¿Chumafuimi tami ngünenienoaeteu ti putun dungu?

QUIÑE huentru Tony pingelu, feyentuquelafui ñi rume putufengen, feimu fentren huesaque dungu mu rupafui. “Iñche fentren putuquen, huelu ngolliquelan, feimu iñche ngollifengelan” piquefui. ¿Chumngelu ngüneduamuulai ñi putufengen?

Quisu ñi ngollin mu cüme raquiduamquelafui. Putun mu tüfachi huentru, tañi lonco ngüneuhuetuquelai. Doi putun mu, doi huyüquei tañi lonco, fei ngüneduamquelafui rume tañi ngollilen.

Tony tañi rume ayüquefiel mu ti putun dungu, feimu ngüneduamuuquelafui rume tañi ngollifengen. Alberto ca femngechi dungu mu rupaquefui, quisu feipi: “Iñche ellcauquefun tañi putual, fei quimngelu tañi ngollilen, iñche feipiquefun: ‘No, iñche ngollilelan. Com cüme felei’. Tañi piuque mu, raquiduamcülen tañi doi putual müten” pi. Caquelu che feipiquefeyu rume tañi putufengen engu, huelu Tony ca Alberto feipiquefui: “Feingelai, iñche ngollifengelan”. Huelu huelulcaucülefuingu, tati pulcu ürque mai doi ngünenieyu engu. ¿Chem femafui quiñeque che femngechi dungu mu rupalele?

Pepicaucülenge elcünutuafiel ti huesaque huimtun

Fentren che ngollifengefulu elcünufingün tüfachi huimtun inafiel mu Jesús tañi ngülam. Quisu feipi: ‘Tami man nge ñi duam culpalmi, nentufinge, fei famentufinge ta eimi meu. Doi cümei ta pichin müten tami cuerpo ñi ñamal, fei com tami cuerpo tañi ütrüftucungenoal’ Gehena meu (Mateo 5:29).

Jesús feipilai taiñ rüf allfüluhual, doi mai feipi taiñ elcünutual chem huesa huimtun rume taiñ catrünentuquefeteu Chau Dios mu. Cüdautuafuiñ taiñ elcünutual tüfachi huimtun, huelu quelluaiñmu taiñ putuhuenoal. Feimu feipingelmi tami rume putun, ngünehuaimi tami doi pichin putual.a Quimülmi tami ngüneunon, putuhuequilnge. Cüdautuafuimi tami elcünutual feichi huimtun. Huelu femülmi, montulaimi tami mongen.

Eimi ngollifengelaimi chi, huelu rume putulmi, ¿chem quelluafeimu tami doi pichin putual? Peafiyiñ.

¿Cheu entuafuimi cüme quellun?

1. Ngillatulenge. Maneluucülenge Dios mu tami allcütuaeteu llellipufilmi rüf piuque mu. Biblia feipi: “Com eimün tamün nieelchi dungu, nütramelqueafimün ta Ngünechen. Ngillatufimün, quelluen piafimün ca femngechi mañumtuqueafimün. Fei ta famngechi ta Ngünechen eluaimünmeu quisu tañi cüme tüngün, fei tüfachi fütra cüme tüngün ta doi cümei che ta pepil-layafui ñi nieal ta cüme tüngün, fei Ngünechen tamün elueteuchi cüme tüngün yafülnieñmayaimünmeu tamün piuque ca tamün raquiduam, eimün am quiñeucülelu ta Cristo Jesús meu” (Filipenses 4:6, 7). ¿Chem ngillatuafuimi Dios tami eluaeteu tachi tüngün?

Hunelu mu quimtucunienge tami putufengen, eimi tami huesa huimtun tati. Eluucülenge tami elcünutuafiel. Feipifinge Jehová chumngechi tami elcünutuafiel, femngechi ta quelluaimu. Biblia feipi: “Feichi ellcanielu tañi culpan cüme tripalayai tañi dungu, huelu feichi entudungulu ca elcünulu tañi huesa femmequen cutranpiuqueyengeai” (Proverbios 28:13). Jesús quimeltueiñmu taiñ ngillatuafiel ta Chau Dios: “Elumuqueliyiñ taiñ femal huesaque dungu ca montulniemuiñ com huesaque dungu meu” (Mateo 6:13). Deu ngillatulmi, ¿ca chumafuimi?

2. Yafüluunge Biblia mu. Loncontucunieaiñ: “Ngünechen ñi dungu mongen dungu ca pepiluhun dungu. [...] Inarumequefi ñi chumngechi raquiduamcülen ta piuque” (Hebreos 4:12). Fentrenque che ñi elcünutual tüfachi huesa huimtun, ¿chem quellueyu? Ñi chillcatuafiel ta Biblia fill antü. Chumngechi ñi feipin ta Biblia: “Ayühun niei tati huentru miyauquenolu tati huesaque piuquengechi che ñi ngülam mu […]. Huelu mai rume ayühulqueyu Jehová ñi ley dungu, antü ca pun meu papeltuquei ñi ley ñochi dungun mu. […] Com ñi femquen cüme tripayai” (Salmo 1:1-3).

Alberto chillcatuquefui Biblia pu Dunguquelu Ineingen Jehová mu, fei quellueyu ñi elcünutual tañi huesa huimtun. Quisu feipi: “Cüme quimürpun chillcatunofili Biblia, elcünulayafun tati putun dungu. Feula deu layafun chi”.

3. Quim ngüneunge. Biblia feipi quiñeque che petu ñi quimnofiel ta Chau Dios ngollifengefui, huelu Dios liftucünueyu tañi nehuen mu (1 Corintios 6:9-11). ¿Chumngechi? Dios tañi nehuen quellueyu tañi quim ngünehual, femngechi elcünutufingün tati ngollicahun ca caquelu huesaque huimtun. Feimu llemai Biblia feipi: ‘Inaquefilmün putun dungu [...]. Tamün femafel, elufimün Ngünechen ñi nehuen tamün ngünenieaeteu’ (Efesios 5:18; Gálatas 5:21-23). Ca femngechi Jesús feipi Chau Dios eluquefi ñi nehuen tüfei engün tañi ngillatueteu, feimu “ngillatulemün, fei ta Ngünechen eluaimünmeu” pi (Lucas 11:9, 13).

Femngechi llemai tiyechi duamlu ñi ayühuelafiel ta Dios, mülei ñi quim ngünehual. Tañi quim ngünehual, mülei ñi chillcatuafiel Biblia ca ngillatunieafiel Chau Dios. Ngüneduamliyiñ taiñ pepi ngüneunoal, raquiduamtucuaiñ ñi feipin ta Biblia: “Ngelai taiñ afeluhual taiñ femal cümeque dungu, fei afeluunoliyiñ, cosechayaiñ reque chumngechi ñi adcünuel ta Ngünechen” (Gálatas 6:8, 9).

4. Ngüneduamfinge tami pu hueni. Biblia feipi: “Quimche engu miyauquelu ca quimchengeai, huelu tati quiñeucülelu pu huedhuedque che engün huesa triparpuai” (Proverbios 13:20). Feimu feipifinge tami pu hueni tami müte putuhuenoal. Catrütuelmu quiñeque tami pu hueni, huelu raquiduamquilnge. Biblia deu feipilei tañi huesa dunguyengeal feiti pu elcünufilu putun dungu ca caquelu huesaque huimtun (1 Pedro 4:3, 4). Femngechi dungu rupalmi, doi cümeafui elcünuafiel tami pu huesaque hueni.

5. Ngüneduamnienge tami tunte putual. Biblia feipi: “Inaquefilmün fantepu meu mülechi mapu tuhun huimtun. Tamün femafel, hue raquiduam ta nietumün femngechi ta nietuaimün cangelu mongen ca femngechi quimaimün Ngünechen tañi ayüqueelchi dungu, fei tüfa lle tati cümelu, tati tutelu, ca tati norngelu com dungu meu” (Romanos 12:2). ¿Ayüqueimi ayühuelafiel ta Dios? Inaquefilnge tami pu hueni feyentuquenofilu ta Jehová, doi mai feyentufinge Biblia tañi ngülam. Huelu, ¿chumngechi quimafuimi tami tunte putual?

Quimfalquei tati, ngüneucülenge huyünoal tami lonco. Feimu petu tami ngollinon, fentecünuafimi. Eimi quimnieimi tunten pulcu mu tami ngolliquen, feimu rüf piuque mu ngüneduamuunge ca ngüneucülenge tami doi amuconcülenoal tati putun mu.

6. Lloulayafiñ tati piaimi. Inayafimi Jesús ñi feipin: “‘Mai’ pilmün, femngechi felepe. ‘Felelai’ pilmün, felequilpe” (Mateo 5:37). Feipingelmi tami doi putual, “¡fentecünuan anai!” piafimi. Huelu yamfalngepe tami lloudungun, femngechi inayafimi Biblia ñi feipin: “Tamün nütramyequeelchi dungu ñi ayüfal nütramngeal ca ñi falin cümeque dungual, ca mülei tamün quimal chumngechi tamün cüme lloudunguafiel tati pu che ramtuelmünmeu chem dungu rume” (Colosenses 4:6).

7. Quelluafen piaimi. Quelluen piafimi tami pu hueni poyequefilu ta Jehová, fei engün cüme quelluaimu tami müte putuhuenoal. Biblia feipi: “Epu che doi cümelcalei tati quisulelu mu, tüfa engu am llouqueingu cümelcan fente ñi cüdahun mu. Fei quiñe tranle, quelluaeyu ñi compañ tañi huitrapüramaeteu” (Eclesiastés 4:9, 10; Santiago 5:14, 16). Ca femngechi quiñe instituto quelluquefilu pu ngollife Estados Unidos mu, feipi: “Illutufilmi ti pulcu tami ngollilaeteu, quelluen piafimi tami pu che ca tami pu hueni”.

8. Nehuencünuunge tami fente putual. Biblia feipi: “Ngelai tañi re allcütungeal müten tati hue quimelün dungu. Mülei ñi cüdauyengeal, fei femnolmün, eimün müten quisutu ngünencaucüleimün. Huelu tati lelihulfilu reque tati norngechi cüme ley dungu taiñ cüpaleleteu ta montuluhun, fei tañi ngüyüquenon tañi allcüel, ca tati nehuentulelu ñi mupitual ñi huercünieel ti cüme dungu, rume nieai ayühun ñi femqueelchi dungu meu” (Santiago 1:22, 25).

¿Chem quelluafeimu tami putuhuenoal?

Com pu putuquelu, ngollife pingequelai. Huelu rume putuyüm che, huimtuquei, fei cüdaututuquei tañi elcünutuafiel. Quiñe putufengechi che quiñe antü puturumehuenole, cutranafui, feimu duamtuai quiñe medico. Alberto feipi: “Feichi petu elcünutufilu pulcu, rume cutrani tañi cuerpo, yafüngehuelan. Femngechi ngüneduamuhun re chillcatual Biblia quellulayaeneu, ca mülefui ñi quintual quellun medico mu”.

Fentrenque che ngollifengelu ca femngechi duamtuquei medico tañi quellungeal.b Quiñeque che feichi elcünutufilu ti putun, rume cutrani engün, feimu duami ñi pitaltucungeal. Caquelu fentecünual ti putun, duamtui lahuen. Jesús feipi: “Tati pu che cülfüncülelu ca tremolcülelu fei engün duamyelai ta lahuentuchefe, huelu tati pu cutrancülelu mai” (Marcos 2:17).

Allcütufilmi Jehová, rumel hueutripaleaimi

Dios duamniei taiñ ayüucüleal feula ca cüpalechi antü mu, feimu ngülamtuqueiñmu taiñ cüme ngüneniehual putun dungu mu. Alberto 24 tripantu deu elcünui ti putun. Rume mañumquefi Jehová ñi entutueteu putun dungu mu. Petu ñi quimnofiel Jehová, raquiduamquefui ñi turpu elcünunoafiel ti putun dungu, huelu Jehová ñi pin mu elcünutufi.

Eimi rume putuqueimi chi, huelu femcünuuquilnge, elcünuafuimi llemai. Alberto ca caquelu, eimi reque rume putuquefui, huelu feula pichin müten. Caquelu putuhuetuquelai. Feula ayühun mongen nietuingün, eimi ca femngechi ayüucületuafuimi.

Duamülmi tami pichin putual cam turpu putuhuenoal, acordange Dios piuqueyenquechi feipicünueimu: “¡Ngüneduamniefulmi iñche tañi huercün dungu! Fei tami tüngün quiñe leufü reque feleai, ca tami nor dungu tati lafquen ñi reu reque feleai” (Isaías 48:18).

[Pu quimngeal dungu]

[Huichulechi dungu/​Adentun]

“¿Rume putuquen?”

Ramtuunge:

• “¿Doi putuquen feula?”

• “¿Feula fill antü putuquen?”

• “¿Doi ayüquefiñ ti füre pulcu?”

• “¿Putuquen ñi ngoimayal ti huesaque dungu ñi rupamequen?”

• “¿Rume putuqueimi feipieneu chi quiñe hueni cam quiñe tañi pu che?”

• “Rume putulu iñche, ¿niepen mai doi huesaque dungu tañi pu che mu, tañi cüdau cam miyaulu vacaciones mu?”

• “¿Cüdautuquen rulpacünual quiñe semana ñi putunoal?”

• “Putunon mu caquelu che, ¿huesa duamelqueneu?”

• “¿Feipiquelafiñ caquelu che tañi tunte putuquen?”

Mai pilmi quiñeque tüfachi ramtun mu, ngünehuafuimi tami doi pichin putual.

[Huichulechi dungu/​Adentun]

Cümeque ngülam tami ngünenoaeteu ti pulcu

Petu tami putunon, ramtuunge:

• “¿Cümei tañi putual cam doi cümeafui ñi femnoal?”

Ngülam: Cüdautulmi tami ngünehual, doi cümeafui tami putunoal.

• “¿Tunten copa putuafun?”

Ngülam: Petu tami putunon, raquiduamnge tunte tami putual.

• “¿Tunten mu cümeafui ñi putual?”

Quiñeque ngülam: Putuquilnge petu tami manejanon cam petu tami femnon cuñihun-ngechi cüdau. Cafei putuquilnge petu tami femnon religioso dungu. Ca femngechi putuquilnge niepüñeñcülelmi ca pütocolmi quiñeque huinca lahuen.

• “¿Cheu cümeafui tañi putual?”

Quiñeque ngülam: Ellcalen putuquilnge. Cafei amuquilnge cheu ñi ngollicauquen pu che. Ca femngechi putuquilnge mülele quiñeque che ünuquefilu ti pulcu.

• “¿Chem che engu putuan?”

Quiñeque ngülam: Putuquilnge quiñentrür tati pu che rume putuquelu, doi mai dulliaimi cümeque hueni ca tami pu che quim ngüneuquelu ti pulcu mu.

[Huichulechi dungu/​Adentun]

Biblia ñi quellun mu quiñe ngollife cüme elcünutui ñi mongen

Quiñe huentru Supot pingelu putufengefui. Ellaca mu pun mu müten putuquefui. Huelu mülen antü, com antü femquefui. Putuquefui tañi ngollicahual müten. Huelu eluhui ñi estudiayal Biblia pu Dunguquelu Ineingen Jehová engün, fei quimürpui Chau Ngünechen ayüquelai ti ngollin dungu. Feimu elcünui ti pulcu, huelu pichiñma mu müten. Huiño contulu ngollin dungu mu, tañi pu che huesa duamcülehuei.

Huiño contulu rume putun dungu mu, tüfachi huentru amulei ñi piuqueyeafiel ta Jehová ca ayüquefui ñi ayühuelafiel. Cafei tañi pu cristiano hueni amulei tañi quelluaeteu. Ca yafültucufingün tañi pu che ñi quisucünunoafiel. Quiñe antü papeltui 1 Corintios 6:9, 10 mu, tati pu ngollife conlayai Ngünechen ñi Reino mu. Fei ngüneduamürpui fente ñi huesa femmequen, femngechi quimürpui com ñi nehuen mu ñi elcünual ti pulcu.

Feulaque ta eluhui ñi putuhuenoal. Jehová ñi nehuen, tati Biblia, tañi pu che ca tati trahunche rume quellueyu, femngechi elcünutufi ti pulcu. Rupalu chi antü, fautizahui, femngechi tañi pu che ayüucületui. Feula Supot pingechi huentru ayühuelquefi ta Jehová ca quelluquefi caquelu che ñi hueniyeafiel.