¿Allcütuque­peiñmu mai Chau Jehová?

1, 2. ¿Chumngelu am Jehová allcütuquelaeneu piafuiñ?

“PENGE tami doi fütra ayühun Jehová mu, fei quisu eluaimu tami piuque ñi ayüqueel” (Sal. 37:4). Müna cüme dungu tüfa, huelu ¿itrocom dungu taiñ ngillatufiel ta Jehová elufemafeiñmu pemai? Raquiduamnge tüfa, quiñe lamngen llellipuquei ñi amual ti Escuela ñi Pepicangeam pu Amuldunguquelu Ngünechen ñi Gobierno. Fentren tripantu rupai, huelu petu mangelngelai ñi amual. Cangelu hueche rume cutrancülei, feimu llellipuquefi Jehová ñi tremotual, femngechi ñi doi cüme cüdahual trahunche mu. Huelu turpu tremotulai. Quiñe curehuen llellipuquei tañi pu yall ñi püntütripanoal Jehová mu, huelu tremlu engün, püntütripaingün Jehová mu.

² Eimi ca femngechi elungenolmi tami llellipufiel Jehová, fei Jehová caquelu che allcütuquefi, iñche allcütuquelaeneu piafuimi chi. Cam, ¿huesalcamequepen mai? Feimu allcütuquelaeneu piafuimi. Peafiyiñ ñi rupan lamngen Janiceb ca tañi füta. Fei engu rume ayüniefuingu tañi cüdahual Betel mu, feimu llellipufingu Jehová tañi amual. Taiñ lamngen feipi: “¿Mütrümrumengeafuyu peno?”. Fentren tripantu rupai, huelu chem pingelaingu rume. Fei feipi: “Rume huesa duamcülefun, ¿lladcütupefiñ mai ta Jehová? piquefun. Rumeñma llellipuquefiñ Jehová tañi cüdahual Betel mu, ¿chumngelu am huiñoldungulaeneu? pilefun”.

3. ¿Chem ngüneduamaiñ tüfachi troquiñ mu?

³ ¿Iñche allcütuquepeneu mai Jehová? ramtuhuafuiñ. Cuifi mu quiñeque che serfiquefilu Jehová ca ramtuuquefui (Job 30:20; Sal. 22:2; Hab. 1:2). ¿Chumngelu maneluhuafuiñ taiñ rüf allcütuaeteu Jehová? (Sal. 65:2). Taiñ quimal, ngüneduamaiñ cüla dungu: 1) llellipufiliyiñ Jehová, ¿chumai quisu? 2) Llellipufiliyiñ Jehová, ¿chem ayüquei taiñ femal? 3) Quiñeque mu, ¿chumngelu cacünutuafuiñ taiñ llellipuel?

LLELLIPUFILIYIÑ JEHOVÁ, ¿CHUMAI QUISU?

4. Ñi feipin Jeremías 29:12, ¿chumai Jehová?

⁴ Jehová feipieiñmu taiñ allcütuñmayaeteu taiñ llellipun (papeltunge Jeremías 29:12). Chau Jehová rume piuqueyeniefi tañi pu serfiqueteu, feimu rulpacünuquelai taiñ llellipuquefiel (Sal. 10:17; 37:28). Tüfa, ¿feipipei mai taiñ eluaeteu itrocom taiñ llellipuquefiel? Femlai. Quiñeque dungu ti hue mapu mu müten llohuafiyiñ.

5. Allcütulu taiñ llellipun, ¿chem raquiduamtucuniei Jehová?

⁵ Allcütulu taiñ llellipun, Jehová raquiduamtucuniei quisu tañi ayünieel (Is. 55:8, 9). Jehová ayüniei tati mapu ñi apoleal fentren che quiñehun eluucülelu ñi ngüneaeteu Chau Ngünechen. Huelu ti Huecüfü feipiquei pu che quisu ngüneucülele, doi cümelcaleai (Gén. 3:1-5). Ñi feipin ti Huecüfü re coila tati. Feimu ñi pengelcünual Huecüfü ñi coilatun, Jehová elcünufi pu che ñi quisutu ngüneniehual. Feimu mülei fentren huesaque dungu pu gobierno ñi duam mu (Ecl. 8:9). Jehová apümcafule feula com feitachi huesaque dungu, pu che raquiduamafui cümelcaleiñ taiñ quisutu ngüneniehual, cüme tripai pu che ñi gobierno feipiafui. Feimu Jehová müñtüñmalayafeiñmu com taiñ huesaque rupan fantepu mu.

6. Maneluuliyiñ Jehová tañi nor femquen ca tañi piuqueyechequen, ¿chumaiñ?

⁶ Trürcüleafui quiñeque llellipun, huelu caquerumeafui chumngechi ñi huiñoldungufiel Jehová. Por ejemplo, ti lonco ülmen Ezequías rume cutrancülefui, fei llellipufi ta Chau Ngünechen ñi tremoltuaeteu, fei Jehová tremoltueyu (2 Rey. 20:1-6). Ti apostol Pablo ca llellipufi ta Jehová ñi müntuñmayaeteu “quiñe chacai reque” felelu, tüfa ¿quiñe cutran peno? Huelu Jehová tremoltulafi (2 Cor. 12:7-9). Ca peaiñ ñi rupan Santiago engu Pedro. Ti lonco ülmen Herodes ayüniefui ñi langümafiel engu. Ti trahunche llellipui Pedro ñi duam mu, ¿ca fempelaingün Santiago ñi duam mu? Fei quiñe cüme püllü montulfi ta Pedro ñi layal, huelu Santiago langümngei (Hech. 12:1-11). Ramtuhuafuiñ: “¿Chumngelu chi cai Jehová montulfi ta Pedro, huelu montul-lafi ta Santiago?”. Biblia ta feipilai. Huelu rüf maneluuqueiñ ta Chau Jehová “norngenochi dungu femquelai” (Deut. 32:4).c Ca quimnieiñ Chau Jehová piuqueyefi Pedro ca Santiago (Apoc. 21:14). Quiñeque mu, Jehová huiñoldunguqueiñmu taiñ llellipun huelu chumngechi taiñ ayünienofel. Huelu maneluuliyiñ Jehová ñi norngen ca ñi piuqueyechequen, cüme llohuaiñ chumngechi taiñ huiñoldungueteu taiñ llellipun (Job 33:13).

7. ¿Chem ngelai taiñ femal? ¿Chumngelu cai?

⁷ Trürümuulayaiñ caquelu che ñi rupan mu. Quiñeque mu, Jehová elulayafeiñmu chem taiñ llellipufiel. Huelu ca che eluafui tañi llellipuel. Peafiyiñ ñi rupan quiñe lamngen Anna pingelu. Tañi füta ca epu lamngen trahunche mu cancer cutran niefuingün. Fei Anna llellipufi Jehová tañi tremotual engün. Ti epu lamngen müten tremotuingün, huelu tañi füta lai. Fei Anna ramtuuquefui ¿Jehová mai tremoltupefi tüfachi epu lamngen? ¿Chumngelu chi cai tremoltulafi tañi füta? Iñchiñ quimlaiñ chumngelu ñi tremotun tüfachi epu lamngen, huelu quimnieiñ Jehová apümafi com taiñ cutrancaqueteu ca ayüniei ñi huiñomongeltuafiel tañi pu hueni (Job 14:15).

8. 1) Ñi feipin Isaías 43:2, ¿chumngechi quelluqueiñmu Jehová rupaliyiñ huesaque dungu mu? 2) Huesaque dungu taiñ rupan, ¿chumngechi quelluqueiñmu ti llellipun? (Inaduamnge ti video Llellipuliyiñ, nehuentuleaiñ).

⁸ Jehová rumel quelluqueiñmu. Taiñ poyen Chau Jehová pilai taiñ cutrancahual (Is. 63:9). Huelu Jehová müntuñmalayaiñmu com taiñ huesaque rupan. Huesaque dungu taiñ rupan trürümafuiñ leüfu mu cam cütral mu (papeltunge Isaías 43:2). Jehová feipicünui taiñ quelluaeteu, femngechi taiñ chaftuafiel feitachi huesaque dungu. Ca quelluaiñmu taiñ fülconcüleal quisu meu chem rupaliyiñ rume. Ca eluaiñmu tañi nehuen, femngechi taiñ amuleal (Luc. 11:13; Filip. 4:13). Feimu llemai, rupaliyiñ huesaque dungu mu, maneluhuaiñ Jehová taiñ quelluaeteu nehuentuleal ca taiñ püntütripanoal quisu meu.d

LLELLIPUFILIYIÑ JEHOVÁ, ¿CHEM AYÜQUEI TAIÑ FEMAL?

9. Ñi feipin Santiago 1:6, 7, ¿chumngelu duamnieiñ taiñ maneluhual Jehová mu?

⁹ Jehová ayüniei taiñ maneluucüleal quisu meu (Heb. 11:6). Quiñeque mu, yafüngehuelayafuiñ taiñ rupan huesaque dungu mu, fei ¿quellupeafeneu mai ta Chau Jehová? piafuiñ. Huelu “fütra cura malal” mu pürayafuiñ Chau Ngünechen ñi nehuen mu pi ta Biblia (Sal. 18:29). Feimu epurume raquiduamcülelayaiñ, huelu mai llellipuafiyiñ Jehová ca com piuque mu maneluhuaiñ taiñ allcütuaeteu (papeltunge Santiago 1:6, 7).

10. Deu llellipuliyiñ, ¿chumngechi anücünuulayaiñ? Feipinge quiñe nütram.

¹⁰ Deu llellipuliyiñ, re anücünuulayaiñ. Raquiduamnge tüfa mu, quiñe peñi cüpa amui fütra trahun cüla antüngequelu, fei llellipufi Jehová, femngechi tañi jefe ñi eluaeteu ta permiso. ¿Chumngechi quelluafeyu Jehová? Quelluafeyu ñi nehuen piuquecünuhual, fei ñi nütramcayafiel tañi jefe. Huelu ti peñi ngelai ñi anücünuhual, mülei ñi nütramcameafiel tañi jefe ca ñi ramtuafiel: “¿Eluafen permiso tañi amual fütra trahun mu?”. Quiñe rupa müten no, doi rupachi mülei ñi nütramcalelafiel, ca feipiafui: “Elueli permiso, cullilayaen rume”. Cam “ca antü cüdahuafun” piafui.

11. ¿Chumngelu am quiñe rupa müten llellipulayafiyiñ Jehová?

¹¹ Jehová ayüniei taiñ rumel llellipunieafiel (1 Tes. 5:17). Jesús ñi feipin Lucas 11:9 mu pengeli llellipuliyiñ, pürüm huiñoldungungelayaiñ chi. Feimu fentecünulayaimi, com piuque mu ngillatuniefinge ta Jehová (Luc. 18:1-7). Rumel llellipuniefiliyiñ Jehová, pengelaiñ taiñ rüf duamtuniefiel chem taiñ llellipuqueel. Ca pengelqueiñ taiñ maneluuquen fei tañi quellun mu.

QUIÑEQUE MU, ¿CHUMNGELU CACÜNUTUAFUIÑ TAIÑ LLELLIPUEL?

12. 1) ¿Chem ramtuhuafuiñ? ¿Chumngelu cai? 2) ¿Chumngechi pengelafuiñ taiñ yamniefiel Jehová llellipun mu? (Inaduamnge ti huichulechi dungu “Ñi llellipufiel ta Jehová, ¿pengelquepen mai ñi yamniefiel?”).

¹² Elungenoliyiñ taiñ ngillatuel, cüla dungu ramtuhuafuiñ. Hune: “¿Cümepei mai chem tañi llellipumequen?”. Llellipumequeiñ chi chumngechi ñi cüme elcünutual quiñeque dungu. Huelu chem taiñ ngillatuel cümelcalayafeiñmu, ¿doi cüme dungu mülepelai fei taiñ cüme tripayal? Cafei chem taiñ pedifiel ta Chau Jehová nüucülelai chi quisu tañi ayünieel mu (1 Juan 5:14). Raquiduamaiñ ñi llellipuel ti curehuen taiñ nütramcapeel parrafo quiñe. Llellipufingün ta Jehová tañi pu yall ñi püntütripanoal fei meu. Cüme dungu piafuiñ. Huelu Jehová dicümtucuquelafi inei no rume ñi serfiafiel. Chau Dios ayüniei com pu che ñi serfiaeteu quisu ñi duam mu, pu pichiqueche cafei (Deut. 10:12, 13; 30:19, 20). Feimu doi cümeafui feichi pu chau ñi ngillatuafiel ta Jehová chumngechi puhual tañi pichiqueche ñi piuque mu, femngechi piuqueyerpuafuingün ta Chau Jehová ca cüpa hueniyeafingün (Prov. 22:6; Efes. 6:4).

13. Llellipufiliyiñ Chau Jehová, ¿pürüm müten quelluaiñmu? ¿Chumngelu feipiafuiñ? (1 Pedro 5:6, 7).

¹³ Epu ramtun: “¿Puhui mai chi antü tañi eluaeteu Jehová chem tañi llellipufiel?”. Llellipufiliyiñ Jehová, müchai müten duamnieiñ ñi quellungeal piafuiñ, huelu Chau Jehová quelluaiñmu puuchi antü meu (papeltunge 1 Pedro 5:6, 7). Müchai müten huiñoldungungenole taiñ llellipun, Jehová elulayaeneu tañi llellipufiel piafuiñ. Huelu petu no ¿pipelai ta Chau Ngünechen? Raquiduamnge feiti hueche llellipulu ñi tremoltuaeteu Chau Dios. Jehová tremoltufile ti hueche, ¿chem rupayafui? Feichi hueche serfiquefi ta Chau Ngünechen quisu ñi cümelcaleal müten feipiafui ti Huecüfü (Job 1:9-11; 2:4). Cafei Jehová feipicünui ñi acual chi antü ñi tremoltuafiel com pu cutrancülelu (Is. 33:24; Apoc. 21:3, 4). Feimu petu acunole feichi antü, iñche tremoltuaeneu ta Chau Jehová pilayafuiñ. Feimu, ¿chem pediafui ti hueche? Llellipuafui Jehová ñi eluaeteu nehuen ca tüngün, femngechi ñi aguantayal ca ñi serfinieafiel ta Chau Jehová (Sal. 29:11).

14. ¿Chem quimeltun entuiñ ñi rupan taiñ lamngen Janice?

¹⁴ Raquiduamaiñ ñi rupan taiñ lamngen Janice. Fei llellipuniefi ta Jehová ñi conal Betel mu, huiñoldungunoalu mu Chau Jehová troquihui. Quechu tripantu rupai, fei hula quimtucui ñi caquerumerquen chumngechi ñi huiñoldungueteu ta Jehová. Taiñ lamngen feipi: “Com tüfachi tripantu Jehová quelluqueneu tañi doi cüme cristianangeal. Duamniefun tañi doi maneluhual Jehová mu ca ñi doi cüme chillcatuafiel tati Biblia. Ca loncontucun cheu rume cüdahuelfili ta Jehová, ayüucülean” pi taiñ lamngen. Rupachi antü mu, Janice ca tañi füta feipingei tañi huitrancontuafiel pu trahunche. Feula ta Janice feipi: “Jehová huiñoldungufeneu tañi llellipun, huelu chumngechi ñi ayünieel iñche no. Alüñman ñi loncontucuan chumngechi ñi huiñoldungueteu Jehová. Huelu mañumniefiyiñ tañi piuqueyenieteu ca tañi duamtunieteu”.

15. Quiñeque mu, ¿chumngelu cümelayafui taiñ rume quimfalcünulelafiel chem taiñ pedifiel Jehová? (Ca inaduamnge ti adentun).

¹⁵ Ca ramtuhuafuiñ: “¿Ca dungu ngillatupeafun mai?”. Iñchiñ mülei taiñ cüme feipiafiel ta Jehová chem taiñ duamnieel. Huelu quiñeque mu, duamfal-lai taiñ rume quimfalcünulelafiel, femngechi doi cüme quimafuiñ chem ayüquei Chau Jehová taiñ femal iñchiñ. Ca raquiduamaiñ feiti lamngen ayülu ñi amual ti Escuela ñi Pepicangeam pu Amuldunguquelu Ngünechen ñi Gobierno. Fei ayüniefui tañi amuldungual cheu ñi doi duamniengeel quellu. Llellipuleafui Jehová tañi amual ti escuela mu, huelu petu ñi amunon, ca llellipuafui ñi quelluaeteu chumngechi ñi doi cüdahuelafiel (Hech. 16:9, 10). ¿Ca chem chumafui? Deu ñi llellipuel, nütramcayafui ti huitran-ngepaquechi loncolelu, fei ramtuafui: “¿Mülepei mai quiñe trahunche duamnielu precursor?”. Ca huirintuculelafui quiñe carta Betel tañi feipingeal cheu doi duamniengei quellu.e

16. ¿Chem mu maneluucüleiñ?

¹⁶ Chumngechi ngüneduampeiñ, Chau Jehová piuqueyechequei ca norngei, feimu maneluuqueiñ taiñ cüme huiñoldunguaeteu taiñ llellipun (Sal. 4:3; Is. 30:18). Quiñeque mu, Jehová quellulayaiñmu chumngechi taiñ ayünieel iñchiñ, huelu rumel allcütuqueiñmu. Quisu rume piuqueyeiñmu ca turpu quisucünulayaiñmu (Sal. 9:10). Feimu llemai, chem rupaliyiñ rume, maneluucüleaiñ Jehová mu ca nülanentuafiyiñ reque taiñ piuque llellipun mu (Sal. 62:8).