¿Chau Dios niei inei tañi deumaeteu?

Quiñe chau feipifi tañi pichi huentru: “Fütra cuifi mu, Chau Dios deumacünui ti Mapu ca com ñi mülen fei mu. Cafei deumai ti antü, huangülen ca cüyen”. Fei ti pichi huentru raquiduamcülehuei ca ramtufi tañi Chau: “Chau, ¿inei deumai ta Chau Dios?”.

“Inei no rume deumalai ta Dios. Quisu rumel mülequei”, femngechi huiñoldungueyeu ti chau. Fei tati pichi huentru doi ramtuhuelai. Huelu doi tremcülerpulu, doi raquiduamcülei. “¿Chumngechi am Dios nielai inei tañi deumaeteu?” ramtuhui. “Com dungu ñi mülen niei inei tañi deumaeteu” pi. Feula inaduamaiñ chumngelu Dios nielai inei tañi deumaeteu.

¿Chem quimeli ta Biblia? Chumngechi feipi ti Chau, Biblia ca femngechi feipicai müten. Fütra cuifi mu, femngechi feipi Moisés ta Jehová meu: “Petu ñi mülenon fütraque mahuida, cam petu tami deumanofiel ti Mapu, eimi ta Chau Ngünechen, rumel mülequeimi ca rumel müleaimi” (Salmo 90:⁠1, 2). Ngüneduamfimi Isaías ca femngechi feipi: “¿Quimlaimi am? ¿Allcülaimi am? Jehová, tati Deumalu cheu ñi afpuquen ti Mapu, quisu ta Ngünechen-ngei rumel mu. Afeluuquelai ca ngañhuadquelai. Quimfal-lai fente tañi nieelchi quimün” (Isaías 40:⁠28). Juda pingechi lifru ca quimeleiñmu Chau Dios afquentu ñi mülequen (Judas 25, Traducción del Nuevo Mundo).

Tüfachi cüla texto quiñeucülei Pablo tañi feipin, quisu feipi Ngünechen “tati rumel lonco ülmencülealu, tati rumel mongelequelu” (1 Timoteo 1:⁠17). Quimfali llemai, Chau Jehová afquentu mülequei tati (Apocalipsis 1:⁠8). Ca amuleai tañi mülequen, femngechi felei taiñ Huenu Chau.

¿Chumngelu fente cüdaungei inaduamal? Iñchiñ rumel mongelequelaiñ, rume pichin taiñ mongen. Jehová mu, quiñe huaranca tripantu quiñe antü reque felei. ¿Chumngelu? Fei am rumel mongen nielu (2 Pedro 3:⁠8). Inaduamaiñ tüfa: pu chori (saltamonte) mongelequei 50 antü müten. Huelu pu che mongelei 70 cam 80 tripantu peno. Feimu pu chori adümlayafui rume tunten tripantu ñi mongelen pu che. Iñchiñ pichin tripantu mongeleiñ tati pu chori reque, fei ¿chumngechi quimafuiñ Jehová rumel mongen nielu? Cafei iñchiñ taiñ quimün, ancapuulai Jehová tañi quimün mu (Isaías 40:⁠22; 55:⁠8, 9). Feimu llemai adümlayafuiñ Jehová ñi afquentu mülequen.

Chau Dios afquentu mülequei, quisu deumacünui com ñi mülen. Feimu inei no rume deumalaeyeu ta Dios, femngechi quimeli ta Biblia (Apocalipsis 4:⁠11). Fütra cuifi mu, ngelafui chem no rume (Génesis 1:⁠1, 2). Feimu ñi huefpayal com ñi mülen, duamfalngefui ñi müleal inei tañi deumaeteu. Petu ngenolu chem no rume, Jehová mülefui. Quisu deumafi ta Jesus ca pu cümeque püllü (Job 38:⁠4, 7; Colosenses 1:⁠15). Quimfali llemai Jehová ñi afquentu mülequen, quisu müten deumacünui com.

Iñchiñ taiñ mongen ca com ñi mülen, quimfali Chau Dios taiñ deumaeteu. Jehová deumacünui com ñi mülen huenu mu, fillque planeta, antü, huangülen, ca com ngüneniei. Quimfali ñi rumel mongen nien. Quisu müten com eluniefi mongen (Job 33:⁠4).