¿Chumafuimi tami ca huiño hueniyeafiel Jehová?

FILL tripantu, fentren pu che huiñotuingün Jehová tañi troquiñche mu. Eimi ca fempelaimi. Fei Jehová, Jesús ca tati pu cümeque püllü, rume ayüucüleingün tami huiñotun Jehová tañi troquiñche mu (Luc. 15:7, 10). Huiñotulmi Jehová ñi troquiñche mu, cüdautuafuimi chi tami cüme hueniyetuafiel ta Jehová. ¿Chem cüdaungechi dungu mu rupayafuimi? ¿Chem quelluafeimu eimi? Feula peafiyiñ.

¿CHEM CÜDAUNGECHI DUNGU MU RUPAYAFUIMI?

Fentren pu peñi ca pu lamngen huiñotulu engün rume Jehová ñi troquiñche mu, petu huesa duamcüleingün. Raquiduamnge tati rey David mu. Perdonangelu rume tañi culpan mu, petu huesa duamcülequefui. David reque, eimi ca huesa duamcülepelaimi (Sal. 40:12; 65:3). Quiñe che huiñotulu Jehová mu, fentren tripantu mu yehueleafui ca petu culpalelu troquihuafui. Raquiduamnge ñi rupan ta Isabel.⁠a Fei doi 20 tripantu mu püntülequefui Jehová mu. Fei feipi: “Iñche ‘¿perdonapeafeneu mai Jehová?’ piquefun”. Raquiduamnge: eimi hueñancülelmi, hueniyehuelayafuimi ta Jehová (Prov. 24:10). Huelu elcünuquilnge tami hueniyeafiel Jehová.

Quiñeque raquiduamqueingün ñi rume cüdaungen ñi ca hueniyeafiel ta Jehová, feimu huesa duamcülequeingün. Taiñ peñi Antonio, huiñotulu Jehová ñi troquiñche mu, feipi: “Ngoimapefun com tañi quimürpuel ca tañi femqueel testigongelu iñche” feipi. Quiñeque peñi ca quiñeque lamngen ca femngechi rupaingün Antonio reque. Fei huiñotulu Jehová tañi troquiñche mu engün, müte cüdahuelquelafingün ta Jehová.

Raquiduamnge tüfa: rupalu quiñe fütra cürüftucu mahun, quiñe ruca trafocahui fei com teifüi. Feimu ti ngen ruca mülei ñi ca deumatuafiel ti ruca. Huelu raquiduamlu ñi rume cüdaungen ca ñi alüñmayal tañi deumatuafiel ti ruca, rume huesa duamcülequei. Ca femngechi culpalu eimi Jehová mu, tami hueniyefiel Jehová teifüi ti ruca reque. Feimu raquiduamafuimi chi ñi rume cüdaungen tami hueniyetuafiel ta Jehová, fei huesa duamcüleafuimi. Huelu huesa duamquilnge, eimi huiño hueniyerpuafuimi ta Jehová.

Jehová feipiqueiñmu: “‘Cüpamün mai, ca cümelcautuaiñ’ pi Jehová” (Is. 1:18). Eimi deu eluhuimi tami cümelcautual Jehová engu, feimu Jehová piuqueyenieimu. Eimi deu huiñotuimi Jehová mu, fei tami cüme femün meu Jehová pengelcünuafui tati Huecüfü ñi coilatufengen (Prov. 27:11).

Huiñotulu eimi Jehová ñi troquiñche mu, fülconpaimi Jehová mu feimu quisu ca fülcontuaimu (Sant. 4:8). Müna cümei pu peñi ca pu lamngen ñi pefiel tami huiñotun trahunche mu. Huelu fei ca müten femlayaimi. Ca mülei tami cüdahual tami doi piuqueyeafiel ta Jehová. ¿Chumngechi femürpuafuimi tüfa?

¿CHEM FEMAFUIMI?

Raquiduamnge quiñeque dungu tami femal. Eimi petu acordaniepelaimi quiñeque dungu tami quimürpun Jehová mu ca ñi feipicünuel ñi femal cüpalechi antü meu. Huelu feula mülei tami amuldungual, amual ta trahun mu ca nütramcayafiel tami pu peñi ca pu lamngen.

Fill antü llellipuafimi Jehová. Culpalu eimi am cuifi, petu huesa duamcülepelaimi. Feimu cüdautuafuimi chi tami llellipuafiel ta Jehová. Jehová quimniei tüfa (Rom. 8:26). Femngechi dungu mu rupamequelmi, elcünuquilnge tami llellipuafiel Jehová. Feipiafimi tami rume cüpa hueniyefiel (Rom. 12:12). Andrés feipi: “Rume yehuelefun ca culpatuuquefun. Huelu llellipufiel mu Jehová, doi cüme duamquetun” pi taiñ peñi. Quimnolmi chem tami feipiafiel ta Jehová ngillatun meu, ngüneduamafuimi quiñeque llellipun ñi entuel tati rey David repentiulu tañi culpan mu. Tüfa mülei tati Salmo capitulo 51 ca capitulo 65.

Rumel papeltuafimi ta Biblia. Femngechi femülmi, doi maneluhuaimi Jehová mu ca doi piuqueyenieafimi (Sal. 19:7-11). Femngechi femi Felipe, quisu feipi: “Cuifi mu müte cüme papeltuquelafun Biblia. Fei ñochiquechi hueniyehuelafiñ Jehová, fei rupalu ta antü fütra culpan. Feimu huiñotulu iñche Jehová ñi troquiñche mu, eluhun tañi cüme estudiayal ta Biblia fill antü” pi taiñ peñi. Eimi ca femngechi femafuimi. Huelu quimnolmi chem tami estudiayal, ¿chumafuimi? Quiñe peñi cam quiñe lamngen cüme hueniyefilu ta Jehová pediafuimi tami quelluaeteu.

Ca huiño hueniyeafimi pu peñi ca pu lamngen. Quiñeque che huiñotulu Jehová ñi troquiñche mu, raquiduamqueingün: “¿Illcutupeafeneu mai pu peñi ca pu lamngen?”. Femngechi duamcülefui Larissa, fei feipi: “Culpalu iñche, hueñancülfilu ti trahunche troquiuquefun. Fentren tripantu mu yehuelefun” pi taiñ lamngen. Maneluhuafuimi pu loncolelu ca pu peñi ca pu lamngen mu. Fei engün eluucüleingün tami quelluaeteu tami cüme hueniyetuafiel ta Jehová (inaduamnge ti huichulechi dungu “Eimün pu loncolelu, ¿chem femafuimün?”). Fei engün ayüucüleingün tami huiñotun Jehová mu ca ayüqueingün tami ayüucüleal (Prov. 17:17).

¿Chumafuimi tami doi fülmanieafiel ti trahunche? Faltalayaimi ta trahun mu ca amuldunguaimi pu peñi ca pu lamngen engün. Femülmi tüfa, ¿chumngechi quelluaimu? Taiñ peñi Felix feipi: “Pu peñi ca pu lamngen ayüquefuingün iñche tañi huiñotual ti trahunche mu. Fei huiñotulu iñche, cüme llohueneu engün. Tañi quellun mu engün, raquiduamürpun tañi rüf perdonaeteu ta Jehová ca tañi pepi serfinieafiel” (inaduamnge ti huichulechi dungu “Eimi, ¿chem femafuimi?”).

¡YAFÜLUUNGE!

Petu eluhulmi tami cümelcautual Jehová engu, Huecüfü fentecünulayai tami ngünencayaeteu (Luc. 4:13). Feimu trepeluucülenge. Eluunge tami doi cüme hueniyeafiel ta Jehová.

Chau Jehová feipicünui: “Quintuafiñ tati pu ufisa ñamquiyaulu, ca cüpaltuafiñ tati pu famtripalu. Tati allfülechi ufisa, iñche cüme traricünuñmayafiñ tañi allfeñ. Nehuentucuafiñ tati nehuen-ngenolu” (Ezeq. 34:16). Fentren che famtripatulu Jehová mu, Jehová quelluquefi tañi ca hueniyetuafiel. Ca femngechi eimi quelluaimu.