Jewba falintukefi “felepe may” taiñ piel

PU ISRAELCHE “¡FELEPE MAY!” MÜLEFUY ÑI FEYPIAL

Ti feypin “felepe may” kiñe ebrew dungun mu tuwi feypilelu “manelngeam” kam “manelfalngeam”. Kiñeke mu feypingekefuy “felepe may” wentru ñi ley dungu mu. Kafey eldungukünulu pu che ka feypikefuy “felepe may”, femngechi pengelkefuy ñi rüfngen tañi feypin ka ñi eluwkülen ñi femal chem rume rupale (Núm. 5:22). Femngechi eldungukünulu pu che, kimniefuy ñi rume falin-ngen femtripayal tañi feypin (Neh. 5:13).

Deuteronomio kapitulo 27 küme pengeli chumngechi feypingekefuy kuyfi “felepe may”. Pu israelche konpulu ti Feypikünuelchi Mapu mu, mülefuy ñi trawüluwal Ebal wingkul ka Guerizim wingkul mu ñi papeltulelngeal ti Ley. Ngelafuy ñi re allkütual müten, doy may mülefuy ñi feypial tañi küme llowfiel ti Ley dungu. ¿Chumngechi kay? Papeltungelu ñi chem rupayal inanienofule engün chi Ley, pu israelche mülefuy ñi feypial “¡felepe may!” (Deut. 27:15-26). Fentren wentru, domo ka pichikeche newentu dungun mu, feypingün: “Felepe may”, ¡afmatufali! (Jos. 8:30-35). Kidu engün turpu ngoymanentulay (upelay) tañi feypin feychi antü. Feley llemay, pu israelche femtripayngün ñi feypin. Biblia feypi: “Israel amuley ñi serfimekefiel ta Jewba tuntepulu Josue ñi mongen ka tuntepulu pu longkolelu ñi mongen doy amulelu ta Josue mew, tüfa engün kimfuy kom ñi femün Jewba Israel ñi duam mu” (Jos. 24:31).

Jesus “felepe may” pikefuy pengelalu ñi rüfngen tañi feypin, welu feypikelafuy kakelu che reke. Kidu feypikelafuy “felepe may” dew allkütulu kakelu che ñi feypin, doy may tañi amulkünual kiñe nütram.a Femngechi Jesus pengelelfi ñi pu allkütumekeetew ñi manelfalngen tañi feypin. Kidu rüf dungukefuy Chaw Jewba dullietew kay ñi femürpual kom tañi feypikünuel (2 Kor. 1:20; Apok. 3:14).

KOM TI TROKIÑCHE “¡FELEPE MAY!” PI KA PÜRAMYEFI TA JEWBA

Pu israelche ka feypikefuy “felepe may” ñi püramyeafiel ka ngillatuafiel ta Jewba (Neh. 8:6; Sal. 41:13). Kidu engün dew allkütulu kiñe llellipun “felepe may” pikefuy, femngechi pengelkefuy ñi llowfiel tüfachi llellipun ka kidu ñi dungun tañi trokifiel. Femün mu tüfa, kom koneltukefuy engün ka ayüwünkechi püramyekefuy ta Jewba. Femngechi dungu rupay longko ülmenkülelu ta David. Kidu küpaltufi Jerusalen mew ti falin caja nielu Jewba ñi Ley dungu. Petu fiestañmalu engün, kiñe ülkantun mu David ngillatufi ta Jewba kom piwke mu (1 Crón. 16:8-36). Allkütulu tüfa puwi tañi piwke mu, fey “¡felepe may!” pi engün ka püramyefi ta Jewba. Feley llemay, müna ayüwkülefuyngün ñi kiñentrür serfiniefiel ta Jewba

Pu wünenke kristiano ka feypikefuy “felepe may” ñi püramyeafiel ta Jewba. Pu wirintukulu Biblia tañi karta mu ka wirintukuy tüfachi feypin (Rom. 1:25; 16:27; 1 Ped. 4:11). Kafey ti lifru Apokalipsi feypi pu kümeke püllü ñi püramyefiel ta Jewba wenu mu, fey feypingün: “¡Felepe may! ¡Püramyengepe ta Ñidol!” (Apok. 19:1, 4). Pu wünenke kristiano ka feypikefuy “felepe may” dew ngillatukünungelu trawün mu (1 Kor. 14:16). Welu küme rakiduamkefuyngün ñi feypial tüfa.

¿CHUMNGELU FENTE FALIN-NGEY TAIÑ FEYPIAL “FELEPE MAY”?

Dew ngüneduamlu iñchiñ chumngechi feypingekefuy kuyfi “felepe may”, kimürpuiñ chumngelu fente kümey taiñ femngechi feypial ñi fentepual ti llellipun. Dew ngillatulu “felepe may” feypilu iñchiñ, pengelkeiñ rüf piwke mu ñi entuel taiñ feypin. Kafey “felepe may” piliyiñ dew ngillatule kakelu che, pengelkeiñ taiñ kiñewkülen ñi feypin mu, ñüküfkülen kam newentu dungun mu rume feypiliyiñ. Ngüneduamaiñ chumngelu fente falin-ngey “felepe may” taiñ feypial.

Eluwküleiñ ñi poyeafiel ta Jewba. Llellipun mu poyekefiyiñ ta Jewba, ¿chumngechi? Taiñ küme llowfiel mew müten no, kafey taiñ küme femün mu. Küpa feypikeiñ “felepe may” rüf piwke mew, fey tüfa kellukeeiñmu ñi küme rakiduamfiel ka küme allkütufiel ti llellipun.

Kiñewküleiñ pu peñi ka lamngen iñchiñ. Trawünche mu kiñentrür allkütukeiñ ñi chem pilen ti ngillatumekelu (Hecho 1:14; 12:5). Feymu trür “felepe may” piliyiñ pu peñi ka pu lamngen iñchiñ, doy kiñewküleaiñ. Ñüküfkülen kam newentu dungun mu femngechi feypiliyiñ, pengelelafiyiñ ta Jewba chem dungu mu wiñoldunguaetew taiñ ngillatuel.

Püramyekefiyiñ ta Jewba. Chaw Ngünechen ngüneduamkey kom taiñ femkeel ñi poyeafiel ta kidu, pichike dungu ngefule rume (Luka 21:2, 3). Jewba kimniey chumngelu taiñ femken tüfa ka chem ñi mülen taiñ piwke mu. Feymu pepi amunoliyiñ Trawünwe Ruka mu ka telefono mu allkütuliyiñ ti trawün, Jewba allkütuay taiñ feypin “felepe may”. Femngechi femliyiñ, kiñewaiñ pu trawülelu engün ñi püramyeafiel ta Jewba.

Chumngechi ngüneduamiyiñ, ñi feypin “felepe may” chem dungu no trokingeafuy chi, welu müna falin-ngey llemay. Ti lifru Perspicacia wirikonküley, feypial “felepe may” pengelkey ti rüf maneluwün piwke mu mülelu. Feymu lle “felepe may” piliyiñ, ayüwülafiyiñ ta Jewba (Sal. 19:14).