Sasamaan Palahad to Miceriday Mikingkiw a Ngaˈayay Nanaman?
MICERID ato rahekeren a mikingkiw to Fangcalay Cudad, pasangaran nanay kiso han? Kita maemin latekay iraay ko mahaenay a piharateng. Nikawrira, haratengen hena ko miceridan no mita dademaken a demak, tinakoen o maynoˈay to tireng. O maynoˈay hananay i, mipalakay to toki ato ˈicel, kawra maharek maynoˈ i, sinowayay ko tireng. Mikingkiw to Kimad no Kawas pasinowayay to falocoˈ no tamdaw, miliyaw milifok to ˈicel. (Ifiso 5:26) Sasamaan palahad to miceriday mikingkiw a ngaˈayay nanaman hani? Iraay ilaeno ko pina sapaini a hapakayraan:
Saˈosien ko hapikingkiwan a toki. Pakaynien i Krisciyang, ‘masakalimlaan’ ko mikingkiway to Fangcalay Cudad, caay ka ngaˈay sakahmawen. (Filipi 1:10) Ngaˈayay tiliden iso ko hapikingkiwan a toki, paketingen i maˈaraway a kitiraan, tinakoen itinien i kokofang anca i saedef no pinsiyang. Ngaˈayay saˈosien ko soni no soci ato pingpan, ano mangatato ko pikingkiwan a toki patalipaˈelal to niyahan.
Piliˈen ko matatodongay to niyahan a hapakayraan a mikingkiw. O manan a hapakayraan mikingkiw ko matatodongay tisowanan hani? Tinakoen, padadotoc sa to cecay tatokian a mikingkiw madoloay misamacay ko harateng han? Anca maolahay kiso to kamotoˈay a toki mikingkiw, kinapinapina mikingkiw han? Kiso ko sacipinangay to niyahan, ngaˈayay makilim ko matatodongay to niyah a hapakayraan. Ano maraodto ko misaˈosian a toki, awaay ko harateng iso mitoor to mihalakaan a misatapang a mikingkiw, ngaˈayay tanamen 10 ehon a mikingkiw han? Soˈlin apotoˈ ko toki mikingkiw wa adihay ko mananamay iso, maedeng wa ikaka ko kangaˈay to misawaday a mikingkiw. Ano mitekaho kiso i, alatek wa irato ko ˈicel iso padadotoc mikingkiw.—Filipi 2:13.
Paliˈayawen mipiliˈ ko lalangian no lalakaw. Ano maroˈto kiso satapang saho itiya miharateng to maanan ko kingkiwen i, cowa ito ko sangaˈayay ‘misakadademak to toki’ alatek. (Ifiso 5:16) Tanamen iso paliˈayaw mitilid i kalidokap, tiliden ko kahemekan iso a lalakaw ato lalangian. Ano maharatengay iso to kalo romiˈad ko maanan a salicay tilidento itiya. Maharekto mikingkiw i, ngaˈayay tongalen iso ko maharatengay a romaroma a lalangian i kalidokap.
Makahi a mifalic. O pihalaka iso to pikingkiw ngaˈayay safalifalicen, tooren ko pakayraan iso a mifalic, tinakoen salofen ko koˈedaw no toki iso mikingkiw anca lalangian. Kalimlaan i, cowa ko hacowa kiso mikingkiw, hakowa ko halafin mikingkiw, o manan ko mikingkiwan, ao miceriday kiso mikingkiw hokira.
Micerid a mikingkiw pairaay to haepoc no mita. Mamapatireng ko ngaˈayay kalawidang ita aci Yihofaan, mafanaˈ mataneng ko pidemak, hanaca miliyaw milifok to haˈicel.—Yosuwa 1:8.