Ayühunquechi üngümcüleafuiñ

Jehová ayüniei taiñ ñochiquechi esperanieafiel feichi antü quisu ñi femal. ¿Chumngelu feipiqueiñmu Jehová taiñ üngümcüleal? ¿Chem quelluafeiñmu taiñ huesa duamnoal petu taiñ üngümcülen?

¿CHUMNGELU DUAMNIEI JEHOVÁ TAIÑ ÜNGÜMCÜLEAL?

Biblia feipi: “Jehová ñochi duam mu üngümcülei tamün füreneaeteu, ca eluhuai tamün cutranduamyeaeteu. Jehová nor Ngünechen ngelu am. Fei ayüucüleingün com pu llihuatulelu quisu mu” (Is. 30:18). Isaías feipicünufi tüfachi dungu tati pu judio trencül piuquengelu (Is. 30:1). Huelu feichi antü, ca mülefui nor piuquengechi pu judio. Tañi feipin Isaías elueyu maneluhun feichi pu judio. Tüfachi antü mu iñchiñ ca femngechi maneluhuafuiñ.

¿Chumngelu ñochiquechi üngümcüleaiñ? Jehová cafei ñochiquechi üngümcülei. Jehová dulliniei chem antü ca chem hora ñi apümcünuafiel ti huesaque dungu, quisu cafei femngechi esperaniei ñi acual feichi antü (Mat. 24:36). Acule feichi antü, quimfalngeai Huecüfü ñi coila dalluntucuquefiel Jehová ca tañi pu che, femngechi Jehová ütrüftucuafi lolo mu tati Huecüfü ca tañi pu huesaque püllü. Huelu tañi pu poyequeteu doi cutranduamyeafi.

Petu taiñ üngümcülen, Jehová com entuñmalayaiñmu taiñ huesa rupamequen, huelu quellunieaiñmu taiñ ayüucüleal. Chumngechi ñi feipin Isaías, ayüucüleafuiñ petu taiñ üngümniefiel Jehová ñi feipicünuel (Is. 30:18). ¿Chem quelluafeiñmu taiñ ayühunquechi üngümcüleal? Ngüneduamafiyiñ meli dungu mu.

AYÜHUNQUECHI ÜNGÜMCÜLEAIÑ

Piuquentucunieafiyiñ doi cümeque dungu. Ti lonco ülmen David fentren huesaque dungu rupai tañi mongen mu (Sal. 37:35). Felelu rume, huirintucui: “Ñücüfcülenge Jehová ñi adquiñ mu ca üngümniefinge ñochi duam mu. Huesa duamquilnge ñi cüme tripan mu pu huentru tañi huesa adcünuel mu” (Sal. 37:7). David inafi tüfachi ngülam, ¿chumngechi? Raquiduamtucui chumngechi Jehová tañi montulaeteu, cafei piuquentucuquefui com cümeque dungu ñi femün Jehová quisu meu (Sal. 40:5). Ca femngechi iñchiñ müte raquiduamlayaiñ taiñ huesa rupamequen mu, doi mai cümeque dungu mu. Femngechi ayühunquechi üngümcüleaiñ.

Fillque rupa püramyeafiyiñ ta Jehová. David peno feipifi ta Jehová: “Huelu iñche üngümcülean. Doi püramyenierpuayu” (Sal. 71:14). David, ¿chumngechi püramyequefui ta Jehová? Ülcantulelquefi ta Jehová, ca amuldungulelquefi caquelu che Jehová mu (Sal. 71:16, 23). Iñchiñ inayentuafuiñ ta David. Feimu amuldunguafiyiñ pu che, nütramcayafiyiñ taiñ pu che ca taiñ pu hueni Jehová mu ca ülcantulelafiyiñ ta Jehová, femngechi püramyeafiyiñ. Feimu ülcantulelfilmi ta Chau Dios, cüme ngüneduamnge chem pin tati ül, fei peaimi chumngechi tami quelluaeteu.

Quiñentrür müleaiñ pu peñi ca lamngen iñchiñ. David rupalu huesaque dungu mu, feipifi ta Jehová: “Rangi tami pu poyequeteu, maneluucülean tami üi mu” (Sal. 52:9). David quintui trahuluhual tañi pu peñi engün, femngechi yafültucungei. Iñchiñ ca yafültucuafeiñmu taiñ pu peñi, pu lamngen amuldungun mu, trahun mu ca cheu rume müleliyiñ (Rom. 1:11, 12).

Yafültucunieaiñ taiñ maneluhun. Salmo 62:5 feipi: “Rüfcünu, ñücüfcülen üngümniefiñ ta Chau Dios, rumel maneluucülen fei mu”. Duamfali foliluucüleal taiñ maneluhun, doyelchi mai pürüm acunole tati afaelchi antü chumngechi taiñ üngümniequefel. Tunten-ngeafui rume taiñ üngümcülen, maneluucüleaiñ llemai tañi femtripayal. ¿Chumngechi yafültucuaiñ taiñ maneluhun? Papeltuafiyiñ Biblia, raquiduamaiñ chumngechi ñi femtripalen cuifique profecia, com tati pu huirintuculu Biblia caquerumequelai tañi dungun engün, ca chumngechi quimfalngequei Jehová Biblia mu (Sal. 1:2, 3). Ca llellipuleaiñ Jehová mu taiñ eluaeteu ñi nehuen, fei quelluaiñmu taiñ hueniyenieafiel petu taiñ üngümniefiel tati rumel mongen (Jud. 20, 21).

David maneluucülefui Jehová leliniefi tañi pu üngümnieteu, fei füreneafi engün. Iñchiñ ca femngechi maneluhun nieafuiñ (Sal. 33:18, 22). Feimu llemai, ¿chumngechi üngümcüleafuiñ ñochi duam mu? Piuquentucuafiyiñ doi cümeque dungu, fillque rupa püramyeafiyiñ ta Jehová, quiñentrür müleaiñ pu peñi ca lamngen iñchiñ ca yafültucunieaiñ taiñ maneluhun.