Amulepe taiñ quiñeucüleal
TATI apostol Pablo feipifi tati pu cristiano Éfeso mülelu: “Hueluquentu duamtuniehuaimün piuqueyehun mu. Chau Ngünechen ñi nehuen mu quiñeucüleimün. Yafüluumün tamün cüme yeucüleal, femngechi amuleai tamün quiñeucülen” (Efes. 4:2, 3).
Pablo ñi feipin, Chau Ngünechen ñi nehuen mu müten quiñeucüleiñ. Huelu ca mülei taiñ yafüluhual ñi amuleal taiñ quiñeucülen. Felei llemai, com iñchiñ mülei taiñ quelluntucual ñi amuleal taiñ quiñeucülen.
Raquiduamnge tüfa: quiñe tati che tami piuqueyenieteu elueimu quiñe auto. Tañi cüme amuleal ti auto, mülei tami cuidayafiel. Huelu huesañmaule tami cuidanofiel mu, culpatulayafuimi tami elueteu ti auto.
Felei, Jehová elueiñmu taiñ quiñeucülen, quiñe regalo reque felei. Huelu ñi amuleal taiñ quiñeucülen, caque quiñeque iñchiñ mülei taiñ cuñiutucuafiel. Feimu pichi yafcaucüleliyiñ quiñe peñi cam lamngen iñchiñ, ramtuhuafuiñ: “¿Com piuque mu quelluntucuquepen mai taiñ quiñeucüleal?”.
‘YAFÜLUHUAIÑ TAIÑ CÜME YEUCÜLEAL’
Pablo ñi feipin, quiñeque mu cüdaungeafui taiñ com cüme yeucüleal taiñ pu peñi ca pu lamngen iñchiñ, doyelchi mai huesa duamelngeliyiñ. Taiñ quiñeucületual, ¿mülei taiñ feipiafiel ti che taiñ huesa duameleteu? Quiñeque mu duamfalngelayafui chi. Ramtuhuafuiñ: “Feipifili tañi huesa duameleteu, ¿quiñeucületuayu cam doyelcületuai ti dungu?”. Quiñeque mu doi cümeafui rulpacünuafiel müten ti dungu (Prov. 19:11; Mar. 11:25).
Ramtuhuafuiñ: “Feipifili tañi huesa duameleteu, ¿quiñeucületuayu cam doyelcületuai ti dungu?”.
Pablo feipi: “Hueluquentu duamtuniehuaimün piuqueyehun mu” (Efes. 4:2). Quiñe lifru feipi Pablo ñi feipin ca rulpadungungeafui “ñi piuqueyehual che chumngechi ñi femngen müten”. Quimtucunieaiñ, taiñ pu peñi, pu lamngen ca culpafengei iñchiñ reque. Com iñchiñ yafüluuqueiñ taiñ inayentuafiel Jehová ñi chumngen (Efes. 4:23, 24). Huelu taiñ culpafengen mu, com cüme femquelaiñ (Rom. 3:23). Acordanieliyiñ tüfa, doi cüdautulayaiñ taiñ nieluhual paciencia, perdonahual ca taiñ quiñeucüleal.
Rulpacünuliyiñ taiñ huesa duamelngen, cüme yeucüleaiñ ca quiñeucüleaiñ trahunche mu. Pablo feipilu “cüme yeucüleal”, griego quehun mu feipilei “ligamentos” (Efes. 4:3). ¿Chem pifui tüfa? Taiñ cuerpo niei fillque troquiñ, huelu taiñ ligamento quiñeucünuquefi. Ca femngechi taiñ cüme yeucülequen ligamento reque felei. Cüdaungefule rume, taiñ cüme yeuquen ca piuqueyeuquen quelluqueiñmu taiñ quiñeucüleal trahunche mu.
Quiñeque taiñ pu peñi, pu lamngen huesa duamelafeiñmu cam nüngayelafeiñmu chi, huelu huesa troquilayafiyiñ, doi mai cutranpiuqueyeafiyiñ (Col. 3:12). Com culpafe chengeiñ, feimu ca huesa duamelquefiyiñ caquelu. Acordanieliyiñ tüfa, quelluntuculeaiñ taiñ quiñeucüleal.