INU NKWEEN̄ 6

Riọọn̄ Ubọk Kpa Jaan̄ Mkpọ Orọrọ Okifuk Ere Baibul

Jọn 10:33-36

ME MGBIDIM: Kakpọkpọk ifuk ere Baibul mè isaba isi tumu ofifi ibot usem. Mun̄ ibe ke ebi ikigban̄ owu migobo itet ubọk ere ofukbe ya osabe ikaan̄ mgbaan̄ me lek ibot usem kwun̄.

UBỌK OBORỌ:

Gobo usem echi okukup okpan okpan. Osifuk ere Baibul isan̄a, kpa wele usem echi ochubọk ikaan̄ mgbaan̄ me lek ibot usem kwun̄. Omokọt irọ eyi sa me ikpọkpọk itumu usem cha miya ire sa me idodo ndo-ikọ eyi oborọ me ebi ikigban̄ owu ekọt eriọọn̄ usem echi okukup me ufiak.

Ire osa esese esese usem isa ikpọk isan̄a mkpọ ere Baibul ofukbe okitumu isibi, mun̄ jaan̄ ibe ke ebi ikigban̄ owu mekọt igobo itet si ubọk usem echi esabe irọ mkpọ me ere Baibul ya ojebe inin̄ me lek ibot usem okikpa.
Gon aban me lek ibot usem oweekbe ibe ekekeek. Ire okaan̄ atalek ibot ibot inu orọrọ ifuna ofuk ere Baibul ge, kpa wele ubọk usem okukup ufiak me ere ofukbe ya osabe ibieen̄ nkeek kwun̄ inye.

Eyi okebikpa ere Baibul, kachit Baibul kwun̄. Eyi morọ me ebi ikigban̄ owu emun̄ lek ubọk usem kwun̄ osabe ije ikike me lek ere Baibul ya ofukbe.
Rọ me usem kwun̄ ikup mfufet. Kakpa usem echi ikabieen̄ge okpan ibot usem kwun̄ inye. Igọọk me lek mkpọ ebi ikigban̄ owu ewuukbe lek iriọọn̄ ofolek ibot usem ya, riọọn̄ mbet lek usem obosa irọ mkpọ ifuna ebi ikigban̄ owu egobo ibot usem kwun̄ etet ejaan̄.