Ñi feipicünuel Jefté

Pu Israel che ca huiño püntütripaingün Chau Jehová mu, fei eluhuingün ñi poyeafiel coilaque dios. Huelu tüfa engün catrütuquelafui pu Ammón che ñi lefcontuaeteu. Fentren tripantu cutrancahuingün pu Israel che. Feula ca feipifingün ta Chau Jehová: “Culpaiñ. Fürenemuiñ, montulmuiñ taiñ pu caiñe mu”. Fei apümfingün pu coilaque adentun ca huiño poyefingün ta Chau Jehová. Feimu, cutranpiuqueyeyu engün.

Pu Israel che dullifingün ta Jefté ñi loncoleal ti troquiñ hueichayafilu pu Ammón che. Jefté feipifi ta Chau Jehová: “Elumuiñ taiñ huehual. Femülmi, iñche hulcünulelayu ti hunen che tañi trafyemeaeteu huiñotuli iñche tañi ruca mu”. Chau Jehová allcütufi ta Jefté, fei quellufi ñi huehual.

Huiñotulu Jefté tañi ruca mu, ti hunen che tañi trafyemeteu fei tañi ñahue ürque. Tüfa tañi quiñen ñahue. Failalen tripai ca dungulmequefui quiñe pandero. ¿Chumi cai Jefté? Raquiduamfemi tañi feipicünufiel ta Chau Dios, feipi: “¡Ay fotrü! ¡Müna huesha, saquin ñahue! Feipicünufiñ quiñe dungu ta Chau Dios. Feula tañi femürpual, mülei tami mülepual Siló mu, ngillatuhue tolto ruca mu, fei tami serfiafiel ta Chau Jehová”. Tañi ñahue feipieyu: “Chau, tami feipicünufiel ta Chau Jehová mülei tami femal. Huelu, füreneen, hune amuan tañi pu hueni engün mahuidantu mu 2 cüyen. Fei hula amuan ngillatuhue tolto ruca mu”. Jefté tañi ñahue mülepui üyeu, fei püntütripalai Chau Jehová mu. Doi mai, serfiniefi fente puulu tañi mongen. Ca fill tripantu tañi pu hueni pemefeyu Siló mu.