Chem taiñ rakiduamal ti welulkan mu

Daniel ka Margaritaa müna ayüwingu tañi witranmanieetew tañi ñawe ñi pu che engün. Margarita küdawkefuy ñi dewmayal iyael, feymu petu ñi amutunon tañi witran, eluwi ñi pepikayal fideo engu salsa quesuñmalelub, tüfa rume kümentukelu am tañi epu chuchu.

Petu ñi anülen engün mesa mu, Margarita yemey tati challa ka elkünufi mesa mu. Nülafilu ti challa afmatulewey, ¡re salsa müten mülerkey! Margarita ngoymay ñi pepikayal ti doy falin dungu, ti fideo ürke.

Tunten tripantu ka adümuwün nieliyiñ rume, kom iñchiñ welulkakeiñ. Kiñeke mu weludungukeiñ, weda femkeiñ kam re ngoymakeiñ müten taiñ chumafel. ¿Chumngelu am (chemu) welulkakeiñ? ¿Chumafuiñ welulkaliyiñ? Ka ¿chumngechi famentuafuiñ? Küme rakiduam mu ngüneduamliyiñ taiñ welulkan, kimürpuaiñ ti wiñoldungun.

TAIÑ RAKIDUAMKEEL KA ÑI RAKIDUAMKEEL CHAW DIOS

Kümeke dungu femliyiñ, ayünieiñ taiñ sakiaetew pu che. Welu ngüneduamnole kakelu che, ¿entudungukepeiñ may taiñ welulkan? Duamfali ñom piwkengeal taiñ femal.

Mallmangeliyiñ, rakiduamaiñ taiñ müte welulkakenon, ka kulpatuafuiñ kake che taiñ welulkan mu. Femngechi femliyiñ, norümngelayafuy taiñ weda femün ka dallukangeafuy pu che welulkanolu. Ka wedalkanoeliyiñmu rume taiñ welulkan, müley taiñ longkontukual “kake kiñeke kisuke ta iñchiñ feley taiñ nentudunguael Ngünechen mew” (Romanu 14:12).

¿Chem rakiduamkey Chaw Dios taiñ welulkan mu? Ti lifru Salmo feypi Ngünechen “kutranpiwkeyechekey ka küme piwkengey”, ka “turpu feypimekelayaeiñmew taiñ kulpan, ka lladkülewelayay rumel mu”. Kidu kimniey taiñ kulpanchengen ka chem taiñ doy küdawtukeel, feymu “akordaniey taiñ trufür mapungen” (Salmo 103:8, 9, 14).

Chaw Dios kutranpiwkeyechekey, feymu ayüy taiñ ngüneduamal ti welulkan kidu reke (Salmo 130:3). Chaw Dios elueiñmu Biblia taiñ küme ngülamtuaetew ka kelluaetew taiñ chaftual pu che ñi welulkan ka iñchiñ taiñ welulkan.

¿CHUMAFUIÑ WELULKALIYIÑ?

Fentren rupa mu kiñeke che welulkawlu yafüluwkeyngün ñi kulpatuafiel kakelu che ka rakiduamelafiel ñi kulpalenon, ¡müna weda! Fey eymi weda dungufilmi kiñe che doy kümeafuy tami feypial: “Füreneen wiñoduamtuen”, tami kümelkawtual feychi che eymu. Wedalkafilmi kiñe che kam femülmi kiñe dungu tami wedalkakeetew, ngelay tami kidu lladkütuwal ka kulpatuafiel kake che, doy may norümafimi ti welulkan. Doyelkünuaymi ti dungu feypilmi: “Weda femlan rume”. Doy kümeafuy tami nentual kümeke dungu tami rupan mu, küme elkünutual ka ngoymanentual tüfa.

Kakelu che welulkawle, lladküfemafuiñ tati. Welu doy kümeafuy inayal Jesus ñi ngülam: “Ka femngechi ta femaymün ta eymün ta kakelu pu che mew chumngechi ta ayükeymün tamün küme trokituaetew kakelu pu che” (Matew 7:12). Welulkawliyiñ, pichingefule rume, ayükeiñ pu che taiñ kutranpiwkeyeaetew ka ngoymanentuñmayaetew taiñ welulkan. Feymu lle, ¿kümepelayafuy may taiñ ka femngechi femal? (Efesio 4:32.)

KÜMEKE NGÜLAM TAIÑ DOY PICHI WELULKAYAL

Kiñe lifru feypi taiñ welulkaken küme rakiduamnoliyiñ, müte kimnoliyiñ ka ngüneduamnoliyiñ kiñe dungu. Rüfkünu may, kiñeke mu kom iñchiñ femafuiñ tüfachi dungu. Welu inanieliyiñ kiñeke ngülam mülelu Biblia mu, doy pichi welulkayaiñ.

Proverbios 18:13 niey kiñe küme ngülam: “Kiñe che llowdungulu petu ñi allkütunon kiñe dungu, tüfa re wedwedka dungungey ka yewen-ngey”. Rüfkünu may, eluwliyiñ taiñ küme allkütual ti dungu ka rakiduamal chumngechi wiñoldungual, weda entufemlayaiñ taiñ feypin. Kafey ngüneduamal chem ñi rupameken kelluaeiñmu taiñ welulkanoal.

Biblia ka ngülamtukey: “Tunten tamün pepilel, yafüluwmün tamün kümelkawküleael itrokom che eymün” (Romanu 12:18). Yafüluwaymi tami küme yewal kakelu che engün. Küdawülmi kakelu che mu yamchekeaymi ka duamtuchekeaymi. Kafey sakiafimi ka yafültukuafimi engün. Femngechi femülmi, müte küdawngelayafuy tami wiñoduamatucheal ka rulpakünual kakelu che tami weda femetew. Kiñe fütra weda dungu kütu küme elkünungetuafuy piwkeyen mu.

Nentuaymi kümeke dungu tami welulkan mu. Rakiduamelkefilnge ta che tami kulpalenon, doy may welulkalmi, eluwnge tami doy küme chengerpual. Duamnieafuymi tami doy ñochi duampiwkengeal, doy fürenecheal, doy ngüneniewal, doy ñom duamngeal, tüngchengeal kam doy piwkeyechefengeal (Galata 5:22, 23, Traducción del Nuevo Mundo [TNM]). Ka kimaymi chem tami femwenoal. Fütra illkutuwkilnge tami welulkan mu, doy may norümfinge tami femün. Yafkawküleliyiñ kiñe che engu, kümeafuy taiñ ayekawal ñi rupan, femngechi tutewkületuaiñ.

KÜMELKAYAEIÑMEW KÜME RAKIDUAM NIEAL

Küme rakiduam mu ngüneduamliyiñ taiñ welulkan, kimaiñ chem taiñ chumal welulkaliyiñ. Femngechi küme duamküleaiñ ka tutewküleaiñ kakelu che iñchiñ. Kümeke dungu nentuliyiñ taiñ welulkan mu, doy kimchengeaiñ ka doy küme chengeaiñ. Ka femngechi weda duamkülelayaiñ ka kidutu kulpatuwlayaiñ. Kimal kakelu che ñi ka chaftukeel tañi welulkan, kelluaeiñmu taiñ doy küme yewal feychi pu che iñchiñ. Doyelchi may, inayentuafiyiñ Chaw Dios ñi piwkeyechen ka ñi eluwkülen tañi wiñoduamatucheal (Kolosense 3:13).

Margarita ñi welulkan nütramkangelu nga, ¿katrütufi ñi küme rupaleal engün? Femlay tati. Margarita rume ayekawi tañi pu che engün, ka kümentufingün ti iyael fideo ngenofulu rume. Rupalu chi tripantu, tañi pu chuchu nütramkalelfingün ñi pu yall ti rupan dungu, ka feypifingün fente ñi küme rupakeel ñi pu füchakeche engün. Feymu lle, Margarita pichi welulkay müten.