Jehová quellueyumu ñi ayüucüleal cheu rume tayu huercüngen

Mats ca Ann-Catrin amuingu Galaad pingechi Escuela 1979 tripantu mu. Fei huercüngeingu ñi amuldungumeal Irán, Mauricio, Myanmar, Tanzania, Uganda ca Zaire mapu mu. Quiñe tañi quimeltufe Galaad mu Jack Redford pingei ngülamtueyu tañi ayüucüleal cheu rume mülele engu ca chem dungu rupale rume. Tüfa rume quellueyu, fei engu cai fentren rupa huercüngeingu cañpüle. Feula ngüneduamaiñ chem tañi feipin engu.

Mats, feipimuiñ chumngechi quimfimi ti rüf dungu.

Mats: Tañi chau mülequefui Polonia mu rupamequelu tati Segunda Guerra Mundial. Ca inaduamün fentren huesaque dungu ñi femngequen Iglesia catolica mu. Femngefulu rume, huelu quisu raquiduamquefui tañi mülepen quiñe rüfngechi religion. Fei rupachi antü mu, quimürpun ñi rüfngen ñi feipin tañi chau. Huimtulefun tañi ngillayal usauque lifru, quiñe tüfa tati azul lifru La verdad que lleva a vida eterna pingelu. Afmatuleneu ñi feipiel. Feimu quiñe pun meu müten, com papeltufiñ. Rupan papeltulu iñche, ngüneduamün ñi mülen quiñe rüfngechi religion.

Feichi abril 1972 tripantu, eluhun ñi doi papeltuafiel pu testigo ñi publicacion. Pefiñ ti huiñoldungun tañi ramtuuquefel Biblia mu. Trürümuhun tati negociaquelu Jesús tañi nütramcael. Pefilu quiñe falin llancatu, fendei com tañi nieel ñi ngillafiel ti llancatu. Fei reque, iñche elcünun tañi doctorngeafel tañi ngillayafiel feichi llancatu, tüfa tati rüf dungu (Mat. 13:45, 46). Feimu 10 diciembre 1972 tripantu mu, fautizahun.

Quiñe tripantu rupalu, tañi pu chau ca tañi inan peñi poyerpufingün ta Jehová ca fautizahuingün. Julio 1973 tripantu precursorngerpun. Taiñ trahunche mu mülefui quiñe rume cüme adngechi precursora. Rume cüme hueniyequefui Jehová, Ann-Catrin pingei. Ayühurpuyu ca piuqueyehurpuyu, fei 1975 tripantu niehuiyu. Rupalechi 4 tripantu mu, amuldunguquefuyu quiñe adngechi huaria Suecia mu. Fentren che ayüi ñi doi quimal Biblia ñi dungu üye mu.

Ann-Catrin: Tañi chau amuquefui universidad Estocolmo huaria mu. Feichi mu quimürpufi ti rüf dungu. Iñche pichiche müten ngefun, huelu tañi chau yequefeneu trahun mu ca amuldungun mu. Tañi ñuque turpu ayülai, feimu cüpa quimfalcünui pu testigo ñi coilangen. Huelu quimtucui tañi huelulcaucülen. Feimu rupachi antü mu, fautizahurpui. Iñche nielu 13 tripantu, ca fautizahun. Ca 16 tripantu nielu, precursorangerpun. Amuldungumen quiñe huaria cheu ñi doi duamniengen amuldunguquelu. Fei hula, precursora especialngerpun.

Deu nieulu Mats iñchiu, fentren che quimelfiyu ti rüf dungu. Quimeltuquefiyu Biblia quiñe üllcha domo Maivor pingelu. Rume cüme deportetufengefui, huelu fentecünui tañi cüdahuelafiel Jehová. Rupachi antü, trür precursorangerpui iñche tañi lamngen engu. Amuingu Galaad 1984 tripantu mu, ca misionerangeingu Ecuador mu.

Eimu misionerongeimu fillque mapu mu, ¿chem quellueimu tamu ayüucüleal serfiniefiel mu Jehová?

Mats: Alün rupa huercüngeyu ca mapu tayu amuldungumeal. Quiñe dungu quellueiñmu: inayentufiyu Jesús, doyelchi mai tañi ñom piuquengen (Col. 2:6, 7). Caque mapu calei chumngechi ñi femngequen quiñeque dungu, huelu iñchiu eluuquefuyu tayu ca femngechi femal. Feipiquelafuiñ pu peñi, pu lamngen ñi femal engün chumngechi tayu huimtulen. Eluuquefuyu tayu quimafiel tañi huimtun ca chumngechi tañi raquiduamqueel engün. Inayentufilu iñchiu Jesús, doi cüdautulafuyu tayu ayüucüleal cheu rume tayu huercüngen (Sal. 1:2, 3).

Ann-Catrin: Quiñe anümca huiño anümngetulu duamniei tañi eñumaeteu ti antü tañi amuleal ñi tremcülen. Jehová tati antü reque felefui iñchiu mu (Sal. 84:11). Tayu mülepun caque mapu mu, taiñ piuqueyenieteu mu pu lamngen, eñumi reque tayu piuque. Tati trahunche mülelu Irán mu rume poyechefengefuingün ca cüme llouchefengefuingün chumngechi ñi femquefel cuifique che tripalu Biblia mu. Ayüfuyu tayu mülenagal Irán mu, huelu julio 1980 tripantu ti gobierno catrütui ti amuldungun ca feipieiñmu ñi tripayal ti pais mu 2 antü meu müten. Fei huercüngeyu África mu, Zaire mapu meu, feula República Democrática del Congo pingei.

Feipingelu tayu amual África mu ngüman, llicalefun. Allcütuquefun tañi mülen cuñihun-ngechi filu ca fillque cutran África mu. Quiñe curehuen tayu cüme hueniyefiel fei engu alüñma amuldungumefuingu África mu, fei feipieiñmu: “Llicaquilmu, eimu quimlafimu ta África. Mülepulmu üyeu, cüpa huiñolayaimu”. Rüfngerquei tañi feipin. Pu lamngen mülelu África mu müna piuqueyechefengefuingün. Cayu tripantu rupalu, catrütungei taiñ amuldungun Zaire mapu mu, feimu feipingeyu tayu amutual. Iñche llellipufiñ Jehová tayu mülecayal. Fei ayühun ngüneduamlu fente ñi piuqueyerpufiel África.

¿Chem cümeque dungu rupaimu tamu serfiniefiel mu Jehová?

Mats: Taiñ misionerongen mu, hueniyefiyiñ caquelu misionero caque tuhun-ngelu. Quiñeque mapu mu nierpuyu fentren chillcatuquelu Biblia, tüfa rume ayühuleiñmu. Ca acordaniefiñ fente taiñ piuqueyeteu pu peñi ca pu lamngen África mu. Huitranmafilu pu trahunche, amuquefuyu tayu furgon mu, fei mu umaquefuyu. Pu peñi ca lamngen rume pofrelefuingün, huelu rume duamtuquefeiñmu tayu cümelcaleal (2 Cor. 8:3). Tañi domo iñchiu niequefuyu quiñe huimtun. Aflu chi antü, anücünuuquefuyu tayu nütramcayal chem tayu rupan feichi antü, fei mañumtuquefiyu Jehová taiñ quellueteu mu.

Ann-Catrin: Rume ayühulnieneu quimfiel fentren lamngen caque tuhun-ngelu. Quimürpuyu hueque quehun: frances, luganda, persa ca suajili. Ca quimürpufiyu caquerumechi huimtun. Quelluntucuyu ñi pepicayafiel hueque lamngen. Nierpuyu cümeque hueni ca ayüucüleiñ taiñ trür cüdahuelniefiel Jehová (Sof. 3:9).

Quimfilu caque mapu, ngüneduamquefiyu fente ñi adelcalen com ñi deumael Jehová. Fillque rupa tayu huercüngen cañpüle, Jehová pengelmequeteu ti rüpü troquihuiyu. Jehová quimeltuqueiñmu fentren cümeque dungu, iñchiu tayu duam mu turpu quimürpulayafuyu.

¿Chem cüdaungechi dungu rupaqueimu? Ca, ¿chem quellueimu?

Mats: Fentren rupa contueiñmu huesaque cutran, quiñe tüfa malaria cutran. Ca quiñeque mu tañi domo duamniei ñi pürüm operangeal. Ca doi füchalerpulu tayu pu chau, raquiduamcülefuyu chumngechi ñi cuidangeal engün. Feimu müna mañumfiyu tayu pu familia ñi cuidafiel tayu pu chau piuqueyen mu, ayühun mu ca ñochi duam mu, femngechi amulerpuyu tayu misionerongen (1 Tim. 5:4). Camapu mülelu am iñchiu, pepi quellulafiyu tayu pu chau chumngechi tayu ayüquefel, feimu quiñeque mu huesa duamcülefuyu.

Ann-Catrin: Feichi 1983 tripantu mülelu iñchiu Zaire mapu mu, contueneu quiñe huesa cutran. Fei ti doctor feipifi tañi füta: “Tañi lanoal tami domo, pürüm müten tripamu ti pais mu”. Ca antü mu müten amuyu Suecia mu, huelu yeeiñmu quiñe avion re chemcün müten yequelu.

Mats: Raquiduamcülefuyu tayu pepi misionerongehuenoal, feimu ngümacahuiyu. Ti doctor feipieiñmu ñi tremotunoal tañi domo, huelu tremotui. Quiñe tripantu rupalu, huiñotuyu Zaire mapu mu. Puhuiyu quiñe pichi trahunche suajili quehun dunguquelu Lubumbashi huaria mu.

Ann-Catrin: Mülelu iñchiu feichi huaria mu, niepüñeñün, huelu ancatripai ñi püñeñ. Raquiduamquelafuyu tayu nieal pichiqueche. Huelu perdelu tañi püñeñ petu ñi choyünofiel, chüngartupiuqueleneu reque. Huelu rupalu iñchiu tüfachi hueñancün dungu, Jehová rume cümelcaeiñmu. Doi fentren che chillcatulelfiyu Biblia, turpu niequelafuyu fenten estudio. Quiñe tripantu mu müten, tremi ti trahunche. Ñi mülefel 35 amuldunguquelu, 70 ngetui. Ñi amuquefel 40 che trahun mu, 220 che amuquefui. Fentren cüdau niequefuyu tayu amuldungual, fei ngüneduamlu Jehová tayu cümelcaqueteu, rume yafültucueneu. Femfulu rume, petu acordaniequefiyu tayu pichiche yem tañi choyünon. Rume ayüqueyu tayu ngüneduamal chumngechi Jehová entuñmayaiñmu feichi hueñancün ti hue mapu mu.

Mats: Rupachi antü mu, tañi domo müte nehuen-ngehuelai. Iñche feipingen tañi nien cancer de colon ca duamniefun ñi femngeal quiñe cuñihun-ngechi operacion. Feula cüme feletun ca tañi domo com piuque mu cüdahuelniefi Jehová.

Quimnieiñ iñchiu müten tayu rupaquenon cüdaungechi dungu meu. Feichi 1994 tripantu meu, Ruanda mapu mu langümngei fentren che. Iñchiu huitrancontufiyu fentren peñi ca lamngen lefmaulu tañi mapu mu ñi montual engün. Pefilu iñchiu fei engün ñi fente maneluucülen, nehuentulen ca poyechefengen, fei quimtucuyu Jehová ñi quelluntucuquen tañi pu che chem dungu rupafule rume (Sal. 55:22).

Ann-Catrin: Rume cüdaungechi dungu rupayu 2007 tripantu. Amuyu hultucungelu Jehová mu ti Betel Uganda mu. Fei petu huiñotulu, amulefuiñ 25 misionero ca betelita engün. Epe puulu Kenia mu, fei quiñe camion cüpalelu tripai tañi rüpü meu, fei chocaeiñmu. Lai ti conductor ca 5 lamngen, fei ca quiñe lamngen larpui pital meu. Rume üngümcüleyu tayu huiño petuafiel tayu pu hueni hue mapu meu (Job 14:13-15).

Rupachi antü, tremotui tañi allfen. Huelu tañi füta iñchiu ca caquelu lamngen contueiñmu ansiedad cutran taiñ huesa rupan mu. Pun meu llicanquechi treperumequefun, niealu quiñe infarto troquiuquefun. Chem tayu doi quellueteu fei tayu llellipufiel Jehová, tayu papeltufiel tayu ayünieelchi texto Biblia mu ca tayu raquiduamal tüfa meu. Ca amuyu doctor meu tayu quelluaeteu ñi chaftuafiel ansiedad cutran. Feula doi nehuencületuyu ca llellipufiyu Jehová tayu pepi quelluafiel pu nielu ansiedad cutran.

Jehová, ¿chumngechi quellueimu tamu chaftuafiel rupan mu huesaque dungu mu?

Mats: Com püle tayu huercüngen, Jehová rumel cuidaeiñmu. Pu che suajili quehun dunguquelu niei quiñe feipin, feipi “Tumebebwa kama mayai mabichi”. Tüfa cüpa feipi “Yeniengeiñ quiñe carü curam reque”. Quiñe che yenielu quiñe carü curam cuñihun mu yequefi tañi huatronoal, femngechi cuñiutucueiñmu Jehová cheu rume tayu huercüngen. Jehová piuqueyenquechi eluqueiñmu com taiñ duamnieel ca quiñeque mu doi eluqueiñmu. Cafei ti Troquiñ Adniechequelu piuqueyen mu duamtueiñmu, femngechi ngüneduamfiyu Jehová taiñ piuqueyeteu ca quelluntucueteu.

Ann-Catrin: Jehová rume cuidaqueiñmu. Quiñe rupa mütrümngen tañi feipingeal tañi chau ñi rume cutrancülen pital meu. Tañi füta malaria cutran contufeyu, fei petu nehuencülelai. Tayu amual Suecia mu nielafuyu plata tayu ngillayal pasaje avion meu. Fendeayu ti auto pihuiyu. Huelu pürüm epuchi mütrümngeyu. Quiñe curehuen ayüfui tayu ngillalelaeteu quiñe pasaje avion meu. Ca quiñe cushe lamngen, fei ngülümquefui plata quiñe pichi caja meu feipilu “Ñi quelluafiel duamnielu”. Femngechi Jehová pichiñma mu quellueiñmu tayu ngillayal ti pasaje avion mu (Heb. 13:6).

Deu yenieimu 50 tripantu tamu serfiquefiel Jehová, ¿chem quimürpuimu?

Ann-Catrin: Quimürpun, taiñ nehuencüleal mülei taiñ tüngcüleal ca maneluhual. Maneluulu iñchiñ Jehová mu, fei quehuaquei reque iñchiñ meu (2 Crón. 20:15, 17; Is. 30:15). Eluulu cai iñchiu tayu cüme serfiafiel Jehová, fei llohuiyu doi fentren cümelcan taiñ llohuafiel caquelu cüdau meu.

Mats: Tati doi cüme dungu tañi quimürpuel, fei ñi maneluhual Jehová meu chem dungu rupafule rume. Femngechi ngüneduamafun chumafui taiñ quellueteu (Sal. 37:5). Chumngechi taiñ feipicünueteu Jehová, fei rumel mülequei iñchiñ mu. Feula ca femngechi femquei mülelu iñchiu ti Betel mülelu Myanmar mu.

Com tayu mongen mu ngüneduamqueyu fente tayu piuqueyeteu Jehová. Fachantü fentren huechequeche ca eluquei ñi doi cüdahuelafiel Jehová. Ayünieyu fei engün tañi ca ngüneduamal tunte tañi piuqueyeteu Jehová. Maneluule Jehová mu engün, ayüucüleaingün cheu rume huercüngele.