Ikpa Okikpa Nkween̄mkpọ Ugwem Mè Ikwaan̄ Kiji Kubọk Ebi Eyi Karais
ONYAN̄ ITA 1-7
INU UNYE OTU EWE OKUP ME USEM AWAJI | OTU IFUK 7-8
“Inu Eji Ebekọt Ikween̄ Inan̄a Me Lek Ere M̀gba-Ǹgwele Ukan̄ Ebi Ijeren”
it-1 497 ¶3
Ntitiin̄
Owuwa mgbọ, ikire ebirieen̄ ebi imimiin̄ isoon̄ ekikeke ichit chieen̄ otutuuk ebi Ijeren. (Ejira 10:14) Eya orọ, mgbọ egwuun̄be atanga chinichini isan̄a, ire “ebi ibot otoko” cha ge ge enyi inyinyi isasa ibieen̄ ikwaan̄ ekirọ me ere ya inye. (Ifuk 7:1-11) Isọkọ me lek si, ire ebi ngwugwa, ebi Libai melek “ebi ibot ebi Ijeren” ekeke ichit chieen̄ otutuuk ebi ido Ijeren mè isa iman̄ oriọọn̄ kiban̄ igon me lek ikpa esabe ige “mgbaan̄-nchieek” eyi ema ekaan̄be me usen kè Neyemaya. (Neyem 9:38–10:27) Me mgbọ ebi Ijeren ekupbe me emen ewe, efit ebirieen̄ iba mè akọp go, ‘ìrere ebi ibot me ido ebi Ijeren, ebi egobobe itap me etete ebi mkpulu, mè ire si ebi eriọọn̄be erieen̄ me etete ebi Ijeren,’ migọọk Kora, Datan, Abiram, mè On igbaan̄ ititiin̄ ikeme Mosis melek Erọn. (Ifuk 16:1-3) Igọọk me lek ntọ-ubọk Awaji, Mosis igobo akọp ebi ugane ebi Ijeren jaaba, ebi ikikọt ikpulu ebi ene ijaan̄, mè ire si ebi ebi ene ekinyi ulibi, inyi ema egọọk ọmọ “ebeme ufialek” ebi Ijeren, eyi ọmọ gaalek kpokọtbe ibeme. (Ifuk 11:16, 17, 24, 25) Me ikpa Libitikọs 4:15, michak otu me lek “ebi ugane ama,” ikup kubọk ke ire ebi ugane ebi Ijeren, ebi ibot kiban̄, ebi oyerebet kiban̄ mè ebi isi akọn̄ kiban̄ ekikeke ichit chieen̄ otutuuk ebi ido Ijeren.—Ifuk 1:4, 16; Jos 23:2; 24:1.
it-2 796 ¶1
Ruben
Me ere mgba-ngwele-ukan̄ ebi Ijeren, ebi otoko kè Ruben ekup me etete ebi otoko kè Simiọn mè Gadi, me agan̄ osiki akpatan̄ mbuban. Esibenan̄a ije isi ofifi ere, ebi otoko kè Ruben ekije me isi ebi otoko iba chi. Ema ekigọọk ebi otoko kè Juda, Isaka mè Jebulọn me udun̄. (Ifuk 2:10-16; 10:14-20) Ire igọọk me lek onineen̄ yi si ke ebi otoko chi enyi inyinyi kiban̄ me usen efakabe akpatan̄ mbuban itap me ubọk Awaji.—Ifuk 7:1, 2, 10-47.
w04 8/1 25 ¶1
Inu Ekpabe Ofolek Ikpa Otu Ifuk
8:25, 26. Bak lek ulọk Awaji okaan̄be me lek ebi ininin̄ ugane, inyi ida ibe ebi isoso akọp acha go ekayaka isi ikwaan̄ me atanga chinichini, eyi morọ me ebi Libai ekesi ikwaan̄ kiban̄ ejaan̄ si. Ire, ebi ugane chi mekọt itap ubọk inyi ebi Libai kechilọ. Me chereyi, ebi ikilook ata etip kpekaan̄ acha eyi ema ebere mè itele ikekilook ata etip, ire, eji mekọt ikween̄ mkpọ inan̄a me lek ikan yi. Ire ogwu eyi Karais ikakọt irọ usini ikwaan̄ echi iwuukbe lek ikirọ bak lek inin̄be ugane, ene ya ibokirọrọ echi ibokọt irọ.
Week Inu Unye Otu Ewe Okup Me Usem Awaji
it-1 835
Adasi Gwun̄, Gwun̄ Uchili-Owot
Ire ebi adasi bọn ebirieen̄ ekikana ebi ibot ototun̄ ukan̄ kiban̄ ge ge, ọmọ orọ, ire ema ekikeke ichit chieen̄ otutuuk ebi ido Ijeren. Jioba igwen otutuuk ebi ido Ijeren “adasi gwun̄” kan̄ bak lek inyan̄a-ibot ọmọ orọbe melek Ebereyam. (Isis 4:22) Bak lek Jioba onyan̄abe ugwem ebi Ijeren, inyi ema ida ibe: “Ìsan̄a adasi gwun̄ enerieen̄ geelek ìsun̄ esese ìnyi emi. Adasi gwun̄ enerieen̄ geelek òchichili owot ogwu enenwaan̄ me etete ebi Ijeren, ìre eyi n̄a, bene me lek gwun̄ ebilene re lek gwun̄ anam uwu.”—Isis 13:2.
ONYAN̄ ITA 8-14
INU UNYE OTU EWE OKUP ME USEM AWAJI | OTU IFUK 9-10
“Ubọk Jioba Okisa Ebi Eyi Kan̄ Ije”
it-1 398 ¶3
Ere M̀gba-Ǹgwele Ukan̄
Ubọk ebi Ijeren esabe ikije inan̄a me ere ge isi ofifi ere (ikpa Otu Ifuk 33 ijeen̄ ibe ke ere ebi Ijeren egwuun̄be uwu ọfọ kiban̄ ike ema ekije mokọt iso akọp ini) ikijeen̄ ibe ke Awaji ire ogwu okineen̄ mkpọ ijaan̄. Oduku inyọn̄ isikeke ibia me inyọn̄ akpatan̄ mbuban, otutuuk ebi Ijeren ekiluluk ibia me uwu ọfọ kiban̄ me ere m̀gba-ǹgwele ukan̄ geelek ema ekupbe. Oduku inyọn̄ ya isijibi ibene, ebi Ijeren mîra ijibi ije. “Mgbọ geelek [Jioba, NW ] isinyi ida ibe eje, ebi Ijeren mîra ijibi ije. Mgbọ [Jioba, NW ] isiyaka inyi ida ibe etap efuuk, ebi Ijeren mîra iyaka itap efuuk.” (Ifuk 9:15-23) Ire otita alata okuket iba ke ekiwut isa ikilook ebi Ijeren ibe ke Jioba iweek ibe ema ejibi ije. (Ifuk 10:2, 5, 6) Otita eyi osisibi esese, eyi ida okibene mè ikigele, ire iman̄ oriọọn̄ inyi ebi Ijeren ibe ke menijibi ije. Adasi mgbọ eyi obọkọbe irek ire me “òso akọp usen iba me emen òso onyan̄ iba me òso acha iba [1512 B.C.E.].” Akpatan̄ mbuban okije me isi, ebi otoko kè Juda, Isaka melek Jebulọn menenigọọk. Ebi ibeyaka igọọk ema ire ebi owot iman kè Gasiọn mè Merari, ebi ikiben okpọkọ me lek akpatan̄ mbuban. Ofifi, ebi otoko kè Ruben, Simiọn melek Gadi menenigọọk. Ebi owot iman kè Koyat, ebi ikibeme otutuuk inu okup mbuban ichit menenigọọk, melek ebi otoko kè Iferem, Manasi, mè Bejamin. Me ota kan̄, ọgbọn̄ ebi ije melek otoko kè Dan, irere ebi ikichit udun̄ otutuuk urum ebi Ijeren, melek ebi otoko kè Asa mè Nafitali menenijibi ije. Bak lek ubọk eneen̄be ije kiban̄, ebi iwawa mè ikaan̄ unye ichit ekije me isi melek udun̄ otutuuk ebi Ijeren.—Ifuk 10:11-28.
w11 4/15 4-5
Ire Okekimun̄ Inu Echi Okijeen̄ Ibe Ke Ire Awaji Okiban Eji Ni?
Kpa ubọk ke eji ebesa ijeen̄ itọn̄ me lek ubọk Awaji okisa iban eji? Ogwu ikwaan̄ Pọọlu itumu ibe: “Ìkisiki ibot ìnyi ebi ibot kinyi, mè ìkirọ inu ema ekitumu inyi enyi.” (Iburu 13:17) Irọrọ ikeya ikakifet mgbọ geelek. Kubọk inu ijejeen̄: Mọnọ-nu ibe ke owu ire ogwu Ijeren ge me ukot mgbọ kè Mosis. Ike enyi ekije ije, oduku inyọn̄ oyayaka ikeke me ere ge. Oduku inyọn̄ ya ibobia ire mgbọ owa? Ire usen ge? Ire nde ge? Ire owuwa onyan̄? Omokọt ikido lek kwun̄ ibe, ‘Ire igbe ibe nteen̄ otutuuk mkpọ nkaan̄ n̄a nsibi ni?’ Omokọt idasi iteen̄ mkpọ inen mè inen echi okukup ufiak ichit isibi. Ire, ike usen inen mè inen orakabe, mije okamun̄ge usini mkpọ okebiweek, omokọt iteen̄ otutuuk mkpọ cha isibi. Ire, mgbọ yaage, ike okiteen̄ ota mkpọ cha isibi isan̄a, oduku inyọn̄ ya ojijibi ibene—omonenikpọk ineen̄ mkpọ cha itap me emen ere ema enan̄abe! Irọrọ eya ikafet kubọk ge. Ire, oduku inyọn̄ ya isijibi ibene, “mgbọ yaage, ebi Ijeren mîra ijibi ije.”—Ifuk 9:17-22.
Eji ye, kpa ubọk ke eji ekirọ eru me mgbọ Awaji onyibe eji ntọ-ubọk? Ire “mgbọ yaage” ke eji ekigọọk ntọ-ubọk ya ni? Sa ire eji ekikup inye ikirọ inu ubọk eji ewuukbe lek ikirọ ni? Ire eji miriọọn̄ ayaya ntọ-ubọk echi enyibe, kubọk ubọk ebesa ikisun̄ nkween̄mkpọ Baibul, ikilook ata etip inyi ebi ikitumu ofifi ida usem, ikirọ nkween̄mkpọ ototun̄ ukan̄ mgbọ geelek, ikigọọk ebi Hospital Liaison Committee irọ mkpọ, mè ikirọ eru ijaan̄ me chinichini ilile kiji ni? Eji ekijeen̄ itọn̄ me lek ubọk Awaji okisa iban eji si sa me ikekibọkọ nteme itap. Eji isiberọ ntumu-mfieek echi okukup ufiak, kè eji ekayaka lek imaan̄ me lek iriọọn̄-inu eyi kiji, kpan̄asi ikeya, kè eji echieek ibe Jioba melek ntitiin̄ kan̄ eban eji. Ike gwun̄ okiweek mbem ogwu ute mè ogwu uga me mgbọ egwijo okiwut, eji ekiweek mbem me emen ntitiin̄ kè Jioba me mgbọ eji ekichichini ufialek, echi okukup kubọk egwijo.
Week Inu Unye Otu Ewe Okup Me Usem Awaji
it-1 199 ¶3
Ntitiin̄
Inu Orọrọ Itititiin̄ Okupbe Ufiak. Inan̄a me lek Ijọk Iraraka eyi ekebirọ me acha geelek, eji mikween̄ ibe ke ikup ufiak ibe eji ekegbaan̄ etitiin̄, inyi eji ekekaan̄ oruru me irek emen ekwukwu inan̄a me lek inu echi Jioba okisan̄a isibi. Ire ogwu ikachakage mbuban me lek mè ogwu ikakupge si me oniin̄ ije me mgbọ ijọk ya ijit igọgọọk irie Ijọk Iraraka ya, ebekpakpan̄ ene ya. (Ifuk 9:9-14) Mgbọ ogwu ubọọn̄ Ejikaya oriabe ikpa ijet otutuuk ebi Ijeren ibe enu Jeruselem enerie Ijọk Iraraka, echichi ire usini mkpọ itumube inyi ema: “Ebi Ijeren, ìgwu ìkom ìna me lek [Jioba, NW ]. . . . Ikanye ejit kubọk ebi nte nte kinyi erọbe, ìsiki ibot ìnyi [Jioba, NW ] mgbọ keyi. Ìsibi ìna me Uwu Mbuban kan̄ ere îsun̄be mbuban ire mgbọ geelek, mè ìnisi ikwaan̄ ìnyi [Jioba, NW ] Awaji kinyi, inyi iben uga unaan̄-ejit kan̄ isan̄a enyi me lek. . . . [Jioba, NW ] Awaji kinyi ìre ogwu ata ejit, mè ire si ogwu ejit njijin, ìkpoda isi kan̄ isan̄a me lek kinyi, ire enyi igwu ikom inu me lek kan̄.” (2 Mfuf 30:6-9) Ogwu ogegen ibak ijit inunu ikijeen̄ ibe ke ọmọ ijit Awaji. Ikerere ibe ke ebi eyi Karais kpekirie ijọk chi kubọk Ijọk Iraraka, Pọọlu iteme ema ibe me ema ekatele ikekigọọk ebi eyi Awaji ititiin̄ mgbọ geelek, itumu ibe: “Eji ekekeek ubọk eji ebekisa itap ebi melek kiji efuuk me emen, inyi ema ekemun̄ ene me chieen̄, mè ekerọ ata inu. Eji ekatele ikekigbaan̄ ititiin̄, kubọk usini ebi ene ekitele. Eji eketap ebi melek kiji efuuk me emen, ògak ge, mije eji eriọọn̄be ibe ke usen Okaan̄-ene obonu òkigbet enenen.”—Iburu 10:24, 25; kpọ si CONGREGATION.
ONYAN̄ ITA 15-21
INU UNYE OTU EWE OKUP ME USEM AWAJI | OTU IFUK 11-12
“Keke Orọ Eji Ebejit Ikekinunuun̄?”
w01 6/15 17 ¶20
Ikakiwuuk Mkpọ Enyi Enọbe
20 Owuwa ebi eyi Karais kpekirọn̄ inin̄ me emen barabat. Ire, eji megbala chieen̄ inyi eji ekakaan̄ eru ikekinunuun̄, eyi obokọt irọ inyi Awaji ikabọkọ eji itap. Pọọlu iteme eji ibe: “Eji ekatọ Ogwukaan̄-ene ìkpọ kubọk usini kiban̄ [ebi Ijeren] erọbe, eyi ulu otọkbe ema ikpan̄ isan̄a. Eji ekakinunuun̄ kubọk usini kiban̄ enunuun̄be, eyi ogwu osat òkikpan̄ ene okpan̄be ema isan̄a.” (Ebi Kọrint Eyi Adasi 10:9, 10) Ebi Ijeren mitumu ikeme Mosis melek Erọn—iin̄, ikerere Awaji—ikinunuun̄ ofolek inorie mana eyi Awaji onyibe ema. (Otu Ifuk 16:41; 21:5) Ire barabat ema erọbe onaan̄ Jioba igak nuunuun̄ kiban̄ ni? Baibul ijeen̄ ibe ke ulu itọk owuwa me lek ebi inununuun̄ ikpan̄. (Otu Ifuk 21:6) Sabum mgbọ keyi, akọp mè obop ene ini mè efit jaaba mira ikwukwu mije mkpaka-ibot melek nuunuun̄ kiban̄. (Otu Ifuk 16:49) Eya orọ, kè eji ekatọ ime kè Jioba ikpọ, eji ekejeen̄ ulibi me lek inu ikebisan̄a isibi.
w06 7/15 15 ¶7
“Ikakinunuun̄, Ikakitap Okput Me Inu Geelek Enyi Eberọ”
7 Kpọ-nu ubọk ebi Ijeren enwenebe! Unwọọn̄ ema ekaan̄be me mgbọ Jioba onyan̄abe ema isibi me Ijipiti melek Okwaan̄ Anyiaan̄ obieen̄ ema ibe ekọt okwa etọn̄ ọmọ. (Isisibi 15:1-21) Ire, mije usini mkpọ echi ema enanbe me emen ewe melek ukpook ema ekaan̄be me lek ebi Kenan, ebi Ijeren kpeyaka itọn̄ Awaji, kpeyaka ikaan̄ ujot-owot si. Kpan̄asi ema ebekitọn̄ Awaji mije nkaan̄-lek inyibe ema, ema ebebene ikifeek ọmọ ikọ. Nuunuun̄ kiban̄ ikijeen̄ ibe ke ema kpenwọọn̄ inu echi Jioba osan̄abe isibi inyi ema. Mkpọ si Awaji otumube ibe: “Ìre emi m̀bame nuunuun̄ ebi ijo ife chi ekinunuun̄ isi ire mgbọ owa mọnọ?”—Otu Ifuk 14:27; 21:5.
it-2 719 ¶4
Ibaak
Nuunuun̄. Nuunuun̄ ikiwọ ene lek, ikakinama ene ibene. Mè ikafiin̄ge eyi ebi Ijeren esibibe me Ijipiti, ema ebebene ikinunuun̄ ikeme Jioba melek Mosis mè Erọn, ebi itobe kubọk ebi isi kiban̄. (Isis 16:2, 7) Nuunuun̄ kiban̄ iwọ Mosis lek enenen mege itumube ibe me Awaji ikpan̄ ọmọ. (Ifuk 11:13-15) Ogwu okinunuun̄ ikitap lek kan̄ me emen ufialek omimin. Jioba imọnọ inu ebi inununuun̄ cha etumube kubọk inu ema etumube ikime ubọk Ọmọ osabe ikikpulu ema. (Ifuk 14:26-30) Eyi irọ inyi owuwa ene echep ugwem kiban̄.
Week Inu Unye Otu Ewe Okup Me Usem Awaji
it-2 309
Mana
Ubọk Ikupbe. Mana “ìtatana okuket, mè ikup ibot kpiri kpiri kpiri kubọk ukwuuk uti kọrianda,” ikup si kubọk mgbe utop olu ekigwen bideliọm. Mana “ikitop kubọk akpakpa nchicha esabe aran̄ akwọọk igbaalek irọ” mè iyaka ire “nchicha esabe aran̄ olifu ikala.” Esikọk mana ya me inyọn̄ ewuuk, mè ìyaka ire itun̄ me emen otik, menenitem mè ìyaka ire isa irọ fituru.—Isis 16:23, 31; Ifuk 11:7, 8.
ONYAN̄ ITA 22-28
INU UNYE OTU EWE OKUP ME USEM AWAJI | OTU IFUK 13-14
“Ubọk Ichechieek Okisa Irọ Me Eji Etet Lek Enye”
w06 10/1 16-17 ¶5-6
Ichechieek mè Ukpook Ekaan̄be Me Lek Awaji Inyi Ema Ukarajit
5 Ene iba me lek ebi enun̄un̄un̄, orere Josuwa mè Kelep michubọk iweek ininin̄ Ijọn̄ Echieekbe Me Use ya. Ofolek ebi Kenan, ema etumu ibe: “Eji ebeteteen̄ ebi ìluk me inyọn̄ ijọn̄ ya imeen̄ isan̄a kpai. Ema kpekaan̄ ukput-lek geege. Eyi kiji, [Jioba, NW ] ọmọ òwa melek kiji. Ikatet ukpook me lek ife cha.” (Otu Ifuk 14:9) Ire Josuwa mè Kelep ekikpọ chieen̄ ibe ke mkpọ eyi kpokọtbe ibọkọ irek morọ ni? Kubọk ge! Ema melek otutuuk ebi ido Ijeren mimun̄ ubọk Jioba osabe Akọp Osusut isulu ebi Ijipiti melek awaji kiban̄. Ema mimun̄ si ubọk Jioba orọbe me Ferọ melek ebi akọn̄ kan̄ ekwaan̄ me Okwaan̄ Anyiaan̄. (Okwa Itọn̄ 136:15) Isibi utoon̄ ibe ke ebi enun̄un̄un̄ kechilọ melek ebi ofifi ife kpekaan̄ ibot ibot mkpọ oborọ inyi ema etet ukpook. Inu ema erọbe ikabele Jioba ejit, eya orọ idobe ibe: “Ìre ife chi ebejit ichechieek me lek n̄a isi ire mgbọ owa, me lek otutuuk inu ukechieen̄ kechi nkirọ me etete kiban̄?”—Otu Ifuk 14:11.
6 Jioba itumu achubọk mkpọ ufialek kiban̄ orebe—ukpook kiban̄ ikpọk mbum una ichechieek kiban̄. Iin̄, ichechieek ikaan̄ mgbaan̄ me lek ukarajit. Eya orọ, ofolek ebi eyi Karais melek akọn̄ emen ekwukwu eyi ema ekebitim, ogwu ikwaan̄ Jọn ige ibe: “Îre ichechieek eji ekaan̄be me lek kè Karais ke eji esa itim ikpan̄ linyọn̄.” (Jọn Eyi Adasi 5:4) Me chereyi, ebi Ata-Ikọ Jioba, ebi iwawa iraka efie ene gweregwen mikaan̄ mbet lek ichechieek Josuwa mè Kelep ekaan̄be. Bak lek ichechieek yi, ebi ijija, ebi ininin̄ ugane, ebi lek onyebe melek ebi lek ikanyege ekilook ata etip Ama Ubọọn̄ me otutuuk linyọn̄ yi. Kpunu ogwu ochicha geege orara ichit otu ikpele urum ebi akọn̄ chi, ebi ikakaan̄ ukarajit.—Ebi Rom 8:31.
Week Inu Unye Otu Ewe Okup Me Usem Awaji
it-1 740
Ijọn̄ Awaji Onyibe Ebi Ijeren
Ijọn̄ ya, eyi Awaji onyibe ebi Ijeren ichubọk ire ata ijọn̄. Sabum ebi Ijeren enin̄be Ijọn̄ Echieekbe Me Use ya, Mosis iria ebi enun̄un̄un̄ ibe esi ekpọ ijọn̄ ya, mè esa usini mfut ònan̄a me inyọn̄ ijọn̄ ya ekaan̄ me ubọk eka. Ema migbeme mfut pomegaranet mè mfut figi, mifieek si otu agọọk olik gerep ge ototo njọ gerep ge omimin ire lek ene iba esabe uti itap itibi, mè irak itoon̄ me oguga! Ikerere ibe ke ema mitet ukpook bak lek una ichechieek kiban̄, ema mitumu ibe: “Ijọn̄ ya ìre atalek ijọn̄ òkisibi inu ijaan̄.”—Ifuk 13:23, 27.
ONYAN̄ ITA 29–ONYAN̄ INI 4
INU UNYE OTU EWE OKUP ME USEM AWAJI | OTU IFUK 15-16
“Gbala Chieen̄ Mun̄ Ibe Ke Okakigumu Lek mè Ikikeek Ibe Ke Okpokọt Irọn̄”
w11 9/15 27 ¶12
Ire Jioba Iriọọn̄ Owu Ni?
12 Ire, mgbọ ebi Ijeren ekupbe me oniin̄ ikije isi Ijọn̄ Echieekbe Me Use ya, Kora obebene ikikeek ibe ke lọlọ omaan̄ me lek onineen̄ Jioba mè ikiweek irọrọ unwene. Efit ebirieen̄ iba mè akọp go, irere ebi ibot me ido ebi Ijeren migọọk Kora ikeke. Ema mira ikikeek ibe ke eya ikpokaan̄ mgbaan̄ geege me lek mgbaan̄je kiban̄ melek Jioba. Ema etumu inyi Mosis ibe: “Iyak, eyi kinyi îyaka igana! Otutuuk ebi ido Ijeren ìre ebi ìkup mbuban. [Jioba, NW ] si òwa melek kiban̄.” (Ifuk 16:1-3) Kpọ-nu mbet lek ubenelek keya! Mosis ofọfọọk ibe: “[Jioba, NW ] môjeen̄ ogwu òrere eyi kan̄.” (Fuk Otu Ifuk 16:5.) Sabum ota usen ogọgọọk, Kora melek otutuuk ebi igọgọọk ọmọ ikpaka ibot ekwakwaan̄ isan̄a.—Ifuk 16:31-35.
w11 9/15 27 ¶11
Ire Jioba Iriọọn̄ Owu Ni?
11 Mosis ijeen̄ ulibi me lek onineen̄ melek ntumu-mfieek kè Jioba, ire, Kora ikarọ ikeya. Eru kiban̄ ikaan̄ mgbaan̄ me lek ubọk Jioba omọnọbe ema ge ge. Kora ire ogwu otoko kè Libai, ogwu owot iman kè Koyat, inwọọn̄ owuwa irek. Irek chi mokọt igọbọ imumun̄ ubọk Awaji osabe inyan̄a ebi ido Ijeren me Okwaan̄ Anyiaan̄, ibebieen̄ oyerebet Jioba ofieekbe ikeme ebi ikpakpaka ibot me inyọn̄ Ogoon̄ Saina inye, mè igọgọọk iben okop inyan̄a-ibot. (Isis 32:26-29; Ifuk 3:30, 31) Ikpọk mbum ibe ke Kora igbe utoon̄-ejit inyi Jioba me acha acha mè ire si ogwu owuwa ebi Ijeren ejeen̄be ulibi.
Week Inu Unye Otu Ewe Okup Me Usem Awaji
w98 9/1 20 ¶1-2
Kisun̄ Inu Echi Okukup Ufiak Kubọk Adasi Inu!
Jioba ikamun̄ inu ogwu enerieen̄ ofafiat ikan Usen Mbuban orọbe kubọk sọntitiik inu. Baibul ibe: “[Jioba, NW ] onenitumu inyi Mosis ibe, ‘Mkpa okup inyi ene ya. Otutuuk ebi ido Ijeren etaba ene ya esibi udun̄ ama, mè eteen̄ ewuuk esa etọbọ ọmọ ekpan̄ me ere ya.’ ” (Otu Ifuk 15:35) Keke orọ Jioba onaan̄be ejit me lek inu ogwu enerieen̄ ya orọbe?
Ebi Ijeren mikaan̄ usen gweregwen, echi mekọtbe isa ikpọ chieen̄ me lek ufiak kiban̄, kubọk itititen̄e iye, iweweek inorie, ọfọnti, mè ere iluluk. Òso usen jaaba ire usen mesabe igwuun̄ chieen̄ me lek ufiak echi emen ekwukwu kiban̄. Itititen̄e iye ikalọ, ire, ilọ ibe esa mgbọ esun̄be ọkpọkpọ isasa itọbọ ebum inyi Jioba erọ ikeya. Ire atikọ ibe ke ebi eyi Karais kpekup me irak Ikan kè Mosis, ire, inan̄a me lek mfufuk yi, ire eji kpekween̄ ibe ke igbe ibe eji ekesun̄ inu me ere igbebe me chereyi ni?—Ebi Filipai 1:10.
ONYAN̄ INI 5-11
INU UNYE OTU EWE OKUP ME USEM AWAJI | OTU IFUK 17-19
“Emi Nre . . . Ìrot Kwun̄”
w11 9/15 13 ¶9
Ire Okekichieek Ibe Jioba Ire Uche Kwun̄ Ni?
9 Keek-nu mkpọ ofolek ebi otoko kè Libai, ebi ekanyige ijọn̄ geege kubọk irot. Eyi irebe ibe ke ire ntọbọ-ebum kè Jioba okup ufiak ichit isa inyi ebi Libai, ema ebeyayaka lek imaan̄ me lek Jioba ibe ikpọ chieen̄ me lek ufiak kiban̄. Jioba itumu inyi ema ibe: “Emi nre uche” kinyi. (Ifuk 18:20) Eji kpekisi ikwaan̄ me uwu mbuban ikike kubọk ebi ngwugwa mè ebi Libai, ire, eji mekọt igọọk akpat ukot kiban̄ sa me itotoon̄ ejit me lek Jioba ibe ke ọmọ mokikpọ chieen̄ me lek kiji. Ike inu okiriọọn̄ ikisak inyi isi me ota mgbọ yi, ikeya ke ikup ufiak ibe eji eketoon̄ ejit me lek unye Awaji okaan̄be isasa ikpọ eji chieen̄ me lek.—Ichi 13:17.
w11 9/15 7 ¶4
Jioba Ire Uche N̄a
4 Mgbọ Jioba onyibe ebi otoko kè Libai ikwaan̄, itumu inyi ema ibe ke ọmọ more uche kiban̄. Eya isibi keke? Jioba inyi ema irek ikwaan̄ eyi osisibi esese kpan̄asi inyinyi ema ijọn̄ kubọk irot. Ire “ikwaan̄ igwagwa ngwugwa inyi [Jioba, NW ]” ore ìrot eyi kiban̄. (Jos 18:7) Inu okup me ikpa Otu Ifuk 18:20 ikijeen̄ ibe ke ebi Libai kpenan mkpọ echi okukup ufiak. (Fuk Otu Ifuk 18:19, 21, 24.) Ebi Ijeren ebekinyinyi ebi Libai ‘mkpukpe irek ge me akọp irek, kubọk ìrot kiban̄, isasa ikpe ema mkpukpe ubọk ikwaan̄ kiban̄.’ Meche inu ema erọkọbe me uko melek anam kiban̄ isibi akọp irek mè inyi ebi Libai irek ge me lek akọp irek cha. Ebi Libai mesan̄a si irek ge me akọp irek me lek inyinyi enyibe ema, “echi ònwọnwọn ichit,” isa ibieen̄ ikwaan̄ ebi ngwugwa inye. (Ifuk 18:25-29) Ebi ngwugwa si ekibọkọ “otutuuk inyinyi òkup mbuban geelek” echi ebi Ijeren ekisa ijet Awaji me ere itọbọ-ebum kan̄. Ebi ngwugwa mikaan̄ atalek ibot ibot inu oboro inyi ema echieek ibe ke Jioba mokpọ chieen̄ me lek kiban̄.
Week Inu Unye Otu Ewe Okup Me Usem Awaji
g02 6/8 14 ¶2
Uchi—Mkpọ Onyenye Otu Ewe
Uchi ikikeke ichit chieen̄ mkpọ inyenye mè ibabia ire mgbọ geelek. Eya orọ, me Baibul, ekigwen inyan̄a-ibot eyi mokupbe ibia “inyan̄a-ibot eyi uchi.” Owuwa mgbọ, isasa irọ inyan̄a-ibot ebi ene erọbe inye, ekigbaan̄ irie inorie eyi etapbe uchi me lek. (Otu Ifuk 18:19) Me irak Ikan kè Mosis, mikitap uchi igbaalek ngwugwa echi ekigwa me inyọn̄ ntook ngwugwa. Kpolọlọ, eya ikijeen̄ ibe ke ngwugwa cha ikup me mbuban.
ONYAN̄ INI 12-18
INU UNYE OTU EWE OKUP ME USEM AWAJI | OTU IFUK 20-21
“Kup Nye Kisiki Lek Me Irak Ukeme”
w19.02 12 ¶19
Kisiki Lek mè Kirọ Inu Jioba Oweekbe
19 Eji mejit ikekirọ inu echi olọlọ. Keek-nu mkpọ ofolek Mosis. Me owuwa acha, Mosis isiki lek mè irọ inu Jioba oweekbe. Ire, me mgbọ ije akọp acha ini kiban̄ me emen ewe obonita, Mosis ikayaka ijeen̄ nsiki-lek ya. Ikafiin̄ ngwan̄ kan̄ enenwaan̄ okwube, mifuun̄ ọmọ si me Kades. Mokọt ire ngwan̄ Mosis ya onyan̄a ọmọ isibi me Ijipiti. Mgbọ keyi, ebi Ijeren ekekitumu ibe ke kpekikpọ ema chieen̄ me lek ijaan̄. Ebi Ijeren etoto “ibaak me lek kè Mosis” bak lek ekamun̄ge mudim inwọ. Ikerere ibe ke Jioba isa Mosis irọ owuwa uyeke uyeke inu, ikerere si ibe ke Mosis ikpulu ema ijaan̄, mè ikaweekge nnwọn eyi lek kan̄ gaalek, ebi Ijeren ekpọkpọk ikinunuun̄. Ikare bak lek kpunuge mun̄ gaalek ke ema enunuun̄, ema etutumu ikọ ikeme Mosis kubọk ke ire ọmọ orọ inyi mun̄ inan.—Ifuk 20:1-5, 9-11.
w19.02 13 ¶20-21
Kisiki Lek mè Kirọ Inu Jioba Oweekbe
20 Mije uyok uyok unaan̄-ejit, Mosis ikayaka ikọt irọ mkpọ esuuk esuuk. Kpan̄asi Mosis obotumu ikọ inyi ewuuk ya ike Jioba otumube, isa me unaan̄-ejit itumu ikọ inyi ebi Ijeren mè irọ si kubọk ke ire unye kan̄ ke isa isan̄a mun̄ ya isibi inyi ema. Isa mkpat isulu ewuuk ya mgbọ iba, mundim ogbugbuk isibi. Ubenelek mè unaan̄-ejit irọ me Mosis irọ inu olọlọ. (Itọn̄ 106:32, 33) Mije ibe ke Mosis ikajeen̄ nsiki-lek me mgbọ ya, Awaji ikachieek ibe inin̄ Ijọn̄ Echieekbe Me Use ya.—Ifuk 20:12.
21 Atalek mkpọ nkween̄ omaan̄ me lek mfufuk yi. Adasi, eji metap efuuk ikijeen̄ eru nsiki-lek mgbọ geelek. Ire eji kperọ ikeya, eji mekọt ibene ikigumu lek mè ikitumu mè ikirọ inu ikagbege. Òso iba, sasaak mokọt iwọ eji lek, eya orọ, eji metet lek inye ikijeen̄ eru nsiki-lek ikerere me irak ukeme.
w09 9/1 19 ¶5
Ogwu Oyerebet Okikeke Inyi Inu Otatat
Adasi, Awaji ikabe me Mosis itumu ikọ inyi ebi Ijeren, oyasik isisibi oyerebet inyi ema kubọk ebi okpaka-ibot. Òso iba, Mosis melek Erọn kpemin Awaji. Awaji itumu inyi ema ibe: “Enyi kpesun̄ si emi me mbuban.” (Agba Eyi 12) Mosis itumu ikọ kubọk ke ire ọmọ melek Erọn ebesan̄a mun̄ ya isibi kpan̄asi Awaji. Òso ita, osusut Awaji onyibe Mosis melek Erọn ire eyi ogbegbe igọọk me lek osusut echi inyibe ebi Ijeren me mgbọ oraraka. Ike Awaji ikachieekge ibe ebi adasi ikpakpaka ibot inyi ọmọ enin̄ ido Kenan, ikeya ke ikachieek ibe Mosis melek Erọn enin̄ si. (Otu Ifuk 14:22, 23) Òso ini, ire Mosis melek Erọn esa ebi Ijeren ije kubọk ebi isi kiban̄. Ebi ikakaan̄ owuwa akpan ikwaan̄ menyi Awaji owuwa mfufuk.—Luk 12:48.
Week Inu Unye Otu Ewe Okup Me Usem Awaji
w14 6/15 26 ¶12
Ire Okekimun̄ Iwọwọ Ebi Ene Ubọk Jioba Okebimun̄ Ni?
12 Me irek chi ge ge, Jioba ke okọt osut Erọn osusut mgbọ yaage. Ire, Awaji iriọọn̄ ibe ke Erọn ikare ijo ene ikerere ibe ke ikaan̄ mgbọ ikakekebe inye irọ inu otatat. Ikup kubọk ke Erọn ichechieek ibe irek imun̄be lek kan̄ mè iyaka ire ebi ofifi ebieen̄ ọmọ esan̄a me oniin̄ eyi otatat. Ire, mgbọ etumube ijo inu irọbe isibi, Erọn ichieek ibe ke ọmọ irọ ilọ mè ibọkọ oyerebet kè Jioba itap. (Isis 32:26; Ifuk 12:11; 20:23-27) Jioba igobo igwugwuun̄ chieen̄ me lek ichechieek Erọn okaan̄be mè ata eru ngwu-nkom-nkana kan̄. Ike acha acha okebije, ekikeek Erọn mè bọn bọn kan̄ kubọk ebi ikakaan̄ ukpook me lek Jioba.—Itọn̄ 115:10-12; 135:19, 20.
ONYAN̄ INI 19-25
INU UNYE OTU EWE OKUP ME USEM AWAJI | OTU IFUK 22-24
“Jioba Irọ Inyi Ogbo Ikana Ugbana”
bt 53 ¶5
Ikpakpa “Ata Etip Ofolek Kè Jisọs”
5 Me chereyi, ike ikupbe me ukot ikaan̄, tukutuku ikakigban ikwaan̄ ilolook ata etip eyi ebi eyi Awaji ekebirọ. Owuwa mgbọ, tukutuku ikirọ inyi ebi eyi Karais enan̄a me ere ema ekebiluk efo ofifi ere, kubọk ofifi ido mè iyaka ire mkpọn. Ire, eyi ikinyi ema irek ikpakpa etip Ama Ubọọn̄ inyi ebi ene me ayaya ere ema ekupbe ya. Kubọk inu njeen̄, me mgbọ etimbe Òso Akọn̄ Iba Etimbe Me Otutuuk Linyọn̄, Ebi Ata-Ikọ Jioba mikọt ilook ata etip eyi osisibi esese me emen esese esese uwu mkpọn ebi Nazi. Ogwu Ju ge, ogwu ochichichini ebi Ata-Ikọ cha ibe: “Ukarajit mè ime Ebi Ata-Ikọ Jioba ikup me mkpọn ekaan̄be irọ ibe emi nchieek njaan̄ ibe ke ichechieek kiban̄ iyayaka imaan̄ me lek Baibul—irọ inyi nkana ogwu Ata-Ikọ Jioba si.”
it-2 291
Iraak
Iraak eyi Ikekeke Ikeme Jioba. Balam ogwu nriran ikajeen̄ iriọọn̄-inu me mgbọ iweekbe ibeben nriran ikeme ebi Ijeren inyi ọmọ ikọt ibọkọ ikpoko me ubọk Ogwu Ubọọn̄ Mowabu orere, Balak. Ire, Jioba ikachieek ibe inu itọtbe ya itet mun̄. Ofolek Balam, ogwu ikwaan̄ Pita ige ibe ke ‘inyinya akpan ya ìsa ida ebilene itumu ikọ ikwek ogwu nriran ya, inyi ikakọt ìsi ikwaan̄ ebi iraak ya eyi ìbosi.’ Me ikpakpa ubọk Balam orọbe eru, ogwu ikwaan̄ Pita isa usem Giris pa·ra·phro·niʹa, ‘eyi ekisa ikpa mkpọ ofolek ogwu iraak’ irọ mkpọ.—2 Pit 2:15, 16; Ifuk 22:26-31.
Week Inu Unye Otu Ewe Okup Me Usem Awaji
w04 8/1 27 ¶2
Inu Ekpabe Ofolek Ikpa Otu Ifuk
22:20-22—Keke orọ Jioba onaan̄be ejit inyi Balam? Jioba iwuuk lek itumu inyi Balam ibe me ikafieek otu inyi ebi Ijeren. (Otu Ifuk 22:12) Ire, ogwu nriran ya, orere Balam, igọọk ebirieen̄ ebi Balak eriabe inu me lek kan̄ ije, me nkeek ibe ke ọmọ mofieek otu inyi ebi Ijeren. Balam iweek irọrọ inyi ejit ogwu ubọọn̄ Mowabu ibele, ufuna ikọt ikpe ọmọ mkpukpe. (Pita Eyi Òso Iba 2:15, 16; Judu 11) Ikerere me mgbọ Awaji onwenebe ogbo ya ikana ugbana, Balam ikpọkpọ ikiweek nnwọn-isi ogwu ubọọn̄ ya sa me itutumu ibe me eria ebibaan̄ ebi ikifaka Baali ibe esi eleke ebirieen̄ ebi Ijeren etap me barabat. (Otu Ifuk 31:15, 16) Eya orọ, inu orọrọ Awaji onaan̄be ejit inyi Balam ogwu nriran ya ire bak lek chieen̄ ile ikaan̄be.
ONYAN̄ INI 26–ONYAN̄ GO 2
INU UNYE OTU EWE OKUP ME USEM AWAJI | OTU IFUK 25-26
“Ire Inu Ene Ge Orọbe Mokọt Ikaan̄ Mgbaan̄ Me Lek Owuwa Ene Ni?”
lvs 118 ¶1-2
“Ìlibi Ìnan̄a Me Lek Ugwem Barabat!”
OGWU MBỌM IRIN̄ ikisi ere ibomun̄ mbet lek irin̄ iweekbe itetet. Mogobo mkpọ-otu-ukọọk itap me otu ukọọk kan̄ mè itọp ukọọk ya ito me mun̄ ikikpọ ibe irin̄ iben. Ike irin̄ okikpok ukọọk ya me ubọk kan̄ me iben imeen̄, mosik ukọọk ya igọbọ irin̄ ya me otu mè itaba isibi.
2 Mbet inu yaage mokọt irọ ebilene si. Kubọk inu ijejeen̄, ebi Ijeren mijeje igbet Ijọn̄ Echieekbe Me Use ya mgbọ ema egwuun̄be uwu ọfọ kiban̄ me Òla Ijọn̄ Ido Mowabu. Ogwu ubọọn̄ Mowabu ichieek use inyinyi Balam owuwa ikpoko ire ke ọmọ mochieek ifefieek otu inyi ebi Ijeren. Ire, Balam ikọt iweek oniin̄ isa irọ inyi ebi Ijeren erọ mkpọ eyi mosabe ogbo ijet ema. Iriọọn̄ ubọk igobo mkpọ-otu-ukọọk isabe itet ema. Iria ebibaan̄ ebi Mowabu ibe enin̄ emen uwu ọfọ ebirieen̄ ebi Ijeren esi eleke ema inyi ema ebubat.—Otu Ifuk 22:1-7; 31:15, 16; Ichichili 2:14.
lvs 119 ¶4
“Ìlibi Ìnan̄a Me Lek Ugwem Barabat!”
4 Keke orọ owuwa ebi Ijeren erọn̄be inin̄ me emen ufe kè Balam? Ema ekikeek nnwọn eyi lek kiban̄ gaalek mè iwuuk otutuuk inu echi Jioba orọbe inyi ema. Ebi Ijeren mikaan̄ owuwa inu echi morọ inyi ema egbe utoon̄-ejit enyi Awaji. Awaji onyan̄a ema isibi me irak usun̄ me Ijipiti, ọmọ onyi ema inorie me emen ewe mè isa ema iban me esuuk inire otu utọn̄ Ijọn̄ Echieekbe Me Use ya. (Ebi Iburu 3:12) Ire, ema michieek ibe eleke ema etap me barabat. Ogwu ikwaan̄ Pọọlu ige ibe: “Ofifi si, eji ekaluk ugwem barabat kubọk usini ebi nte nte kiji cha erọbe, eyi akọp obop ene iba mè obop ita egbaan̄be ikwaan̄ me usen ge gaalek.”—Ebi Kọrint Eyi Adasi 10:8.
Week Inu Unye Otu Ewe Okup Me Usem Awaji
it-1 359 ¶1-2
Okike Ijon̄
Ikup kubọk echeche ijọn̄ inyi ebi Ijeren igọọk me lek mkpọ iba chi: nriroon̄ eroon̄be melek otu ifuk ebi ene me otoko ge ge. Nriroon̄ eroon̄be ya ira itap ubọk inyi ema ekọt eriọọn̄ ijọn̄ agan̄ ebi otoko cha ge ge ebekaan̄ me irot, mè ire agan̄ inyọn̄, agan̄ osiki, agan̄ mbum-ura, sa ire agan̄ ichep-ura, ofifi si, mè ire ijọn̄ okup me agba lek mun̄ mè iyaka ire eyi okup me inyọn̄ ijọn̄ ogoon̄ ogoon̄. Ire Jioba otumu ifieek inu obosibi me lek nriroon̄ ya, eyi oborọ inyi ema ekakaan̄ mba-ejit me lek ge ge mè ibaak ikakup si me etete ebi otoko cha. (Urọk 16:33) Isọkọ me lek si, Awaji isa me ikeyi irọ inyi irek ebi otoko cha ge ge ije ikike me lek nriran Jekọp obenbe sabum ikwube, ike egebe me ikpa Ibebene 49:1-33.
Miroon̄ nriroon̄ isa iriọọn̄ ijọn̄ agan̄ ebi otoko cha ge ge ebeluk, ire, mgbọ keyi, ikup ufiak ibe eriọọn̄ ubọk ijọn̄ kiban̄ obomin ire igọọk me lek otu ifuk ebi otoko cha ge ge. Ikpa Otu Ifuk 33:54 ibe: “Ìroon̄ nriroon̄ ìsa ìche ijọn̄ cha ìnyi lek kinyi me ìrot, ìgọọk me ikeke otoko geelek. Otoko òmimin môkaan̄ ijọn̄ òmimin, otoko òsisip môkaan̄ ijọn̄ òsisip. Okike ijọn̄ geelek òrọrọn̄ inyi otoko geelek, eya obore eyi kiban̄.” Kpebekọt inwene ijọn̄ agan̄ orere ema lek igọọk me nriroon̄ eroon̄be ya, ire, mekọt inwene ubọk ijọn̄ ya obomin ire, ikpọ me lek ikeke ebi otoko cha ge ge. Eya orọ, mgbo emun̄be ibe ke ijọn̄ ebi otoko kè Juda imin igak ema, ekpọkpọkọ me lek isa inyi ebi otoko kè Simiọn.—Jos 19:9.