¿Cümeafui ñi manejahuenoal?

Femngechi dungu mu rupaquelmi, ¿chem quelluafeimu tami cüme raquiduamal chem chumal?

Quiñeque pais mu, pu deu füchalelu duamniei hunelu mu peaeteu doctor, fei feipiayu tañi manejayal cam manejanoal. Pu cristiano fei mu mülelu mülei tañi feyentuafiel feichi ley (Rom. 13:1). Huelu ngenole femngechi ley cheu tami mülen, fau niei quiñeque ngülam tami petu manejayal cam femhuenoal.

NGÜNEDUAMNGE CHUMNGECHI TAMI MANEJAQUEN

Quiñe troquiñche ñi quelluquefiel pu füchalelu feipi ñi ramtuhual engün:

• ¿Cüdautuquepen mai tañi cüme pelotual pun mu? ¿Cüdautuquepen mai tañi peal señales de transito ca tañi chem pin?

• ¿Matu nengümquelan tañi topel, fei ñi lelial tañi 2 espejo ca tati cüme pengequenolu?

• ¿Cüdautuquen ñi pürümquechi raquiduamal duamfalngele? ¿Alüñmayafun ñi hueluque pünofemal ti acelerador ca ti freno?

• ¿Catrütuquefiñ ta caquelu tañi rume ñochi manejaquefiel ti auto?

• ¿Epeque troncüfun cangelu auto mu? ¿Chocalei tañi auto?

• Chumngechi tañi manejaquen, ¿catrütueneu quiñe soltau?

• ¿Umaunagquen petu manejamequelu iñche?

• Quiñeque pastilla tañi pütocoqueel, ¿doi cüdautuquen ñi manejayal?

• ¿Chem piqueneu tañi familia ca tañi pu hueni? ¿Raquiduamelqueyu tañi manejaquen?

Mai pilmi 1 cam 2 tüfachi ramtun mu, cümeafui tami raquiduamal tami chem chumal. Müte manejahuelayan piafuimi, doi mai pun meu. Fillque rupa ngüneduamuuqueaimi chumngechi tami manejaquen. ¿Cüme manejaquepen mai? piafuimi quiñe hueni cam quiñe familia. Ca conafuimi quiñe curso mu tami doi cüme manejayal. Huelu, mai pifulmi doi epuchi ramtun mu, doi cümeafui tami manejahuenoal.a

BIBLIA ÑI NGÜLAM ADNIEAFEIMU

Adümuulaimi chi tami manejayal cuifi reque, cüdautuafuimi tami quimtucual tüfa. Ca huesa duamelafeimu tami manejahuenoal. ¿Chumngechi quelluafeimu ta Biblia tami cüme ngüneduamuhual ca tami cüme dullial? Ngüneduamaiñ 2 ngülam.

Ñom chengeaimi (Prov. 11:2). Füchan mu cüme pelohuelai che, müte cüme allcühuelai, com tañi cuerpo huesañmauquei. Raquiduamnge tüfa: quiñeque deporte doi cuñihun-ngei, feimu quiñeque füchalu elcünuquefi tañi allfünoal. Ca femngechi feichi ñom chengelu elcünuquei ñi manejayal ngüneduamle ñi cuñihun-ngen (Prov. 22:3). Ca allcütuai caquelu che ñi feipieteu ñi manejaquen mu (ca ngüneduamafuimi 2 Samuel 21:15-17).

Culpaconlayaimi caquelu che ñi lan mu (Deut. 22:8). Quiñe che cüme manejanole ñi auto, rume cuñihun-ngeafui. Feichi che adümuuhuenolu ñi manejayal huelu femcünuunole, layafui ca tuntucun mu langümcheafui. Femngechi culpaconafui caquelu che ñi lan mu.

Manejahuenoli, respetangehuelayan pilayaimi. Loncontucuaimi: Chau Jehová piuqueyenieimu, fei rume falintuquei tami ñom chengen ca tami duamtuquefiel caquelu che ñi mongen. Fei feipicünui tami quelluaeteu ca tami yafültucuaeteu (Is. 46:4). Chumcaunorume quisucünulayaimu. Feimu tami dullial tami manejayal cam femhuenoal, llellipuafimi Jehová tami eluaeteu quimün ca adnieaeteu Biblia ñi ngülam.