanay. O romasato, tona o hongti no Salim cingra saka, o Parihadayay a Hongti sanay ko roma a tatodong no ngangan ningra.)
it-1 1058 fiedac Milkicitik
Ci Milkicitik o nilitengan hongti no Salim; o saysi no Satadamaany a Kawas ci Yihofa cingra. (Satapangan 14:18, 22) Ci Milkicitik, o saka cecay to matiliday i Fangcalay Cudad a saysi cingra, ˈayaw ni Yis to 1933 miheca mala saysi cingra. Nao hongti no Salim cingra, tatodong no “Salim” hananay o “rihaday” sanay, mankora o “parihadayay a hongti” han ni Pawlo cingra, mipatoor tora ngangan ao “moecelay hongti” han cingra. (Hipray 7:1, 2) Ora nolitengan a Salim ikor malo Yirusalimay a niyaroˈ. Nolatek o “Salim” hananay ko Yirusalim.—ˈOlic 76:2.
Ci Apram (Apraham) ta mipadik ci Kitorlaomiran ato sakakomod ningra a hongtingti i, tayraay i Safih a saˈowac cingra, ci Milkicitik i, “mihawikid cingra to epang ato fadisosoˈ a epah”, palemed ci Aprahaman, sowal sa: “Nanay, mapalemed no misangaˈay to kakarayan ato sera a isatakaraway a Kawas kiso Apram. Nanay, mapahemek koya papipakalowiday tisowanan to ˈada a Isatakaraway a Kawas, saan a palemed. Saka, ala hanto ni Apram nai niˈafasan ningra i kalaloodan a maamaan ko cecay no moetepay a pafeli ci Milkicitikan.” Patelong toya malo hongtiay halo malo saysiay a Milkicitikan.—Satapangan 14:17-20; Hipray 7:4.
(Hipray 7:3) Awaay ko mama, awaay ko ina ningra, awaay ko tilid to pakayniay i tatoˈasan ningra. Awaay ko satapangan, awaay ko paherekan no ˈorip ningra. Matiya o Wawa no Kawas cingra. Tahadaˈoc ko nika rarid ningra a malacitodongay to taˈong [saysi].
it-1 1058-1059 fiedac Milkicitik
Misamaanay hano awaay ko satapangan ato paherekan no ˈorip ni Milkicitik sa hani?
Pakayni ci Milkicitikan, somowalay ci Pawlo to cecay mikiriwiˈay a demak, sowal sa: “Awaay ko satapangan, awaay ko paherekan no ˈorip ningra. Matiya o Wawa no Kawas cingra. Tahadaˈoc ko nika rarid ningra a malacitodongay to taˈong [saysi].” (Hipray 7:3) Malecaday to kalo tamdaw ci Milkicitik, hofoc han maˈorip to cecay liyad, ikor matapayto cingra. Kawra, awaay matilid i Fangcalay Cudad ko ngangan no wama wina ningra, awaay matilid ko lalitengan ato teloc ningra. Hacowaay mahofoc, hacowaay matapay cingra, awaay ko sowal no Fangcalay Cudad. Mankora, tada matatodongay ci Milkicitik mipaliˈayaway toya midaˈocay mala saysi a Yis Kristoan. Awaay ko sowal no Fangcalay Cudad to cima ko midotocan ni Milkicitik mala saysi, awaay ko sowal to cima ko midotocay cingranan. Mahecaday, kaˈayaw ni Kristo, awaay ko matiraay cingranan a sakakaay a saysi, awaay ko midotocay ci Kristoan sanay ko Fangcalay Cudad. Hanaca, soˈlin o Yuta ngasaw a hofocen ci Yis, o teloc ni Tafiti, kawra o ˈaˈirangan ningra cowa ka pilingat to ˈinorong no saysi, o lalengawan ningra cowa ko hamamala hongti halo malasaysi. O mikitiniay i noka pikiˈok ni Yihofa ko saka ira ni Yis tonini a ˈinorong.
(Hipray 7:17) Nawhani o sowal a matilid i Fangcalay Cudad i, “O mamidoedo kiso ci Milkicitikan a midaˈoc a malacitodongay to taˈong [saysi],” saan.
it-1 1058 fiedac Milkicitik
Pakayni to saysi a ˈinorong ni Kristo, itini i sapairasol ci Misiyaan a sowal, hananay ni Yihofa ko “Tapang” ni Tafiti: “O mamidoedo kiso ci Milkicitikan a midaˈoc a malacitodongay to taˈong [saysi]!” sanay. (ˈOlic110:1, 4) Onini sapatemer no Kawas a ˈOlic iraay ko lalangian no Hipray tamdaw pakasoˈlin, ci Misiya o mamala saysi halo mala hongti. Ora nisowalan a “Tapang” hananay i, matira i tikami ni Pawlo to Hipray tamdaw, oniyaan ‘midoedoay ci Milkicitikan a midaˈoc a mala sakakaay saysi a Yisan’.—Hipray 6:20; 5:10; nengnengen ko KATATELEKAN.
Kadkaden ko Noˈadingoan Odoˈ
(Hipray 8:3) O sakapipatireng to Sakakaay a Citodongay to Taˈong [saysi] hananay i, o mamipacakat cingra to sapaini ato sapatoˈaya i Kawas. Saka, caay ka eca ka o aira ko maan a sapacakat no Sakakaay a Citodongay to Taˈong [saysi] ita.
w00 8/15 14 fiedac 11 fatac Pahemekay to Kawas a Sapatoˈaya
11 Sowal no tarokos ci Pawlo: “O sakapipatireng to Sakakaay a Citodongay to Taˈong [saysi] hananay i, o mamipacakat cingra to sapaini ato sapatoˈaya i Kawas.” (Hipray 8:3) Sinanoten itini, pafafidaˈan ni Pawlo palo tosa kora mipacakatan a sapatafang; “sapaini” ato “sapatoˈaya” (sapihepol to raraw a sapatoˈaya). (Hipray 5:1) O tamdaw ano patelong to sapaini, tohatiniay o papaihkal to olah ato piakoˈid, hanaca oha sapicowataw to kalawidang, mangaˈay ko kalalaˈed. (Satapangan 32:20; Taneng 18:16) Mahecaday, o misaˈosian no Rikec a maamaan a sapacakat, o sapatelong to Kawas a “sapaini”, o araaw i, oha sapilifokaw to picada ato hemek no Kawas. Ano micicih to Rikec ko tamdaw i, o papatefoc, pacakat to “sapihepol to raraw a sapatoˈaya”. Itini i saˈayaway a lima no Fangcalay cudad, mangalefay o Kasadakan, Lifi ato Saˈosi, misadakay to adihayay pakayniay sapatoˈaya a lalakaw. Soˈlin cowa ka dolo a cipinang ato maharateng ko kihcod a demak, kawra pakayni to masamaamaanay a sapatoˈaya, iraay ko sasasinanoten ita a kalimlaan.
(Hipray 8:13) Pasowal ko Kawas to pakayniay i faelohay a katatelekan saka, o katelang han Ningra koya saˈayaway. 0 mamalasawadto ko mamatelang a maamaan.
it-2 1039 fiedac 6 fatac Katatelekan
O Rikec a katatelekan misamaanay a ‘matelangayto a malasawad’ hani?
Ta pakaynien no Kawas ci Yirimiyaan milasil to papatireng to faelohay katatelekan i, “matelangayto a malasawad” ko Rikec a katatelekan. (Yirimiya 31:31-34; Hipray 8:13) Saka 33 miheca, mapatay ci Kristo i pisemseman a hecek, itiya oya Rikec a katatelekan mafalahayto a malasawad. (Kolosay 2:14), ikor o faelohay katatelekan ko mikotayay. —Hipray 7:12; 9:15; Dmak 2:1-4.
Miˈosi to Sinael
(Hipray 7:1-17) O hongti no Salim ci Milkicitik. O citodongay to cingra a matayal tono Satadamaanay a Kawas. Yo minokay ci Apraham tona milowid to kakitakitaan i, litemohen ni Milkicitik ci Apraham a mipalemed. 2 Paflien ni Apraham cingra to cecay no moetepay no nialaan ningra i kalaloodan a kalomaamaan. (O saka cecay a tatodong no ngangan ni Milkicitik i, o Moecelay ko falocoˈ a Hongti sanay. O romasato, tona o hongti no Salim cingra saka, o Parihadayay a Hongti sanay ko roma a tatodong no ngangan ningra.) 3 Awaay ko mama, awaay ko ina ningra, awaay ko tilid to pakayniay i tatoˈasan ningra. Awaay ko satapangan, awaay ko paherekan no ˈorip ningra. Matiya o Wawa no Kawas cingra. Tahadaˈoc ko nika rarid ningra a malacitodongay to taˈong. 4 Haratengen, hakowa ko nika tadamaan ningra. Halo ci Apraham o tatoˈasan ita a pafeli i cingraan to cecay no moetepay no nialaan ningra i kalaloodan a safangcalay a dafong. 5 O teloc ni Lifi ko mamalacitodongay to taˈong. Doedoen nangra ko matiliday i Rikec a limoˈot a miala i finawlan no Israil to cecay no moetepay. Talacowa o malecaday cangra o teloc ni Apraham, nikawrira, alaen nangra i finawlan no tireng ko cecay no moˈtepay. 6 Caay ko tatoˈasan ni Lifi ci Milkicitik. Nikawrira, miala cingra i ci Aprahaman to cecay no moetepay. Ta palemeden ningra ci Apraham, o milayapay to nano nisowalan no Kawas a sapalemed. 7 O papalemed a tamdaw i, caay ka eca ikaka no mamilayap to sapalemed a tamdaw ko nika tadamaan ningra. 8 Ano pakayniay i citodongay to taˈong i, ano mialaala cangra to cecay no moetepay i, o mamapatay cangra. Nikawrira, ano pakayniay ci Milkicitikan i, o midaˈocay a maˈorip cingra o mialaay to cecay no moetepay saan ko sowal a matilid i Fangcalay Cudad. 9 O tatoˈasan no mamisorot to cecay no moetepay ci Lifi. Saka, yo mipafeli ci Apraham to cecay no moetepay i, o iraayto ci Lifi a mikapot a pafeli to cecay no moetepay. 10 O romasato, yo lietmohen ni Milkicitik ci Apraham i, i tirengho no tatoˈasan ningra ci Aprahaman ci Lifi. Caayho ka hofocen cingra itiya. 11 O mirikecay to finawlan ko tayal no citodongay to taˈong a Lifi a tamdaw. Saka, mapafeli i finawlan no Israil ko Rikec. Ano masongilaˈay ko tayal noya citodongay to taˈong a Lifi i, kona maedeng ko teloc ni Aron a matayal tonini. Kona caay ka lomowad ko midoedoay to tayal ni Milkicitik a roma a citodongay to taˈong. 12 Nawhani ano mafalic ko lkakawa no citodongay to taˈong i, halo rikec a mafalic. 13 O sasowalen ita imatini a Tapang i, ono roma a ngangasawan. Awaayho ko matayalay nangra tono citodongay to taˈong. 14 Kafanaˈanto ita, o Yuta a ngangasawan ko mihofocay to Tapang ita. Nikawrira, awaay ko maan a sowal ni Mosi to pakayniay i nika tayal nonini a ngasaw tono citodongay to taˈong. 15 Mapahapinangto anini ko demak. Nawhani talahekalto ko faelohay a citodongay to taˈong, o milecaday ci Milkicitikan. 16 O sakatomireng nonini a tamdaw a malacitodongay to taˈong i, caay ko nano tamdawan a limoˈot ato rikec. O nano ˈicel no midaˈocay a ˈorip. 17 Nawhani o sowal a matilid i Fangcalay Cudad i, “O mamidoedo Kiso ci Milkicitikan a midaˈoc a malacitodongay to taˈong,” saan.
SAKA 9 FOLAD 9-15 ROMIˈAD
O ODOˈ KO KIMAD NO KAWAS | HIPRAY 9-10 FEDENGAN
“O Pasamo Aca to Aira a Tadamaanay a Demak”
(Hipray 9:12-14) Caay ko remes no siri ato remes no okang a kolong ko nialaan ningra a sapatoˈaya a micomod. Ono tireng ningra a remes ko nialaan ningra. Yo micomod ci Yis toya taloˈan i, taˈlifen ningra ko saka cecay a rawang a kinacecay aca a micomod i Safangcalay a Kaitiraan. Itira cingra a milaheci to demak to sakahepol no raraw ita a tahadaˈoc. 13 Ano o sapikorac to paˈfoay to tamdaw a lisin ko nifaresiˈan a remes no siri ato remes no okang a kolong ato nifolsakan a ˈafo no nitodohan a tingdahan a kolong i, 14 mangalef ko ˈicel no remes ni Kristo a mikorac. Pakaynien ningra i midaˈocay a [fangcalay saocor] ko nipipacakat i Kawas to tireng ningra a malamasongilaˈay a sapacakat. O remes ningra ko mamikorac to falocoˈ ita a papisawad to caay ka ciepoc a demak. Ta mangaˈay kita a mitaˈong to maˈoripay a Kawas.
it-1 862 fiedac 6 fatac Misodod
Kitinien i sapafeli no Kawas to Israil a rikec, o cimacima ano pakararaw to Kawas anca finawlan, ano sakasododaw ko raraw, tooren ko saˈosi no rikec a misalof to raraw, ikor pacakaten ci Yihofaan ko ciremesay a sapihepol to raraw a sapatoˈaya. (Lifi 5:5–6:7) Mihaen to demak, mahecaday to safalod to nisadakan ni Pawlo: “Ano doedoen ko Rikec i, soˈlinay maedeng a makorac ko maamaan pakayni i remes. Ano caay ka sadak ko remes i, caay ka hepol ko raraw.” (Hipray 9:22) Manaokaniw, ora remes no pinaˈorip, cowa ko mamipalasawad to raraw, cowa ko mamikorac to falocoˈ no tamdaw. (Hipray 10:1-4; 9:9, 13, 14) Edengan pakaynien toya nisowalan no Fangcalay Cudad a faelohay katatelekan, ya mipacakatan a sapatefoc ni Yis Kristo wangaˈ mahepol ko raraw no tamdaw. (Yirimiya 31:33, 34; Matay 26:28; 1 Korinto 11:25; Ifiso 1:7) Itiniho i sera ci Yis tiya miadah to cecay maˈepiay tamdaw i, paihkalayto to iraay ko fadangalan ningra mihepol to raraw.—Matay 9:2-7.
(Hipray 9:24-26) Caay picomod ci Kristo to nisangaˈan no tamdaw a Fangcalay a Kaitiraan hananay. Nawhani o sapatinako aca to soˈlinay a kaitiraan ko nisangaˈan no tamdaw a Fangcalay a Kaitiraan hananay. O kakarayan ko nicomodan ningra a tayra i kaˈayaw no Kawas a patado titaanan. 25 Caay ko sapisaliyaliyawaw ni Kristo a pacakat to tireng ko sakapicomod ningra. Caay ka matiya ono Yutaya a sakakaay a citodongay to taˈong cingra a mitatoy to remes no pinaˈorip a micomod to mihecahecaan i Safangcalay a Kaitiraan. 26 Ano mahaenay i, kona kinapinapi:na cingra a misemsem nai satapangan no nipisangaˈ no Kawas to hekal. Nikawrira, caay ka matira ko ni Kristo. Yo mamalaheci ko demak no Kawas i, kinacecay aca a talahkal cingra a kinafalah a pacakat to tireng to sapipalasawadaw to raraw.
cf 183 fiedac 4 fatac Padadotoc a Mikotod i Takowanan
4 Minokayto ci Yis tala kakarayan i, samaanay mihamham a militemoh ko kakarayanay a taˈangayay paro no lomaˈ, samaanay lipahak a masasoˈaraw to kakarayanay a Wama, cowa ka somowal ko Fangcalay Cudad. Nikawrira, paliˈayawayto ko Fangcalay Cudad, o mamafekad ko manan demak ano tala kakarayanto ci Yis. Mafanaˈay kita, to ˈayawho no tatayra ci Yis i kakarayan to 1500 miheca i, o Yutaya tamdaw iraay ko lisin to mihecahecaan: Itini i Pihepolan to Raraw a Romiˈad, Sakakaay a saysi micomoday i Safangcalay Kaitiraan no sefi, mifaresiˈ to remes ikaˈayaw no Lipa. Oya nano demak no Sakakaay saysi toya romiˈad, paliˈayaway to hademak ni Misiya noikor. Patikor tayni i kakarayan ci Yis, kina cecayay aca palaˈosi toni paliˈayawan a demak, cowto pisaliyaliyaw. Minokay cingra tayni i tadamaanay kitiraan ni Yihofa, ikor pacakatan ningra ko epoc no sapatefoc ningra. (Hipray 9:11, 12, 24) Micadaan ni Yihofa han?
(Hipray 10:1-4) O Rikec i, o pasamo aca to aira a tadamaanay a demak, caay ko tadatireng nora demak ko Rikec. Saka, mararid a mapacakat to mihecahecaan ko malecaday a sapatoˈaya. Nikawrira, caay pakasongilaˈ to miraoday to Kawas a tamdaw konini. 2 Ano pakasongilaˈay a mikorac to mitaˈongay to Kawas a tamdaw konini i, o ciraraway kako kona caay ka saan cangra. Kona malasawadto ko patoˈayaay a demak. 3 Nikawrira, ciepocay ko pipatoˈaya no citodongay to taˈong to sakapalal no tamdamdaw a miharateng to raraw nangra to miecahecaan. 4 Nawhani caay ko papakapalasawad to raraw ko remes no okang a kolong ato remes no siri.
it-2 431-432 fiedac Malefotay
Malefotay ko Rikec ni Mosi. Oya pakaynian ci Mosian a sapafeli no Kawas to Israil tamdaw a Rikec, mahawpay ko limasmas to patirengay to kasakapot no saysi ato masakenakenaay a sapatoˈaya. O Kawas ko pafeliay tora Rikec, o malefotay; kawra matira to sapitemer no fangcaclay saocor ci Pawloan, ano o Rikecto, kasakapotto no saysi anca ora sapatoˈaya, cowa ko papadama to tamdaw a malefot ko ˈorip. (Hipray 7:11, 19; 10:1) Soˈlinay haw i, o Rikec hananay, cowa ko mamihepol to raraw ato patay, ˈarawhan patalasekalay to raraw no tamdaw. (Loma 3:20; 7:7-13) Nikawrira, oniya kihcod a milimasmasan no Kawas, palaˈosiay to mikiriwiˈay a araaw no Kawas. Mala “misimaway titanan” ko Rikec, mikerid titanan tayra ci Kristoan, oniya Rikec “o pasamo aca to aira a tadamaanay a demak.” Itiniay mahapinang ita, “caay pakalaheci ko Rikec a miliyaw to pinangan ita,” sako maan ko sowal ni Pawlo. (Loma 8:3) Ano ihekalen kora sowal, ora no Yutaya a sakakaay saysi a tamdaw cowa ka “tahadaˈoc a misongilaˈ a mipaˈorip” to tamdaw. (O sakakaay saysi pakaynian i Rikec ni Mosi a patireng, misimaway tono patoˈayaay a demak, itini i Pihepolan to Raraw a Romiˈad miˈorongay to remes no pinaˈorip micomod i Safangcalay a Kaitiraan), mahaen o sowal i Hipray 7:11, 18-28. O lalomaˈan ni Aron a saysi soˈlin patadoay to finawlan pacakat to sapatoˈaya, ngaˈayay mahemeken ko Kawas a micada to finawlan, kawra cowa ka pisaheci a palasawad to kiyam no falocoˈ to nika raraw nangra. Sowal ni Pawlo, o tayniay i kaˈayaw no Kawas a tamdaw cowa ko papakayni i sapatoˈaya a ‘milifok to malefotay’, ira ko malefotay makoracay a falocoˈ sanay. (Hipray 10:1-4; Palalinien to Hipray 9:9.) Ora sakakaay saysi cowa ka misaheci a mipalasawad to raraw no tamdaw. Edengan aca ci Kristo oya midaˈocay a saysi, pacakat to ˈorip a malo sapipalasawad to raraw a sapatoˈaya ngaˈ, ngangaˈay malidong ko tamdaw.—Hipray 9:14; 10:12-22.
Kadkaden ko Noˈadingoan Odoˈ
(Hipray 9:16, 17) Ano mapatayto ko paikoray to sowal a tamdaw i, itiyato a ciepoc ko sapaikor ningra a sowal. 17 Nawhani ano maˈoripho koya mipaikoray a pasowal a tamdaw i, caho lahecien ko sowal ningra. Ano mapatayto cingra i, itiyato a milaheci to sowal ningra.
w92 3/1 31 fiedac 4-6 fatac Salicay no Miˈosiay Tamdaw
Somowalay ci Pawlo to ira ko mapatayay ngaˈ, malaˈosi ko nika katatelek no Kawas ato tamdaw sanay. O tinakoan ko Rikec a katatelekan. Ci Mosi ko misatenokay tamdaw toni Rikec, mikayat to katatelek no Kawas ato Israil tamdaw. Itini toiya demak masaka limlaan ko saaroˈan ni Mosi, o cingra ko mikayatay to Israil pacomod tayni toni katatelek. Naitiniay ci Yihofaan koni Rikec, ci Mosi ko mipatirengay toni Rikec. Toha sakalaˈosiaw noni Rikec o lalakisen ni Mosi ko remes ningra han? Cowa, o pinaˈorip ko pacakatan no Israil, mitisod to remes ni Mosi.—Hipray 9:18-22.
O katatelek ni Yihofa ato noˈadingoan Israil a faelohay katatelekan samaanay aki? Ci Yis Kristo ko Misatenokay, o tadamaanay a saaroˈan koni. Soˈliˈlin o ci Yihofa ko patirengay toni katatelekan. O Misatenokay noni faelohay katatelekan o ci Yis, tiya itiniho i sera mala tamdaw ci Yis i, micawmaˈay cingra toya salakatay mamicomod itini toni faelohay katatelekan a tamdaw. (Luka 22:20, 28, 29) O roma sa i, citatodongay cingra pasadak to ciepocay a sapatoˈaya palaˈosi to katatelekan. Onini a sapatoˈaya cowa ko pinaˈorip, ao malefotay a ˈorip ningra. Pakayni toni pisatenok ni Yis toni faelohay katatelekan, sanay ko sowal ni Pawlo. “O kakarayan ko nicomodan ningra [ci Kristo] a tayra i kaˈayaw no Kawas a patado titaanan.” Ikor nora, misatapangayto malaˈosi ko faelohay katatelekan.—Hipray 9:12-14, 24.
O sowal ni Pawlo, ci Mosi aci Yis o misatenokay to katatelekan sa i, cowa ko mipatirengay cangra tora katatelekan, oniya tosa a katatelekan o ci Yihofa ko mipatirengay. O misatenokay aca cangra. Itini toni tosa a katatelekan milingatay to patay, o pinaˈorip ko mikotayay ci Mosian; ci Yis i, o remes no tireng ningra ko pacakatan.
(Hipray 10:5-7) Orasaka, yo taynito ci Kristo i hekal i, sowal sa cingra i Kawas, “Caay ko sapatoˈaya ato sapacakat ko nilongocan Iso. O nipatalaanto Iso ko malo tireng ako. 6 Caay ka olah Kiso to nisakimoodan a mitodoh a sapatoˈaya ato sakahepol no raraw a sapatafang. 7 Ini kako han ako Kiso a pacaˈof. Doedoaw ako ko nafalocoˈan Iso a milaheci to matiliday i Fangcalay Cudad to pakayniay i takowanan,” saan.
it-1 795 fiedac
Paputisem
Sowal ni Luka, tiya micada to paputisem ci Yis i, mitolonay cingra sanay. (Luka 3:21) O sowal no mitiliday to Hipray sanay, “yo taynito ci Kristo i hekal i” (mitoroan nora, cowa tiya hofocen mala tamdaw itiya, samanen cowaho ka fanaˈ to tilid cingra, awaay ko pakayraan somowal tora naitiniay i sinael a sowal, mitoroan i, itiyaay tiya micada cingra to paputisem ato misatapang to mitosilay a demak), ˈOlic 40:6-8 sanay somowal to falocoˈ ningra: “Caay ko sapatoˈaya ato sapacakat ko nilongocan Iso. O nipatalaanto Iso ko malo tireng ako. Doedoaw ako ko nafalocoˈan Iso a milaheci to matiliday i Fangcalay Cudad to pakayniay i takowanan,” saan. (Hipray 10:5-9) Hofoc han ci Yis o Yutayato a tamdaw, matatelekayto koni kitakit ato Kawas, oyaan Rikec a katatelekan. (Kasadakan 19:5-8; Kalatiya 4:4) Mihaenay haw i, ˈayaw no tayra ci Yis ci Yohanian micada to paputisem i, maharekayto ci Yis matatelek aci Yihofa. Ora paputisem ni Yis mitaˈelifayto to saali no Rikec. Patafang cingra to tireng i ci Yihofaan, oha sapilaheciaw to mikiriwiˈay a araaw no Wama i kakarayan, patafangen ningra kora tireng ningra, oha sapipalasawadaw to saˈosi no Rikec a pacakat to sapatoˈaya. Sanay ci Pawlo mitadtad: “Doˈdoen ni Yis Kristo ko nafalocoˈan no Kawas a pacakat to tireng Ningra to kinacecay. Saka, makoracto kita.” (Hipray 10:10) Mikiriwiˈay a araaw no Wama pakayni ci Yisan, milingatay to Hongti Kitakit no Kawas. Kinafalahay ci Yis milaheci toni ˈinorong. (Luka 4:43; 17:20, 21) Lipahakay ci Yihofa micada to tireng no kanonoˈan a Wawa Ningra, tano fangcalay saocor a pasimal cingranan, halo milasil: “O kakaolahan Ako a Wawa kiso. O kakahemekan Ako kiso,” saan.—Marko 1:9-11; Luka 3:21-23; Matay 3:13-17.
Miˈosi to Sinael
(Hipray 9:1-14) O saˈayaway a katatelekan i, ira ko likakawa to pakayniay i pitaˈong. O romasato, ira ko nisangaˈan no tamdaw a pitaˈongan a lomaˈ. 2 Mapatireng ko Taloˈan. O Fangcalay a Kaitiraan han ko saka cecay a rawang nonini. Ira itira ko padawdawan ato cukui ato papatelien i cukui a sapacakat i Kawas a epang. 3 I aikor no saka tosa a sapalaˈed a kiradom i, ira ko cecay a rawang. O Safangcalay a Kaitiraan han konini. 4 Ira itira ko tadaekim a paehiwan ato Katatelekan a Lipa. Maledef a mapataedip to tadaekim koya Lipa. Ira i lalomaˈ noya Lipa ko cipinaroay to mana a tadaekim a kapowa ato cicoˈongay a cokor ni Aron ato tosaay a masasapaday a fokeloh to citiliday to moetepay a limoˈot. 5 O todong no nika ira no Kawas a mikapot saka, ira i fafaeed noya Lipa ko ciˈdilay a kirupim. Macelak ko sapikpik nangra i fafaˈed no satahaf noya Lipa. O pihepolan to raraw koya satahaf. Nikawrira, caay ka ngaˈay anini a misaheci a somowal to pakayniay tonini a demak. 6 Mahaen a makairaira ko maamaan. Mararid a micomod ko citodongay to taˈong i saka cecay a rawang a matayal tono taˈong a demak. 7 Nikawrira, deng o Sakakaay a Citodongay to Taˈong ko mamicomod toya iaikoray no sapalaˈed a kiradom a rawang. Cecay a miheca kinacecay aca cingra a micomod. Ano micomod cingra i, alaen ningra ko remes a pacakat i Kawas to sakahepol no raraw no tireng ato sakahepol no kapatelacan no finawlan a raraw. 8 Pakayni tonini ko sapahapinang no [fangcalay saocor] a pakafanaˈ to nika caayho ka fawah ko picomodan i Safangcalay a Kaitiraan. Nawhani iraho a tomireng ko saka cecay a rawang noya Taloˈan. 9 O sapatinako to aniniay a demak ko saka cecay a rawang no Taloˈan. Talacowa mipacakat ko citodongay to taˈong to sapaini ato sapatoˈaya i Kawas, nikawrira, caay pakasongilaˈ to falocoˈ no mitaˈongay a tamdaw ko demak nangra. 10 O lisin nangra to pakayniay i kakaenen ato nananomen ato masamaamaanay a pikorac a demak konini. Ono paputal aca a dadoedoen konini a likakawa. O dademaken konini tangasa i kairaan no faelohay a demak. 11 Nikawrira, irato ci Kristo anini a Malasakakaay a Citodongay to Taˈong a matayal tono talahekalayto a ngaˈayay a demak. Caay ko nano nisangaˈan no tamdaw ko katayalan Ningra a taloˈan. Caay kono itiniay i hekal a masangaˈay, tada ikakaay, tada o masongilaˈay a taloˈan ko katayalan Ningra. 12 Caay ko remes no siri ato remes no okang a kolong ko nialaan Ningra a sapatoˈaya a micomod. Ono tireng Ningra a remes ko nialaan Ningra. Yo micomod ci Yis toya taloˈan i, taˈlifen Ningra ko saka cecay a rawang a kinacecay aca a micomod i Safangcalay a Kaitiraan. Itira Cingra a milaheci to demak to sakahepol no raraw ita a tahadaˈoc. 13 Ano o sapikorac to paˈfoay to tamdaw a lisin ko nifarsiˈan a remes no siri ato remes no okang a kolong ato nifolsakan a ˈafo no nitodohan a tingdahan a kolong i, 14 mangalef ko ˈicel no remes ni Kristo a mikorac. Pakaynien ningra i midaˈocay a [fangcalay saocor] ko nipipacakat i Kawas to tireng ningra a malamasongilaˈay a sapacakat. O remes ningra ko mamikorac to falocoˈ ita a papisawad to caay ka ciepoc a demak. Ta mangaˈay kita a mitaˈong to maˈoripay a Kawas.
SAKA 9 FOLAD 16-22 ROMIˈAD
O ODOˈ KO KIMAD NO KAWAS | HIPRAY 11 FEDENGAN
Misamaanay Hano Masaka Limlaan ko Pasoˈlinay Falocoˈ
(Hipray 11:1) O pitiˈer to Kawas hananay i, o soˈlinay konini sanay a falocoˈ to pafalocoˈan ato caay ka ˈaraw a demak.
w16.10 27 fiedac 6 fatac Pasoˈlinen ko Falocoˈ Iso to Sakiˈok no Kawas
6 Ngaˈayay kita itini i Hipray 11:1 (ˈosien) mafanaˈ to o manan ko pasoˈlinay falocoˈ hananay. Milingatay to tosa cowa ka ˈaraw a demak: (1) O ‘tokel’. Miwacayay ko Kawas to mamalaˈosi ko caayho ka fekad a demak, patinakoen, papalahedaw to kihcod mariˈangay tamdaw ato tatiihay demak. (2) ‘Caay ka ˈaraw a demak’. O ‘wacay’ hananay mihongyak kora sinael ino Krisiya a sowal, mitoroan i, soˈlin caay ka ˈaraw kora demak, kawra iraay ko papasoˈlinen a wacay o sanay, patinakoen, o nika ira ni Yihofa Kawas, ni Yis Kristo ato coyoh, ato ikakarayanay a Hongti Kitakit. (Hipray 11:3) Mamisamaan ko tao pakaˈaraw to nika pakasoˈlin ita to mamalaˈosi ko nitokelan ita a demak, ato pakasoˈlinay to nisowalan no Fangcalay Cudad to cowa ka ˈaraw a demak hani? Papakaynien i waywayan ato sasowalan ita maˈaraw no tao. Ano caka pakaynien ita i waywayan ato sasowalan patahkal to nika pakasoˈlin ita i, cowa ito ko ˈosi ko pasoˈlinay falocoˈ ita.
(Hipray 11:6) Ano caay pitiˈer to Kawas ko tamdaw i, caay pakapalipahak to Kawas cingra. Nawhani o miraoday to Kawas a tamdaw i, caay ka eca pasoˈlin to nika ira ko Kawas. O romasato, pasoˈlin cingra to nika o mipakaolahay ko Kawas to milongocay Cingraan a tamdaw
w13 11/1 11 fiedac 2-5 fatac Mipalifonay Toya Milongocay i Cingranan a Tamdaw
Misamaan kita ngaˈ wa mahemek ci Yihofa hani? Sanay ci Pawlo: “Ano caay pitiˈer [pasoˈlin] to Kawas ko tamdaw i, caay pakapalipahak to Kawas cingra.” O sowal ni Pawlo ano caay pasoˈlin ko tamdaw wa samaanto sanay hani? O Kawas i, caay ka pasangar a pakahemeken, kawra ano caay pasoˈlin kita i, caay ko lalipahak Cingra. Ano falicen ko sowal, ano pakapalipahak to Kawas i, ira ko pasoˈlinay falocoˈ wangaˈ.
O masamaanay noka pasoˈlin palipahakay ci Yihofaan hani? Mahawpay ko tosa, saka cecay, “pasoˈlin to nika ira ko Kawas.” Ano cisasa ko falocoˈ ita to nika ira no Kawas i, mamisamaan a lipahak Cingra hani? Pasoˈlin aca to nika ira Ningra cowa ka edeng, samanen ano tatiihay a coyoh pasoˈlinay to nika ira no Kawas. (Yakop 2:19) Ano pasoˈlin kita to iraay ko Kawas i, o mamidoedo to kahemekan no Kawas a maˈorip kita, mihaen a misawacay to pasoˈlinay falocoˈ no niyah.—Yakop 2:20, 26.
Saka tosa i, papasoˈlinen to papalifon ko Kawas. Ano ira ko soˈlinay noka pitiˈer to Kawas i, pakasoˈlinen ano doedoen ko kahemekan no Kawas a maˈorip cowa ko mamahorac. (1 Korinto 15:58) Ano cisasa ci Yihofaan to mamakahi palifon hokira, anca ira ko ˈicel Ningra mihaen hokira, wa misamaan a lipahaken Cingra hani? (Yakop 1:17; 1 Pitiro 5:7) Ano o maˈidiay ci Yihofa cowa pikihar to tamdaw ano saan miharateng kita i, cowa ka sasoˈlin a mafanaˈ cangra to Kawas.
Cima ko papalifonen ni Yihofa hani? Sowal sa ci Pawlo: “O milongocay Cingraan a tamdaw.” Sanay. Ora “milongocay” hananay a Krisiya sowal, tala papotal a mikilim cowa ka saan, ao pakaynien i noka pidoko tayni ikaˈayaw no Kawas o sanay. O roma a sowal pakayni toni Krisiya a tilid, patahkalay to mamisamacay, misarocod a midoko to Kawas o sanay. Itiniay mahapinang ita, o papalifonen ni Yihofa koya to nika pakasoˈlin a misarocoday ko falocoˈ a maolah i Cingranan, ˈifowa a mihodop i Cingranan a tamdaw.—Matay 22:37.
(Hipray 11:33-38) O mitiˈeray to Kawas cangra saka, malowid nangra ko kitakit no ˈada. O moecelay ko demak nangra. Malayap nangra ko nano nisowalan no Kawas a sapalemed. Masafa nangra ko layon. 34 Mapadeng nangra ko marengrengay a namal. Maliyas nangra ko mitatoyay to funus a mipatayay. Nano tadancaay cangra i, malaciˈicelayto. Malakiemelayto cangra a milood. Laopen nangra ko sofitay no roma a kitakit a milowid. 35 O mitiˈeray to Kawas ko fafahiyan saka, mapanokay i cangraan ko mapalowaday a mapaˈorip nai patay a tamdaw nangra. O romaroma a mapalitay a tamdaw i, caay ka kahi a tedalen. Nawhani mangalay cangra a mapalowad a mapaˈorip nai patay to sakaciˈoripaw to tadamaanay a ˈorip. Saka, mapasemsem cangra a mapatay. 36 O romaroma a tamdaw i, masamsam, masetiˈ, mapalit to lonayiˈ, marofo i pirofoan, 37 matekol to fokeloh a mipatay, marosaros a makalitosa, patayen to funus. Cirikoˈ cangra to falako no tadasiri ato siri a misarakarakat. O malapakoyocay, o makariˈangay, o masamsamay cangra. 38 Caay ka tatodong konini a hekal a malokamaroˈan nangra saka, salinalinah saan cangra a maroˈ i kohkohan, i lotolotokan, i dihidihifan, i reforfongan no sera.
w16.10 23 fiedac 10-11 fatac Paˈicelen ko Nika Pasoˈlin no Falocoˈ to Mitokelan a Demak
10 Itini i Hipray saka 11 fedengan somowalay ci Pawlo to romaroma madimadiay sikawdan na miememay to sapalifet. Patinakoen, mapatayay ko wawa no pasoˈlinay fafahiyan, ikor patikolay maˈorip ko wawa nangra. O roma tamdaw i, “to sakaciˈoripaw to tadamaanay a ˈorip, mapasemsem cangra a mapatay.” (Hipray 11:35) Cima ko maharatengay ni Pawlo itiya cowa ka fanaˈ kita, kawra ci Napot aci Cikariya, tona midofdofay cangra to araaw no Kawas, mitekolan ko fakeloh a mipatay cangra. (1 Hongti 21:3, 15; 2 Rayray 24:20, 21) Ci Taniil ato kapot ningra na ngangaˈay malidong ko ˈorip, kawra caay kakahi cangra mihayi mitaˈong, pakasoˈlinay to Kawas, teloc i, “masafa nangra ko layon”, “mapadeng nangra ko marengrengay a namal.”—Hipray 11:33, 34; Taniil 3:16-18, 20, 28; 6:13, 16, 21-23.
11 Ci Mikaya ya mipairasolay aci Yirimiya tona patahkalay to pasoˈlinay falocoˈ, “masamsam, masti’, mapalit to lonayi’, marofo i pirofoan”, o romaroma matiraay ci Iliyaan i, “salinalinah saan cangra a maroˈ i kohkohan i lotolotokan, i dihidihifan, i reforefongan no sera.” Pakahadidi cangra to sapalifet samanen ‘mafanaˈay cangra to mamalaˈosi to nitokelan.’ —Hipray 11:1, 36-38; 1 Hongti 18:13; 22:24-27; Yirimiya 20:1, 2; 28:10, 11; 32:2.
Kadkaden ko Noˈadingoan Odoˈ
(Hipray 11:4) O mitiˈeray ci Apil to Kawas saka, ikaka no nipacakatan ni Kain ko nika tadamaan no nipacakatan ningra i Kawas. O nipitiˈer ningra to Kawas ko piˈarawan no Kawas to nika o moecelay ko falocoˈ ningra. Saka, kahemeken no Kawas ko nipacakatan ningra. Talacowa mapatayayto cingra, nikawrira, pakayni i nipitiˈer ningra to Kawas a matiya o pasowalay cingra a tahanini.
it-2 610 fiedac 3 fatac Pakasoˈlinay Falocoˈ
Nolitengan a Taˈarawan. Misilsilay ci Pawlo pasadak to masapolongay a misawacayay tamdaw (Hipray 12:1) o pakasoˈlinay falocoˈ nangra patirengan i tanoktokay a taˈeneran. Patinakoen, ci Apil maedeng mafanaˈay to sakiˈok no Kawas to aira ko “ˈoner” mipesiˈ to “teloc” no fafahiyan. O roma i, maˈaraway ni Apil ko wacay, to pisawkit no Kawas toya i Itinay a wama wina ningra. I papotal no Itin maˈkakay ko saseraan malengaw ko ceka a semot ato talod, ci Atam ato paro no lomaˈ tasinootto a matayal ngaˈ ira ko sakafecol no paro no lomaˈ. Maˈaraway haca ni Apil to nika ngalay ni Ifa to faˈinay, maˈaraw ko piˈimer a mikowan ni Atam to fafahi, matengil ko kapingaliwngiw ni Ifa to adada a mapoyapoy. Maˈaraway ningra koya misimaway to picomodan to Itin a kirupim ato maliyonay a marengrengay ko namal a funus. (Satapangan 3:14-19, 24) O “ihekalay a wacay” koni, pakasoˈlinen ci Apil toya mikiˈokan a teloc to mamilidong to tamdaw. Mankora, mikitiniay i pakasoˈlinay falocoˈ ci Apil pacakat to pinaˈorip malo sapatoˈaya i Kawas.—Hipray 11:1, 4.
(Hipray 11:5) O mitiˈeray ci Inok to Kawas saka, caay ka patay cingra. Kakoy han no Kawas cingra a milinah. Orasaka, awaay a makera[mahera] no tamdaw cingra. O sowal a matilid i Fangcalay Cudad i, “Iˈayaw no nika kakoy ningra i, palipahak cingra to Kawas,” saan.
wp17.1 12-13 fiedac Palipahak Cingra to Kawas
O sowal no Fangcalay Cudad ci Inok “milinahan” hato “caay ka patay cingra” sa i, samaanen ita cipinang koni sowal hani? Parihadayan ni Yihofa mapatay ci Inok, caka pisemsem a mapatay alatek. ˈAyaw no mapatay ci Inok “palipahakay cingra to Kawas”. Teloc i, ˈayaw no mamapatay cingra maˈaraway ningra ko iseraay a lakoing i mapolosi, mikitini a mafanaˈ ci Inok to lipahkay ko Kawas i cingranan, ikor nora mapatayayto cingra. Ta somowal ci Pawlo ci Inokan ato romaroma a madimadiay a sikawdan i, sanay ko sowal: “o mitiˈeray to Kawas cangra a maemin tangasa i nika patay nangra.” (Hipray 11:13) Mapatayto ci Inok ikor, talacowacowaay a mikilim ko ˈada to tireng ningra, ˈarawhan “awaay a mahera”. Alatek milinahan ni Yihofa ko tireng ni Inok, ho caka alaen no tatiihay tamdaw a milokes anca micowat to mararaway a pidoyongan.
Miˈosi to Sinael
(Hipray 11:1-16) O pitiˈer to Kawas hananay i, o soˈlinay konini sanay a falocoˈ to pafalocoˈan ato caay ka ˈaraw a demak. 2 Mitiˈer to Kawas ko iti:yaayho a tamdaw. Saka, makahemek no Kawas cangra. 3 Nano pitiˈer ita to Kawas ko sakafanaˈ ita to nika o nano sowal no Kawas ko sakasangaˈ no hekal. Saka, o nano caay ka ˈaraw a maamaan ko sapisangaˈ to maˈaraway imatini saan ko nika fanaˈ ita. 4 O mitiˈeray ci Apil to Kawas saka, ikaka no nipacakatan ni Kain ko nika tadamaan no nipacakatan ningra i Kawas. O nipitiˈer ningra to Kawas ko piˈarawan no Kawas to nika o moecelay ko falocoˈ ningra. Saka, kahemeken no Kawas ko nipacakatan ningra. Talacowa mapatayayto cingra, nikawrira, pakayni i nipitiˈer ningra to Kawas a matiya o pasowalay cingra a tahanini. 5 O mitiˈeray ci Inok to Kawas saka, caay ka patay cingra. Kakoy han no Kawas cingra a milinah. Orasaka, awaay a makera no tamdaw cingra. O sowal a matilid i Fangcalay Cudad i, “Iˈayaw no nika kakoy ningra i, palipahak cingra to Kawas,” saan. 6 Ano caay pitiˈer to Kawas ko tamdaw i, caay pakapalipahak to Kawas cingra. Nawhani o miraoday to Kawas a tamdaw i, caay ka eca pasoˈlin to nika ira ko Kawas. O romasato, pasoˈlin cingra to nika o mipakaolahay ko Kawas to milongocay Cingraan a tamdaw. 7 O mitiˈeray to Kawas ci Nowa saka, mitengil cingra to limoˈot no Kawas to pakayniay i caayho ka ˈaraw ningra a demak. Ta misangaˈ cingra to lonan to malokaˈoripan ningra ato paro no lomaˈ ningra. Orasaka, mapasetekto ko tamdamdaw i patay. O romasato, pakayni i pitiˈer ningra ao moecelay kiso han no Kawas cingra. 8 O mitiˈeray to Kawas ci Apraham saka, yo sowalen no Kawas cingra a miocor a patayra toya nano nisowalan no Kawas cingraan a sapafeli a sera i, doedo han ningra ko sowal no Kawas. Yo miliyas cingra to kitakit ningra i, caay ka fanaˈ cingra to katayraan ningra. 9 O mitiˈeray to Kawas cingra saka, sanopalafangay han ningra ko aroˈ i nano nisowalan no Kawas a sapafeli cingraan a sera. Maroˈ cingra i kopang a taloˈan. Mahaen ci Isak aci Yakop. O malecaday cangra a mapasowal no Kawas to lalayapen nangra a sera. 10 Nawhani o mapatirengay i tanektekay a paranaan a niyaroˈ ko nitalaan ni Apraham. O Kawas ko misafacoay a mipatireng toya niyaroˈ. 11 O mitiˈeray to Kawas ci Sara. Talacowa mataˈlifto ko kaciwawaan ningra, nikawrira, mapafeli no Kawas cingra to sakaciwawa ningra. Nawhani “O soˈlinay a tatiˈeren koya miktonay to sowal i tamiyanan,” saan cingra. 12 Talacowa hato mamapatayto ci Apraham to nika toˈas no tireng ningra, nikawrira, citeloc cingra to caay ko mamasaˈosi ko nika ˈaloman. Matiya o nika adihay no fuˈis i kakarayan ato tafok i riyar ko nika ˈaloman nangra. 13 O mitiˈeray to Kawas cangra a maemin tangasa i nika patay nangra. Talacowa caay ka layap nangra ko nano nisowalan no Kawas a sapafeli, nikawrira, matiya o pakaˈaraway i ra:ay ko nika halamham nangra a mitala tonini. “O palafangay, o pacarcaray kami a maroˈ itini i hekal,” saan ko nipipatalahekal nangra to sowal. 14 O sakamatini no sowal nangra i, o patalahekalay to nipilongoc nangra to malokitakit nangra. 15 Caay piharateng cangra to niliyasan nangra a kitakit. Ano miharatengay cangra i, kona ira ko kangaˈayan nangra a minokay. 16 Nikawrira, o ikakarayanay a tadamaanay a kitakit ko soˈlinay a kahalamhaman nangra. Orasaka, caay ka ngodo ko Kawas ao Kawas niyam han nangra Cingra. Nawhani mapatalato no Kawas ko maloniyaroˈ nangra.
SAKA 9 FOLAD 23-29 ROMIˈAD
O ODOˈ KO KIMAD NO KAWAS | HIPRAY 12-13 FEDENGAN
O Mirikecay—O Wacay to Olah ni Yihofa
(Hipray 12:5) Matawal namo saw ko nipipaˈicel no Kawas? Samatiyaen Ningra o nika somowal no mama i wawa ko nika somowal Ningra i tamowanan. O sowal Ningra i, “Wawaaw Ako, aka pisakahemaw to nipipalatamdaw no Tapang i tisowanan. Ano matoroˈ no Tapang ko raraw iso i, aka ka toled.
w12 3/15 29 fiedac 18 fatac Aka Pinengneng to Lalikoray Demak
18 Kaadadaan no Falocoˈ a Saparikec. Alatek iraay ko miparikecay kitanan, halafinay caka sayar ko falocoˈ ita. Ira ko mahaenay harateng, adadaay ko falocoˈ, latek matoledto ko falocoˈ. (Hipray 12:5) Ano misakahemaw kita to saparikec, miculi to saparikec, anca matoleden ko falocoˈ, falah saanto ko kimad, mahecaday ko teloc—Cowa ko papakayni i sarikec a milayap to soˈlinay epoc, misalof to niyahan. Tengilen ko sapalimoˈot ni Solomon cowa ko ikakaay ko nika ngaˈay han? Saan ko sowal ningra: “Pakifalocoˈen a mararid ko minanaman iso, o nilayapan iso a sifanaˈ i, o sakaciˈorip iso.” (Taneng 4:13) Cadaen ita ko saparikec, dofdofen ko sakayat, padadotoc talaˈayaw, matira o parakatay to paliding midoedo to sapatoroˈ a talaˈayaw.—Taneng 4:26, 27; ˈosien ko Hipray 12:12, 13.
(Hipray 12:6, 7) Nawhani palatamdawen no Tapang ko kaolahan Ningra a tamdaw a maemin. O wawa Ako yahananay no Tapang a maemin i, setiˈen Ningra,” saan. 7 O nipihaen no Kawas i, o wawa Ako konini, o sanay Ningra. Saka, o nipipalatamdaw no Mama ako takowanan konini han ko harateng a mihadidi. Iraay sa ko caay pipalatamdaw to wawa a mama?
w12 7/1 21 fiedac 3 fatac “Ano Mitolon Kamo i, ‘Ama’ Saan.”
O ciolahay a wama mirikecay to wawa, samanen ciharatengay cingra to mamalo masamaanay tamdaw ko wawa. (Ifiso 6:4) Ano misalof cingra to wawa i, tanekteken ko waywayan, kawra aka pakinali mariˈang. Mahaenay, ano mirikec kitanan ko Wama ikakarayan, o naitini i olah, cowa pakinali ko pirikec. Ci Yis matiraay to Wama, cowa pakinali mirikec to nisawawaan, soˈlinto caka kaliki misalof to daˈoc nangra, cowa pakinali ci Yis mikapoiˈ a mirikec cangranan.—Matay 20:20-28; Luka 22:24-30.
(Hipray 12:11) Ano misalof ko cima a palatamdaw titaanan i, caay ko kalipahakan ita itiya, o kararoman ita. Nikawrira, iikorto i, pakayni tonini a demak ko sakacirihaday ato sakamoecel no demak no mita o nilifetan a tamdaw.
w18.03 32 fiedac 18 fatac Teloc No Manaˈayay to Sarikec a Demak
18 Soˈlin mararomay ko falocoˈ ano marikec, kawra ano manaˈayay to saparikec i—o mamalifok ko tatiihay a teloc. (Hipray 12:11) Sinanoten ita ko tinakoan ni Kain ato hongti ci Citikiya. ˈIntehay ci Kain ci Apilan, hato sadak sanay ko sapipatayaw a harateng, rikecan ni Yihofa cingra: “Nawiro maketer kiso saw? Nawiro saˈosenget sa ko pising iso saw? Ano moecelay ko demak iso i, kona matawa kiso, nikawrira, tona midemak kiso to caay ko dademaken a demak saka, misaˈimerto ko raraw i fawahan iso. O mamakowan no raraw kiso, nikawrira, o sasaˈicelen iso a milowid ko raraw.” (Satapangan 4:6, 7) Cowa pisikor to saparikec ci Kain, midemak to taˈangayay a raraw, teloc pairaay to kesem ato roray i cingranan! (Satapangan 4:11, 12) Ano micada to saparikec no Kawas coko ngangaˈay ko teloc han?
Kadkaden ko Noˈadingoan Odoˈ
(Hipray 12:1) Hatini ko nika ˈaloman no pawacayay to demak no Kawas a tamdaw a milikot i titaanan. Orasaka, falahen ita ko karetengay a ˈinorong a maemin ato mifedfeday titaanan a raraw. Lahecien ita a cumikay ko cacikayen ita.
w11 9/15 17 fiedac 11 fatac Lahecien Ita a Comikay ko Cacikayen Ita.
11 Onini sano ˈoˈolay ko nika ˈaloman a misawacayay cowa ko mitapalay a minengnengay a tamdaw, minengneng to kaolahan a cumikayay a milowid to tao, ˈarawhan i, o mirienangay cangra midefol, mahererekayto midefol to midaˈocay a cacikayen. Soˈlin mapatayto cangra, kawra o cinalifetay a midefolay tamdaw han ita minengneng cangra, hato itiniay i raringid ita miowing kitanan. Haratengen hena, ora midefolay tamdaw ano mafanaˈay to iraay ko cinalifetay a comikayay a miˈalikot cangranan, minengneng cangranan, sasamaan ko falocoˈ hani? Coko mamakowad cingra misaˈicel a comikay, misaˈicel a mitaˈelif to tolas no niyah han? Orira nolitengan a misawacayay tamdaw ngaˈayay misawacay, ora midefolan ano hakowato ko nika roray, o madimadiay sikawdan no Kawas o papakalowid tahatolas. Saka cecay hahekalan a Hipray Krisciyang, pakifalocoˈan ko taˈarawan nora ˈalomanay a misawacayay, hato timoloayto a “mihadidi” a padadotoc a milaheci to cacikayen. Mahecaday, ano sinanoten a miharateng ko taˈarawan nolitengan a misawacayay tamdaw, o papakahadidi kita, milaheci to cacikayen.
(Hipray 13:9) Aka ka safanaˈ no masamaamaanay a roma a sifanaˈ kamo. O sakaciˈicel no falocoˈ ita i, caay ko nano pitoor ita to lkakawa to pakayniay i kakaenen. O nano siniˈada no Kawas ko sakaciˈicel no falocoˈ ita. Awaay ko epoc no nipidoedo no tamdaw to lkakawa to pakayniay i kakaenen.
w89 12/15 22 fiedac 10 fatac Pacakaten ko Kahemekan ni Yihofa a Sapatoˈaya
10 Mihaenay o laliyasen no Hipray tamdaw ko miˈowingay to Yutayakiyo a ‘masaˈefit no masamaamaanay a kafokilan a sapasifanaˈ’. (kalatiya 5:1-6) O falocoˈ no tamdaw o papakaynien i sidaˈit no Kwas ao cowa ko papakaynien to matiniay kafokilan sifanaˈ a “mapatanektek”, hongaˈ makedec ko pimamet nangra to soˈlinay kimad. Ano nengnengen o tamdaw itiya pakayniay i kakaenen ato sapatoˈaya a malacongis, samanen sowal ni Pawlo o falocoˈ no tamdaw “cowa ko papakayni i kakaenen a mapatanektek”, “oya mikecengay to kakaenen a tamdaw, cowa ka pilifok to epoc.” O noˈadingoan a epoc naitiniay i noka madimadi to Kawas ato miakoˈid to sapatefoc ko saka ira, cowa ko pakayniay kakomaen to maanan kakaenen ato mitafo to maanan a lisin ko saka ira. (Loma 14:5-9) O roma i, oya patafangan ni Kristo a sapatoˈaya palasawadayto tono Lifi a sapatoˈaya.—Hipray 9:9-14; 10:5-10.
Miˈosi to Sinael
(Hipray 12:1-17) Hatini ko nika ˈaloman no pawacayay to demak no Kawas a tamdaw a milikot i titaanan. Orasaka, falahen ita ko karetengay a ˈinorong a maemin ato mifedfeday titaanan a raraw. Lahecien ita a cumikay ko cacikayen ita. 2 Pamoteken ita a minengneng ko pitiˈeran ita ci Yis. Nawhani o palowaday, o milaheciay to pitoor ita cingra. O sapilayapaw ningra to aira a malolipahak ningra saka, “O nika pakangodo ako ko mimaanay,” saan cingra. Hadidi han ningra ko nika pisemsem i hecek. Maroˈ cingra anini i kawanan no kamaroˈan no Kawas. 3 Haratengen Cingra o nano mihadidiay to piˈintel no ciraraway a tamdaw. Ta caay ka roray, caay ka toled kamo. 4 Awaayho ko mapatayay namo to nano nika pades a milowid to raraw. 5 Matawal namo saw ko nipipaˈicel no Kawas? Samatiyaen Ningra o nika somowal no mama i wawa ko nika somowal Ningra i tamowanan. O sowal Ningra i, “Wawaaw Ako, aka pisakahemaw to nipipalatamdaw no Tapang i tisowanan. Ano matoroˈ no Tapang ko raraw iso i, aka ka toled. 6 Nawhani palatamdawen no Tapang ko kaolahan Ningra a tamdaw a maemin. O wawa Ako yahananay no Tapang a maemin i, stiˈen Ningra,” saan. 7 O nipihaen no Kawas i, o wawa Ako konini, o sanay Ningra. Saka, o nipipalatamdaw no mama ako takowanan konini han ko harateng a mihadidi. Iraay sa ko caay pipalatamdaw to wawa a mama? 8 Ano caay palatamdawen no mama kiso i, caay ko soˈlinay a wawa ningra kiso. O focod a wawa kiso. O nihaenan ningra a maemin ko wawa ningra a palatamdaw. 9 O mama ita itini i hekal i, mipalatamdaw i titaanan. Ta kangodoen ita cangra. Ano hatira i, mangalef ko nika ngaˈay ita a mihakelong tono saloˈafangan a mama ita ta ciepoc ko ˈorip ita. 10 O mama ita itini i hekal i, o pasamo aca ko demak ningra a mipalatamdaw titaanan a midoedo to harateng ningra. Nikawrira, o nipipalatamdaw no saloˈafangan a mama ita i, o sakaciepoc ita, o sakapikapotaw ita i Cingraan a malafangcalay. 11 Ano misalof ko cima a palatamdaw titaanan i, caay ko kalipahakan ita itiya, o kararoman ita. Nikawrira, iikorto i, pakayni tonini a demak ko sakacirihaday ato sakamoecel no demak no mita o nilifetan a tamdaw. 12 Orasaka, fiyacen ko marorayay a kamay ato rarimaay a tosor namo. 13 Kararid a pakayra i moecelay a lalan a romakat. Ta caay ka ngalef ko piˈiw no waˈay iso. Ta maadahto ko waˈay iso. 14 Saˈicelen ko sakararihaday ato polong no tamdaw. Saˈicelen ko sakafangcal no demak namo. Ano caay ka fangcal i, caay ko papakaˈaraw kamo to Tapang. 15 Pinaˈon kamo. Latek ira ko misiikoray to siniˈada no Kawas. Latek ira ko matiyaay o sawarak a talod a tatiihay a demak a lomowad i falocoˈ no nima namo a miparawraw. Ta pakayni tonini a macengel ko ˈalomanay a tamdaw. 16 Pinaˈon kamo. Latek malamaˈodangay ano eca i, malamitodongay ci Isawan a caay ka ngodo to Kawas ko cima namo. Falic han ni Isaw to cecay a kaen ko todong no sapirocok ningra a fisac a ngangan. 17 Mafanaˈ kamo, nanoya, yo mangalay cingra a milayap to sapalemed no mama ningra i, mawanikto cingra. Ano tomangimangic cingra a mingitangit i, awaayto ko pakayraan ningra a mifalic to nidemakan ningra.
SAKA 9 FOLAD 30 –SAKA 10 FOLAD 6 ROMIˈAD
O ODOˈ KO KIMAD NO KAWAS | YAKOP 1-2 FEDENGAN
“Saka Rarawaw ato Patay a Lalan”
(Yakop 1:14) O ˈanof no tireng ko sakasolot no tamdaw a masawi.
g17.4 14 fiedac Sapalifet
Ano masolot no maanan kiso, mangalefay mamidemak to mararaway demak i, o mapalifetayto kiso. Patinakoen, ano maˈaraw iso i picakayan ko cecay dafong, tada maolahay kiso, fedat sa ko harateng alatek: Hawikid han kora dafong, awaay ko pakaˈaraway tamdaw. Itiya, pasowalay ko makapahay falocoˈ iso: Aka a, hato malasawaday kora harateng iso, liyas sato kiso, mihaenay a malowid kora sapalifet.
O MANAN SANAY KO SOWAL NO FANGCALAY CUDAD
Ano makayhid no mararaway harateng i, o tatiihayto tamdaw kiso cowa ka saan. Sowal no Fangcalay Cudad, kita kahacecay tamdaw o mamapalifet sanay. (1 Korinto 10:13) Ora kalimlaan i, ano tahasiˈayaw to sakayhid kita i, o mamitatoy to manan a demak. O roma tamdaw, cowa ka palahedawen kora harateng, saikor o mamapadik no raraw cingra. O roma tamdaw i, tangsolay palahedaw tora harateng.
“O ˈanof no tireng ko sakasolot no tamdaw a masawi.”—Yakop 1:14.
(Yakop 1:15) Cipoyapoy ko ˈanof ningra i, mahofoc to raraw. Malahad ko raraw ningra i, malasakapatay noya tamdaw.
g17.4 14 fiedac Sapalifet
Padamaay ko Fangcalay Cudad kitanan mafanaˈ, to samaanay mihawang ko tamdaw romakat to mararaway lalan. Yakop 1:15 sanay: “Cipoyapoy ko ˈanof ningra i, mahofoc to raraw.” Ano mapoyapoy ko fafahiyan i, malawedto ko toki mahofocayto to wawa. Mahecaday, ano haharateng han ita ko mararaway a demak, to cecay liyad o mamapadikto no mararaway harateng. ˈArawhan, iraay ko ˈicel ita miˈimer to niyahan, caka malakuli no ˈanof.
Kadkaden ko Noˈadingoan Odoˈ
(Yakop 1:17) O Kawas o misangaˈay to likat a maemin i kakarayan ko kasadakan no ngaˈayay ato masongilaˈay a sapafeli a maemin. Caay ka falic Cingra. Caay pisaromaroma Cingra to ˈdil Ningra.
it-1 517 fiedac Likat
“O Kawas o misangaˈay to likat a maemin i kakarayan.” (Yakop 1:17) “O cidal ko sapataengad no Tapang to romiˈad. O folad ato foˈis ko sapataengad Ningra to dadaya.” (Yirimiya 31:35) O pipowalan no noˈadingoan likat Cingra. (2 Korinto 4:6) O likat ko rikec, sapalimoˈot ato kimad ni Yihofa, ngangaˈay mikayat to makahiyay midofdof a tamdaw. (ˈOlic 43:3; 119:105; Taneng 6:23; Isaya 51:4) Saan ko sowal no mitiliday to ˈOlic: “O nano nipatedian Iso ko sakataengad niyam.” (ˈOlic 36:9; palalinien to ˈOlic 27:1; 43:3.) Naitini kasadakan no cidal tangasa kalahokan, o tedi no cidal taengadtaengaday; malecaday, mapatediˈay no likat no taneng no Kawas, o lalan no moecelay tamdaw malikat malikatay. (Taneng 4:18) O tamdaw ano tooren ko sakayat ni Yihofa a maˈorip i, o raromakat i taengad. (Isaya 2:3-5) Ano caka tingalaw ko falocoˈ no tamdaw i, o mamarefong i noˈadingoan a toˈman. Sowal sa ci Yis: “Nikawrira, ano tatiih ko mata iso i, toˈman ko tireng iso a maemin. Orasaka, ano caay ka taengad ko lalomaˈ iso i, mangalef ko nika toˈman iso.”—Matay 6:23; palalinien to Limoˈot 15:9; 28:54-57; Taneng 28:22; 2 Pitiro 2:14.
(Yakop 2:8) O sowal a matilid i Fangcalay Cudad i, “Samatiyaen o nika olah iso to tireng ko nika olah iso to tao,” saan. Ano madoedo namo konini a rikec no nikowanan no Kawas a kitakit i, ngaˈayay ko demak namo.
it-1 1004 fiedac 10 fatac Rikec
“Tadamaanay a Rikec.” O mikiriwiˈay ko “tadamaanay rikec”, mikowanay to kalalaˈed no tamdaw (mahawpay ko kalalaˈed no hongti ato finawlan) tada o masaka limlaan koni. (Yakop 2:8) O kalimlaan no katatelekan a Rikec i, o olah, polong a sarikec ato sowal no pairasolay miketingay toni saka tosa a limoˈot, “o nika olah iso to tireng ko nika olah iso to tao” (tadamaanay rikec) (Matay 22:37-40) Mihaenay haw i, soˈliˈlin cowa ka makowan no katatelekan Rikec ko Krisciyang, kawra ano doedoen ko faelohay katatelekan, o mamidofdof cangra to rikec ni Yihofa, ato rikec no wawa Ningra ci Yis Kristoan.
Miˈosi to Sinael
(Yakop 2:10-26) Ano maˈimeˈimer ko cima to polong no rikec, ano miliyangay cingra to cecay i, o miliyangay cingra to polong no rikec. 11 Nawhani “Aka ka ˈodang,” yasanay a somowal a Kawas i, “Aka pipatay to tamdaw,” saan ko roma a sowal Ningra. Orasaka, ano caacaay ka ˈodang kiso, ano mipatay kiso to tamdaw i, o miliyangayto kiso to Rikec. 12 Pinaˈon kamo to sowal ato demak namo. Nawhani pakayni tonini a mitdalay to tamdaw a rikec ao mamaliclic kako han ko falocoˈ namo. 13 O caay ka siniˈada to tamdaw i, caay ko kasiniˈadaen no misawkitay a Kawas. Nikawrira, o siniˈadaay to tamdaw i, o mamaliyas ningra ko pisawkit no Kawas. 14 Salikakaaw ako, o mitiˈeray kako ci Kristoan, ano saasaan ko cima, ano caay ka ngaˈay ko demak ningra i, o maan ko epoc saw? Pakapaˈorip cingraan ko matiraay a pitiˈer ningra ci Kristoan haw? 15 Tinako sa, ano caay ka deng to rikoˈ, ano cangoˈot to kakaenen ko salikaka namo to faˈinayan to fafahiyan i, 16 “Sangaˈayen ko namo! Sadihekoen, pafecolen!” ano saan ko cima namo i cangraan, ano caay pafelien namo cangra i, o maan ko epoc to nika somowal namo saw? 17 Malecad torira, ano caay pahapinangen namo i demak namo ko nipitiˈer namo ci Kristoan i, awaay ko epoc. 18 Nikawrira, ira ko sasomowal a tamdaw, “O pasoˈlinay a mitiˈer ci Kristoan kora tamdaw. O malalokay to ngaˈayay a demak konini a tamdaw,” saan. Ano hatira i, sowalen ako cingra, “Patiriˈen kako to awaay ko demak a nipitiˈer no nima ci Kristoan. Ta pakaynien ako i demak ako ko nipipatiriˈ tisowanan to pitiˈer ako ci Kristoan,” o hahaenen ako a pacaˈof. 19 Cecay ko Kawas saan ko pipasoˈlin iso haw? Ngaˈayay korira. Halopalafoay a pasoˈlin a mamirmir a matalaw. 20 Kiso o mafolaay a tamdaw, mangalay kiso saw to pipatado no tao tisowanan a pahapinang to nika awa ko epoc noya caay pilaheci a midemak a pitiˈer ci Kristoan? 21 O maan ko sakangaˈay no tatoˈasan ita ci Apraham a malayap no Kawas saw? Pakayni i demak ningra a mipacakat to wawa ningra ci Isakan i pipacakatan ko sakangaˈay ningra. 22 Itini a mafanaˈ kiso, malalilid ko nipitiˈer ni Apraham to Kawas ato demak ningra. Saka, pakayni i demak ningra ko sakasongilaˈ no pitiˈer ningra to Kawas. 23 Saka, malaheci ko sowal a matilid i Fangcalay Cudad toya, “Mitiˈer ci Apraham to Kawas a pasoˈlin to sowal Ningra. Saka, raheker ko Kawas a milayap cingraan,” sanay. Saka, o widangto no Kawas han cingra. 24 Itini a mafanaˈ kamo, pakayni i demak ko sakangaˈay no tamdaw a malayap no Kawas. Caay ka pakayni i pitiˈer ci Kristoan a cecay. 25 Mahaenay ci Rahap oya tasalamaan a fafahiyan. Pakayni i demak ningra ko sakangaˈay ningra a malayap no Kawas. Nawhani hamhamen ningra koya misolapay to niyaroˈ a Yutaya a tamdaw. O romasato, papilaliwen ningra cangra a pakayra i roma a lalan. 26 Tinako sa, ano awaay ko saloˈafang no tatirengan i, o mapatayay koya tatirengan. Malecad tonini, ano caay ka hapinang i demak ko pitiˈer ci Kristoan i, o mapatayay ko pitiˈer noya tamdaw.