¿Chumngechi allcütuñma­queiñmu Jehová taiñ llellipun?

1, 2. Quiñeque mu, ¿chem ramtuhuafuiñ?

¿RAMTUUQUEIMI quiñeque mu Jehová tami allcütuñmaqueteu tami llellipun? Fentren pu peñi pu lamngen ca femngechi ramtuuqueingün ruparupangelu engün huesaque dungu mu. Cutrancahun dungu mu rupaliyiñ, cüdautuafuiñ taiñ raquiduamal chumngechi taiñ allcütuñmaqueteu Jehová taiñ llellipun.

² Tüfachi chillcatun mu, peaiñ chumngelu maneluhuafuiñ Jehová tañi allcütuquen taiñ llellipun (1 Juan 5:15). Tüfa mu ca peaiñ chumngelu raquiduamafuiñ Jehová ñi allcütuquenon taiñ llellipun ca chumngechi allcütuqueiñmu Jehová.

QUIÑEQUE MU JEHOVÁ QUELLU­LAYAFEIÑMU CHI CHUMNGECHI TAIÑ AYÜQUEFEL

3. ¿Chumngelu Jehová ayüquei taiñ llellipuafiel?

³ Biblia feipiqueiñmeu Jehová taiñ rume piuqueyequeteu ca taiñ falintuqueteu (Ageo 2:7; 1 Juan 4:10). Feimu mangelqueiñmu taiñ llellipuafiel, fei quisu taiñ quelluaeteu (1 Ped. 5:6, 7). Jehová ayüquei taiñ quelluaeteu, femngechi taiñ fülconcüleal quisu meu ca taiñ aguantayal rupaliyiñ huesaque dungu meu.

4. ¿Chumngelu quimnieiñ Jehová allcütuñmaquefi ñi llellipun tañi pu poyequeteu? (Ca inaduamnge ti adentun).

⁴ Biblia pengelquei Jehová chumngechi ñi allcütuñmafiel ñi llellipun cuifi tañi pu poyequeteu. Quiñe tüfa ti rey David. David com tañi mongen mu niequefui fentren caiñe, feimu rumel ngillatuquefui Jehová tañi quelluaeteu. Quiñe rupa feipifi: “Ahuem Jehová, allcütuñmaen tañi llellipun; llellipueyu tami quelluafiel, füreneen, allcütuen. Tami manelfalngen mu ca tami nor dungu mu huiñoldunguen” (Sal. 143:1). Jehová allcütuñmaqueyu ca montulqueyu tañi pu caiñe meu (1 Sam. 19:10, 18-20; 2 Sam. 5:17-25). Feimu David rume maneluhun mu feipiquefui: “Jehová fülmaniefi com ñi pu mütrümqueteu”. Iñchiñ ca femngechi maneluhuafuiñ taiñ quelluaeteu Jehová (Sal. 145:18).

5. Jehová, ¿allcütuñmaquepefi mai ñi llellipun tañi pu poyequeteu chumngechi ñi ayüqueel engün? Feipinge ñi rupan Pablo. (Ca inaduamnge ti adentun).

⁵ Quiñeque mu, Jehová huiñoldungulayaiñmu chumngechi taiñ ayüniefel. Ti apostol Pablo femngechi dungu mu rupai. Quiñe cutrancahun dungu niefui, ca cüla rupa llellipufi ta Jehová tañi entuñmayaeteu feichi huesa dungu. Jehová allcütuñmaeyu ñi llellipun, huelu entuñmalaeyu ñi cutrancanieteu, huelu nehuentucueyu femngechi tañi serfinieafiel Jehová (2 Cor. 12:7-10).

6. Quiñeque mu, ¿chumngelu raquiduamafuiñ Jehová ñi allcütuquenon taiñ llellipun?

⁶ Quiñeque mu, Jehová ca lloudungulayaiñmu taiñ llellipun chumngechi taiñ ayüniefel, huelu mülei taiñ maneluucüleal Jehová mu quisu quimnielu am chem taiñ duamnieel. Feimu chem taiñ llellipuel ca chem taiñ raquiduamqueel “Chau Ngünechen doi fütra dungu femafui” (Efes. 3:20). Jehová lloudungulayafeiñmu chi chumngechi taiñ ayüqueel, feimu Jehová allcütuquelai chi piafuiñ, huelu quimnieiñ taiñ allcütuaeteu.

7. Quiñeque mu, ¿chumngelu mülei taiñ cacünutual chem taiñ llellipuafiel ta Jehová? Feipinge ñi rupan peñi Martin Poetzinger.

⁷ Quiñeque mu, mülei taiñ cacünutual chem taiñ llellipuquefiel ta Jehová, ¿chumngelu am? Doi cüme quimafuiñ chem tañi ayüquefel Jehová taiñ femal. Peafiyiñ ñi rupan taiñ peñi Martin Poetzinger. Pichin rupachi antü mu ñi niehun tañi domo engu, carceltucungei tati campo de concentracion nazi mu. Hue concülepulu carcel mu, llellipufi Jehová tañi lifrecünuaeteu, femngechi ñi müleal tañi domo engu ca tañi amuldunguleal. Rupalu epu semana, taiñ peñi raquiduami Jehová tañi lifrenentunoaeteu carcel meu. Feimu llellipufi ta Jehová: “Füreneen, tami feipifiel ¿chem am ta mülei tañi femal?”. Tüfachi peñi raquiduameluhui caquelu pu peñi mülelu carcel mu. Fentren engün cutrantupiuquelefuingün tañi pu yall meu ca tañi domo mu engün. Feula ti peñi mañumfi ta Jehová tañi elueteu quiñe hue cüdau reque. “Eluen nehuen tañi yafültucuafiel tañi pu peñi”, llellipufi ta Jehová. Feimu taiñ peñi ailla tripantu ñi carceltucungen femngechi yafültucufi tañi pu peñi.

8. Llellipufiliyiñ Jehová, ¿chem acordayaiñ?

⁸ Llellipufiliyiñ Jehová, acordayaiñ quisu feipicünui ñi apümafiel huesaque dungu puuchi antü meu. Apümafi com taiñ cutrancaqueteu, apümafi fütraque nüyün, cürüftucu mahun, huesaque cutran ca ti lan dungu. Ngünenietule tüfachi mapu, com huechutripayai tañi feipicünuel (Dan. 2:44; Apoc. 21:3, 4). Huelu petu ñi puunon feichi antü, eluñmangei ti Huecüfü ñi ngünenieafiel ti mapu (Juan 12:31; Apoc. 12:9).b Apümcangele chi huesaque dungu famülque mu, raquiduamün-ngeafui Huecüfü ñi cüme ngüneniefiel ti mapu. Jehová apümcanofile rume huesaque dungu famülque mu, raquiduamlayafuiñ taiñ quellunoaeteu. Jehová rüf quelluqueiñmu llemai, ¿chumngechi am? Peafiyiñ.

LLELLIPUFILIYIÑ JEHOVÁ, ¿CHUMNGECHI QUELLUAIÑMU?

9. Raquiduamliyiñ taiñ femal, ¿chumngechi quelluafeiñmu Jehová? Feipinge ñi rupan María.

⁹ Jehová eluqueiñmu quimün. Jehová feipicünui taiñ eluaeteu quimün taiñ cüme femal, doi mai taiñ femal falinque dungu taiñ mongen mu. Quiñe tüfa taiñ nieal cam nienoal quiñe afcadi (Sant. 1:5). Peafiyiñ ñi rupan quiñe lamngen María pingelu.c Quisu fütangelai, petu ñi precursorangen quimfi quiñe peñi. Quisu feipi: “Rume hueniyehuiyu, fei ayüniehuiyu. Feimu raquiduamün tañi chumal. Fei llellipun mu, nütramcafiñ Jehová feichi dungu mu. Duamniefun Jehová tañi quelluaeteu, huelu iñche mülefui tañi dullial chem chumal” pi taiñ lamngen. Jehová allcütuñmafi ñi llellipun ta María ca elufi quimün, ¿chumngechi? Papeltulu fillque publicacion, pei tañi duamniefel, fei huiñoldungungei com tañi ramtuuqueel. Tañi ñuque testigongelu ca ngülamtueyu, tüfa quellueyu ñi cüme ngüneduamuhual, femngechi María cüme raquiduami tañi femal.

10. Jehová, ¿chumngechi quelluquefi tañi pu che? (Filipenses 4:13; ca inaduamnge ti adentun).

¹⁰ Jehová quelluqueiñmu taiñ aguantayal. Jehová chumngechi ñi quellufiel Pablo, ca femngechi eluaiñmu nehuen taiñ chaftuafiel huesaque dungu (papeltunge Filipenses 4:13). Peaiñ ñi rupan ti peñi Benjamín. África mapu mu, Benjamín tañi familia engün fentren tripantu mu mülequefuingün cheu ñi umañpuquen pu lefmaulu tañi mapu mu. Benjamín feipi: “Rumel ngillatuquefuiñ Jehová tañi quelluaeteu ñi cüme femal. Fei Jehová quellueneu llemai. Elueneu ñi tüngcüleal, elueneu tañi nehuencüleal tañi amuldungual. Ca elueneu fillque publicacion tañi fülconcüleal quisu mu. Iñche papeltuquefun ñi rupan caquelu testigo ca Jehová chumngechi ñi quellueteu engün. Fei müna quellueneu tañi nehuencüleal ca tañi serfinieafiel Jehová”.

11, 12. Jehová, ¿chumngechi pünequefi pu peñi ca pu lamngen taiñ quelluaeteu? (Ca inaduamnge ti adentun).

¹¹ Jehová pünequefi taiñ pu peñi ca pu lamngen taiñ quelluaeteu. Feichi pun petu ñi lanon ta Jesús, fütra ngillatufi ta Jehová. Jesús feipifi ñi huesa dunguyengenoal tañi lan mu, huelu Jehová huercülelfi quiñe cüme püllü tañi nehuentucuaeteu (Luc. 22:42, 43). Jehová ca femngechi quelluafeiñmu. Taiñ pu peñi ca lamngen mütrümafeiñmu cam pemeafeiñmu chi taiñ ruca mu taiñ nehuentucuaeteu. Com iñchiñ raquiduamafuiñ chumngechi ñi yafültucuafiel taiñ pu peñi ca pu lamngen (Prov. 12:25).

¹² Peafiyiñ ñi rupan quiñe lamngen Míriam pingelu. Tañi füta lai. Rupachi semana mu, taiñ lamngen rume hueñancülefui ñi piuque. Ngümaconcülefui müten, quisu duamniefui tañi nütramcayal. Quisu feipi: “Nehuen-ngehuelafun ñi mütrümafiel tañi pu peñi ca pu lamngen, feimu llellipufiñ ta Jehová. Petu ngillatulu iñche, quiñe loncolelu trahunche mu mütrümeneu” pi taiñ lamngen. Feitachi peñi ca tañi domo yafültucufingu Míriam. “Jehová tañi duam mu müten mütrümeneu tati loncolelu” pi Míriam.

13. Nehemías ñi rupan mu, ¿ca chumngechi huiñoldunguafeiñmu Jehová taiñ llellipun?

¹³ Jehová püneafui pu che tañi poyequenoeteu rume, femngechi taiñ quelluaeteu (Prov. 21:1). Peafiyiñ ñi rupan ta Nehemías. Quiñe rupa Jehová nengümüñmafi ñi piuque ti rey Artajerjes, femngechi ñi eluafiel ta Nehemías huiñotual ta Jerusalén ca ñi cüme elcünutuafiel ti huaria (Neh. 2:3-6). Llellipufiliyiñ Jehová taiñ quelluaeteu, quiñeque mu Jehová nengümüñmaquefi ñi piuque quiñeque che ñi poyequenoeteu rume, femngechi taiñ quellungeal.

14. Tañi rupan taiñ lamngen Soo Hing, ¿chumngechi yafültucuqueiñmu? (Ca inaduamnge ti adentun).

¹⁴ Peaiñ ñi rupan quiñe lamngen Soo Hing pingelu. Tañi püñeñ pichicalu müten, peñmangei huesaque cutran, feimu nehue cümelequelafui tañi raquiduam. Rupachi antü mu, alüpüra ütrünagi, fei rume allfüi. Soo Hing ca tañi füta elingu tañi cüdau tañi cuidayafiel. Nienolu am cüdau engu, nielafuingu ta plata. Fente tañi huesa rupan mu, Soo Hing nehuen-ngehuelafui, feimu nülalfi ñi piuque ta Jehová, feipifi ñi quelluaeteu. Quiñe doctor ayüfui ñi quelluafiel ti familia. Ñi femün mu tati doctor, ti gobierno quellufi ti familia. Femngechi peingün quiñe ruca ñi doi faratu cullial ti arriendo. Ti lamngen raquiduami Jehová nengümelfi ñi piuque ti doctor, femngechi ñi quelluaeteu. Fei feipi: “Peiñ chumngechi taiñ quellueteu ta Jehová, rüfcünu llemai Jehová tati ‘allcütuquelu ti llellipun’” (Sal. 65:2).

MANELUULIYIÑ JEHOVÁ MU PEAIÑ CA CÜME LLOHUAIÑ CHUMNGECHI TAIÑ HUIÑOLDUNGUAETEU

15. ¿Chumi quiñe lamngen tañi inaduamal Jehová chumngechi ñi huiñoldunguqueteu ñi llellipun?

¹⁵ Llellipufiliyiñ Jehová taiñ quelluaeteu, cüme ngüneduamaiñ chumngechi taiñ quelluaeteu. ¿Chemu? Quiñeque mu, ngüneduamlayafuiñ rume chumngechi taiñ quelluqueteu ta Jehová. Jehová femlayafui chi fütraque dungu taiñ quelluaeteu, huelu eluaiñmu com taiñ duamnieel taiñ fülconcüleal quisu meu. Peafiyiñ ñi rupan quiñe lamngen Yoko pingelu. Quisu allcütuquenoeteu Jehová troquiuquefui, fei ¿chumi? Eluhui tañi huirintucual com tañi llellipufiel ta Jehová, fei huiño inaduamfi com tañi huirintucuel. Feimu quimtucui epe com tañi pedifiel mu Jehová huiñoldungueyu, quiñeque acordahuequelafui rume tañi pedifiel ta Jehová. Feimu cümei taiñ raquiduamal chumngechi taiñ huiñoldunguqueteu Jehová (Sal. 66:19, 20).

16. Llellipufiliyiñ Jehová, ¿chumngechi pengelafuiñ taiñ maneluucülen quisu mu? (Hebreos 11:6).

¹⁶ Chumngechi rume lloudungufeliyiñmu Jehová, cüme llohuafiyiñ femngechi pengelaiñ taiñ maneluucülen quisu mu (papeltunge Hebreos 11:6). Peaiñ ñi rupan quiñe curehuen Mike engu Chrissy pingelu. Fei engu ayüniefuingu ñi cüdahual Betel mu. Mike feipi: “Mufüquechi apolfiyiñ ti solicitud. Llellipufiyu ta Jehová, huelu mangelngelayu” pi. Jehová müten quimniefui cheu doi cümei ñi cüdahual engu, feimu feitachi curehuen maneluucülefuingu Jehová mu. Chem cüdau rume femfuingu, precursor regularngefuingu, fei amuingu cheu ñi doi duamniengeel quellu ca quelluntucuingu ñi deumayal fillque ruca ñi poyengeam ta Jehová. Fachantü huitrancontuyahulquefingu ti trahunche tañi yafültucuafiel. Mike feipi: “Quiñeque mu, Jehová lloudunguquelaeiñmu chumngechi taiñ llellipufiel, huelu lloudunguqueiñmu llemai. Quiñeque mu, doi cümeque dungu femquei iñchiu mu taiñ raquiduamquenofel rume”.

17, 18. Ñi feipin Salmo 86:6, 7, ¿chem mu maneluucüleiñ?

¹⁷ (Papeltunge Salmo 86:6, 7). David quimniefui Jehová ñi allcütuñmaquefiel tañi llellipun ca tañi lloudunguquefiel. Eimi ca maneluhuafuimi fei mu. Chumngechi taiñ ngüneduampeel tüfachi troquiñ mu, Jehová eluqueiñmu quimün ca quelluqueiñmu taiñ aguantayal. Jehová ca pünequefi pu peñi ca pu lamngen ca quiñeque testigongenolu taiñ quelluaeteu.

¹⁸ Quiñeque mu, Jehová lloudunguquelayaiñmu chumngechi taiñ llellipufiel, huelu quimnieiñ taiñ allcütuqueteu. Eluaiñmu taiñ duamnieel puuchi antü meu, feimu maneluucüleaiñ Jehová müten ca ngillatunieafiyiñ. Quimnieiñ taiñ quelluaeteu famülque mu ca ti hue mapu mu eluaiñmu com taiñ ayüqueel (Sal. 145:16).