Amuldungual chi trawün taiñ kellukeetew
1. ¿Chumal am femngekey ti amuldungual chi trawün?
1 Kiñe rupa mu, Jesu trawüli 70 tañi pu inanieetew petu tañi werkünoafiel ñi amuldungual (Luk. 10:1-11). Jesu yafültukufi engün ñi feypin mu ‘kidulelaymün’ pi, Jewba tati ‘ngen-ngelu ti küdaw adnieaymünmew’. Kafey, eluyefi adkünu dungu, kelluafiel ñi femürpual tañi küdaw ka adkünufi ‘epunke mew’ ñi amual. Ka femngechi fachantü tati amuldungual chi trawün yafüluwkeeiñmew, pepikakeeiñmew, ka adkünukeeiñmew.
2. Puwle abril küyen mu, ¿tunteñmayay ti amuldungual chi trawün?
2 Fanten mu, tati amuldungun trawün 10 ka 15 minuto mu puwkefuy. Feychi mu adkünungekefuy ti trokiñche, elungekefuy chew amuldungual ka ngillatungekefuy. Welu konle abril küyen mu, tüfachi trawün 5 kam 7 minuto mu puway. Welu femngele tüfa dewle kangelu trawün, doy pichiñma mu puway, dew llowalu engün am Jewba ñi kimeltun. Doy alüñmanolu am tati trawün, fey pu peñi ka lamngen doy amuldunguayngün. Ti pu wünelekelu ka pu amuldungukelu küdawmekelu petu ñi kon-non ti trawün, pichiñma katrütuñmangeay tañi amuldungun.
3. ¿Chumngechi adkünungeay ti amuldungual chi trawün mu?
3 Adkünungeay ti amuldungual chi trawün ñi adümelafiel tati pu amuldungukelu. Fentren trawünche inaduamingün doy kümey ñi pu trokiñ amuldungukelu fillke püle ñi trawüal engün, feymu doy fülküleay ñi trawüal ka ñi amuldungual tati pu peñi ka lamngen. Feymu doy küdawngelayay adkünuafiel tati pu peñi ka lamngen, ka pu longkolelu ti trokiñ mu dapiyeafiel tati pu che tañi elfalngeel. Tati trokiñ longkolelu feypiay chem dungu mu doy kümelkaleay tati trawünche ka chem duam müley tati lof mu. Petu ñi fentepuwnon ti trawün kiñe pichi ngillatun mu, kom pu peñi ka lamngen kimayngün chew ñi amuldungumeal, ka iney tañi kompañaetew.
4. ¿Chumngelu (chemu) ti amuldungual ti trawün mu müna falin-ngey kakelu trawün reke?
4 Tüfa rume falin-ngey kakelu trawün reke nieyelu pu trawünche. Tüfachi trawün mu akukey pu peñi ka lamngen amuldungualu, duamngelay ñi puwal kom tati trawünche. Welu may pekan pukintufalngelay, kam doy falin-nolu kakelu trawün mu trokikelayafiyiñ. Kom kakelu trawün reke, tüfa kiñe yewün Jewba taiñ eluetew taiñ kelluaetew welukechi piwkeyewael ka taiñ femael kümeke dungu. (Ebr. 10:24, 25). Fey llemay tati pu adkünukelu ti trawün müley ñi küme pepikawküleal, feymu tati trawün püramyeafi ta Jewba ka kümelkayafi pu akunchi peñi ka lamngen. Kom pu amuldungualu, pepi amule engün, müley ñi puwal tüfachi trawün mu.
Tati trawün amuldungual pekan pukintufalngelay, kam doy falin-nolu kakelu trawün mu trokikelayafiyiñ
5. a) Adkünungealu ti amuldungual chi trawün, ¿chem küdaw niey ti longkolelu amuldungun mu? b) ¿Chumngechi pu lamngen adkünuafuy ti amuldungual ti trawün?
5 Chumngechi pepikawal adkünuafiel tüfa. Küme pepikawal tati elfalngelu kiñe küdaw mu, fütra wünen mu mülefuy ñi llowal feychi küdaw. Ka femngechi rupay tati amuldungual chi trawün mu. Fillke püle trawüluwyüm pu trokiñ amuldungukelu, tati pu longkolechi trokiñ ka tañi pu kellukeetew adkünukeayngün tati trawün. Welu kom chi trawünche kiñewkülen tripale ñi amuldungual, tati longkolelu amuldungun mu elfalkünuafi kiñe peñi ñi adkünuafiel ti trawün. Kiñeke longkolelu amuldungun mu elukünukefi kiñe adkünu dungu kom pu peñi elfalkünuelchi küdaw, ka pünakünukefi ti papel ñi chew elngekem ti wüldungu. Tati pu peñi küme adümuwle engün ñi kimeltual ka adkünual ti küdaw, küme tripayay ti trawün, feymu tati longkolelu amuldungun mu küme dulliafi tati pu peñi. Kiñeke antü mu ngenole kiñe longkolelu ka konakechi kellukelu kam kiñe fawtisalechi peñi pepikawkülelu ñi adkünuafiel ti trawün, feymu tati longkolelu amuldungun mu müley ñi elfalkünuafiel kiñe lamngen fawtisalelu ka pepikawkülelu. (Peaymi tati wichulechi dungu feypilelu: “Kiñe lamngen adkünule ti trawün”.)
6. ¿Chumngelu am (chemu) müley ñi küme pepikawal feyti adkünualu ti trawün?
6 Elungeliyiñ kiñe elfal küdaw ti Chillkatuwe ta Amuldungual Ngünechen ñi Dungu, kam chi Trawün Kellukeetew taiñ Poyeafiel ta Ngünechen, küme llowkefiyiñ may ka pepikawkeiñ. Pepikawkelaiñ epe akuchi tati trawün mu müten. Fey elfalkünugeliyiñ adkünuafiel ti amuldungual chi trawün, ka femngechi falintukeafiyiñ. Fewla doy pichiñma ngealu ti trawün, doy falin-ngey taiñ pepikawal, fey küme kimeltungeaiñ ka fente küme puway ñi tiempo. Küme pepikawün mu ka koneltuy ñi nieal chew amuldungual petu ñi kon-non ti trawün.
7. ¿Chem dungu mu nütramkayafuy tati amuldungual chi trawün?
7 Chem dungu am dunguaiñ. Fill püle kakerumey tati mongen, feymu tati ‘kim manelfal kona’ pepikakelay kiñe adkünudungu ñi inaniengeal tüfachi trawün mu (Mat. 24:45, TNM). Ti wichulechi dungu mu feypilelu “Chem dungungeay ti amuldungual chi trawün mu”, fill dungu mu kimeltuay. Kiñeke rupa mu, tüfachi trawün tati pu peñi ka lamngen mülepalu koneltuleayngün. Kafey kiñeke rupa müleay pengelün dungu, ka pengelngeay kiñe video jw.org mülelu, kelluaeiñmu amuldungun mu. Feychi elfalküdawngele ñi adkünual tati trawün, ñi pepikawün mu, müley ñi küme rakiduamal chem dungu yafültukuafi ka kelluafi tati pu peñi ka lamngen tripayalu ñi amuldungual.
Feychi elfalküdawngele ñi adkünual tati trawün, ñi pepikawün mu, müley ñi küme rakiduamal chem dungu yafültukuafi ka kelluafi tati pu peñi ka lamngen tripayalu ñi amuldungual.
8. Afchi semana mu, ¿chem doy kümeafuy pengelal ti amuldungual chi trawün mu?
8 Sabado antü mu, epe kom pu amuldungukelu yekeyngün ti chillka La Atalaya ka ¡Despertad! Fentren pu peñi ka lamngen sabado mu amuldungukelu, pepi femkelayngün tati semana mu, fey ngellu tukulpakeyngün chi ñi pepikawfielchi nütramkan ñi amuldungun mu ñi adümkakünufiel tañi Poyeafiel ta Ngünechen Reñmawen mu. Feymu kümeafuy tati peñi ñi adkünuafiel chi trawün ñi wiño rulpatual kiñeke pengelün dungu müleyelu afchi pagina Taiñ Amuldungukeel mu. Kafey pengelngeafuy tati pengelün dungu kiñeke allküngekeelchi dungu, kam mülechi kawiñ lof mew. Ka feypingeafuy chumngechi pepikawkünual chi dungu ñi wiño witrantuafiel ti che llowlu tati papil. Ka femngechi kiñeke amuldungukelu dew wülmekelu ti papil koneltulu chi küyen mu, feypingeafuy ñi feypial chumngechi wülngeal chi papil, kam ñi feypial kiñeke manelfalchi nütram dungu. Domingo antü mu ka femngechi femngeafuy feychi küyen wülmekeelchi wirin chillka. Tati amuldungual chi trawün mu ka femngechi dungu feypingeafuy chumngechi wülngeafuy kiñeke wirin chillka, kiñeke tüfa: Kümeke Dungu, Allkütumuchi, kam ti lifru Enseña, chem antü mu rume taiñ wülkeel ka taiñ pünekeel chillkatun Biblia mew.
9. Tati trawünche koneltule ti doy fütra amuldungun küdaw mu, ¿chem ngüneduamngeafuy amuldungual chi trawün mu afchi semana mu?
9 Tati trawünche koneltumekele kiñe doy fütra amuldungun küdaw mu, afchi semana mu ngüneduamngeafuy chumngechi trür wülngeal ti pu papil ka ti mangel dungu kam pichi papil engu, ka chumngeafuy kiñeke che ayüfile ti werkün dungu. Ka kiñe dungu feypingeafuy rupan dungu mu ñi pengelal tunte falin-ngey ti doy fütra amuldungun küdaw.
10, 11. Ti trawün amuldungual mu, ¿chumngelu (chemu) müna falin-ngey ti pu amuldungukelu ñi küme pepikawal?
10 Chumngechi pepikawafuy tati pu amuldungukelu. Ñi küme tripayal tati trawün, müley tañi küme pepikawal tati pu amuldungukelu müleyelu trawün mu. Küme pepikawle engün amuldungual —trawüyüm mu chi, ñi Poyeafiel ta Ngünechen Reñmawen mu— femngechi mu küme llowdunguayngün tati trawün mu. Taiñ küme pepikawküleam müley taiñ entual tati pu duamnieelchi wirin chillka petu tañi llitunon ti trawün. Femngechi mu alüñmalayaiñ pual chew taiñ amuldungual chi lof mew.
11 Müna falin-ngey taiñ pual petu tañi llitunon tati trawün, chumngechi femkeel kakelu kom taiñ nieelchi trawün. Dew llitulu mu puwliyiñ, katrütuafuiñ chi trawün, ka kakewmaleafuy tati dew pepikaelchi dungu ñi femngeel. ¿Chumngechi fel kay tüfa? Tati ngüyulnielu ti trawün ngüneduamkey fillke dungu petu tañi adkünunon tati pu amuldungualu. Kiñe pengelün dungu: pichilele engün tati trawün mu, ti ngüyulnielu yeafuy chi kom che kiñe lof mu müten petu mülewelu ñi amuldungungeal. Ka mapu tripalele ti amuldungual ti lof, kompañtukuafuy chi tati namuntuyawlu ti nielu autu mu. Mülele engün kiñe kuñiwngechi lof mu ñi amuldungual, feypingeafuy chi kiñeke peñi ñi amuldungual inafül chew ñi miawün tati pu lamngen kam trür amuldungual engün. Kiñe amuldungukelu kutrankülele, feypiafuy chi ñi amuldungual winkul nienochi rüpü, kam tati puke ruka niele pichike pürawe mu. Kam feypiafuy chi tati doy adümuwlu ñi tripayal tati we amuldungufe engu. Welu puwliyiñ dew llitun mu tati trawün, ti peñi ngüyulmekelu wiño adümkameketuay chew ka chumngechi tañi tripayal amuldunguam. Feley llemay, kiñeke mu kom rupayafuiñ chi taiñ pual dew llituchi trawün mu welu mülerumefule may kiñe üngümnienoelchi dungu. Welu wimtunieliyiñ taiñ femken, müley taiñ rakiduamal doy falintunieafiel tüfachi trawün, kam taiñ doy küme adkünuwal müten.
12. Wimtuleliyiñ kiñe kompañ müten ñi amuldungumeken, ¿chem dungu femafuiñ?
12 Tati pu amuldungukelu pepikawkülen puafuy amuldungual kiñe kompañ engu, kam üngümküleafuyngün ti ngüyulmekelu feypiaetew iney engu tañi tripayal. Welu wimtuleliyiñ kiñe kompañ engün müten tripamekeal, ¿doy amulkayafuiñ taiñ weniwal, kafey taiñ amuldungual kakelu amuldungukelu engu? (2 Kor. 6:11-13). ¿Kiñeke mu tripayafuiñ kiñe we amuldungukelu engu, fey kelluafuiñ ñi doy küme kimelchefe ngerpual? (1 Kor. 10:24; 1 Tim. 4:13, 15). Mülen mu trawün mew küme allkütuaiñ taiñ feypingeel, chew ñi llitual taiñ amuldungun. Dewle tüfa welulkakiliyiñ tati dew pepikaelchi dungu, kafey müchay müten amuaiñ chew taiñ amuldungual chi lof mew.
13. Fey kom kelluntukuliyiñ, ¿chumngechi kümelkayaeiñmew tati trawün amuldungual mu?
13 Jesus ñi pepikaelchi 70 pu inaniekeetew tañi amuldungual “rume ayüwkülen wiñomeyngün” (Luk. 10:17). Feley llemay, Jesu trawülu am kidu engün petu ñi werkünofiel, tüfa kellueyew engün ñi küme tripayawal amuldungun mew. Famülke mew taiñ trawün amuldungual ka femngechi wechu tripan-ngekey. Fey kom kelluntukuliyiñ tüfachi küdawün mu yafültukuaeiñmu, pepikawaeiñmu, kafey kelluaeiñmu adümuwal ñi wechunentungeal ti elfaldungu ñi kimelelafiel “kom trokiñke mapu mew” (Mat. 24:14).