¿Mülepei mai ñi cullial impuesto?

INEI NO RUME ayüquelai ñi cullial impuesto. Fentren che feipiquei ñi huesa pünengequefiel ti plata. Caquelu che feipiquei: “Tüfachi plata mu huesaque dungu femngequei”, feimu culliquelaingün. Tüfa ñi femquen quiñeque che Oriente Medio mapu mu mülelu. Feipiqueingün: “Cullilayaiñ impuesto tañi ngillangeal bala, tüfa langümquefi taiñ pu yall ca pu püñeñ”.

Tañi feipin engün hueque dungu no tati. Cuifi quiñe huentru loncolefulu hindú religion mu, Mohandas Gandhi pingelu, feipi: “Tati fillque troquiñche adcünuquei ti soltau, feimu com pu che quelluntucuquefilu engün ca culpaconqueingün. Com pu huentru, huechequeche ca fütaqueche cullilu tañi impuesto inaye culpaconqueingün”. Femngechi feipi feichi huentru em.

Ca femngechi quiñe quim huentru mülefulu 1800 tripantu peno, Henry David Thoreau pingelu feipi: “Cümelai cullial impuesto, tüfachi plata mu cullingequei ta hueichan”. Fei feipi: “¿Quiñe che quiñepülecünupeafui mai tañi raquiduam ñi doyümafiel chem pin ti autoridad? Feimu, ¿chumngelu am quisuque pu che niei tañi raquiduam?”.

Tati pu cristiano ayüquei ñi quimal tüfa. Tati Biblia quimeltueiñmu taiñ nieal cüme raquiduam (2 Timoteo 1:3). Tati Biblia quimeltueiñmu pu gobierno mülei ñi cofrayal impuesto. Biblia ta feipilei: “Com iñchiñ mülei taiñ feyentuafiel pu autoridad taiñ ngünenieteu. Com tati pu autoridad Chau Ngünechen ñi duam mu mülei. Quisuque engün mülei cheu ñi elcünueteu Chau Dios. Feimu mülei tamün feyentuafiel pu autoridad. Tamün castigangenoal müten no, doi mai tamün cüme raquiduam nieal. Tati pu gobernante rumel fürenechequeingün. Femngechi cüdahuelquefingün ta Chau Ngünechen, feimu eimün ta culliqueimün impuesto. Itrocom che eluafimün chem ñi llohual: tati feipilelu ñi elungeal impuesto, eluafimün impuesto” (Romanos 13:1, 5-7; Traducción del Nuevo Mundo, [TNM]).

Feimu lle tati pu cristiano hunen siglo meu eluucülefuingün ñi cullial impuesto, quimniefulu engün rume ti plata ñi conal ti hueichan mu. Famülque mu taiñ cristianongen ca femqueiñ.a Feimu llemai ramtuhuafuiñ: “¿Chumngelu cai culliqueiñ impuesto pünengelu cai ñi femal huesaque dungu? Tati autoridad feipilei taiñ cullial impuesto, ¿famentupeafuiñ mai taiñ cüme raquiduam?”.

Tati impuesto ca taiñ cüme raquiduam

Tati plata ñi elufiel pu hunenque cristiano pünengequefui hueichan mu, feimu lle Gandhi ca Thoreau pilaingu ñi cullial impuesto.

Ngüneduamnge pu cristiano feyentuingün ñi feipilen Romanos capitulo 13, re tañi tuteafiel ti autoridad müten no, doi mai tañi cuñiutucual tañi cüme raquiduam (Romanos 13:5). Felei, ¿chumngelu ti cristiano culliquei impuesto? Tañi nieel cüme raquiduam, huesa pünengefule rume chi plata. Taiñ doi quimal tüfachi dungu ngüneduamaiñ ñi chumquen taiñ cüme raquiduam. Tüfa pengelqueiñmeu chem ñi cümen ca chem ñi cümenon.

Com pu che niei quisuque ñi raquiduam, chumngechi feipi Thoreau. Huelu tüfa quiñeque mu manelfalngelai. Taiñ tuteafiel ta Chau Jehová, taiñ raquiduam mülei ñi inayal Biblia ñi ngülam. Quiñeque mu duamfalngei norümal taiñ raquiduam. Femngechi trürcüleal chumngechi raquiduamquei Chau Jehová. Quisu tañi raquiduam doicülei iñchiñ taiñ raquiduam mu (Salmo 19:7). Feimu lle, ¿chumngechi troquiquefiyiñ pu autoridad? ¿Jehová cai chumngechi troquiquefi? Ngüneduamaiñ.

Pablo feipi pu autoridad “cüdahuelquefingün ta Chau Ngünechen” (Romanos 13:6). ¿Chem feipilei tüfa? Pu autoridad cuñiutucuquefingün pu che tañi cüme feleal. Huesa autoridadngefule rume, eluucülei ñi müleal bombero, carabinero, educacion ca correo. Jehová quimniei pu autoridad ñi pepiluuquenon, huelu eluquefi ñi ngünenieal pichiñma mu. Chau Ngünechen elcünui ti autoridad ñi adcünuafiel com dungu. Feimu feipieiñmu taiñ cullial impuesto.

Felei llemai Chau Ngünechen eluquefi pu gobierno ñi ngünenieal, huelu pichiñmayai müten. Chau Dios catrütuafi ti gobierno ñi ngünenieel. Fei hula quisu eluhuai ñi ngünenieal. Femngechi cüme elcünutuai com huesaque dungu ñi femün mapu müleyechi gobierno (Daniel 2:44; Mateo 6:10). Petu ñi puunon feichi antü Chau Ngünechen ayüquei com pu cristiano ñi feyentuafiel pu autoridad, feimu culliqueiñ impuesto. Ca femqueiñ caquelu dungu taiñ feipieteu engün.

Eimi raquiduamafuimi chi tati impuesto pünengequei ñi cullial ta hueichan. Femngechi raquiduamülmi, ¿chumafuimi? Loncontucuaimi, Chau Ngünechen com quimniei ca tañi raquiduam doicülei iñchiñ taiñ raquiduam mu. Femngechi femliyiñ raquiduamaiñ chumngechi raquiduamquei Jehová. Chau Ngünechen adniefi Isaías ñi huirintucual: “Doi alüpüralelu am ti callfü huenu tati Mapu meu, ca femngechi iñche tañi rüpü doi alüpüralei tamün rüpü meu, ca iñche ñi raquiduam doi alüpüralei tamün raquiduam meu” (Isaías 55:8, 9).

Pu gobierno, ¿com ngüneniepei mai?

Biblia quimeltuqueiñmu taiñ cullial impuesto, huelu feipiquelai pu gobierno ñi com ngüneniefiel. Chau Ngünechen eluquelafi com autoridad pi ta Jesús. Quiñe rupa pu judio ramtufingün ta Jesús, ‘¿cümepei mai cullial impuesto pu romache?’ Jesús femngechi huiñoldungueyu: “Elufimün ti Lonco Ülmen quisu ñi coneltuel, ca elufimün ta Chau Ngünechen quisu ñi coneltuel” (Marcos 12:13-17, TNM).

Tati pu gobierno deumaqueingün ti plata ca feipiqueingün tunten ñi falin. Feimu Chau Ngünechen cümelu troquiquefi pu gobierno ñi huiñolelngetual ta plata ti impuesto mu. Jesús ca quimeltui quiñe autoridad no rume feipilayafui ñi elungeal “Chau Ngünechen ñi coneltuel”. ¿Chem am ta tüfa? Taiñ mongen ca taiñ poyequefiel ta Chau Dios. Pu gobierno ñi ley famentufile Biblia tañi ngülam, ¿chumquei pu cristiano? “Mülei taiñ femal Chau Ngünechen ñi feipin, pu huentru ñi feipin no” (Hechos 5:29, TNM).

Famülque mu quiñeque cristiano hueluraquiduamafui quimlu chumngechi pünengequei chi plata. Huelu culliqueingün ti impuesto ca chaftuquelafi ti autoridad ñi hueluraquiduamelafiel engün. Pu cristiano femngechi femnofule, pengelafuingün ñi maneluunon Jehová ñi feipin. Doi mai ñom piuque mu üngümcüleingün Chau Dios ñi com cüme elcünutual. ¿Chumngechi femai tüfa? Tañi fotüm ngünenietufile ta mapu. Feimu Jesús feipi: “Iñche ñi ngünenietuafiel mapu trürlayai mapu müleyechi gobierno reque” (Juan 18:36, TNM).

Inayal Biblia ñi ngülam cümelcaqueiñmu

Eimi hueutripayaimi cullilmi ti impuesto chumngechi feipi Biblia. Hunelu mu castigangelayaimi chumngechi ñi femngequen pu hueñefe. Ca trupefquiyaulayaimi tami femün mu (Romanos 13:3-5). Huelu mai Chau Ngünechen ñi adquiñ mu nieaimi cüme raquiduam ca püramyeafiyiñ Chau Dios taiñ inaniefiel pu gobierno ñi ley. Cafei doi pichin plata nieafuimi feiti chi culliquenolu impuesto mu cam pu hueñequefilu ti gobierno. Huelu maneluunge, Chau Ngünechen cuñiutucuafi tañi pu che. Femngechi feipi David: “Cuifi huechengequefun, fei feula füchalehuen, huelu turpu pequelafiñ ñi quisucünungen ti norngelu, ca tañi pu yall ñi mongetuyauquen cofque” (Salmo 37:25).

Af meu quimal ca feyentual Biblia ñi feipilen ñi cullial ti impuesto tüngduamelafeiñmeu. Peaiñ quiñe pengelün dungu: quiñe che arrendayafui quiñe ruca, huelu culpantucungelayai chumngechi ti ngen ruca pünequefi ti plata. Ca femngechi Jehová culpantuculayaiñmeu chumngechi pünengequei ti plata taiñ cullielchi impuesto. Peaiñ ñi rupan quiñe huentru Europa mapu mu, Stelvio pingelu. Fei petu ñi quimnon Chau Dios ñi dungu, fentren tripantu mu rume yafüluhui ñi cüme feleal pu che cheu tañi mülen. Huelu, ¿chumngelu femhuelai? Fei feipi: “Quimtucun tati pu che topaquelai ñi cüme feleal ti mapu ca ñi cüme yeucüleal com pu che. Chau Ngünechen müten ngünenietule ti mapu, com pu che quiñeucületuai quiñe familia reque”.

Eimi femülmi Chau Dios ñi ayünieel, ca femngechi maneluhuafuimi. Quisu tami nge mu peaimi chumngechi Chau Ngünechen ngünenietuai com ti mapu ca chumngechi cüme elcünutuai com huesaque dungu ñi femün pu autoridad.

[Quimngeal dungu]

[Feipin]

Chau Ngünechen tañi raquiduam doicülei iñchiñ taiñ raquiduam mu. Feimu ca femngechi raquiduamnierpuaiñ

[Feipin]

Pu cristiano cullilu ti impuesto, nieingün cüme raquiduam Chau Dios ñi adquiñ mu ca pengelqueingün ñi maneluucülen Jehová tañi quelluaeteu

[Adentun]

“Elufimün ti Lonco Ülmen quisu ñi coneltuel, ca elufimün ta Chau Ngünechen quisu ñi coneltuel”

[Cheu ñi feipin]

Copyright British Museum