TROQUIÑ ÑI CHILLCATUNGEAL 42
ÜLCANTUN 44 Ti hueñancülelu ñi llellipun
¿Chumngechi llellipuafuiñ Jehová com piuque mu?
“ Llellipueyu com tañi piuque mu. Ahuem Jehová, huiñoldunguen” (SAL. 119:145).
¿CHEM QUIMAIÑ?
Ngüneduamaiñ quiñeque llellipun Biblia mu tañi doi cüme tripayal taiñ llellipun.
1, 2. 1) ¿Chem dungu mu cüdautuafuiñ taiñ nülacünulelafiel taiñ piuque ta Jehová? 2) ¿Chumngechi quimiyiñ taiñ ayühunquechi allcütuqueteu ta Jehová?
LLELLIPUFIEL mu Jehová, ¿ca huiño feipiquefimi quiñeque dungu müten, huelu entuquelaimi chem ñi mülen tami piuque mu? Com iñchiñ femngechi dungu mu rupayafuiñ. Com iñchiñ am fentren duam nielu, feimu aporiauquechi llellipuafuiñ Jehová. Cafei, quiñeque mu ¿inei am ta iñche tañi nütramcayafiel Jehová? piafuiñ, feimu cüdautuafuiñ taiñ nülanentulelafiel taiñ piuque.
2 Biblia quimeltuquei Jehová ayüquelai taiñ quintucayal chem taiñ feipiafiel, doi mai falintuquei ñom piuque mu entual taiñ llellipun. Chau Jehová allcütuquei tañi llellipueteu pu ñomngelu (Sal. 10:17). Jehová rüf duamtunieiñmu, feimu ayühunquechi allcütuqueiñmu (Sal. 139:1-3).
3. ¿Chem ramtun lloudungungeai feitachi troquiñ mu?
3 Feimu ramtuhuafuiñ: “¿Chemu huitrautulayaiñ taiñ llellipuafiel ta Jehová? ¿Chem quelluafeiñmu taiñ nülanentulelafiel taiñ piuque ta Jehová? ¿Chem enseñalqueiñmu tati llellipun mülelu Biblia mu? Ca, ¿chumngechi quelluafeiñmu taiñ doi cüme llellipual? Quimnoliyiñ taiñ chem piafiel Jehová fente taiñ hueñancülen, ¿chem chumafuiñ?”. Tüfachi troquiñ mu ngüneduamafiyiñ.
HUITRAUTULAYAIMI TAMI LLELLIPUAFIEL JEHOVÁ
4. ¿Chem quelluafeiñmu taiñ com piuque mu llellipuafiel Jehová? (Salmo 119:145).
4 Inaduamliyiñ Jehová tañi cüme hueningen ca ayüquei taiñ cümelcaleal, femngechi eluhuaiñ com piuque mu taiñ llellipuafiel. Tati huirintuculu ti Salmo 119 ca femngentuquefi ta Jehová. Feitachi salmista ca rupafui huesaque dungu mu. Quiñeque che dalluntucueyu coilaque dungu mu (Sal. 119:23, 69, 78). Ca quiñeque mu ca huesa duamquei tañi huesa femün mu (Sal. 119:5). Femfulu rume, llicalai tañi nülacünulelafiel ñi piuque ta Jehová (papeltunge Salmo 119:145).
5. Huesa duamcüleliyiñ, ¿chumngelu huitrautulayaiñ taiñ llellipuafiel Jehová? Feipiaimi quiñe ejemplo.
5 Jehová ayüniei tañi llellipuaeteu tati pu huesa culpalu cütu (Is. 55:6, 7). Feimu huesa duamcülefuliyiñ rume, llellipuafiyiñ ta Jehová. Peaiñ quiñe ejemplo. Quiñe che ñamquiyaulu quiñe fütra mahuidantu mu, perumefi quiñe che tañi quelluaeteu. Tañi yehuelen mu, ¿huitrautupeafui mai tañi feipiafiel tañi quelluaeteu? Femlayai llemai. Ca femngechi, ñamquiyauliyiñ reque cam culpaliyiñ, huitrautulayaiñ taiñ llellipuafiel Jehová (Sal. 119:25, 176).
¿CHEM QUELLUAFEIÑMU TAIÑ LLELLIPUAL COM PIUQUE MU?
6, 7. ¿Chem quelluafeiñmu taiñ feipiafiel Jehová taiñ chum duamcülen? (Ca inaduamnge ti quimal dungu).
6 Feipifiliyiñ Jehová com ñi mülen taiñ piuque mu, doi fülconaiñ quisu mu. ¿Chem quelluafeiñmu taiñ nülacünulelafiel taiñ piuque ta Jehová?
7 Raquiduamaiñ ñi chumngen ta Jehová.a Doi raquiduamtucunieliyiñ Jehová tañi cüme piuquengen, cüdautulayaiñ taiñ nülacünulelafiel taiñ piuque (Sal. 145:8, 9, 18). Peafiyiñ ñi rupan ta Cristina. Tañi chau quehuafe chengefui, fei feipi: “Cüme chau nienofulu am iñche, feimu cüdautuquefun tañi chau reque nütramcayafiel ta Jehová. Ca raquiduamquefun piuqueyehuelayafeneu Jehová tañi huelulcauquen mu”. ¿Chem quellueyu? Quisu feipi: “Raquiduamün Jehová tañi rume piuqueyechequen, feita cüme duameleneu. Feula quimnien Jehová quisucünulayaeneu. Huelulcaufuli rume, Jehová piuqueyenieaeneu ca quelluaeneu. Raquiduamfiel mu iñche fente ñi piuqueyechequen Jehová, cüdautuquelan tañi feipiafiel com tañi ayühulqueteu ca tañi hueñancülqueteu”.
8, 9. Raquiduamliyiñ petu taiñ llellipunon, ¿chumngechi quelluafeiñmu?
8 Petu taiñ llellipunon, raquiduamaiñ taiñ chem pial. Ramtuhuafuimi: “¿Chem huesaque dungu mu rupamequen? ¿Mülepei mai quiñeque che tañi perdonayafiel? ¿Mülepei mai quiñeque hue dungu tañi chaftuafiel?” (2 Rey. 19:15-19). Ca raquiduamafuiñ chem pi Jesús taiñ llellipual, femngechi llellipuafuiñ ñi yamniengeal Jehová tañi üi, ñi cüpayal tañi ngünenietual mapu ca ñi femngeal tañi ayüqueel (Mat. 6:9, 10).
9 Peaiñ ñi rupan taiñ lamngen Aliska pingelu. Quimlu tañi füta tañi nien ta cancer ca tañi layal, cüdautuquefui tañi llellipual. Feitachi lamngen feipi: “Fente tañi hueñancülen, quimquelafun tañi chem piafiel Jehová llellipun mu”. ¿Chem quellueyu? Quisu ca feipi: “Petu tañi llellipunon, hunelu mu raquiduamquen tañi chem piafiel Jehová, femngechi ñi raquiduamnoal iñche mu müten ca tañi füta mu. Femün mu, doi tüngcületun, femngechi fillque dungu acuquei tañi lonco mu ñi feipiafiel Jehová”.
10. ¿Chemu cümei doi alüñma llellipuafiel Jehová? (Ca inaduamnge ti adentun).
10 Matu llellipulayafiyiñ ta Jehová. Huesa dungu no taiñ pichiñma mu llellipuafiel Jehová, huelu doi alüñmale taiñ llellipun, doi nülanentulelafiyiñ taiñ piuque.b Aliska tañi füta, Elías pingelu, feipi: “Antü mu, fentren rupa llellipuquefiñ ta Jehová, huelu doi alüñma nütramcafiel mu, doi fülconquen quisu mu. ¿Chumtepuai tañi llellipuaeteu tüfa? piquelai Jehová, feimu chumteñmayafun rume tañi llellipufiel”. Femngechi femaimi: dulliaimi chem hora ca cheu tami llellipuafiel ta Jehová, femngechi chem no rume tami catrütunoaeteu, doi alüñma llellipuafuimi ca nehuentu llellipuafuimi chi, femngechi huimtuaimi tami alüñma llellipuafiel ta Jehová.
Dulliaimi cheu ca chem hora tami matu llellipunoal. (Inaduamnge parrafo 10).
RAQUIDUAMAIÑ QUIÑEQUE LLELLIPUN HUIRICONCÜLELU BIBLIA MU
11. ¿Chumngechi quelluqueiñmu ti llellipun huiriconcülelu Biblia mu? (Ca inaduamnge ti huichulechi dungu “¿Fei engün reque rupaleimi?”).
11 Biblia mu huiriconcülei ñi llellipun pu poyequefilu Jehová cuifi ca ñi ülcantulelfiel engün. Raquiduamfilmi tañi feipin, doi eluucüleaimi tami nülacünulelafiel tami piuque ta Jehová, ca doi quimaimi tami chem piafiel Jehová tami püramyeafiel. Biblia mu ca peafuimi quiñeque llellipun nüucülelu tami rupamequen.
12. Biblia mu papeltuliyiñ quiñe llellipun, ¿chem ramtuhuafuiñ?
12 Biblia mu papeltulmi quiñeque llellipun, ramtuhuafuimi: “¿Inei feipi feitachi dungu ca chem dungu mu rupamequefui? ¿Chum duamcülefui tati llellipulu? Iñche, ¿ca femngechi troquiuquen? ¿Chem quimeltuafeneu tañi llellipun?”. Tami huiñoldungual feitachi ramtun, mülefui tami doi estudiayal. Huelu femülmi, rume cümelcayafeimu. Feula, peaiñ quiñeque llellipun mülelu Biblia mu.
13. ¿Chem quimeltuqueiñmu ñi llellipuel ta Ana? (1 Samuel 1:10, 11; ca inaduamnge ti adentun).
13 (Papeltunge 1 Samuel 1:10, 11). Ana entulu feitachi llellipun, epu huesaque dungu rupamequefui. Ana pepi niepüñeñquelafui ca tañi müri domo illamcaquefeyu (1 Sam. 1:4-7). Ana pepi catrütulafui tañi huesa rupamequen. Eimi ca femngechi dungu rupamequelmi, ¿chem quimeltuafeimu tañi llellipun? Ana elcünui tiempo tañi feipiafiel Jehová com ñi mülen tañi piuque mu, femngechi doi cüme duamtui (1 Sam. 1:12, 18). Ana reque, iñchiñ ca femngechi feipiafiyiñ Jehová chem taiñ rupamequen ca taiñ chum duamcülen, femngechi elcünuaiñ Jehová mu taiñ fanetunieteuchi dungu ca doi cüme duamtuaiñ (Sal. 55:22).
Ana pepi niepüñeñquelafui ca ayentuquefeyu tañi müri domo, fei llellipui com tañi piuque mu. (Inaduamnge parrafo 13).
14. 1) ¿Ca chem quimeltueiñmu Ana ñi rupan? 2) Raquiduamliyiñ Biblia ñi feipin mu, ¿chumngechi quelluaiñmu taiñ doi cüme llellipual? (Ca inaduamnge ti quimal dungu).
14 Jehová tañi duam mu, Ana choyüi quiñe püñeñ, Samuel pintucufi. Pichin tripantu rupalu, elcünumefi Jehová tañi ruca mu (1 Sam. 1:24-28). Fei Ana llellipufi Jehová, mañumtufi tañi cuñiutucuquefiel tañi pu serfiqueteu (1 Sam. 2:1, 8, 9).c Aflai tañi huesa rupamequen ta Ana, huelu quisu fei mu müten raquiduamcülelafui, doi mai chumngechi tañi cümelcaeteu Jehová. ¿Chem quimeltueiñmu iñchiñ ñi rupan ta Ana? Doi raquiduamtucunieafiyiñ chumngechi taiñ quellumequeteu Jehová, femngechi doi cüme chaftuafuiñ taiñ huesa rupamequen.
15. ¿Chem quimeltueiñmu Jeremías ñi llellipun? (Jeremías 12:1).
15 (Papeltunge Jeremías 12:1). Quiñe rupa Jeremías pefilu tati che tañi huesa femmequen, doi ayüucülelu troquifi, fei huesa duami. Ca huesa duami tati pu Israel che tañi ayentueteu (Jer. 20:7, 8). Fachantü ca femngechi ayentungeafuiñ, ca tati pu che huesa femquelu doi ayüucülelu troquingeafui, feimu huesa duamafuiñ Jeremías reque. Jeremías feipifi ta Jehová tañi huesa duamcülen, huelu culpatulafi ta Jehová, feipintuculafi tañi norngenon. Ca inaduamfilu Jehová ñi norümtufiel tañi pu che, ¿doi maneluupelai Jehová tañi norngen? (Jer. 32:19). ¿Chem quimeltueiñmu tüfa? Pefiel mu norngenochi dungu, feipiafuiñ Jehová taiñ huesa duamcülen, huelu ca maneluucüleaiñ Jehová tañi com norümafiel puuchi antü mu.
16. ¿Chem quimürpuiñ tati levita ñi llellipun meu? (Salmo 42:1-4; ca inaduamnge ti adentun).
16 (Papeltunge Salmo 42:1-4). Ti levita huirintuculu tüfachi salmo pepi amuquelafui ngillatuhue ruca mu ñi püramyeafiel Jehová caquelu pu Israel che engün. Tüfachi salmo pengeli tañi huesa duamcülequefel. Eimi, tati salmista reque duamcüleafuimi chi. Pepi tripaquelaimi chi tami ruca mu tami cutrancülen mu, cam presuleimi chi tami serfifiel mu Jehová. Femngechi rupalmi, quiñeque mu cüme duamafuimi chi, huelu ca hueñancürumetuafuimi. Femfuimi rume, cümei tami llellipuafiel Jehová, femngechi doi cüme ngüneduamuhuaimi tami chum duamcülen ca acordanieafimi chem ñi doi falin-ngen. Femngechi femi ti levita, ngüneduami ñi femafel caquelu dungu ñi püramyeafiel Jehová (Sal. 42:5). Ca raquiduami chumngechi Jehová tañi cuidaeteu (Sal. 42:8). Com piuque mu llellipufiliyiñ Jehová, quelluaiñmu taiñ ngüneduamal taiñ chum duamcülen, taiñ tüngcüleal ca nehuentuleal.
Ti levita huirintuculu Salmo 42 llellipui com tañi piuque mu. Ca femngechi femliyiñ, doi cüme raquiduam nieafuiñ. (Inaduamnge parrafo 16).
17. 1) Jonás ñi llellipun, ¿chem quimeltuafeiñmu? (Jonás 2:1, 2). 2) Rupan mu huesaque dungu, ¿chumngelu acordayafuiñ quiñeque salmo? (Inaduamnge ti quimal dungu).
17 (Papeltunge Jonás 2:1, 2). Ti profeta Jonás mülelu ti fütra challhua ñi pütra meu, eluhui ñi llellipual. Feichi mu, Jonás inanofilu rume ñi feipieteu Jehová, huelu maneluhui Jehová ñi allcütuaeteu tañi llellipun. Tañi llellipun mu, Jonás feipi fentren dungu huiriconcülelu Salmos mu.d Fei, ¿cüme quimniepelafui ñi huiriconcülen feichi lifru Salmos? Fei raquiduamlu fei mu, maneluhui Jehová tañi quelluaeteu. Ca femngechi, loncontucufiliyiñ quiñeque troquiñ Biblia, llellipufilu Jehová acordayafuiñ quiñeque troquiñ, feita yafültucuafeiñmu.
LLELLIPUNIEAFIMI JEHOVÁ TAMI DOI HUENIYEAFIEL
18, 19. Quimnolu iñchiñ chem taiñ llellipual, ¿chumngechi yafültucuqueiñmu Romanos 8:26, 27?
18 (Papeltunge Romanos 8:26, 27). Quiñeque mu fente taiñ fill raquiduamcülen, pepi entulayafuiñ taiñ chem pial. Huelu “Chau Ngünechen ñi nehuen quimfalcünuquei taiñ raquiduam”. ¿Chumngechi femi? Chau Ngünechen ñi nehuen mu, Biblia mu huiriconcülei fentren llellipun femquefulu pu hueniyefilu Jehová. Fei engün, iñchiñ reque, ca femngechi rupaqueingün. Feimu iñchiñ pepi entunolu taiñ llellipun, Jehová ngüneduamafui fei engün ñi llellipun, iñchiñ taiñ feipifiel reque troquiafui, fei huiñoldunguafeiñmu.
19 Tüfachi dungu rume quellufi taiñ lamngen Yelena, Rusia mu mülelu. Fei presuntucungei tañi llellipuquefiel mu ca tañi papeltuquefiel mu Biblia. Fente tañi fill raquiduamcülen ca llicalen, pepi entuquelafui ñi llellipun. Fei feipi: “Quimnolu iñche chem tañi pial llellipun mu, acordafiñ ti llellipun ñi femquefel pu huirintuculu Biblia, iñche feipilu reque troquiafui Jehová. Femngechi raquiduamün mu, rume yafültucueneu tañi huesa rupamequen mu”.
20. Fill raquiduamcüleliyiñ, ¿chumngechi pepicahuafuiñ taiñ llellipual?
20 Llellipuliyiñ, quiñeque mu tüngcülequelai taiñ raquiduam fente taiñ fill raquiduamcülen. ¿Chem quelluafeiñmu? Nehuentu papeltuafuiñ quiñeque salmo petu taiñ llellipunon. Cafei, David reque, huirintucuafuiñ taiñ chum duamcülen (Sal. 18, 34, 142; huenuntu meu ti versiculo 1). Com huirintucungelai chumngechi taiñ pepicayal taiñ llellipun (Sal. 141:2). Femafuimi chumngechi tami doi quelluqueteu.
21. ¿Chumngelu llellipuafuiñ com taiñ piuque mu?
21 Ayühulqueiñmu taiñ quimfiel Jehová ñi ngüneduamquen taiñ chum duamcülen petu taiñ chem pinon rume (Sal. 139:4). Huelu Jehová ayüquei taiñ feipiafiel taiñ chum duamcülen ca taiñ maneluuquen quisu meu. Feimu eluunge müten tami llellipuafiel tami Huenu Chau Jehová. Entuafuimi quiñeque llellipun Biblia mu. Llellipunge com tami piuque mu, feipiafimi Jehová chem tami ayühulqueteu ca tami hueñancülqueteu, fei am cüme hueniyefilu eimi, rumel allcütuaimeu.
ÜLCANTUN 45 Tañi piuque ñi raquiduamqueel
a Peafimi ti lifru Biblia ñi ngülam adniequeiñmeu, fei quintuaimi ti troquiñ “Jehová”, fei hula “Chau Jehová ñi chumngen”.
b Ti llellipun femngelu trahun meu müte alüñmaquelai.
c Ana tañi llellipun mu feipi quiñeque dungu epe trürcülefui ñi huirintucuel Moisés. Fei raquiduampelai ñi feipiel Chau Dios ñi Huirintucun (Deut. 4:35; 8:18; 32:4, 39; 1 Sam. 2:2, 6, 7). Ca rupachi tripantu, María ca feipi quiñeque dungu ñi feipiel Ana llellipulu (Luc. 1:46-55).
d Trürümfinge ñi feipin Jonás 2:3-9 tüfachi salmo mu: Salmo 69:1; 16:10; 30:3; 142:2, 3; 143:4, 5; 18:6 ca 3:8. Tüfachi salmo adcülei chumngechi ñi feipin Jonás.