¿ˈÑeeⁿ juu na mayuuˈcheⁿ matsa̱ˈntjom tsjoomnancue?

ˈNAᴺ NA MATSO BIBLIA

«Chaˈtsondye nnˈaⁿ na laxmaⁿna cantyja ˈnaaⁿˈ tsjoomnancue mˈaⁿna nacje ˈnaaⁿˈ tsaⁿjndii.» (1 Juan 5:19, Ñˈoom na Tqueⁿ Tyˈo̱o̱tsˈom Cantyja ˈNaaⁿˈ Jesucristo.)

«Ndoˈ jnda̱ jndyo Jnda Tyˈo̱o̱tsˈom na nntseityueeⁿˈeⁿ tsˈiaaⁿ ˈnaaⁿˈ tsaⁿjndii.» (1 Juan 3:8.)

NA CWILIUUYA NA LUAAˈ CHIUU WAA MATEIJNDEIINAˈ JAA

Nlaˈno̱o̱ⁿya yuu jnaⁿ nawiˈ na mˈaaⁿ tsjoomnancue (Revelación [Apocalipsis] 12:12).

Mateijndeiinaˈ jaa na nnda̱a̱ nntyjaaˈ nˈo̱o̱ⁿya na nncuaa cwii tsjoomnancue yati (1 Juan 2:17).

¿AA WAA ˈNAᴺ NA NNDA̱A̱ NTEIJNDEII JAA CHA NA NLAYUUˈA ˈNAᴺ NA MATSO BIBLIA?

Waa, nlˈuuya wendyenaˈ:

• Na matsa̱ˈntjom Satanás jnda̱ jndaaˈ cwaaⁿ nntyuiiˈnaˈ. Jehová jnda̱ tqueⁿtyeeⁿ na nntseityueeⁿˈeⁿ na matsa̱ˈntjom Satanás nnˈaⁿ tsjoomnancue. Jom maqueⁿtyeⁿ na «nntseityueeⁿˈeⁿ [...] Tsaⁿjndii» ndoˈ nntcoˈyaaⁿ ˈnaⁿ na juu seiˈndaaˈ (Hebreos 2:14).

• Nquii Tyˈo̱o̱tsˈom tjeiiñe Jesucristo na nntsa̱ˈntjom tsjoomnancue. Jesús jeeⁿ tˈmaⁿ xuiiˈñe ñequio tsaⁿtia na wiˈñe na matsa̱ˈntjom tsjoomnancue waa. Tyˈo̱o̱tsˈom maqueⁿtyeⁿ na Cristo xjeⁿ na nntsa̱ˈntjom: «Nncˈoom na wiˈtsˈoom nnˈaⁿ na ntyˈiaandye ndoˈ ndyeñeeⁿˈ [...]. Naquiiˈ nawiˈ ndoˈ na cwajndii cwitjomna nncwjiˈnˈmaaⁿˈñê joona» (Salmo 72:13, 14).

• Tyˈo̱o̱tsˈom xocanda̱a̱ ntsoom cantu. Biblia matso jndaaˈnaˈ na Tyˈo̱o̱tsˈom tijoom nñequiuˈnnˈaaⁿ (Tito 1:2). Ncˈe jo, quiana Jehová maqueⁿtyeⁿ na nntsˈaaⁿ cwii ˈnaⁿ, nnda̱a̱ nlayuuˈa na mayuuˈcheⁿ na nntsˈaaⁿnaˈ (Isaías 55:10, 11). Ndoˈ ˈnaⁿ na jnda̱ tqueⁿ tyeeⁿ joˈ na «ntyuiiˈ na matseixmaⁿ tsaⁿjndii na matsa̱ˈntjom» (Juan 12:31).