Quiñeque tami pu che lale

Tüfa ñi feipiel Vanessa, Australia mapu mu mülelu: “Tañi huentru lamngen larumei, fei rume lladcün. Mufüque cüyen rupalu rume, müna huesa duamcülequefun, tañi lan chüngartucupiuqueeneu reque. Quiñeque mu illcuquen, fei ‘¿chumngelu am (chemu) lai tañi lamngen?’ piquefun. Ca culpantucuuquefun, fei ‘müna huesa ñi doi rupanon tañi lamngen iñchiu’ piquefun”.

EIMI CAI, ¿hueñancüleimi chi ñi lan mu quiñe tami piuqueyenieelchi che? Femngechi rupalmi, quiñeque mu rume lladcüpelaimi cam quisulelu troquiupelaimi. Ca illcupelaimi, culpantucuupelaimi ca llicapelaimi. Fei fente tami huesa duamcülen, ngünam mongelen pipelaimi cütu.

Huelu alüñmale rume tami hueñancütufiel tami la, ¡huesa duamcülequilnge! Fente piuqueyeniefimi, feimu fente hueñancütufimi. Huelu, ¿chem quelluafeimu tami doi cüme duamcüleal?

¿CHUMAFUIMI TAMI DOI CÜME DUAMCÜLEAL?

Afnoalu tami hueñancün troquihuafuimi, huelu allcütufilmi tüfachi ngülam, doi cüme duamcüleaimi llemai.

ENTUNGE TAMI HUEÑANCÜN

Caquerumei pu che ñi chum duamcülen. Cafei quiñeque che rume hueñancülequei pichiñma mu, caquelu che alüñma mu. Huelu, ¿chem quelluafeyu com pu che ñi doi cüme duamcüleal? Ngümayal quelluafeyu llemai. Tüfa ñi feipiel Vanessa: “Ngümangümaquefun. Femngechi doi cüme duamcülefun”. Ca ngüneduamnge Sofía ñi rupan. Quisu tañi lamngen larumei, feimu feipi: “Müna cutrancahun anai. Layeluhun trürümfalngeafui quiñe che allfülelu. Entuñmangele tañi trarcülechi allfen, doi cüme duamtuafui ti che, cutrantufule rume. Huelu femngechi müten tremoleai tañi allfen. Ca femngechi rupaqueiñ lale quiñe che taiñ piuqueyeniefiel”.

ENTUNGE TAMI CHUM DUAMCÜLEN

Quiñeque mu duamafuimi tami quisuleal. Huelu tami doi cüme duamcüleal, ca duamnieimi tami quellungeal. Raquiduamnge ñi feipiel quiñe hueche huentru Jared pingelu. Lalu tañi chau, ¿chumi am? Quisu feipi: “Nütramcalelfiñ ta caquelu che tañi chum duamcülen, duamfalngenolu troquifili rume. Huelu entulu tañi nütram, doi cüme duamün”. Deu ngüneduampeiñ Janice ñi rupan, quisu ca feipi: “Nütramcalelfiel ta caquelu che tañi chum duamcülen pañushpiuqueleneu. Iñche quimüñmangelu tañi chumlen, fei quisulelu troquiuhuelan”.

ELUUNGE TAMI QUELLUNGEAL

Quiñe doctor feipi: “Pu che layeluulu ca eluulu tañi quellungeal, ñochiquechi yafüluuquei ca hueñancülehuelai”. Feimu, eluunge tami quelluaeteu tami pu che ca tami pu hueni. Tüfa engün cüpa quellueimu, feimu quelluen piafimi. Femngechi müten quimai engün chem tami duamnieel (Proverbios 17:17).

FÜLCONAIMI TAMI HUENU CHAU MU

Tüfa feipi quiñe domo Tina pingelu: “Tañi huentru contueyu cancer, fei larumei. Niehuetunolu cai tañi huentru, pepi nütramcalafiñ tañi chum duamcülen. Feimu eluhun tañi com nütramcalelafiel ta Chau Dios. Pulihuentu, quelluen fachantü piquefiñ fill antü. Quisu müna quellueneu, femngechi raquiduamlafun rume”. Quiñe domo, Tarsha pingelu, 22 tripantu niefui lalu tañi ñuque. Quisu feipi: “Papeltufiel mu Biblia, cüme raquiduameltueneu ca doi cüme duameleneu fill antü”.

¡MANELUUNGE ÑI HUIÑOMONGETUAL TAMI LA!

Tina ca feipi: “Lalu tañi huentru, nehue quellulaeneu maneluhual tañi huiñomongetual quisu, iñche ca tañi cüla huentru püñeñ müna duamniefilu cai. Huelu feula, deu rupalu meli tripantu, ¡com piuque mu maneluuquen ñi huiñomongetual tañi huentru! Müna quellueneu tüfa. Peyeniequefiñ reque feichi antü, ¡petuafiñ mai tañi huentru! Tüfa tüngduamelqueneu ca ayühuelmapiuquequeneu”.

Pürüm müten cüme duamcülelayafuimi chi. Huelu ngüneduamnge ñi feipin Vanessa: “Fente hueñancüleafuimi, huelu ñochiquechi doi cüme duamcüleaimi tati”.

Amulele rume tami hueñancütufiel tami la, Chau Dios quelluaimu tami ngünam mongelen pinoal. Quisu cutranpiuqueyenieimu, fei eluaimu cümeque hueni tami nieal ca ayüucülen mongeleal. Ca pichiñma mu, taiñ Huenu Chau huiñomongeltuafi tami pu layelu. Feichi mu pancoafimi, fütra cuifi piafimi. Chau Dios müna ayüniei ñi acual feichi antü. Feichi mu, ¡hueñancühuelayaimi tati!

Biblia ñi ngülam quelluafeimu llemai

Hueñancülelmi, Chau Dios duamtunieaimu

Quiñe huentru feipifi ta Chau Dios: “Tami trülque metahue mu ngülümüñmaen tañi cülleñu. ¿Huiriconcülepelai eimi tami lifru mu?” (Salmo 56:8).

Llellipun mu entunge com tami chum duamcülen

“Nütramcalelfiñ [ta Chau Dios] com tañi hueñancülnieteu [...]. Ahuem Jehová,a llellipun mu quelluen pieyu” (Salmo 142:2, 5).

Mülei maneluhun

“Maneluucülen ta Ngünechen meu tati pu layelu tañi huiñomongetual engün” (Hechos 24:15).

Chau Ngünechen feipicünui tañi huiñomongeltuafiel fentren che lalu.b Quisu müna ayüniei tañi femal tüfa (Job 14:14, 15).

a Biblia feipi Chau Ngünechen niei quiñe üi, Jehová pingei.

b Tami doi quimal tüfachi maneluhun mu, ngüneduamnge quimeltun 30 ti lifru ¡Rumel ayüucüleaimi! ñi entuel pu Dunguquelu Ineingen Jehová, ca mülei www.jw.org mu.