¿Aa nnda̱a̱ na nntaˈndoˈnndaˈ nnˈaⁿ na jnda̱ tja̱?

ˈNAᴺ NA MATSO BIBLIA

«Nnˈaⁿ na jnda̱ tja̱ nntaˈndoˈnndaˈ.» (Hechos 24:15, Ñˈoom na Tqueⁿ Tyˈo̱o̱tsˈom Cantyja ˈNaaⁿˈ Jesucristo.)

NA CWILIUUYA NA LUAAˈ CHIUU WAA MATEIJNDEIINAˈ JAA

Ntseiñjoomˈnaˈ jaa quiana nncueˈ cwii tsˈaⁿ na wiˈ nˈo̱o̱ⁿya (2 Corintios 1:3, 4).

Nlˈaaya cwiintyja na jeeⁿcheⁿ ndyaˈ nquiaaya na ncwja̱ (Hebreos 2:15).

Nnda̱a̱ ntyjaaˈtyeⁿ nˈo̱o̱ⁿya na ntyˈiaanndaaˈa nnˈaⁿ na wiˈ nˈo̱o̱ⁿya na jnda̱ tja̱ (Juan 5:28, 29).

¿AA WAA ˈNAᴺ NA NNDA̱A̱ NTEIJNDEII JAA CHA NA NLAYUUˈA ˈNAᴺ NA MATSO BIBLIA?

Waa, nlˈuuya wendyenaˈ:

• Tyˈo̱o̱tsˈom sˈaaⁿ chaˈtso ˈnaⁿ na wandoˈ. Biblia matsonaˈ na Jehová «nqueⁿ mañequiaaⁿ na chaˈtsondyo̱ cwitando̱o̱ˈa» (Hechos 17:24, 25; Salmo 36:9). Xeⁿ na jnda̱a̱ tquiaaⁿ na taˈndoˈ chaˈtso ˈnaⁿ na sˈaaⁿ, cwiwitquiooˈya na nnda̱a̱ nñequiaaⁿ na nntaˈndoˈxco nnˈaⁿ na jnda̱ tja̱.

• Teibiocheⁿ Tyˈo̱o̱tsˈom jnda̱ ñeseicwandoˈxcoom ntˈom nnˈaⁿ. Biblia matseineiiⁿnaˈ cantyja ˈnaaⁿˈ ñeeⁿ tsˈaⁿ na ñeseicwandoˈxcoom (naⁿnom ndoˈ yolcu na tiñecwiixjeⁿ chuuna) ndoˈ taˈndoˈnndaˈna nnom Tyuaa. Wendyee joona cweˈ tja̱ncuena; sa̱a̱, cwii tsaⁿˈñeeⁿ jnda̱ wˈjaa ñequiee xuee na tueeⁿˈeⁿ (Juan 11:39-44).

• Tyˈo̱o̱tsˈom macaaⁿˈ tsˈoom na nñequiaaⁿ na nntaˈndoˈxco nnˈaⁿ na jnda̱ tja̱. Jndooˈ Jehová ˈnaⁿ na machˈee na cwiwje nnˈaⁿ (1 Corintios 15:26). Jeeⁿcheⁿ macaanˈ tsˈoom na nntseityueeⁿˈeⁿ juunaˈ ndoˈ nntsˈaaⁿ na luaaˈ xjeⁿ na nntseicwandoˈxcoom nnˈaⁿ na jnda̱ tja̱. Ndoˈ lˈue tsˈoom na nnˈaⁿ na ñjom tsˈoom nntaˈndoˈnndaˈna nnom Tyuaa (Job 14:14, 15).