TROQUIÑ ÑI CHILLCATUNGEAL 43
ÜLCANTUN 41 Allcütuñmayafen tañi ngillatun
Llellipuleaiñ caquelu mu
“ Ngillatuñmahuaimün [...]. Tati nor che ñi llellipun rume nehuen-ngei ca quelluchequei” (SANT. 5:16).
¿CHEM QUIMAIÑ?
Chemu fente falin-ngei llellipual caquelu mu ca chumngechi femafuiñ.
1. ¿Chemu feipiafuiñ Jehová rume falintuñmaqueiñmu taiñ llellipuquefiel?
TATI llellipun rume falintufali. ¿Chemu feipiafuiñ? Jehová elufi tati pu cümeque püllü ca tañi Fotüm falinque cüdau (Sal. 91:11; Mat. 28:18). Huelu feipilafi inei no rume ñi allcütual taiñ llellipun, quisu müten mai allcütuquei. Feimu “allcütuquelu tati llellipun” pingei Biblia mu (Sal. 65:2).
2. ¿Chem quimeltueiñmu ñi femün ta Pablo?
2 Llellipuafuiñ ta Jehová iñchiñ taiñ dungu mu, huelu ca llellipuafuiñ caquelu mu. Femngechi femi apostol Pablo. Feipifi ti Éfeso trahunche: “Ngillatuñmaniehuiyiñ” (Efes. 1:16). Ca llellipui quiñeque che mu. Feipifi ta Timoteo: “Mañumniefiñ ta Chau Ngünechen. Cafei llellipun mu rumel acordaqueyu antü ca pun meu” (2 Tim. 1:3). Pablo ca rupamequefui huesaque dungu mu (2 Cor. 11:23; 12:7, 8). Huelu femfulu rume, eluucülefui ñi llellipual caquelu mu.
3. ¿Chumngelu ngoimayafuiñ taiñ llellipual caquelu mu?
3 Quiñeque mu ngoimayafuiñ taiñ llellipual caquelu mu, ¿chemu? Quiñe lamngen Sabrinaa pingelu, feipi: “Com iñchiñ fentren duam nieiñ. Feimu llellipuliyiñ, acordayafuiñ iñchiñ taiñ duamnieel müten”. Femngechi dungu mu rupamequelmi, tüfachi troquiñ quelluaimu. Peaiñ chumngelu fente falin-ngei taiñ llellipual caquelu mu ca chumngechi femafuiñ.
¿CHEMU LLELLIPUQUEIÑ CAQUELU MU?
4, 5. Taiñ llellipun, ¿chumngechi quelluafui caquelu che? (Santiago 5:16).
4 Taiñ llellipun caquelu che mu “rume nehuen-ngei ca quelluchequei” (papeltunge Santiago 5:16). Llellipuliyiñ caquelu che mu, ¿doi cümelcalepetuafui mai tañi dungu? Femafui llemai. Jesús quimniefui Pedro tañi quimlafiñ piaeteu, feimu feipifi: “Ngillatuñmaeyu ñi afnoal tami feyentun” (Luc. 22:32). Pablo ca quimniefui llellipuliyiñ caquelu mu, doi cümelcaletuafui. Pablo presulelu Roma mu, huirintuculelfi ta Filemón: “Fente tamün llellipuquen, neicümngetuafun, femngechi tamün pemeafiel” (Filem. 22). Femngechi rupai llemai. Pichi rupalu müten, neicümngetui Pablo carcel mu ca huiño amuldungutui.
5 Felei, taiñ llellipun rume nehuen-ngei, huelu Jehová obligaucülelai tañi femal iñchiñ taiñ llellipuquefiel. Chau Jehová ngüneduamquei chumte falintuquefiyiñ taiñ chem llellipuquefiel. Fei quiñeque mu, eluuquei ñi femal taiñ chem pifiel. Feimu doi eluucülequeiñ taiñ llellipuafiel Jehová com piuque mu, maneluucülequeiñ Jehová doi cüme quimniei ñi chumcünuafiel chi dungu (Sal. 37:5; ca inaduamnge 2 Corintios 1:11 ca ti epu nota de estudio).
6. Llellipuliyiñ caquelu mu, ¿chum duamqueiñ fei engün mu? (1 Pedro 3:8).
6 Llellipun mu caquelu mu, quelluaiñmu taiñ cutranpiuqueyeafiel (papeltunge 1 Pedro 3:8). Cutranpiuqueyefiliyiñ caquelu che, inaduamafiyiñ tañi huesalcalen ca eluhuaiñ taiñ quelluafiel (Mar. 1:40, 41). Quiñe loncolelu Miguel pingelu, feipi: “Llellipun mu caquelu mu, inaduamquen chem tañi rupamequen engün, fei doi piuqueyerpuquefiñ. Doi fülconcülelu fei engün mu troquiuquen, inaduamnole engün rume”. Cangelu loncolelu Richard pingelu, feipi: “Ngillatun mu caquelu mu, doi eluucülequeiñ taiñ quelluafiel. Femliyiñ, quelluntucuqueiñ reque ñi huiñoldungungeal taiñ llellipun”.
7. Llellipun mu caquelu mu, ¿chumngechi quelluqueiñmu taiñ cüme raquiduam nieal? (Filipenses 2:3, 4; ca inaduamnge ti adentun).
7 Llellipuliyiñ caquelu mu, raquiduamlayaiñ iñchiñ taiñ rupamequen mu müten (papeltunge Filipenses 2:3, 4). Huecüfü am com ngünenielu, feimu com iñchiñ rupaqueiñ huesaque dungu mu (1 Juan 5:19; Apoc. 12:12). Llellipuleliyiñ caquelu mu, acordaqueiñ “com pu peñi, com pu lamngen ca femngechi cutrancaumequeingün” (1 Ped. 5:9). Quiñe precursora Katherine pingelu, feipi: “Llellipun mu iñche caquelu mu, acordaquen com tañi pu lamngen ca rupaqueingün huesaque dungu mu. Femngechi raquiduamquelan iñche tañi rupamequen mu müten”.
Llellipuliyiñ caquelu mu, raquiduamlayaiñ iñchiñ taiñ dungu mu müten. (Inaduamnge parrafo 7).d
¿INEI ENGÜN MU LLELLIPUAFUIÑ?
8. ¿Inei engün mu llellipuafuiñ?
8 Llellipuafuiñ fentren che mu: pu cutrancülelu, pu huechequeche ayentungequelu ca dicümtucumequengelu ñi huesa femal colegio mu, ca tati pu füchaqueche. Ca llellipuafuiñ taiñ pu peñi ca lamngen mu ñi caiñetueteu tañi familia cam tati gobierno (Mat. 10:18, 36; Hech. 12:5). Quiñeque taiñ pu peñi ca lamngen lefmahuingün tañi ruca mu mülelu am quehuan dungu tañi lof mu. Ca quiñeque cutrancaumequeingün mülen mu fütraque nüyün ca cürüftucu mahun. Iñchiñ com quimlafiyiñ pu peñi ca lamngen cutrancaumequelu. Huelu llellipuliyiñ fei engün mu, pengelaiñ taiñ hueluconque piuqueyeuquen chumngechi ñi huercüel Jesús (Juan 13:34).
9. ¿Chumngelu llellipuafuiñ pu peñi rume cüdauquelu ca tañi domo engün?
9 Ca llellipuafuiñ tati pu peñi quelluntucuquelu Jehová tañi troquiñche mu. ¿Inei engün coneltulei? Ti Troquiñ Adniechequelu ca tañi pu quelluqueteu, pu peñi adcünuquelu Betel ruca, pu loncolelu fillque cüdau Betel mu, pu huitran-ngepaquechi loncolelu, pu loncolelu trahunche mu ca pu quelluquelu. Com engün nieingün fentren cüdau taiñ quelluaeteu, huelu ca chaftuquefingün cüdaungechi dungu (2 Cor. 12:15). Quiñe huitran-ngepaquechi loncolelu Marco pingelu, feipi: “Tañi chau ca ñuque füchaleingu ca cutrancüleingu, feimu rume raquiduamquen tañi camapulen quisu engu mu. Tañi lamngen ca tañi ngillañ cuidaqueyu engu, huelu iñche ayüafun tañi doi quelluntucual, feimu hueñancüquen”. Feitachi pu peñi rume cüdauqueingün, iñchiñ com quimlaiñ chi chem tañi rupamequen engün. Huelu cümei taiñ llellipual fei engün mu (1 Tes. 5:12, 13). Feitachi pu peñi curengele, tañi domo quelluqueyu tañi cüme cüdaucülerpual engün, feimu ca cümei taiñ llellipual fei engün tañi domo mu.
10, 11. ¿Ayüquepei mai Jehová llellipuliyiñ fentren taiñ pu peñi ca lamngen mu?
10 Chumngechi ngüneduampeiñ, llellipuafuiñ fentren pu peñi ca lamngen mu. Quiñeque mu, quiñe no rume üitulayafuiñ chi, huelu llellipuafuiñ Jehová ñi quelluafiel pu carcelconcülelu cam tati pu layeluulu. Quiñe loncolelu Donald pingelu, feipi: “Fentrenque taiñ pu peñi, pu lamngen rupamequefui huesaque dungu mu. Quiñeque mu, com üitulayafuiñ quiñe llellipun mu, huelu llellipuafuiñ Jehová ñi quelluafiel com tati pu cutrancaumequelu”.
11 ¿Ayüquepei mai Jehová femngechi llellipun? Femllei mai. Iñchiñ quimlaiñ chem tañi duamnieel caque quiñeque taiñ pu peñi, pu lamngen. Feimu cümei taiñ llellipual com taiñ pu peñi ca lamngen mu (Juan 17:20; Efes. 6:18). Femün mu, pengelqueiñ taiñ ‘piuqueyefiel com pu peñi ca pu lamngen’ (1 Ped. 2:17).
LLELLIPUAIÑ CAQUE QUIÑEQUE TAIÑ PU PEÑI, PU LAMNGEN MU
12. Ngüneduamfiliyiñ tañi chumlen taiñ pu peñi, pu lamngen, ¿chumngechi quelluaiñmu taiñ doi cüme llellipual?
12 Ngüneduamnieafiyiñ taiñ pu peñi, pu lamngen. Llellipuliyiñ, ca cümei taiñ üituafiel quiñeque peñi ca lamngen. Tami trahunche mu, ¿mülei quiñeque tami pu peñi ca lamngen cutrancülelu? ¿Huesa duamcülepei mai quiñeque hueche tañi ngüchaltucungequen colegio mu ñi huesa femal? ¿Mülepei mai quiñe ñuque quisu tremümmequelu tañi püñeñ ñi poyeafiel Jehová? ¿Mülepei mai quiñe chau ca femngechi rupamequelu? (Efes. 6:4). Inaduamfiliyiñ taiñ pu peñi, pu lamngen, doi cutranpiuqueyeafiyiñ engün, doi eluucüleaiñ taiñ llellipual quisu engün mu (Rom. 12:15).b
13. ¿Chumngechi llellipuafuiñ taiñ quimnoelchi pu peñi ca lamngen mu?
13 Llellipuliyiñ, üituafiyiñ taiñ pu peñi ca lamngen. Femafuiñ pequenofiliyiñ rume. Raquiduamafuiñ taiñ pu peñi, pu lamngen presulelu Crimea, Eritrea, Rusia ca Singapur mapu mu. Taiñ pagina jw.org mu peafuiñ tañi üi engün.c Quiñe huitran-ngepaquechi loncolelu Brian pingelu, feipi: “Huirintucun mu tañi üi quiñe peñi ca lamngen presulelu, fei nehuentu papeltuquefiel mu, doi cüdautuquelan tañi üituafiel llellipun mu”.
14, 15. ¿Chumngechi llellipuafuiñ caque quiñeque tañi duamnieel mu engün?
14 Llellipuaiñ caque quiñeque tañi duamnieel mu engün. Miguel taiñ nütramcapeel parrafo 6 mu, feipi: “Taiñ pagina jw.org mu pequen chem dungu rupamequei taiñ pu peñi, pu lamngen presulelu. Fei raquiduamquen, iñche presuleli, ¿chum duamcüleafun? ¿Raquiduamcülepelayafun tañi domo tañi chumlen? Raquiduamcüleli chem tañi duamnien tañi pu peñi curengelu, doi quelluafeneu tañi chem piafiel ta Jehová” (Heb. 13:3, nota).
15 Raquiduamün mu chem tañi rupamequen fill antü taiñ pu peñi ca lamngen presulelu, doi quimqueiñ chem llellipual. Feipiafuiñ Jehová pu guardia ñi cümelcayafiel taiñ pu peñi ca lamngen presulelu, ca tati pu autoridadcülelu ñi elcünuafiel ñi poyeafiel Jehová carcel mu (1 Tim. 2:1, 2). Ca llellipuafuiñ ñi yafültucungeal ti trahunche ngüneduamfiel mu ñi nehuencülen pu presulelu. Ca llellipuafuiñ Jehová tati pu testigongenolu ñi inaduamafiel ñi cüme femquen tati pu presulelu, femngechi ñi allcütuafiel taiñ amuldungun (1 Ped. 2:12). Felei llemai, ca femngechi dungu raquiduamafuiñ taiñ llellipual pu peñi ca lamngen mu caquelu dungu mu rupamequelu. Taiñ femal, ngüneduamafiyiñ ñi chumlen engün, üituafiyiñ taiñ llellipun mu ca llellipuaiñ caque quiñeque tañi duamnieel mu engün. Femngechi pengelaiñ taiñ “hueluconque piuqueyehun” (1 Tes. 3:12).
¿CHEM ACORDANIEAIÑ LLELLIPULIYIÑ CAQUELU MU?
16. ¿Chem acordayaiñ llellipuliyiñ? (Mateo 6:8).
16 Taiñ peel, taiñ llellipun mu quelluafuiñ caquelu che, feimu rume nehuen-ngei. Huelu acordanieaiñ: Jehová am com quimnielu, llellipufiliyiñ, deu quimniei com tañi rupamequen ca duamnielai taiñ feipiafiel chem ñi chumal. Quiñeque mu, ngüneduamuulayafuiñ chi chem taiñ duamnieel cam ngüneduamlayafuiñ chem ñi duamnieel taiñ pu peñi ca pu lamngen, huelu Jehová deu quimnieuyei (papeltunge Mateo 6:8). Feimu, ¿chemu llellipuafuiñ caquelu mu? Tüfachi troquiñ mu, deu ngüneduamiyiñ quiñeque dungu, huelu ca quiñe dungu mülei: llellipuliyiñ caquelu mu, pengelaiñ taiñ duamtuquefiel ca piuqueyefiel engün. Inayentuquefiyiñ Jehová tañi piuqueyechen, feimu ayühulquefiyiñ.
17, 18. ¿Chemu feipiafuiñ Jehová ngüneduamquei llellipuliyiñ caquelu mu? Feipiaimi quiñe ejemplo.
17 Quiñeque mu, llellipuliyiñ rume pu peñi, pu lamngen mu, felecai müten ñi rupamequen piafuiñ. Huelu Jehová ngüneduamquei taiñ piuqueyeniefiel engün. Raquiduamaiñ quiñe chau nielu quiñe fotüm ca quiñe ñahue. Tati pichi huentru rume cutrancülei, tranaconcülei cahuitu mu, fei tañi pichi ñahue feipieyu: “Quellufinge tañi pichi lamngen, rume cutrancülei” pifi tañi chau. Tati chau quimniefui ñi chumlen tañi fotüm. Piuqueyeniefilu am, cüme cuidaniefi, huelu rume ayühui inaduamfilu tañi pichi ñahue. Fente tañi duamniefiel tañi pichi lamngen, quellufinge pimefi.
18 Jehová ayüquei taiñ duamtuafiel ta caquelu ca taiñ llellipual fei engün mu, femngechi pengelaiñ taiñ duamtuuquenon müten iñchiñ, doi mai taiñ duamtuquefiel taiñ pu peñi ca lamngen, Jehová inaduamai taiñ femün mu (2 Tes. 1:3; Heb. 6:10). Ca quiñeque mu, taiñ llellipun mu doi cümelcaletuafui quiñe che. Feimu llemai, ¡llellipuleaiñ taiñ pu peñi, pu lamngen mu!
ÜLCANTUN 101 Quiñentrür cüdaucüleiñ
a Tüfachi troquiñ mu, ca üi tuculelngei ta quiñeque che.
b Peafimi ti video Takeshi Shimizu: Jewba tati “Allkütukelu tati llellipun” mülelu jw.org mu.
c Tami peafiel ñi üi pu presulelu, quintunge jw.org mu “Testigos de Jehová presos por sus creencias (por países)”.
d ¿CHEM PENGELI TI ADENTUN? Quiñeque peñi ca lamngen rupamequefulu rume huesaque dungu mu, huelu llellipuquei caquelu mu.