¿Aa nncueˈntyjo̱ xuee na taxocantyˈiaaya nawiˈ?

ˈNAᴺ NA MATSO BIBLIA

«Tyˈo̱o̱tsˈom [...] ticwii cwii ndaanda̱a̱na nncueeˈñê. Taxocwjena joˈ joˈ. Taxocˈomna na chjooˈ nˈomna, meiⁿ taxocatyueena, meiⁿ na taxoquiitinaˈ joona.» (Apocalipsis [Revelación] 21:3, 4, Ñˈoom na Tqueⁿ Tyˈo̱o̱tsˈom Cantyja ˈNaaⁿˈ Jesucristo.)

NA CWILIUUYA NA LUAAˈ CHIUU WAA MATEIJNDEIINAˈ JAA

Nlaˈno̱o̱ⁿˈya na nchii Tyˈo̱o̱tsˈom machˈee na jaa cwitjo̱o̱ⁿya nawiˈ (Santiago 1:13).

Nntseiñjoomˈnaˈ jaa xjeⁿ na nlaˈno̱o̱ⁿˈya na Tyˈo̱o̱tsˈom matseiˈno̱o̱ⁿˈo̱ⁿ nawiˈ na cwiwino̱o̱ⁿya (Zacarías 2:8).

Nntyjaaˈ tyeⁿ nˈo̱o̱ⁿya na xuee na quiandyo taxocˈoom meiⁿcwii ˈnaⁿ na nlcoˈwiˈ jaa (Salmo 37:9-11).

¿AA WAA ˈNAᴺ NA NNDA̱A̱ NTEIJNDEII JAA CHA NA NLAYUUˈA ˈNAᴺ NA MATSO BIBLIA?

Waa, nlˈuuya wendyenaˈ:

• Jndooˈ Tyˈo̱o̱tsˈom nawiˈ ndoˈ ˈnaⁿ na tixcwe cwiluii. ¿Chiuu waa sˈaanaˈ ntyjii Jehová tiempo teibio xjeⁿ na taˈwiˈna tsjoomˈm? Biblia matsonaˈ na tyoquiinaˈ Jom xjeⁿ na ntˈomcheⁿ njoom «tyonchjeena nnˈaⁿ ˈnaaⁿˈaⁿ» (Jueces 2:18, Traducción del Nuevo Mundo).

  Tyˈo̱o̱tsˈom tineiiⁿˈeⁿ nnˈaⁿ na cwitaˈwiˈ ncˈiaa. Biblia matsonaˈ na jndooˈ Jehová «nnˈaⁿ na cwilaˈcwjee ncˈiaa» (Proverbios 6:16, 17).

• Tyˈo̱o̱tsˈom mˈaaⁿˈ tsˈoom cwii ndoˈ cwii tsˈaⁿ. Meiiⁿ na matseitiuuˈ na manda̱ ˈu ntyjiiˈ «na maquiinaˈ ˈu ndoˈ nawiˈ na mawinoomˈ», na mayuuˈcheⁿ mati Jehová ntyjeeⁿ ˈnaⁿ na mawinoomˈ (2 Crónicas 6:29, 30, La Palabra de Dios para Todos).

  Tyˈo̱o̱tsˈom ñequio Nˈiaaⁿ ˈnaaⁿˈaⁿ, tajdye xuee ndoˈ nseicatsuu chaˈtso nawiˈ na mawinom cwii ndoˈ cwii tsˈaⁿ (Mateo 6:9, 10). Biocheⁿ na nncueˈntyjo̱ xueeˈñeeⁿ matseiñjoomˈm nnˈaⁿ na cwilˈuee jom ñequio na canda̱a̱ˈya nˈomna (Hechos 17:27; 2 Corintios 1:3, 4).