¿CHUMLERPUAI TAIÑ MAPU?
MAHUIDANTU
TI MAHUIDANTU trürümngequei ponon mu eluquefilu ñi mongeleal ta che. ¿Chumngelu? Tati anümca ponon reque lipümquefi tati cürüf. Lümüquefi reque tati dioxido de carbono. Femnole, huesalcayafui pu che. Ca anümca mu tripaquei tati oxigeno, tüfa rume falin-ngei taiñ cüme neyüal. Epe com tati anümca ca mapu culliñ mülei mahuidantu mu. Ngenole mahuidantu, ngelayafui mongen.
¿Chem rupamequei taiñ mahuidantu mu?
Doi nieal mapu tañi nganal pu che, catrüngequei huarancaque millon anümca. Tüfachi 75 tripantu mu fentren anümca catrüngequei. Rangiñ reque tati mahuidantu mülequefulu mapu meu ngehuetulai.
Apümcangele mahuidantu, com tati anümca ca culliñ mülepulu ca apümcangequei.
Taiñ mapu deumangei tañi afnoal
Cheu ñi catrücangen tati anümca, fei mu ca huiño tremtuafui mahuidantu. Tati pu cuidaquefilu mapu hue ngüneduamingün ñi pürüm tremquetun ti anümca cheu ñi catrücangemum ca huiño cüme mahuidantungequetui. Peaiñ quiñeque ejemplo:
Ngüneduamngei 2.200 mapu mülelu América ca África Occidental mu, cheu apümcangelu mahuidantu ñi nganal mapu, huelu rupachi antü tranacünungei. Fei pu cientifico ngüneduamingün tati mahuidantu ñi huiño tremquetun petu ñi rupanon rume 10 tripantu.
Quiñe revista Science pingelu feipi pu cientifico raquiduamingün 100 tripantu peno rupale tati mahuidantu huiño ca feletuafui chumngechi ñi felequefel cuifi petu ñi catrücangenon ti anümca, huelu pu huentru ñi coneltunon mu.
Brasil mapu mu, hue hula quiñe troquiñ cientifico cüpa ngüneduamfingün matu huiño tremtual mahuidantu anümngele hueque anümca. Tüfa mu ti revista National Geographic feipi pu cientifico afmatulehuei ñi ngüneduamfiel mu chumngechi tati anümca quisutu apoltuquefi ti mapu, rupan mu quechu tripantu müten. Duamfalngelafui anümngeal hueque anümca.
¿Chem chummequei tati pu che?
Com mapu mu quintumequengei chumngechi cuñiutucunieal tati pichilehuechi mahuidantu ca ñi cüme elcünungetual ti huesalcangelu. Tüfachi cüdau mu tati Naciones Unidas feipi rupayechi 25 tripantu müte catrüngehuelai anümca chumngechi ñi catrüngequefel cuifi.
Tüfachi cüdau cümei, huelu doi duamfali yafüluhual ñi montulngeal ti mahuidantu. Tati organizacion Global Forest Watch feipi ñi apümcangen ti mahuidantu doi arengechi mapu mu, müte caletulai fantepu mu.
Tati pu empresa quisu ñi duam mu catrüquefilu anümca entuam mamüll, hueuquei fentren plata. Fei tüfa mu, fentren mahuidantu doi arengechi mapu mu apümcamequengei.
Mülei troquiñche cuñiutucuquefilu mahuidantu tañi pichiquen catrüngeal anümca ca ñi huiño anümngetual.
¿Chem maneluhun elueiñmu ti Biblia?
“Chau Jehováa eli ñi tremal mapu meu itrofill ayüfalchi anümca hulquelu cümeque fün ñi ingeal” (Génesis 2:9).
Tati deumafilu com tati mahuidantu elcünufi taiñ cümelcayaeteu. Quisu duami cuñiutucunieal pu mahuidantu ca com mülelu fei mu.
Biblia quimeltuqueiñmu Chau Ngünechen elulayafi pu che ñi apümcayafiel taiñ mapu ca com ti mongen mülelu fei mu. Inaduamnge ti troquiñ “Chau Dios feipicünui ñi montuluhual taiñ mapu” mülelu pagina 15 tüfachi revista mu.
a Jehová, Dios tañi üi (Salmo 83:18).