Ekene Ore Jisọs?

Owuwa ene minọ mkpọ ofolek Jisọs. Ire, isan̄a me lek erieen̄ kan̄, kperiọọn̄ owuwa mkpọ ofolek kan̄, ema mikaan̄ esese esese nkeek ofolek ogwu Jisọs orebe. Keke ke Baibul okpa ofolek Jisọs ni?

1. Ekene ore Jisọs?

Jisọs ire ogwu osat okakaan̄ unye okiluk me emen inyọn̄. Jioba idasi irom ọmọ sabum inirom ofifi inu geelek. Eya orọ egwenbe ọmọ “adasi Gwun̄ enerieen̄ Awaji . . . orombe.” (Ebi Kọlọsi 1:15) Baibul igwen Jisọs “ọkpọkpọ Gwun̄ ge” Awaji okaan̄be mije Jisọs gaalek ke Jioba osa ubọk kan̄ irom. (Jọn 3:16) Jisọs igọọk Nte kan̄ Jioba, igbaan̄ isi ikwaan̄, mè itap ubọk inyi Ọmọ irom otutuuk mkpọ. (Fuk Urọk 8:30.) Jisọs ikaan̄ ata mgbaan̄je melek Jioba. Ọmọ okitumu otu Awaji isibi kubọk “Ikọ” kan̄ mè ikilook etip mè ntọ-ubọk Kan̄.—Jọn 1:14.

2. Keke orọ Jisọs onube me inyọn̄ ijọn̄ yi?

Me mkpọ oraraka obop acha iba, Jioba isa ekwukwu mbuban kan̄ iria ugwem Jisọs inan̄a me emen inyọn̄ itap me owot Meri, ogwu enenwaan̄ ikariọọn̄ge enerieen̄ me oniin̄ okup uyeke uyeke. Ikeyi ke esa iman Jisọs kubọk ebilene. (Fuk Luk 1:34, 35.) Jioba iria Jisọs inu linyọn̄ ibe inire ogwu Mesaya mè iyaka ire Karais mè inyan̄a ebilene.a Otutuuk nriran Baibul ofolek ogwu Mesaya irọrọ iso me lek Jisọs, eyi orọ me ifet me ebi ene ekọt eriọọn̄ ọmọ kubọk “ogwu Awaji otọkọbe aran̄ me ibot ya, ogwu òrere Gwun̄ Awaji òkup me ugwem!”—Matiyu 16:16.

3. Owa ke Jisọs okup me mgbọ keyi?

Jisọs ikwu kubọk ebilene, ire, Awaji ijomo ọmọ ifo emen inyọn̄ kubọk ogwu osat. Me emen inyọn̄, “Awaji obebene ọmọ ifo inyọn̄, mè isun̄ ọmọ me irek òbebene.” (Ebi Filipai 2:9) Mgbọ keyi, Jisọs ikaan̄ unye enenen—ire Jioba gaalek okaan̄ unye igak ọmọ.

4. Jisọs ikare Awaji Ogwu Okakaan̄ Unye Ichit

Ubọk geelek ibe ke Jisọs ikaan̄ unye enenen me emen inyọn̄, Baibul ijeen̄ ibe ke ikisisiki ibot inyi Awaji, orere, Nte kan̄ Jioba. Keke orọ eji etumube ikeya? Fit FIDIO yi inyi omun̄ inu Baibul ojeen̄be ofolek esese okukup me lek Jisọs mè Awaji ogwu okakaan̄ unye ichit.

FIDIO: Jisọs Karais Ire Awaji Ni? (3:22)

Ere Baibul chi motap ubọk inyi eji egobo etet esese okup me lek Jisọs mè Jioba. Fuk ere Baibul chi, mè igbaan̄ ikpa idodo ogọgọọk:

Fuk Luk 1:30-32.

• Keke ke ogwu osat okpa ofolek ogwu Jisọs orebe isa inyi Jioba, Awaji “Ogwu Òbebene Ichit”?

Fuk Matiyu 3:16, 17.

• Mgbọ Jisọs okaan̄be ntap-me-mun̄, keke ke ida onan̄a me emen inyọn̄ otumu?

• Me nkeek kwun̄, ida ya ire ida ekene?

Fuk Jọn 14:28.

• Me lek ute mè gwun̄, ekene ore ugane? Ekene okaan̄ unye igak ge?

• Jisọs igwegwen Jioba Nte kan̄ ikijeen̄ eji keke?

Fuk Jọn 12:49.

• Ire Jisọs ikikeek ibe ke Nte kan̄ me lek kan̄ ire ikike ni? Keke orọ ofọọkbe ikeya?

5. Inu okijeen̄ ibe ke Jisọs ore ogwu Mesaya

FIDIO: Nriran Orọrọ Iso Me Lek Jisọs (3:03)

Fuk nriran Baibul chi mè igbaan̄ ikpa idodo chi ogọgọọk:

Fuk Maika 5:2 inyi omun̄ ere ebeman ogwu Mesaya.b

• Ire ere ya ke eman Jisọs ni?—Matiyu 2:1.

Fuk Okwa Itọn̄ 34:20 mè Jekaraya 12:10 inyi omun̄ nriran Baibul obenbe ofolek mkpa ogwu Mesaya.

• Ire nriran chi irọ iso ni?—Jọn 19:33-37.

• Ire okeek ibe ke ire Jisọs oneen̄ ibe nriran chi irọ iso me lek kan̄ ni?

• Keke ke eyi okijeen̄ owu ofolek Jisọs?

ME MGBIDIM

Jisọs ire ogwu osat okakaan̄ unye. Ọmọ ire Gwun̄ Awaji mè ire si ogwu Mesaya.

Idodo

• Keke orọ egwenbe Jisọs “adasi gwun̄ enerieen̄ eyi Awaji”?

• Keke ke Jisọs orọ sabum inube me inyọn̄ ijọn̄?

• Ike owa ke eji esa iriọọn̄ ibe ke Jisọs ore ogwu Mesaya?

WEEK

Kween̄ gbaalek si ubọk eji esabe iriọọn̄ ibe ke Jisọs ore ogwu Mesaya.

“Do Messianic Prophecies Prove That Jesus Was the Messiah?” (Web article)

Kpọ-nu mè ire Baibul ijeen̄ ibe ke Awaji ibobon Jisọs ike ebilene ekibon bọn.

“Why Is Jesus Called the Son of God?” (Web article)

Kween̄ inu orọrọ njeen̄ Awaji ita me emen ge ikarege njeen̄ Baibul.

“Is Jesus God?” (The Watchtower, April 1, 2009)

Fuk ubọk ugwem ogwu enenwaan̄ ge onwenebe mgbọ ikween̄be inu Baibul ojeen̄be ofolek Jisọs.

“A Jewish Woman Explains Why She Reexamined Her Faith” (Awake!, May 2013)