¿Chem profecia femtripai?

Ngüneduampeiñ quiñe cuifi nütram, ti pelontuchequelu Delfos tuulu hueluraquiduamelfi ta Creso tañi hueichameafiel ti lonco ülmen Persia tuulu, huelu hueungei. Biblia ca niei quiñe afmatufalchi profecia tüfachi lonco ülmen mu, huelu tüfa rume cüme femtripai.

Ti cuifi profeta Isaías pingelu, feipicünui Ciro tañi nüafiel ti fütra huaria Babilonia ca chumngechi tañi femal. Tüfa feipicünungei 200 tripantu petu ñi rupanon, Ciro petu choyüngelafui rume.

Isaías 44:24, 27, 28: “Tüfa ñi feipiel ta Jehová, [...] feiti feipiquefilu tati alü concülechi co: ‘Fürfür pürange ca arcümüñmayayu com tami leufü’; Feiti feipiñmafilu ta Ciro: ‘Iñche tañi camañfe, ca quisu femürpuai itrocom tañi ayüqueel’; Feiti feipiñmafilu ta Jerusalén: ‘Huiño deumangetuai’, ca tati ngillatuhue ruca mu: ‘Huiño anümcünungeai tami ruca’”.

Heródoto, quiñe cuifi historiador, feipi Ciro ñi pu hueichafe cañpüle cünutufi ñi hutrual chi leufü rupaquefulu rangiñ Babilonia huaria mu. Femngechi trecalen rumeingün ti leufü ñi conpual tati huaria meu. Deu ñi nüfiel ti huaria, Ciro montulfi pu judio presulequefulu Babilonia meu, ca elufi tañi huiñotual Jerusalén mu ca huiño deumatual ti huaria apümcangelu 70 tripantu cuifi mu.

Isaías 45:1: “Tüfa ta Jehová ñi feipifiel tañi dullielchi che, Ciro, man cuhu mu nüfiñ tañi ngünenieal troquiñque mapu quisu ñi adquiñ meu, ñi müntuñmayafiel pu lonco ülmen tañi hueichayam, ñi nülayal tañi puñma mu tati epu rupachi hulngiñ, femngechi racümcülelayai tati hulngiñ”.

Ti huaria niequefui epu rupachi hulngiñ, huelu ngoiman mu nülacünungerquei, femngechi conpuingün pu hueichafe. Pu Babilonia che quimfule ñi cüpayal Ciro, racümcünurqueafui ti fütraque hulngiñ leufü püle mülelu. Huelu femnolu am engün, nüngei ti huaria.

Afmatufali tüfachi profecia, huelu Biblia ca niei fentren dungu müna cüme femtripalu.a Fentren rupa, tañi pelontuel pu che quisu tañi dios mu cüpalu troquiquefingün, huelu tüfa re coilaque dios ürque. Biblia ñi feipicünuel müten rüf cüpaquei Chau Dios mu, quisu feipi: “Ellaca mu feipicünun chem ñi rupayal, ca fütra cuifi chi dungu ñi femngequenon” (Isaías 46:10).

Chau Ngünechen müten feipicünuafui chem ñi rupayal, quisu Jehová pingei. Tüfachi üi cüpa feipipelai “Huechunentuniequei com tañi ayünieel”. Ca pengeli tañi adümuucülen ta quimal ca adcünual chem dungu ñi rupayal, femngechi ñi femngeal quisu tañi ayüqueel. Feimu llemai, rüf maneluhuafuiñ taiñ Fütra Chau mu ñi huechunenturpual com ñi feipicünuel.

FAMÜLQUE MU, ¿CHEM PROFECIA FEMTRIPAMEQUEI?

¿Chem feipicünui Biblia ñi rupayal famülque mu? Epe 2.000 tripantu cuifi mu, Biblia feipicünui: “Epe puucülele ñi afal mapu müleyechi dungu, müleai cüdaungechi dungu ca cuñihun-ngeai ta mongen”. Feimu, ¿afpeai mai pu che ca ti mapu? ¡Femlayai tati! Doi mai afai fillque huesaque dungu afquentu cutrancaniequefilu pu che. Ngüneduamaiñ quiñeque profecia pengelquelu ñi epe puucülen “ñi afal mapu müleyechi dungu”.

2 Timoteo 3:1-5: “Epe puucülele ñi afal mapu müleyechi dungu [...] tati pu che quisutu piuqueyehuai, rume diñmatuafi ti plata, checahun-ngeai engün, doi falin che troquihuaingün, caiñetudunguafingün ta Chau Dios ca tati pu che, allcütulayafingün tañi fütaqueche, quim mañumlayai, quisucünuafi engün tañi chafche. Piuqueyelayafi engün quisu tañi pu che, pilayai ñi cümelcautual caquelu che engün, dallucafengeaingün, quim ngünenieulayai engün, rume illcufengeaingün, piuqueyelayafi ti cümeque dungu engün. Huesalcayafi quisu tañi pu hueni engün, inayai quisu tañi pin engün, rume mallmangeaingün, doyümnieafingün tañi cüme rupaleal müten, huelu doyümlayafingün ta Chau Ngünechen. Serfiniefilu reque ta Chau Dios femfaluhuaingün, huelu quimfalngelayai tañi mongen meu”.

¿Ca femngechi troquiquefimi pu che famülque mu? Pu che quisutu duamuuquei, rume diñmatuquei ta plata ca mallma piuquengeingün, ¿felei no am? Pu che ayüquei tañi re tutengeal müten ca duamcülelai ñi cüme yehual caquelu che engu, ¿ca femngentuqueimi? ¿Raquiduamqueimi am pu yall ca püñeñ ñi allcütuquenofiel tañi pu fütaqueche? Ca ngüneduampelaimi chi, pu che duamniei tañi cüme rupaleal müten fei famentuquei Chau Dios ñi dungu. Fei ca müten no, com tüfachi huesaque dungu fill antü doyelcülerpuquei.

Mateo 24:6, 7: “Allcütuaimün ñi mülen hueichan fill püle. [...] Quiñe troquiñche hueichayafi cangelu troquiñche, ca quiñe gobierno hueichayafi cangelu gobierno”.

Ñi mülen fillque hueichan 1914 tripantu ta fantepu mu, lai doi 100 millon che pingequei. Raquiduamnge fente ñi hueñancün, ngüman ca cutrancahun com pu layeluulu. Femfule rume, pu gobierno concülequei hueichan mu.

Mateo 24:7: “Fill püle müleai ta filla”.

Ti Programa Mundial de Alimentos feipi: “Taiñ mapu hulquei ti iyael ñi duamnieel itrocom che, huelu ailla che meu, quiñe ngüñülen cuduquei, tüfa ta 815 millon che. Doyelchi mai, cüla che meu, quiñe entrilequei”. Ca fill tripantu fentren pichiqueche laquei entrin mu, tüfa ta cüla millon püle.

Lucas 21:11: “Müleai fütraque nüyün”.

Fill tripantu, 50.000 nüyün mülequei. Pataca rupa püle ti nüyün apümcaquefi fillque ruca, ca epe fill tripantu ti mapu quiñe rehuall fütra nüyüquei. Feichi 1975 puulu 2000 tripantu lai 471.000 che nüyün mu.

Mateo 24:14: “Tati cümeque dungu Chau Dios ñi ngünenietual ta mapu amuldungungeai huall mapu püle, femngechi com troquiñche ñi quimal engün. Fei hula afai mapu meu müleyechi dungu”.

Pu doi pura millon che coneltulelu pu Dunguquelu Ineingen Jehová mu, quimeltuchequei Chau Ngünechen ñi cümeque dungu 240 troquiñ mapu meu. Amuldunguqueingün cheu rume ñi mülen pu che, huaria mu, lelfün mu, fütra camapu ca tuntepu ñi mülen ta mapu. Fei Chau Dios, deulu troquifile tüfachi cüdau, Biblia feipi “afai mapu meu müleyechi dungu”. ¿Chem pilei tüfa? Ñi afal pu che ñi gobierno ca ngünenietual Chau Ngünechen. Ngünenietule Chau Dios, ¿chem profecia femtripayai? Tami quimürpual, amulepe tami papeltumequen.