Pinengnengan to lalakaw no Mitosilay ato Nikaˈorip Rayray no Saˈopo
SAKA 6 FOLAD 1-7 ROMIˈAD
O ODOˈ KO KIMAD NO KAWAS | SATAPANGAN 44-45
“Misododan ni Yosif ko Salikaka Ningra”
(Satapangan 44:1, 2) Palimoˈoten ni Yosif koya misimaway to lomaˈ ningra a somowal: “Tomesen a miparo ko pawti nangra. Ano hakowa ko tatodong nangra a miˈorong i, doedo han a mitomes a miparo. Patikolen a miparo i pawti no kahacecay ko payci nangra. 2 Itira i pawti noya sasafaay nangra i, paroen koya ekim a takid ako atoya payci ningra.” Saka, doedo hanto noya misimaway to lomaˈ ko limoˈot ni Yosif.
w15 5/1 14-15 fiedac
“Mangaˈay Kako Mitisod to Kawas Saw?”
Misaˈfitan ni Yosif ko demak, micorcor to tamdaw milepel to salikaka ningra, mipakokot cangranan to mitakaway to lingkim a takid ningra. Itiniay i pawti ni Pinyamin mahela no misimaway kora takid, oraanto i, pataynian cangra maemin tayra ci Yosifan. Itiyaay maˈaraw ni Yosif ko soˈlinay falocoˈ nangra. Caciyawto ci Yuta patado to salikaka, mingitangit to pisodod ni Yosif, somowal to sidayen i Icip koya 11 a salikaka a mala kuli. ˈArawhan ci Pinyamin aca ko mamasiday mala kuli i Icip sa ci Yosif, minokay tala lomaˈ ko romaroma saan.—Satapangan 44:2-17.
Somowalto ci Yuta to kasemeran a sowal: “O mihofocan no wina ningra i, edenganto cingra cecay ko materekay, tada o kaolahan no wama cingra.” Oniniya sowal tada mitemeray to falocoˈ ni Yosif, maharateng ningra ko wina no niyah, oyaan tada kaolahan a fafahi ni Yakop ci Rakir. Ci Yosif i, matira ci Yakopan adihayay materek i falocoˈ ningra ko kangaˈayan ni Rakir. Mahofoc cingra to sasafaay a wawa ci Pinyamin i, mapatayay cingra. Tona ci Rakir ko mihofocay tonini tatosa malikakaay, saka tangongol ko olah ni Yosif ci Pinyaminan.—Satapangan 35:18-20; 44:20.
Ngangitangit han ni Yuta ci Yosif aka sidayen ci Pinyamin a mala kuli, o kako sa ko mamasiday mikotay to safa a mala kuli han ningra. Oraanto tangic sato mingitangit cingra: “Ano caay pihakelong konini a wawa i takowanan a minokay i, maanen ako ko pinokay i ciwamaan ako saw? Caay ko papakahadidi kako a minengneng to matiniay a nika pades no wama ako.” (Satapangan 44:18-34) Nohatini, maˈaraw ni Yosif to soˈlinay pasasiyor ko falocoˈ ni Yuta. Cowa aca ko nika tatiihen ko falocoˈ ni Yuta, hanaca tada patahkalay to siniˈadaay falocoˈ cingra, caay ko niyah aca ko miharatengan.
Nohatini, caayto pakaemet ci Yosif to falocoˈ ningra. Papipahadaken ningra ko polong a matayalay, oraanto lekal sato tomangic cingra, somowal: “O salikaka namo kako ci Yosif.” Matengil no salikaka ningra marawrawto a fahkaˈen. Paihkalay to taˈangayay a sidaˈit ci Yosif, mitakec cangranan, misodod cangranan, makahi a miwalawal to ˈinteh. (Satapangan 45:1-15) Mihaenay cingra patahkal to makahiyay misodod a capeling ni Yihofa. (ˈOlic 86:5) Ngaˈayay kita mitodong ci Yosifan!
(Satapangan 44:33, 34) Nohatini, tapangaw ako, mangalay kako a tahasiday itini a mikotay tonini a wawa a malakuli iso, papihakelongen cingra to kaka ningra a minokay. 34 Ano caay pihakelong konini a wawa i takowanan a minokay i, maanen ako ko pinokay i ciwamaan ako saw? Caay ko papakahadidi kako a minengneng to matiniay a nika pades no wama ako!”
(Satapangan 45:4, 5) Pasowal han ni Yosif ko salikaka: “Katayni i kaˈayaw ako.” Saka, raod han nangra cingra. Sowal sa ci Yosif: “O safa namo kako ci Yosif, oya nipacakayan namo a patayni i Icip kako. 5 Nikawrira, aka ka rawraw ko falocoˈ namo, makamiroroh kamo. O pidipot no Kawas to ˈorip ita konini, saka, paiˈayaw han Ningra kako a miocor a patayni.
Kadkaden ko Odoˈ no Sinael
(Satapangan 44:13) Itiya i, rarom sato koya malikakaay a maemin, cinas sa to rikoˈ nangra, ta padakawen nangra i lofa ko ˈinorong nangra, patikol cangra a tayra i niyaroˈ.
it-2 337 fiedac
Micinas to Rikoˈ
O Yutaya tamdaw, micinasay to rikoˈ a paihkal to nika rarom, mangalefay ano matengil to kapatay no salawina mihaenay to demak cangra. Tohatiniay o ˈaˈayaw no rikoˈ aca ko micinasan, pasadak to falohang, ao cowa ka cicih han mihaemin ko rikoˈ a cato ka ngaˈay a caˈedongen.
O saˈayaway masowalay no Fangcalay Cudad to micinasay to rikoˈ a demak i, milingatay to sakakaay wawa ni Yakop ci Riupinan. Tiya patatikol cingra awa maˈaraw ci Yosif i tefon i, cinas saan to rikoˈ, sowal sa: “Awaayto koya wawa, samaan sato?” O sakakaay a wawa ci Riupin, ciˈinorongay to ˈorip no safa. Tiya matengil ni Yakop to mapatayay ci Yosif, nao soˈlinay mapatay saan cingra, mihaenay a micinas to rikoˈ, mifakec i tatelecan to pawti, tomangic a mararom saki Yosifan. (Satapangan 37:29, 30, 34) Ikor itini i Icip, ira ko mipakokotay to mitakaway ci Pinyamin, mararomay ko salikaka ni Yosif a micinas to rikoˈ cangra.—Satapangan 44:13.
(Satapangan 45:5-8) Nikawrira, aka ka rawraw ko falocoˈ namo, makamiroroh kamo. O pidipot no Kawas to ˈorip ita konini, saka, paiˈayaw han Ningra kako a miocor a patayni. 6 O saka tosaho a mihecaan a makedal ko pala, iraho ko lima a mihecaan, caay ko mamangaˈay a maomah, awaay ko kinaira. 7 Paliˈayawen no Kawas kako a patayni, oha sapidemakaw to tadamaanay a demak, sapidipotaw tamowanan ato teloc namo. 8 Mihaenay haw i, cowa ko kamo ko patayniay takowanan, ao Kawas. Minilnilan Ningra kako mapala sakakaay no hongti a tapang kako, mikowan to polong a paro no lomaˈ ni Falaw ato polong a kitakit no Icip.
w04 8/15 15 fiedac 15 fatac
Awaay ko Lalangian a Kaˈintehen no Tao
15 Ano awa ko lalangian a makaˈinteh no tao kita i, sasamaan a caka ˈintehen hani? Aka mapawan, ci Satan ato mariˈangay a coyoh ko ˈada no mita. (Ifiso 6:12) Soˈliˈlin iraay ko tatiihay ko falocoˈ a padeteng saan a miroero kitanan, kawra o ˈalomanay a misafelitay to Krisciyang a tamdaw, o nika caka fanaˈ anca maˈowingay no tao cangra ko sapihaen. (Taniil 6:4-16; 1 Timoti 1:12, 13) O tokel ni Yihofa i, ‘malidong ko masamaamaanay a tamdaw, misasoˈlin a mafanaˈ to kimad.’ (1 Timoti 2:4) ˈArawhan i, iraay ko namisafelitay kitanan a tamdaw, tona maˈaraw ko ngaˈayay waywayan ita, awa ko patelac ita, ikor mala Krisciyangayto cangra. (1 Pitiro 2:12) Ngaˈayay a todongen ita ko mipatirengan a taˈarawan no wawa ni Yakop ci Yosif. Makariˈang no kakakaka ci Yosif, tada mararomay cingra, kawra cowa ka ˈinteh ko falocoˈ. Misamaanay hano hatira hani? Samanen maˈaraway ningra to ikamayay ni Yihofa ko kihcod, o mamafanaˈ ci Yihofa miliyoc to demak a milaheci to araaw Ningra. (Satapangan 45:4-8) Mahaenay, ano masamsam kita i, o aˈimeren ni Yihofa ko demak, saikor mapaˈodingar ko ngangan Ningra.—1 Pitiro 4:16.
Miˈosi to Sinael
(Satapangan 45:1-15) Itiya, caayto pakaˈmet ci Yosif to falocoˈ ningra. Saka, lekal han ningra ko matayalay a pasowal: “Kasadak a maemin kamo!” Yo awato ko romaroma a tamdaw itira i, pakafanaˈen ni Yosif ko salikaka to cima cingra. 2 Ongong sato ci Yosif a tomangic, matengilto no Icip a tamdaw ko tangic ningra, tahirato i lomaˈ no hongti konini a ratoh. 3 Pasowal sa ci Yosif to salikaka ningra: “Ci Yosif kako. Ngaˈayho ciwama haw?” Kawra mafanaˈ ko salikaka ci Yosifan i, cekok sa a maemin a maorat, caayto pakapacaˈof cangra a pasowal. 4 Pasowal sa ci Yosif to salikaka ningra: “Ka tayni miraod i takowanan.” Saka, tayra sato cangra i tatihi ningra. Sowal sa ci Yosif: “O salikaka namo kako ci Yosif, oya nipacakayan namo tayni i Icip a Yosifan. 5 Nikawrira, aka ka rawraw ko falocoˈ namo, makamiroroh kamo. O pidipot no Kawas to ˈorip ita konini, saka, paiˈayaw han Ningra kako a miocor a patayni. 6 O saka tosaho a mihecaan a makedal ko pala, iraho ko lima a mihecaan, caay ko mamangaˈay a maomah, awaay ko kinaira. 7 O sapidipotaw no Kawas tamowanan ato teloc namo saka, paiˈayawen Ningra kako a miocor a patayni, pakaynien Ningra i kafahkaˈan a demak ko pipaˈorip i tamowanan. 8 Paliˈayawen no Kawas kako a patayni, oha sapidemakaw to tadamaanay a demak, sapidipotaw tamowanan ato teloc namo. 9 “Kalamkamen a minokay i ciwamaan, pasowalen cingra, ‘sanay ko sowal no wawa iso ci Yosif: “Minilnilanto no Kawas kako a malatapang no polong no kitakit no Icip. Kalikien a tayni. 10 Alaen ko wawa iso ato fufu iso ato kolong ato siri ato polong no maamaan iso a tayni i Kosin a maroˈ a mingata i takowanan. 11 O dadipoten ako a pakaen kiso. Ho caka macahiw kiso ato paro no lomaˈ iso a malo pakoyoc kamo, tona iraho ko lima a mihecaan a kedal.”’ 12 Nohatini matoeto namo maemin ato safa ako ci Pinyamin a minengneng kako, kako ci Yosif konini a somowalay i tamowanan. 13 Pasowalen ciwama to nika tadamaan no sakowan ako i Icip, pasowalen cingra to polong no maˈaraway namo a demak a maemin. Kalamkamen a minokay, alaen ko wama a patayni.” 14 Itiya i, takec han ni Yosif ko safa ningra ci Pinyamin a miongong a tomangic, halo safa ningra a mitakec cingraan a miongong a tomangic. 15 Hangoten ningra ko polong a kaka ningra, mitakec a tomangic. Ikorto i, misatapangto ko salikaka ningra a caciyaw i cingranan.
SAKA 6 FOLAD 8-14 ROMIˈAD
O ODOˈ KO KIMAD NO KAWAS | SATAPANGAN 46-47
“Mapadang Itini i Kakedalan”
(Satapangan 47:13) Tadatataˈang ko kedal saka, awaayto icowacowa ko kakaenen, sararima sato to cahiw ko finawlan no Icip ato Kanan.
w87 11/1 15 fiedac 2 fatac
Malidong ko ˈOrip Itini i Kakedalan
2 Pito miheca a kadofahay mahererekayto, matira mipairasolan ni Yihofa, misatapangto ko kedal—Cowa aca ko Icip ko makedalay, macapiday i ‘polong no hekal.’ Tiya misatapangto macahiw ko Icip tamdaw i, misaaliay ci Falawan to kakaenen, oraanto: “Palimoˈoten noya hongti cangra a patayra ci Yosifan, doedoen ko sowal ni Yosif,” han ningra. Pacakayen ni Yosif ko Icip to kakaenen, tangasa kaeminan no payci nangra. Haydaen ningra cangra pacakay to pinaˈorip a miaca to kakaenen. Salikorto i, taynito ko finawlan ci Yosifan pasowal: “Mamaan falic han kami ato sera niyam to malo kakaenen niyam. Hano hongti sato ko sera niyam, ngaˈayto a malakuli no hongti kami, patadoen niyam cingra a maomah.” Saka, cakayento ni Yosif ko sera no polong a Icip mala sera ni Falaw.—Satapangan 41:53-57; 47:13-20.
(Satapangan 47:16) Pacaˈof sa ci Yosif, “Ano maeminayto ko payci namo i, ngaˈayto a pataynien ko pinaˈorip namo to sapifalic to kakaenen,” han ningra.
(Satapangan 47:19, 20) Nanay saharateratengenho ko sakaecaaw ka patay niyam. Malakohkohanto ko omah niyam, mamaan falic han kami ato sera niyam to malo kakaenen niyam. Hano hongti sato ko sera niyam, ngaˈayto a malakuli no hongti kami, patadoen niyam cingra a maomah. Nanay pafelien kami to kakaenen, ta maˈoripho kami, pafelien kami to sapaloma, ta ira ko sapifolsak niyam i omah,” han nangra. 20 Itiya i, mangalef a tataˈang ko kedal saka, pacieci sato ko Icip a tamdaw a pacakay to sera nangra. Saka, patado hanto ni Yosif ko hongti a micakay to polong no sera no Icip a tamdaw. Malaserato no hongti a maemin koya sera nangra.
(Satapangan 47:23-25) Pasowal sa ci Yosif to finawlan, “Tona mapatadoto ako imatini ko hongti a micakay tamowanan ato omah namo saka, pafelien ako kamo to sapaloma, ta ira ko sapifolsak namo i omah. 24 Ano militodto kamo i, pafelien ko hongti to cecay no lima no kinaira namo, o romaroma i, o malo no namoto a kakaenen ato paro no lomaˈ namo ato sapaloma,” han ningra. 25 Pacaˈof sa cangra, “Tapangaw, mapaˈorip iso ko ˈorip niyam, tadasiniˈadaay kiso i tamiyanan, mihai kami a malakuli no hongti,” han nangra.
kr 234-235 fiedac 11-12 fatac
Hongti Kitakit no Kawas Papalaˈosi to Araaw no Kawas Itini Toni Sera
11 Kadofahay. Itini toniya hekal iraay ko noˈadingoan a kedal. Sowal no Fangcalay Cudad: “Satakaraway a Tatapangan ci Yihofa sanay ko sowal: ‘Nengnengen! Maraodto ko toki, o tatefaden Ako ko kedal i sera. Macahiw ko tamdaw cowa ko nika cangoˈot no kakaenen, masoˈaw ko tamdaw cowa ko nika awa no nanom, ao nika cowa pitengil to sowal ni Yihofa.’” (Amos 8:11) O tamdaw no Hongti Kitakit no Kawas o mamacahiw han? Paliˈayaway ci Yihofa pakayni to tamdaw Ningra ato misaˈadaay cangranan a tamdaw, to samaanay ko nika sasiroma nangra. Sowal sa: “O sikawdan no Mako aira ko kakaenen, kamo i, o mamacahiw. O sikawdan no Mako o aira ko nananomen, kamo i, o mamasoˈaw. O sikawdan no Mako o lalipahak, kamo i, o mamapakangodo.” (Isaya 65:13) Maˈaraway iso ko nika laˈosi noni sapairasol han?
12 O macadaay ita a noˈadingoan kakaenen tada kadofah kadofahay, matira o cedas no ˈalo a mapowar. Itini toni makedalay i noˈadingoan a hekal, o mitepangan cudad, lokoing, ika, saˈopo, taykay ato i wangcanay a mitepangan, matiraay o macedasay a nanom, kadofahay a mirenec to noˈadingoan a saali ita. (Icikil 47:1-12; Yoil 3:18) To romiˈamiˈad maˈaraway iso ko nika laˈosi no sakiˈok no Kawas, kadofah ko sapafeli i tisowanan i, coko lipahakan nanay kiso han? Kiemelay kiso milayap to noˈadingoan a sapafeli ni Yihofa han?
Kadkaden ko ˈOdo no Sinael
(Satapangan 46:4) Mikapot Kako i tisowanan a tayra i Icip, o romasato, o kakeriden Ako ko teloc iso a panokay tonini a sera. Ano mapatay kiso i, o aira ci Yosif i tatihi iso a mikepit to mata iso.”
it-2 1211 fiedac 4 fatac
Mikepit to Mata Iso
Mikepit to mata no mapatayay tamdaw. Hananay ni Yihofa ci Yakop: “O kakepiten ni Yosif ko mata iso.” (Satapangan 46:4) Tatodong nora sowal i, ano mapatay ci Yakop o aira i tatihi ci Yosif a mikepit to mata ningra, tohatiniay o ˈinorong no sakakaay a wawa koni. O paihkalay ci Yihofa ci Yakopan, o fadangalan no fisac wawa ao ci Yosif ko mamilayap.—1 Rayray 5:2.
(Satapangan 46:26, 27) O mihakelongay ci Yakopan a tayra i Icip a teloc ningra i, enem a poloˈ ira ko enem a tamdaw, caay ka saˈosi ko kadafo. 27 Tatosaay ko wawa ni Yosif i Icip. O polong no paro no lomaˈ ni Yakop to tayraay i Icip i, pitoay a poloˈ a tamdaw.
nwtsty sapatongal sowal no Dmak 7:14
75 ko polong a tamdaw: Pasowal ci Stifano toni 75 a tatamdawan to tayraay i Icip sa i, cowa ko naitiniay i sinael no Hipray Fangcalay Cudad a miala tora komodan. Awaay matilid kora komodan i Masoritik hananay a Hipray Fangcalay Cudad. O sowal i Satapangan 46:26: “O mihakelongay ci Yakopan a tayra i Icip a teloc ningra i, enem a poloˈ ira ko enem a tamdaw, caay ka saˈosi ko kadafo.” Dotoc i 27 sinael: “O polong no paro no lomaˈ ni Yakop to tayraay i Icip i, pitoay a poloˈ a tamdaw.” Itini, tosaay a masasiroma ko pisaˈosi, ora 66 a tamdaw o tadafofo aca ni Yakop ko misaˈosian, ora 75 a tatamdawan o komodan to tayraay i Icip a maemin a tamdaw. Itini i Kasadakan 1:5 ato Limoˈot 10:22, o sowal itira 70 ko teloteloc ni Yakop sanay. Ora nisowalan ni Stifano a 75 a tamdaw, mahawpay ko polong a lalomaˈan ni Yakop. Masalalomaˈay ko wawa ni Yosif ci Manasi aci Ifraim, sanay ko sowal no roma a tamdaw. Kawrira itini i Satapangan 46:20, cowa ka masowal cangra. Mankora, ora 75 a tamdaw o komodan a saˈosi kora. Oniniya 75 a komodan tamdaw matiliday i Satapangan 46:27 ato Kasadakan 1:5 no Pitoay Poloˈ Tamdaw a Mihongyakan. O roma sa i, itiniay i saka 20 hahekalan, mahelaay a tosa Mapatayay a Riyar a maloloday cudad, o sowal i Kasadakan 1:5, “pitoay poloˈ ira ko lima tamdaw” sanay. O naitiniay toniya nolitengan a cudad ci Stifano a somowal tora komodan a tamdaw alatek. Ano icowaayto ko matatodongay hokira, ora nisowalan ni Stifano a 75 a tamdaw o komodan a teloteloc ni Yakop.
Miˈosi to Sinael
(Satapangan 47:1-17) Tayra ci Yosif a mifanaˈ ci Falawan: “Ira a tayni nai Kanan ko wama ato salikaka ako, mihawikid cangra to kolong ato siri ato polong no dafong nangra a tayni, ira cangra i Kosin imatini.” 2 Mikeridan ningra ko lalima a salikaka tayra miˈaraw ci Falawan. 3 Licayen ni Falaw cangra: “O manan ko tayal namo?” Pacaˈof han nangra ci Falaw: “Malecaday to tayal no tatoˈasan niyam ko tayal niyam, o pakaenay to siri ko ˈorip niyam.” 4 Pasowal haca cangra ci Falawan: “Tona tataˈang ko kedal i Kanan a pala, awaayto ko pipakaenan niyam to masafelaway a siri saka, malinah kami a tayni. Nanay, haydaen ko nika maroˈ niyam i Kosin a pala.” 5 Pasowal sa ci Falaw ci Yosifan: “Imatini taynito ko wama ato salikaka iso a maemin. 6 O polong a sera no Icip itiniayto i kamay iso, ngaˈayto a maroˈ ko wama ato salikaka iso i sangaˈayay a pala. Nagangaˈay cangra maroˈ i Kosin. Ano ira ko cima to citanengay nangra i, ocoren cangra a papikowan to pinaˈorip ako.” 7 Nanoya, keriden ni Yosif ko wama ningra ci Yakop a tayra ci Falawan. Itiya i, palemeden ni Yakop ci Falaw. 8 Licayen ni Falaw ci Yakop: “Pinato ko mihecaan iso?” 9 Pacaˈof sa ci Yakop ci Falawan: “O polong no mihecaan ako a misarakarakat a maˈorip i hekal i, semoˈot ira ko tolo a poloˈ a mihecaan. Mamokoˈ konini a mihecaan ako sahto o roray, caay ko papakatoor kako to mihecaan no tatoˈasan ako.” 10 Yo mamiliyas ci Yakop i, palemeden haca ningra ci Falaw, ta masadak cingra. 11 Doedo hanto ni Yosif ko nano limoˈot ni Falaw a pakamaroˈ to wama ato salikaka ningra i saˈangayay a sera no Icip, itira i Ramis, pafelienho cangra to sera malo omah nangra. 12 O romasato, pafelien ningra to kakaenen ko wama ato salikaka ningra ato polong no paro no lomaˈ no wama ningra a maemin. 13 Tadatataˈang ko kedal saka, awaayto icowacowa ko kakaenen, sararima sato to cahiw ko finawlan no Icip ato Kanan. 14 O finawlan no Icip ato finawlan no Kanan tayraay a micakay to kakaenen, palidlid sato a masoped ni Yosif ko payci nangra, patayraento ningra ko payci i lomaˈ no hongti ci Falaw. 15 Ikor, awato ko payci no finawlan no Icip ato Kanan i, tayra ko finawlan no Icip ci Yosifan a mingitangit ci Yosifan: “Maeminto ko payci niyam, nanay saharateratengenho kami a pafeli to kakaenen, ta caay ka patay kami to cahiw to nika awa no payci.” 16 Pacaˈof sa ci Yosif: “Ano maeminayto ko payci namo i, ngaˈayto a pataynien ko pinaˈorip namo to sapifalic to kakaenen.” 17 Saka, patayraen nangra ci Yosifan ko pinaˈorip nangra, falicen ni Yosif to kakaenen ko efa, kolong, siri, lofa nangra. Toya mihecaan i, falicen ni Yosif to kakaenen ko polong no pinaˈorip no finawlan.
SAKA 6 FOLAD 15-21 ROMIˈAD
O ODOˈ KO KINMAD NO KAWAS | SATAPANGAN 48-50
“Matoˈasay Tamdaw Ngaˈayay Milomal to Adihayay Nalifetan Nangra”
(Satapangan 48:21, 22) Nanoya pasowal haca ci Yakop ci Yosifan, “Mangatato a mapatay kako. Nikawrira, o mamikapot ko Kawas i tamowanan a mikerid a panokay i sera no tatoˈasan namo. 22 O sapafeli ako tisowanan a sera o mamikikaka to cecay ko nika adihay to salikaka iso, oya tano funusan ato panaˈ ako a miˈafas nai Amori a tamdaw kora.”
it-2 645 fiedac 1 fatac
Yakop
Tiya mamapatay ci Yakop, palemeday to fufu ningra, tatosa wawa ni Yosif. Itini sakayat no Kawas, paisaˈayawan ningra ko saka tosa wawa ci Ifraim, mikiˈayaw to sakakaay wawa ci Manasian, ikor saan pasowal toya mihatosaay milayap to hafay no fisac wawa ci Yosifan: “O sapafeli ako tisowanan a sera o mamikikaka to cecay ko nika adihay to salikaka iso, oya tano funusan ato panaˈ ako a miˈafas nai Amori a tamdaw kora.” (Satapangan 48:1-22; 1 Rayray 5:1) Tano paycian ni Yakop micakay ko sera ni Sikim wawa ni Hamor (Satapangan 33:19, 20), ora nikiˈokan no Kawas ci Yosifan, nao pitiˈer ni Yakop kora. Paliˈayaway pasowal ci Yakop, o mamilowid to Kanan ko teloteloc ningra, mahecaday tano funusan ato panaˈ a miˈafasan a sera. (Nengnengen ko AMORI TAMDAW.) Itini toniya lalowiden a sera, tosaay ko malayapay ni Yosif a todong, ono ngasaw ni Ifraim aci Manasi a sera.
(Satapangan 49:1) Tahidangen ni Yakop a misaˈopo ko wawa ningra, sowal sa cangraan, “Katayni kamo a maemin, pasowalen ako kamo to aira a mamalitemoh namo a demak i ikor nonini.
it-2 1221 fiedac 8 fatac
Saikoray Lintad
ˈAyaw no Mamapatay ci Yakop Sapairasol a Sowal Ningra. Pasowal ci Yakop to wawa: “Katayni kamo a maemin, pasowalen ako kamo to aira a mamalitemoh namo a demak i ikor nonini.” Oniniya “i ikor” a demak hananay i, oyanan papalidlid saan a malaˈosi ko sowal ni Yakop a lalintadan. (Satapangan 49:1) ˈAyaw to tosa soˈot miheca toya pasowal ci Yakop toniniya sowal i, pasowalan ni Yihofa ko fofo ni Yakop ci Apram (Apraham), o mamasamsam ko teloc ningra to sepat soˈot a miheca. (Satapangan 15:13) Mihaenay haw i, oyanan nisowalan ni Yakop a “i ikor” a demak, o aitini to pihererekan noni sepat soˈot miheca a misatapang. (Pakayni to saka 49 fedengan no Satapangan, nengnengen ko lalakaw ilaeno no kahacecay wawa ni Yakop.) O roma sa i, ora sapairasol ni Yakop milingatay to “Israil no Kawas,” oyanan noˈadingoan a Israil tamdaw.—Satapangan 6:16; Loma 9:6.
(Satapangan 50:24, 25) Saikor, pasowal sa ci Yosif toya salikaka ningra, “Mangatato kako a mapatay, nikawrira, o dadipoten no Kawas kamo a mikerid a paliyas tonini a pala, patayraen Ningra kamo i niketonan Ningra to sowal ci Aprahaman, ci Isakan, ci Yakopan a sera.” 25 Tahidangen ni Yosif ko Israil a tamdaw a papiketon to sowal, sowal sa cingra, “Papadamaen no Kawas kamo. Alaen namo ko ˈokak ako a patayra.”
w07 6/1 28 fiedac 10 fatac
O Matoˈasay—Papalemed to Kaemangay
10 Matoˈasay Krisciyang ngangaˈay palemed to salikaka. Oya sowal ni Yakop to wawaan ˈayaw no mapatay cingra, fanekfekay ko falocoˈ a milimasmas, oniniya demak soˈlin o kantangay, kawra o mamifiyor to pinaay soˈot ˈofad a midokoay to Kawas a teloteloc a tamdaw. Tiya 110 ko mihecaan ni Yosif i, “papiketonan to sowal pakayni to ˈokak ningra”: Palimoˈot cangranan ano miliyas ko Israil to Icip ano hacowaay i, aˈorongen a miala ko ˈokak ningra. (Hipray 11:22; Satapangan 50:25) Mapatayto ci Yosif i, malakuliay ko Israil tamdaw i Icip to koedaway a linted. Itini toniya kapadesan a mihecaan, ora sapatoron ni Yosif a sowal pairaay to hatokel noya malakuliay a Israil tamdaw, pakasoˈlin cangra to mamaliyas nangra ko kalakulian a romiˈad.
Kadkaden ko ˈOdo no Sinael
(Satapangan 49:19) “Ci Kat i, o lalooden no adaˈ, nikawrira, o cacoˈayen ningra a milepel cangra.”
w04 6/1 15 fiedac 4-5 fatac
O Mapalemeday ko Paˈodingaray to Kawas a Tamdaw
4 ˈAyaw to mamicomod to Mikiˈokan Pala ko Israil i, maˈaraw no Kat a ngasaw ko kawali no Yortan ˈAlo to mangaˈayay a pipakaenan to siri i, mingitangitay cangra to aitira ko aroˈ nangra. (Saˈosi 32:1-5) Nikawrira, adihayay ko mamalifa a pasangaray i kawali no ˈalo. O ikaetipay maroˈ a ngasaw, iraay ko Yortan ˈalo a miˈading, miconged to milooday a ˈada. (Yosuwa 3:13-17) O ikawaliay no Yortan ˈAlo i, sanay ko sowal ni Atam Smis i mitilidan ningra a cudad: “Kawali no ˈalo o takaraway a masadafdafay a pala no Arapiya, awaay ko maamaan a tokos a miˈading, mansa marariday micomod ko miresapay pakaen to pinaˈorip a tamdaw. To mihecahecaan mihaenay cangra a micomod miˈafas to parengosan.”
5 Mararid a malood no roma finacadan ko Kat sa i, samaanay cangra a misiˈayaw hani? ˈAyaw no tosa soˈot miheca to mamicomod to Mikiˈokan a Pala ko Israil, paliˈayaw pasowal ko tatoˈasan nangra ci Yakop: “Ci Kat i, o lalooden no adaˈ, nikawrira, o cacoˈayen ningra a milepel cangra.” (Satapangan 49:19) O lalooden no tamdaw ko teloc ni Kat sa kora sapairasol, tengil han hato cowa ko kangaˈayan, ˈarawhan i, tatodong nora sowal, papicoˈayay to ˈada. Mikiˈokay ci Yakop, ano mihaen to demak cangra i, o mamapadik ko ˈada a milaliw, o teloc ni Kat ko mamilepel to mapadikay a sufitay, miˈodis to lalikor no ˈada.
(Satapangan 49:27) “Ci Pinyamin i, matiya o oles. O dafak i, komaen cingra to niˈadopan, o dadaya i, misakilac cingra to niˈafasan.”
it-1 150 fiedac 2 fatac
Pinyamin
Paliˈayaw pasowal tono ikoran ci Yakop to ˈayaw no patay, o teloc ni Pinyamin sahtoay o cicediay a sufitay sanay. Palemedan ni Yakop koni tada kanonoˈan a wawa, sowal sa: “Ci Pinyamin i, matiya o oles. O dafak i, komaen cingra to niˈadopan, o dadaya i, misakilac cingra to niˈafasan.” (Satapangan 49:27) O sufitay no Pinyamin mafanaˈay a mitekol to fakeloh, ano o kawili a kamay anca o kawanan kamay, pakatamaay a mitekol. (Kakitaan 20:16; 1 Rayray 12:2) Kakitaan ci Ihut o Pinyamin a tamdaw, mafanaˈay tano kawili a kamay, mipacok toya mariˈangay a hongti ci Iklonan. (Kakitaan 3:15-21) Ora sasinanoten i, saˈayaˈayaw a nipipatireng ko Israil kitakit, o Pinyamin a ngasaw, soˈlin o sasafaay a ngasaw, ˈarawhan oya saˈayaway a hongti no Israil, nao wawa ni Kis ci Sawlo. Mafanaˈay ci Sawlo a milood, micoˈay to Filistin a tamdaw. (1 Samuil 9:15-17, 21) Tahinito i saikoikor no Israil kitakit, o Pinyamin a ngasaw ci Istir aci Mortikay, oniya tatosa tamdaw, milidongay a paˈorip to Israil tamdaw, toha sakaecaaw malaˈafo itini pikowan no Tadaciˈicelay a Kitakit Pirsiya itiya.—Istir 2:5-7.
Miˈosi to Sinael
(Satapangan 49:8-26) “Yutaaw, o kakahemeken no salikaka iso kiso. O mamiˈimec kiso to liˈel no ˈada iso, o mamitaˈong i tisowanan ko salikaka iso i kaˈayaw iso. 9 Matiya o tofor a layon kiso Yuta. Wawaaw ako, alaen iso ko tamaˈ a panokay i dihif. Mamatira to hofayar sanay to tireng a layon; samatiraay to layon cingra, awaay ko papakaeses a mitefing cingranan. 10 O cacitodong ci Yuta to sakowan no hongti a tahadaˈoc, o tatahadaˈoc ko teloc ningra a mikowan. tangasa i kairaan ni Silo, o mamidofdof ko kasafinawlan i cingranan. 11 Pasiketen ningra i fadisosoˈ a kilang ko okangan a lofa, pasiketen ningra i sangaˈayay a fadisoso’ a kilang konini tofor a lofa. Facaˈen ningra i sakahengang sanay a mato remes a fadisosoˈ a epah ko rikoˈ ningra. 12 Tona komaen cingra to epah saka, sakahengang sa ko mata ningra, tona komaen cingra to hacol saka, sakohecal sa ko wadis ningra. 13 O mamaroˈ i lawac no riyar ci Cipulun. Mingata to paselaˈan no tamina a minato cingra, o mamacowat a tangasa i Siton ko sera ningra. 14 Matiya o tanektekay a lofa ci Isakar, mamihinefa cingra i laˈed no falako a lofoc. 15 Maolah cingra to karihadayan a pala a maroˈ, maolah cingra to mamatangay makapahay a sera. Makonoto cingra a miˈorong to karetengay a ˈinorong, mapalakuli no tao cingra a maroray a matayal. 16 O mamikowan ci Tan to finawlan ningra, matiya o romaroma a ngasaw no Israil. 17 O mamatiya o ˈoner i lawac no lalan ci Tan,matiya o cisawarakay a ˈoner i mimingay a lalan, kalaten ningra ko satenok no efa, ta talarikor a matefad ko pakaefaay. 18 Yihofaaw, mitala kako to pipaˈorip Iso i takowanan. 19 Ci Kat i, o lalooden no ˈada, nikawrira, o cacoˈayen ningra a milepel cangra. 20 Ci Asir i, o kakadofah ko sera ningra to kakaenen, ira i cingraan ko ngaˈayay a kakaenen to malo sapafeli to hongti. 21 Ci Naftali i, matiya o mimingay a tawinaan a malonem, somowal to makapahay a sowal. 22 Ci Yosif i, matiya o itatihiyay no nemnem a kilang milaˈowap to adipel ko caˈang nira. 23 Tataˈang ko pilood no ˈada i cingranan, panaˈen kotangen no ˈada a milepel cingra. 24 Nikawrira, o mitiˈeray cingra to ciˈicelay a Kawas ni Yakop, saka, oyananto a tanektek a koicaw ko panaˈ ningra, mitiˈer cingra toya pakaenay, midipotay to Israil, saka, oyananto a ciˈicel ko patelaw ningra. 25 Mapadama no Kawas ni wama ningra cingra, mikapotay cingra to ciˈicelay a Kawas, o papalmeden no Kawas cingra. O papafelien Ningra kiso to nai kakarayanay a ˈoˈol ato nemnem i sera, o papafelien Ningra kiso to masafelaway a kolong ato efa ato ˈalomanay a teloc. 26 Onini sapalemed to wamaan ningra mamikikaka to lemed no midaˈocay a taporo. O mamatefad i fongoh ni Yoisif kora sapalemed, itira i fongoh noni micidekay to salikaka ningra a tamdaw.
SAKA 6 FOLAD 22-28 ROMIˈAD
O ODOˈ KO KIMAD NO KAWAS | KASADAKAN 1-3
“Sapilaheciaw Kako to Araaw Ako, o Hahaenen Ako a Milaheci”
(Kasadakan 3:13) Sowal sa ci Mosi to Kawasan: “Ano tayra kako i Israil a tamdaw a pasowal i cangranan: ‘O niocoran no Kawas no tatoˈasan ita kako a patayni i tamowanan,’ ano han ako i, ‘Cima ko ngangan noya Kawas?’ Ano saan cangra a milicay i takowanan i, maan han ako ko pipacaˈof saw?”
w13 3/15 25 fiedac 4 fatac
Paˈodingar to Tadamaanay a Ngangan ni Yihofa
4 ˈOsien ko Kasadakan 3:10-15. Tiya 80 ko mihecaan ci Mosi i, patorodan no Kawas cingra to cecay karetengay a ˈinorong, palimoˈot cingranan “pasadak to Israil tamdaw no Kawas nai Icip.” Saka, misakareteng milicay ci Mosi to cecay salicay. Ora salicay ningra i: “Cima ko ngangan Iso hani?” Nawhani, mafanaˈayto ko tamdaw no Kawas to cima ko ngangan Ningra, hano milicayho ci Mosi hani? Ano haratengen, o sakafanaˈaw ci Mosi cima ko mitaypiyawan noniniya ngangan. Miharatengay cingra ho pakasoˈlin ko finawlan to iraayto ko Kawas a milidong cangranan. Matatodongay ko piharateng ni Mosi. Halafinayto ko Israil tamdaw malakuli, cisasaayto cangra toya midokoan no tatoˈasan a Kawas iraay ko ˈicel a milidong cangranan hokira. Romaroma a Israil tamdaw misatapangayto mitaˈong to makaniway kawas no Icip.—Icikil 20:7, 8.
(Kasadakan 3:14) Pasowal ko Kawas ci Mosian: “Sapilaheciaw Kako to Araaw Ako, o Hahaenen Ako a Milaheci.” Sowal haca Cingra: “Pasowalen ko Israil tamdaw: ‘Sapilaheciaw Kako to Araaw Ako, o Hahaenen Ako a Milaheci’ yasanay a Kawas, ko miocoray takowanan tayni i tamowanan, han cangra.”
kr 43 fiedac, ihakoay lalakaw
TATODONG NO NGANGAN NO KAWAS
“Yihofa” oniya ngangan, naitiniay i Hipray sowal “sapi” sanay. Iraay ko “sapisamaanaw” sanay a tatodong. Mankora, tatodong no ngangan no Kawas i, “Sapilaheciaw Kako to Araaw Ako, o Hahaenen Ako a Milaheci,” sanay. Tatodong noniya ngangan tada makakadepay to saaroˈan ni Yihofa. O araaw ni Yihofa misangaˈ to maamaan ato pinaˈorip, ho midoko cangra Takowanan, sanay ko araaw Ningra, oniniya kihcod mahaenay a malaheci. O papadadotocho Cingra milaheci to araaw no Niyah, hatiraay a malaheci koni demak.
Hay, sasamanen ita cipinang ko Kasadakan 3:13, 14 hani? Licay sa ci Mosi ci Yihofaan: “Ano tayra kako i Israil a tamdaw a pasowal i cangranan: ‘O niocoran no Kawas no tatoˈasan ita kako a patayni i tamowanan,’ ano han ako i, ‘Cima ko ngangan noya Kawas?’ Ano saan cangra a milicay i takowanan i, manan han ako ko pipacaˈof saw?” Pacaˈof ko Kawas ci Mosian: “‘Sapilaheciaw Kako to Araaw Ako, o Hahaenen Ako a Milaheci.’ Han cangra.”
Sinanoten, mihaen ci Mosi a milicay, cowa ka pilicay to manan ko ngangan no Kawas. Samanen ci Mosi ato Israil tamdaw halafinayto a mafanaˈ to ngangan no Kawas. O harateng ni Mosi i, ora sapacaˈof ni Yihofa ho patanektek to falocoˈ no Israil tamdaw na sanay, cipinang cangra oniniya “Yihofa” hananay a ngangan, mitaypiyaway to masamaanay a Kawas. Sato pasowal ci Yihofa, “Sapilaheciaw Kako to Araaw Ako, o Hahaenen Ako a Milaheci,” oniniya sowal, patahkalay to kasapaan a capeling: “Toha sapilaheciaw to araaw no Niyah, o mamalo masamaanay a Kawas ci Yihofa, mihaenay a malaˈosi.” Nengnengen, ci Yihofa pakayni ci Mosian ato Israil tamdaw mamalo masamaanay a Kawas Cingra. Mahapinangayto ita itini, ci Yihofa toha sapilaheciaw to sakiˈok Ningra to tamdaw no Niyah, o mamihaen a malaheci a malaˈosi. “Yihofa” onini ngangan, tatodong i, toha sapilaheciaw to araaw o ngangaˈay Cingra malo milidongay a Kawas, mipatirengay to sarikec a Kawas, o pafeliay to maamaan a Kawas, o roma tatodong noni ngangan i: O ngangaˈay Cingra miˈimer to tamdaw toha sapilaheciaw to araaw Ningra.
Kadkaden ko ˈOdo no Sinael
(Kasadakan 2:10) Lomahadto koya wawa i, patayraen ningra i fafahiyan wawa ni Falaw cingra, oniyato a wawa malo wawa no fafahiyan wawa ni Falaw. Paci Mosi han no wawa ni Falaw pangangan cingra, sowal sa: “Tona nipasadakan ako nai nanom cingra.”
g04 4/8 22 fiedac 4 fatac
Soˈlinay Iraay ci Mosi—Hananay a Tamdaw Han?
Fafahiyan wawa no hongti no Icip midipotay to wawa no Hipray sanay a sowal, soˈlinay hatira han? Hay, pakasoˈlinay ko Icip tamdaw, ano sidaˈit to tao midemak to fangcalay demak i, tatayni i kakarayan ano mapatayto sanay cangra. Pakayni to pidipot no Icip tamdaw to wawa, mikakingkiway to nolitengan a tamdaw ci Ciyois Tilteles sanay ko sowal: “Fafahiyan no Icip iraay ko malecaday to faˈinayan a fadangalan. Itini i noholican ato pakapayci a demak, maroyaroyay ato faˈinayan cangra, . . . o fafahiyan tamdaw iraay ko fadangalan a midipot to wawa no tao malo wawa no niyah.” O nolitengan a matiliday a lalakaw, mitiliday to cecay Icip a fafahiyan midipot to kuli malo wawa no niyah. Pakayni to pipacoco ko mihofocay wina ci Mosian, sanay ko sowal no Citing no Fangcalay Cudad: “Mitahidang to mihofocay wina ci Mosian, itini Misopotamiya tamdaw mihaen a midipot to wawa o katatelekan a limasmas kora.” Sanay.
(Kasadakan 3:1) Pakaen ci Mosi to masafelaway a siri no pikadafoan ningra ci Yitroan o saysi no Mitiya. Yo cecay a romiˈad, keriden ningra ko masafelaway a siri a tayra i kaˈetip no kohkohan, i lotok no Kawas, oya Horip a lotok.
w04 3/15 24 fiedac 4 fatac
Kalimlaan no Kasadakan a Cudad
3:1—O masamaanay a saysi ci Yitro hani? Itini i kakitaan a lintad, o tawki no lomaˈ, o saysi no lalomaˈan cingra. Ci Yitro o kakitaan no Mitiyan a ngasaw. Tona o wawa ni Apraham aci Kitura ko Mitiyan a tamdaw, saka, mafanaˈay cangra midoko ci Yihofaan.—Satapangan 25:1, 2.
Miˈosi to Sinael
(Kasadakan 2:11-25) Nanoya, tataˈangto ci Mosi. Yo cecay a romiˈad tayra cingra i finacadan ningra a minengneng to nika pades nangra a malakuli. Maˈaraw ningra ko nipisetiˈ no cecay a Icip a tamdaw to cecay no finacadan ningra a Hipray a tamdaw. 12 Nengneng sa ci Mosi to tatihitihi i, awaay ko cimacima. Saka, patay han ningra koya Icip a tamdaw. Ta tademen ningra koya tamdaw i tafok a misimed. 13 Cila a romiˈad tayra haca cingra i, maˈaraw ningra ko tatosa a malaˈodotay a Hiprayto a tamdaw. Sowalen ningra koya misamsamay: “Nawiro misetiˈ kiso to finacadanto iso saw?” 14 Sowal sa koya tamdaw: “O maan kiso iro citodong kiso a mikowan a misawkit i tamiyanan saw? Sapipatayan kiso i takowanan a matiya o pipatay iso toya Icip a tamdaw haw?” Matalawto ci Mosi, sowal sa: “O kafanaˈanto no tamdaw koya demak ako!” 15 Matengil ni Falaw konini a demak saka, sapipatayan cingra ci Mosian. Nikawrira, milaliwto ci Mosi a tayra i Mitiyan a pala. Tangsa cingra itira, maroˈay i tatihi no tefon. 16 Ira ko papito a fafahiyan a wawa no saysi no Mitiyan a tayra i tefon, miradom cangra to saparo i toptop to sapananom to masafelaway a siri no wama nangra. 17 Itiya i ira ko papinapina a pakaenay to siri a milaplap i cangranan. Nikawrira, paˈadingen ni Mosi cangra. Patadoen ningra cangra a pananom to siri nangra. 18 Yo minokay cangra cimamaan nangra ci Liwilan i, fahkaˈan ko wama nangra a pasowal: “Nawiro kalamkam kamo a minokay anini saw?” 19 Sowal sa cangra: “Iraay ko cecay a Icip a tamdaw a paˈading i tamiyanan a mitaker to mikariˈangay to siri. Patadoen haca ningra kami a pananom to siri niyam.” 20 Sowal sa koya wama: “Icowato koya tamdaw? Nawiro laliw han namo cingra saw? Olili, tahidangen cingra a pakalafi.” 21 Nanoya, keton sato to falocoˈ ci Mosi to sakaitiraaw a maroˈ. Pafafahi hanto noya tamdaw ci Mosi to wawa ningra ci Ciporaan. 22 Mahofoc cingra to cecay a faˈinayan a wawa. Ci Kirsom han ni Mosi pangangan cingra, sowal sa: “O pacarcaray kako itini tonini a pal.” 23 Nanoya, halafinto ko mihecaan saka, mapatayto koya hongti no Icip. O Israil tamdaw tona mapadesay to nika lakuli, ngaliwngiw cangra a tomangic. Mingitangit cangra to nika lakuli, tangasato i Kawas ko tangic nangra. 24 Matengilto no Kawas ko tangic nangra a micedaah. Saka, maharateng no Kawas ko katatelekan Ningra aci Apraham aci Isak aci Yakop. 25 Misikol ko Kawas to Israil a tamdaw a minengneng to pades nangra.
SAKA 6 FOLAD 29 –7 FOLAD 5 ROMIˈAD
O ODOˈ KO KIMAD NO KAWAS | KASADAKAN 4-5
“Ano Pasowal Kiso o Kakapoten no Mako Kiso”
(Kasadakan 4:10) Pasowal sa ci Mosi ci Yihofaan: “Yihofaaw, kangodoanto nano kaemangan ako a matemoy. Pasowal Kiso i takowanan imatini i, oyananto kako a matemoy. Caay ka fanaˈ kako a caciyaw.”
(Kasadakan 4:13) Sowal sa cingra: “Yihofaaw, kangodoanto, nanay ocor han ko cima a tamdaw, ano cimato Miso harateng.”
w10 10/15 13-14 fiedac
O Lalangian no Miso Matatodongay Sanay ci Yihofa Minengneng Han?
“Awaay ko tatodong ako, cowa ka ngaˈay ko demak ako.” Alatek awaay ko tatodong ako mitosil to ngaˈayay lihaf no Hongti Kitakit wa saan kiso miharateng to niyahan. Mikitini nolitengan, iraay ko papina madimadiay sikawdan ni Yihofa sanay a miharateng to awaay ko tatodong no niyah milaheci to sapatorod ni Yihofa a ˈinorong. Tinakoen ci Mosi, palimoˈotan ni Yihofa cingra milaheci to cecay ˈinorong, ˈarawhan, sanay ko sowal ni Mosi: “Yihofaaw, tada kangodoanto. Cowa ko malaymayay ko sowal a tamdaw kako, matiraay inacila, matiraay itiyaho, misatapang caciyaw kako i, mahaenayho. O matemoyay kako, cowa ka fanaˈ caciyaw.” Soˈliˈlin pasowalanto ni Yihofa ci Mosi toor han ko sowal Ako a midemak saan, ˈarawhan sanayho ci Mosi a pasowal: “Yihofaaw, tada kangodoanto, nanay ocor han ko cima a tamdaw.” (Kasadakan 4:10-13) Samaanayto ko pinengneng ni Yihofa toninian hani?
(Kasadakan 4:11, 12) Sowal sa ci Yihofa i cingranan: “O sakacingoyos no tamdaw ato sakaapa ato sakadoˈeng ato sakacengaw ato sakapohaw no tamdaw i, caay kono Mako ci Yihofa a saˈosi saw? 12 Olili. O papatadoen Ako ko ngoyos iso. O papasifanaˈen Ako kiso to malo sasowalen iso.”
w14 4/15 9 fiedac 5-6 fatac
Kiso “Pakaˈaraway toya Caay ka ˈAraw a Kawas” Han?
5 Ta patikolto ci Mosi i Icip i, pasifanaˈan no Kawas to cecay kalimlaan a demak: “Kangodo ci Yihofaan ngaˈ ira ko taneng.” Oya nitilidan ni Mosi a Yopu cudad matiliday koni sowal. (Yopu 28:28) Toha sapadamaaw ci Mosian palahad to mikangodoay a falocoˈ, citaneng ko demak, licay han ni Yihofa ci Mosi: “O sakacingoyos no tamdaw ato sakaapa ato sakadoˈeng ato sakacengaw ato sakapohaw no tamdaw i, caay kono Mako [ci Yihofa] a saˈosi saw?”—Kasadakan 4:11.
6 O manan ko mananamay ni Mosi hani? Mananamay ningra hamaan a matalawen, samanen o ci Yihofa ko miocoray cingranan tayra ci Falawan. Papaˈicelen ni Yihofa cingra, milasil to lihaf ni Yihofa. Hanaca, nanima pakafilo ci Falaw to Kawasan saw? O roma sa i, iti:yaho itini sakowan no hongti no Icip, o finawlan no Kawas tahalifaay to katalawan itini i Icip, kinapinapina:ay ko Kawas midipot cangranan, mahawpay ci Apraham, ci Yosif aci Mosi. Alatek misimsiman ni Mosi korira demak. (Satapangan 12:17-19; 41:14, 39-41; Kasadakan 1:22–2:10) Ci Mosi iraay ko pakasoˈlinay no falocoˈ toya caay ka ˈaraw a Kawas, mankora, satimolo sato cingra tayra misiˈayaw ci Falawan, mahaemin a milasil to lihaf ni Yihofa ci Falawan.
(Kasadakan 4:14, 15) Saka, keter sato ko Kawas ci Yihofa ci Mosian a somowal: “Ira ko salikaka iso ci Aron o Lifi a tamdaw. Cowa saw? Mafanaˈ Kako to nika o karacaciyaway cingra. O tayniay cingra to sapilitemohaw i tisowanan. Ano maˈaraw ningra kiso i, lipahak cingra. 15 Pasowalen cingra to malo sasowalen iso. O papatadoen Ako kamo to malo sasowalen namo. O papasifanaˈen Ako kamo to malo dademaken namo.
w10 10/15 14 fiedac
O Lalangian no Miso Matatodongay Sanay ci Yihofa Minengneng Han?
Ci Yihofa cowa ka palasawaden Ningra koya sapatorod ci Mosian a ˈinorong, nawhani minilnilan Ningra ci Aron a mipadang ci Mosian. (Kasadakan 4:14-17) O roma i, padadotocan ni Yihofa midama ci Mosi, pafeli cingranan to kihcod a saali ningra, padama cingranan milaheci to ˈinorong. Anini, pakasoˈlinen iso, o cacorohen ni Yihofa ko cinalifetay a Krisciyang padama tisowanan, milaheci to mitosilay a demak. Sowal no Fangcalay Cudad, sakakaay a sapadama o naitiniay ci Yihofaan, papadama kitanan pakaremo to sapatorod Ningra a demak.—2 Korinto 3:5; nengnengen ko sapatongal lalakaw “O Salipahakay a Mihecaan Itini i Nokaˈorip Ako.”
Kadkaden ko ˈOdo no Sinael
(Kasadakan 4:24-26) Yo milafin i fatad no lalan i, malitemoh ni Yihofa cingra, sapipatayan cingranan. 25 Ala sa ci Cipora to citalemay a fakeloh a midemak to kerit a lisin i wawa ningra. Ta teli han ningra i waˈay noya tamdaw, sowal sa: “O remes a faˈinay ako kiso.” 26 Saka, sololen no Kawas cingra. Itiya i, sowal sa ci Cipora, to “o remes a faˈinay” saan, tona pakayniay tora kerit a lisin.
w04 3/15 28 fiedac 4 fatac
Salicay no Miˈosiay Tamdaw
Sowal sa ci Cipora: “O remes a faˈinay ako.” Paihkalay ci Cipora to manan hani? Midoedoay ci Cipora to rikec ni Yihofa, patado to wawa midemak to lisin no kerit, mihaenay cingra to nika matatelek aci Yihofaan. Ikor, patirengay ci Yihofa to katatelekan a rikec ato Israil tamdaw. Itini toniniya katatelekan, patatinakoay ci Yihofa to faˈinay ko Niyah, o fafahi ko Israil tamdaw. (Yirimiya 31:32) Ano haenen a minengneng, miowaw ci Cipora toya mitaypiyaway ci Yihofaan a coyoh to “remes a faˈinay ako” saan i, paihkalay cingra to makahiyay a midofdof to kerit a lisin, mihayi to o “faˈinay” ci Yihofa, o “fafahi” ko niyah. Ano masamaamaanayto i, patodicekay a miketon to demak ci Cipora, mitoor to saali no Kawas, hato matafoayto ko ˈorip no wawa ningra.
(Kasadakan 5:2) Sowal sa ci Falaw: “Cima kora ci Yihofa hananay? Iro o tengilen ako ko sowal ningra a mihayda to Israil a pasadak saw? Caay ka fanaˈ kako ci Yihofaan. Caay haca ko mamihayda kako a pasadak to Israil a tamdaw.”
it-2 789 fiedac 1 fatac
Yihofa
“Mafanaˈayto” ano saan ko sowal, o tatodong i, cowa ko nika fanaˈ aca to cimaanan a tamdaw anca to maanan a demak o sanay. Oya mafolaay a tamdaw ci Napal mafanaˈayto to ngangan ni Tafiti, ˈarawhan milicayayho: “Cima ci Tafiti saw?” Tatodong nora sowal ningra i: “Cowa ko manan cingra?” Sanay. (1 Samuil 25:9-11; palalinien to 2 Samuil 8:13.) Mahecaday, milicay ci Falaw ci Mosian: “Cima ci Yihofa saw? Hano tengilen ako ko sowal Ningra, pasadak to Israil tamdaw saw? Cowa ka fanaˈ kako ci Yihofaan, cowa ko papasadaken ko Israil tamdaw.” (Kasadakan 5:1, 2) Tatodong nora sowal ni Falaw i, cowa ka pihayi cingra to soˈlinay Kawas ci Yihofa, cowa pihayi to iraay ko fadangalan ni Yihofa miˈimer to hongti no Icip ato demak ningra, cowa pihayi to ciˈicelay ci Yihofa micorcor ci Mosian aci Aronan milasil to araaw Ningra. Nikawrira, ci Falaw ato polong a Icip, haloya Israil tamdaw, nohatini mamafanaˈ to tatodong no ngangan no Kawas, ato mitaypiyawan nonini ngangan a Kawas. Matira to sowal ni Yihofa ci Mosian, o teloc noniniya demak i, o lalahecien no Kawas ko araaw Ningra to Israil tamdaw, milidong cangranan miliyas kalakuli nangra, pafeli cangranan patayni i Mikiˈokan Pala, mihaen a malaˈosi ko sakiˈok Ningra to tatoˈasan no Israil. Sanay milasil ko Kawas: “Mamafanaˈ kamo Takowanan to Kawas namo ci Yihofa Kako.”—Kasadakan 6:4-8; nengnengen ko TADA CIˈICELAY A KAWAS.
Miˈosi to Sinael
(Kasadakan 4:1-17) Pacaˈof sa ci Mosi: “Latek caay pakasoˈlin ko Israil a tamdaw i takowanan, caay pitengil cangra to sowal ako, samaanto aki? Wa saan pasowal cangra: ‘Na cowa paˈaraw ci Yihofa tisowanan.’” 2 Sowal sa ci Yihofa i cingranan: “O manan kora mitatoyan iso saw?” Sowal sa cingra: “O cokor.” 3 Pasowal ko Kawas: “Fahkolen i sera kora cokor iso.” Fahkol han ni Mosi kora cokor i sera i, malaˈoner koya cokor. Tangsol a miliyas ci Mosi toya ˈoner. 4 “Rawisen a mirepet ko wikol nora ˈoner,” han ni Yihofa ci Mosi a pasowal. Rawis han ni Mosi a mirepet i, malacokorto kora ˈoner i kamay ningra. 5 Sowal sa ko Kawas: “Papakasoˈlinto cangra, ta mafanaˈ cangra to nika o Kawas no tatoˈasan nangra Kako ci Yihofa, o Kawas ni Apraham, Kawas ni Isak, Kawas ni Yakop, soˈlinay paˈaraw i tisowanan.” 6 Pasowal haca ci Yihofa ci Mosian: “Tiˈnecen ko cecay a kamay iso.” Tiˈnec han ningra. Ta sadak han ningra i, mapodok ko kamay ningra, sakohcal sa a mato soeda! 7 Sowal sa ko Kawas: “Tiˈnecen haca ko kamay iso.” Saka, tiˈnec han ningra. Ta sadak han ningra i, mapalololto koyananto a fanges ningra. 8 Pasowal ko Kawas: “Ano caacaay pasoˈlin cangra toya saˈayaway a kafahkaˈan a demak iso i, o papasoˈlin cangra tonini a saka tosa a kafahkaˈan a demak iso. 9 Nikawrira, ano caho pasoˈlin cangra tonini a tosa a kafahkaˈan a demak iso, ano caay pitengil cangra to sowal iso i, alaen ko nanom i Nayil a ˈalo a mitaktak i sera. Ta malaremes koya nanom.” 10 Pasowal sa ci Mosi ci Yihofaan: “Yihofaaw, kangodoanto nano kaemangan ako a matemoy. Pasowal Kiso i takowanan imatini i, oyananto kako a matemoy. Caay ka fanaˈ kako a caciyaw.” 11 Sowal sa ci Yihofa i cingranan: “O sakacingoyos no tamdaw ato sakaapa ato sakadoˈeng ato sakacengaw ato sakapohaw no tamdaw i, caay kono Mako ci Yihofa a saˈosi saw? 12 Olili. O papatadoen Ako ko ngoyos iso. O papasifanaˈen Ako kiso to malo sasowalen iso.” 13 Sowal sa cingra: “Yihofaaw, kangodoanto, ocor han ko cima a tamdaw, ano cimato Miso harateng.” 14 Saka, keter sato ko ci Yihofa ci Mosian a somowal: “Ira ko salikaka iso ci Aron o Lifi a tamdaw. Cowa saw? Mafanaˈ Kako to nika o karacaciyaway cingra. O tayniay cingra to sapilitemohaw i tisowanan. Ano maˈaraw ningra kiso i, lipahak cingra. 15 Pasowalen cingra to malo sasowalen iso. O papatadoen Ako kamo to malo sasowalen namo. O papasifanaˈen Ako kamo to malo dademaken namo. 16 O mamipatado cingra tisowanan a pasowal i finawlan. Itiya i, o mamatiya o Kawas kiso a pasowal i cingranan to malo sasowalen ningra. 17 Tatoyen konini a cokor iso. Ta onini a cokor ko sapidemak iso to kafahkaˈan a demak.”