Tüngcüleaimi mülen mu rume hueichan ca quehuan dungu
Gary mülequefui ejercito mu feipi “Petu ñi papeltunofiel Biblia inaduamquelafun ñi mülen huesaque dungu norngenochi dungu ca cuñillchequenochi huesaque che. Huelu feula nien tüngcülechi raquiduam quimnien Jehová ñi cüme elcünutuafiel mapu.”
Mülei caquelu che ñi raquiduamquen Gary reque. Feula peafiyiñ chumngechi Biblia quelluquefi ta pu che.
BIBLIA ÑI FEIPILEN: “Ahuem Jehová, eimi am cüme piuquengeimi ca pepicaucüleimi tami huiñoduamtual” (Salmo 86:5).
¿CHUMNGECHI QUELLUQUEIÑMU TÜFA? “Tüfachi texto quimeltueneu Jehová ñi cüme piuquengen. Quisu eluucülei ñi perdonayaeteu com dungu ñi femün, concülelu hueichan mu iñche” (ñi feipin Wilmar, Colombia mu).
BIBLIA ÑI FEIPILEN: “¡Tüfei! Hue huenu ca hue mapu deumayan. Ñi rupan cuifi mu raquiduamtucungehuelayai, piuquentucungehuelayai rume” (Isaías 65:17).
¿CHUMNGECHI QUELLUQUEIÑMU TÜFA? “Iñche nien depresion cutran ca estres postraumatico cutran tañi rupan ejercito mu. Tüfachi troquiñ Biblia quimeltunieneu Jehová pürüm nentuñmayaeneu ñi pellquelen, ñi tüngcülenon ca ñi huesaque peumaquen. Pürüm ngehuelayai ñi lonco mu ca ñi raquiduam no rume” (ñi feipin Zafirah, Estados Unidos mu).
BIBLIA ÑI FEIPILEN: “Feichi mu tati pu norngelu alün-ngerpuai ca fentren cüme felen müleai tuntepu ñi mülequen ti cüyen” (Salmo 72:7).
¿CHUMNGECHI QUELLUQUEIÑMU TÜFA? “Raquiduamcülequen müten chem pilen tüfachi troquiñ Biblia mu. Pürüm afai hueichan dungu mu, fei müleduamcülehuelayaiñ ñi chumlen taiñ pu familia” (ñi feipin Oleksandra, Ucrania mu).
BIBLIA ÑI FEIPILEN: ‘Tami pu la mongetuaingün. ¡Eimün trufür mu mülelu, trepemün! ¡Ayühun mu huirarmün!’ (Isaías 26:19).
¿CHUMNGECHI QUELLUQUEIÑMU TÜFA? “Langümngelu pu tutsi che, epe com tañi familia langümuñmangen. Tüfachi troquiñ Biblia eluqueneu maneluhun ñi huiño petuafiel engün. ¡Rume ayünien ñi allcütuafiel engün ñi dungun huiñomongetulengün!” (ñi feipin María, Ruanda mu).
BIBLIA ÑI FEIPILEN: ‘Ca pichin antü mu, ti huesaque che ngehuetulayai engün. Huelu pu ñomngelu ngen mapu ngeai engün, ca rüf ayüucüleaingün ñi mülen fentren tüngün’ (Salmo 37:10, 11).
¿CHUMNGECHI QUELLUQUEIÑMU TÜFA? “Fentepuhun mu rume ti hueichan petu mülei huesaque dungu, norngenochi dungu ca huesaque che. Tüfachi troquiñ rume eluqueneu nehuen. Jehová com peniei ca quimniei chumngechi dungu mu tañi rupalen. Fei feipicünui pürüm com apümafi tüfachi dungu ca inei no rume acordahuelayai” (ñi feipin Daler, Tayikistán mu).
Biblia quelluquefi fentren millon pu Dunguquelu Ineingen Jehová. Quiñeque engün üitungequei tüfachi papel mu. Quimürpuingün ñi üdehuenoafiel caquelu che tañi tuhun, tañi troquiñ mapu, ñi quehun ñi dunguquen ca ñi üdehuenoafiel pu che tañi huesa femquefeteu (Efesios 4:31, 32). Pu dunguquelu Ineingen Jehová coneltuquelaiñ politico dungu mu ca conquelaiñ pofolcahun dungu mu (Juan 18:36).
Pu Dunguquelu Ineingen Jehová rüf lamngenhuen ca peñihuen troquiuqueingün tañi hueluquentu quelluhual (Juan 13:35). Oleksandra lefmahui ca mapu mu ñi lamngen engu ti hueichan ñi duam mu. Fei feipi: “puulu feichi mapu mu iñchiu pefemfiyu pu lamngen taiñ peaeteu. Tañi quellun mu engün cüdautulayu tayu huimtupual tüfachi mapu mu”.
Mangeluhuayiñ tami amual cheu ñi trahu-luuquen pu Dunguquelu Ineingen Jehová. Allcütuaimi Biblia ñi quimeltuqueel ca chumngechi femal tami mongen mu. Amunge taiñ sitio internet jw.org mu tami peal quiñe trahunhue ruca doi püllelelu eimi mu. Cafei huirintuculelafuimi tami quelluaeteu quiñe Dunguquelu Ineingen Jehová tami quimeltueteu chem pin ta Biblia cullinon mu tati lifru ¡Rumel ayüucüleaimi! mu.