¿Chumngelu hultucuaimi tami mongen Jehová meu?
“Trafia pun peufaluhueneu quiñe huerquen püllü, iñche tañi [...] Ngünechen ca ñi poyequeel fei ñi huercüel” (HECH. 27:23).
1. 1) Pu fautizahualu, ¿chem ramtun mülei ñi huiñoldungual? 2) ¿Chem ramtun ngüneduamaiñ tüfachi chillcatun mu?
EPE puucülele ñi fautizahual quiñe che, mülei ñi huiñoldungual epu ramtun. Quiñe ta tüfa feipi: “¿Huiñoraquiduamtuimi mai tami culpan mu, ca hultucuimi tami mongen ta Jehová mu, ca feyentunieimi mai Jesucristo ñi lan meu?”. Tüfachi chillcatun mu, ngüneduamaiñ cüla ramtun: ¿chumngelu pu cristiano mülei ñi hultucual ñi mongen Jehová mu? Femülmi, ¿chem cümelcan llohuaimi? ¿Chumngelu duamfali hultucual taiñ mongen Jehová mu taiñ ayühuelafiel? Taiñ lloudunguafiel tüfachi ramtun, hunelu mu mülei taiñ quimal chem am chi hultucual taiñ mongen.
2. ¿Chumngechi hultucuiñ taiñ mongen Jehová mu?
2 ¿Chem am hultucual taiñ mongen? Taiñ huiñoldungual, allcütuafiyiñ Pablo tañi feipin. Petu cuñihun-ngelu ñi mongen amulelu farcu meu, Pablo feipi Jehová ñi ngen-ngen iñche tañi mongen meu (papeltunge Hechos 27:22-24). Tati pu che poyequenofilu ta Jehová ngünenieyu tati Huecüfü (1 Juan 5:19). Huelu iñchiñ Jehová mai ta ngünenieiñmu, ngen-ngei iñchiñ mu. ¿Chumngelu feipiafuiñ? Quiñe llellipun mu iñchiñ hultucuiñ taiñ mongen Jehová mu, femngechi quisu ngen-ngerpui iñchiñ mu, fei hula fautizahuiyiñ.
3. 1) ¿Chem pengeli Jesús tañi fautizahun? 2) Iñchiñ cai, ¿chumngechi inayentuquefiyiñ ta Jesús?
3 Jesús feichi fautizaulu pengeli ñi eluucülen cüdahuelafiel ta Jehová. Jesús Israel tuhun-ngefulu am, tañi choyüngen mu müten coneltulefui Jehová tañi troquiñche mu. Feimu duamfalngelafui tañi fautizahual, huelu ¿chumngelu femi? Jesús feipi: “Iñche ayülen tañi femal, eimi Ngünechen, tami ayüqueelchi dungu” (Heb. 10:7; Luc. 3:21). Feimu tañi fautizahun mu Jesús chalintucuhui Jehová mu tañi cüdahuelafiel. Iñchiñ ca femngechi taiñ fautizahun mu pengelqueiñ taiñ cüdahuelafiel ta Jehová com taiñ mongen mu. Huelu petu taiñ fautizaunon, quiñe llellipun mu feipicünuquefiyiñ ta Jehová taiñ serfiafiel.
¿Chumngelu cümei hultucual taiñ mongen Jehová mu?
4. ¿Chem quimeltuafeiñmu David engu Jonatán ñi huenihuen-ngen?
4 Hultucual ñi mongen Dios meu, ¿pecan dungu piafuiñ? Femlai, rume falintufali. ¿Chumngelu cümei hultucual taiñ mongen Jehová mu? Taiñ lloudungual tüfa, trürümafiyiñ quiñe cümeque huenihuen. Taiñ piuqueyefiel mu taiñ pu hueni, eluucülequeiñ taiñ quelluafiel. Femngechi femi quiñe cüme huenihuen tripalelu Biblia mu, feita David engu Jonatán. Fei feipicünuhuingu tañi rumel quelluniehual (papeltunge 1 Samuel 17:57; 18:1, 3). Ca femngechi famülque mu pu huenihuen epuñpüle quelluniehui, doi hueniyehurpuquei (Prov. 17:17; 18:24).
5. Pinole ñi amutual, ¿chem femafui quiñe cüdaufe?
5 Fütra cuifi mu, ca feipicünuuquefui pu che tañi quelluniehual. Moisés tañi ley feipilei quiñe che ayüfule ñi cüdaucüleal tati ngen ruca mu, mülefui ñi feipicünuafiel rumel cüdahuelnieayu. Ti ley feipiquefui: “Quiñe che ñi cüdahuelquefiel tañi ngen fentrenquechi feipile: ‘Piuqueyefiñ tañi ngen, tañi domo ca tañi yall feimu cüpa amutulan’, fei tañi ngen mülei ñi chalintuculelafiel tati rüfngechi Ngünechen. Fei quiñe conhue ñi orcon mamüll meu fülpuafi tañi cüdahuelqueteu fei catayafi ñi pilun. Femngechi rumel meu cüdahuelnieafi” (Éx. 21:5, 6).
6, 7. 1) Eldungucünuhun mu epu che, ¿chumngechi cümelcaqueyu? 2) ¿Chumngelu cümei hultucual taiñ mongen Jehová mu?
6 Cangelu falin dungu cheu ñi feipicünuuquen epu che fei tati curehuen. Epu che re trahuluulu, huelu rüfcünu curehuen-ngenolu nielayafui cüme felen quisu engu ca tañi pu pichiqueche no rume. Huelu pu curehuen inaniefilu Biblia ñi feipin, doi cüme felequei. Rupan mu huesaque dungu hudaulayaingu, doi mai Biblia ñi ngülam quelluaeyu ñi cümelcaleal (Mat. 19:5, 6; 1 Cor. 13:7, 8; Heb. 13:4).
7 Biblia feipi cuifi mu epu che eldungucünuuquefui tunte cullingeal tañi cüdau mu (Mat. 20:1, 2, 8). Famülque mu ca femngechi femqueiñ. Petu taiñ negocianon cam cüdaunon, mülei taiñ eldungucünual, femngechi taiñ cümelcaucüleal. Chumngechi taiñ feipipeel, com dungu mu cümei taiñ eldungucünual, pu huenihuen, curehuen ca cüdau mu, femngechi taiñ quiñeucüleal ca cümelcaleal. Ca femngechi eldungucünulelfiliyiñ ta Jehová eluafiel taiñ mongen, fei doi quiñeucüleaiñ quisu mu. Feula peafiyiñ chumngechi pu cuifique Israel che hultucuingün ñi mongen Jehová mu.
Jehová rume cümelcafi pu Israel che
8. Pu Israel che hultucun mu ñi mongen Jehová mu, ¿chumlerpuingün?
8 Cuifi mu, Jehová trahulfi tati pu Israel che inafül Sinaí huincul mu, fei feipifi: “Fente cüme feyentulmün tañi dungun ca inanielmün tañi eldungun, rüfngeai llemai iñche dullihuayiñ tañi saquin pu che ngerpual com tati troquiñ mapu mu. [...] Tati pu che quiñentrür huiñoldunguingün: ‘Com ñi feipiel Jehová eluucüleiñ taiñ femal’” (Éx. 19:4-8). Tañi feipin mu tüfa, hultucui ñi mongen Jehová mu pu Israel che, femngechi Jehová ñi saquin troquiñchengerpuingün.
9. Pu Israel che, ¿chem cümeque dungu llohui hultucun mu ñi mongen Jehová mu?
9 Tati pu Israel che hultucun mu ñi mongen Jehová mu, llohuingün fentren cümelcan. Jehová quisucünulaeyu engün, doi mai cüme cuidaeyu quiñe poyen chau reque. Chau Jehová feipifi pu Israel che: “¿Ngoimacünupeafui mai quiñe domo tañi moyol püñeñ, ca cutranpiuqueyelayafui tañi püñeñ quisu ñi choyüel? Tüfachi pu domo ngoimafule rume, iñche turpu ngoimanentulayayu” (Is. 49:15). Jehová elueyu ley dungu, huercüleleyu profeta tañi yafültucuaeteu ca cümeque püllü tañi quelluaeteu. Feimu Biblia feipi Jehová “quimeldungulelquefi tañi feipin ta Jacob, ca quimeldungulelquefi ñi ngülam ca ley dungu ta Israel. Femngechi quimeldungulafi caquelu troquiñche no rume” (Sal. 147:19, 20; papeltunge Salmo 34:7, 19; 48:14). Jehová chumngechi cuidafi pu Israel che cuifi mu, ca femngechi cuidaquefi tañi pu poyequeteu fachantü.
¿Chumngelu hultucuaiñ taiñ mongen Jehová mu?
10, 11. Taiñ choyüngen mu müten, ¿chumngelu huichutripaleiñ Chau Dios mu?
10 Quiñeque che ayüle ñi serfiafiel ta Jehová ramtuhuafui: “¿Chumngelu duamfali hultucual ñi mongen Jehová mu ca fautizahual?”. Acordange, Adán tañi duam mu choyüngelu müten iñchiñ culpafe chengeiñ, feimu cüdautuqueiñ fülcontuafiel ta Jehová (Rom. 3:23; 5:12). Taiñ hueniyetuafiel ta Jehová, mülei taiñ hultuculelafiel taiñ mongen ca fautizahual. ¿Chumngelu? Peafiyiñ.
11 Taiñ pu chau am culpafe chengelu, iñchiñ ca femngechi culpanchengeiñ (1 Tim. 6:19). Adán ca Eva culpafe chengelu, com tañi cüpanche huichutripalei ta Chau Ngünechen mu (ca ngüneduamafuimi Deuteronomio 32:5). Feichi mu müten quiñe che no rume choyüngelu fülcülelai Chau Dios mu.
12. 1) Taiñ culpafe chengen mu rume, ¿chumngechi fülcontuafuiñ Jehová meu? 2) ¿Chem femafuiñ petu taiñ fautizaunon?
12 Femngechi mu rume, caque quiñeque iñchiñ feipiafuiñ Jehová taiñ llohuaeteu ñi troquiñche mu.a Huelu, ¿chumngechi fülcontutuafuiñ taiñ culpafe chengen mu? Chumngechi ñi feipin Pablo, ‘fei Ngünechen, petu taiñ caiñeyetuniefiel, perdonaeiñmeu taiñ cümelcautual quisu ca iñchiñ, quisu ñi Fotüm tañi lan meu’ (Rom. 5:10). Huelu taiñ llohuaeteu, mülei taiñ ngillatuafiel Dios nietual quiñe cüme raquiduam. ¿Chumngechi femafuiñ? Fautizahun mu müten (1 Ped. 3:21). ¿Chem mülei taiñ femal petu taiñ fautizaunon? Mülei taiñ cüme quimafiel ta Jehová ca feyentuafiel, fei taiñ huiñoraquiduamtual ca norümtual taiñ mongen (Juan 17:3; Hech. 3:19; Heb. 11:6).
13. Taiñ llohuaeteu Chau Dios, ¿chumngelu mülei taiñ eldungucünulelafiel?
13 Taiñ coneltual Dios ñi pu che mu, mülei taiñ eldungucünual, femngechi rumel serfinierpuafiel. ¿Chumngelu? Taiñ adümafiel, raquiduamaiñ quiñe pengelün dungu mu. Quiñe cüme huentru ayüniei tremümafiel quiñe cuñifall, huelu hune feipifi: “‘Rumel yamnieayu ca piuqueyenieayu’ piaen”. Pinole ñi femal ti hueche, ti cüme huentru fotüm pilayaeyu. ¿Rume cüdaungei ñi feipieteu tati cüme huentru? Femlai tati. Jehová ca femngechi femquei, llouquefi feitichi feipicünulu müten tañi serfiaeteu. Femngechi feipilei Biblia mu: “Tamün chalintucuhual quiñe lif mongen mañumtun reque, lifngelu ca tutelu Ngünechen meu” (Rom. 12:1).
Pengelqueiñ taiñ piuqueyefiel ca feyentufiel ta Jehová
14. Hultuculu taiñ mongen iñchiñ, ¿chumngechi pengelelfiyiñ taiñ piuqueyefiel ta Jehová?
14 Hultuculu taiñ mongen iñchiñ, pengelelfiyiñ taiñ poyefiel Jehová. Trürümngeafui epu che niehualu. Ñi pengelal tañi poyehun engu, pu cristiano niehualu eldungucünui ñi rumel müleal engu. Quiñe cristiano ayüle ñi curehuen-ngeal ca ñi cüme feleal engu, hune mülei tañi eldungucünual. Ca femngechi taiñ coneltual Jehová tañi troquiñche mu, mülei taiñ eldungucünual taiñ rumel serfiafiel. Iñchiñ taiñ poyefiel mu ta Jehová, ayüiñ hultuculelafiel taiñ mongen ca eluucüleiñ taiñ serfiafiel chem rupale rume (Mat. 22:37).
15. Hultuculu taiñ mongen iñchiñ, ¿chumngechi pengelqueiñ taiñ maneluhun Jehová mu?
15 Hultuculu taiñ mongen iñchiñ, ca pengelqueiñ taiñ maneluhun Jehová mu. ¿Chumngelu feipiafuiñ? Taiñ feyentufiel mu ta Jehová, rüf quimnieiñ quisu tati doi cüme hueni taiñ nieafel, feimu serfiquefiyiñ (Sal. 73:28). Hualloñmaleiñ huesaque che mu, feimu cüdautungeafui serfiafiel ta Jehová, huelu maneluucüleiñ Jehová taiñ quelluaeteu nor amuleal (Filip. 2:15; 4:13, TNM). Cafei rüf quimnieiñ Jehová taiñ perdonayaeteu huelulcauliyiñ (papeltunge Salmo 103:13, 14; Romanos 7:21-25). Ca femngechi rüf feyentuqueiñ taiñ cümelcayaeteu Jehová nor piuquengeliyiñ (Job 27:5).
Hultuculiyiñ taiñ mongen Jehová mu, rumel ayüucüleaiñ
16, 17. ¿Chumngelu ayühuelqueiñmu hultucual taiñ mongen Jehová mu?
16 Hulün mu taiñ mongen Jehová mu, ayüucüleiñ. Chumngechi feipi Jesús, doi ayühun-ngei ta hulal ta llohun meu (Hech. 20:35). Jesús mülepalu Mapu mu, alün cüdahui tañi quelluafiel caquelu, fei ayühueleyu. Quiñeque mu, cansatuquelafui ca iquelafui rume ñi quimeltulafiel pu che Jehová mu (Juan 4:34). Chem rume doi ayühuelquelafeyu tañi cüme duamelafiel tañi Chau Jehová. Feimu feipi: ‘Iñche rumel femquen quisu ñi ayüqueelchi dungu’ (Juan 8:29; Prov. 27:11).
17 Jesús quimelelfi ñi pu discipulo chumngechi ñi rüf ayüucüleal. Feipifi: ‘Inei rume ayüle iñche ñi discipulongeal, quisu quiñepülecünuupe’ (Mat. 16:24). Femün mu tüfa, doi püllecontufiyiñ Jehová. Chumngechi taiñ poyeeteu ca duamtueteu Jehová, inei no rume femlayafui. Feimu, ¿ayüucülenoafulu cai iñchiñ taiñ poyefiel mu ta Jehová?
18. ¿Chemu doi ayühuelqueiñmu serfifiel mu Jehová?
18 Famülque mu, alün che rume cüdauquei tañi ricungeal cam ñi ngülümal plata, huelu rüf ayüucülelai. Huelu tati pu hultuculu ñi mongen Jehová mu, rüf ayüucüleingün tañi serfiniefiel mu (Mat. 6:24). Ayühunquechi quelluntucuqueingün Jehová tañi cüdau meu, huelu doi ayühueleyu Jehová ñi falintuñmaqueteu ñi poyefiel (1 Cor. 3:9, TNM). Jehová huechecünutuafi tañi pu poyequeteu ca rumel duamtunieafi (Job 33:25; papeltunge Hebreos 6:10).
19. Pu hultuculu ñi mongen Jehová mu, ¿chem falin cümelcan llouqueingün?
19 Biblia niei tüfachi mangelün: “Fülconmün ta Ngünechen meu, fei quisu fülconai ta eimün meu” (Sant. 4:8; Sal. 25:14). Felei llemai, pu che hultuculu ñi mongen Jehová mu fülcontuafingün, fei taiñ doi cüme femün.
[Quimngeal dungu]
a Pu cristiano tañi fautizahun mu müten conelturpuingün Jehová tañi pu che meu, feimu tañi Chau pituquefingün. Huelu huechurpule ti huaranca tripantu Jesús ñi ngüneletun, fei hula mai Jehová ñi yall pingetuaingün pu caquelu ufisa (Juan 10:16; Is. 64:8; Mat. 6:9; Apoc. 20:5).
¿Chem huiñoldunguafuimi?
• ¿Chumngechi hultucuiñ taiñ mongen Jehová mu?
• Hultucun mu taiñ mongen, ¿chumngechi cümelcaqueiñmu?
• Pu cristiano, ¿chumngelu cümei hultucual ñi mongen Jehová mu?
[Adentun]
Eluuliyiñ taiñ serfinieafiel Jehová, rumel ayüucüleaiñ.