Yafültucungei pu domo huesalcangequelu
“FENTREN domo ca pichique malen mapu meu fill huesaque dungu femngequei. ¿Femngechi rupaqueimi? Tüfachi papel mu peaimi chumngelu Chau Dios duamquei tami cuñiutucuhual ca chem femal tañi cutrancangehuenoal pu domo”.
Femngechi feipi tati articulo “¿Chem quelluafeyu pu domo ñi cuñiutucuucüleal? ¿Chem pilei ti Biblia?” mülelu jw.org mu. Afpun mu feitachi articulo mülei quiñe enlace ñi entungeal ti articulo impresora mu, fei müchamngeafui quiñe tratado reque. Quiñe lamngen Stacy pingelu Estados Unidos mülelu, feipi: “Impresora mu entufiñ quiñeque feitachi tratado. Fei cangelu lamngen iñchiu yefiyu quiñe refugio cheu ñi cuidangequen quiñeque domo huesalcangequefulu”.
Quiñe domo cüdauquelu refugio mu feipi ñi doi yelelngeal tratado ñi eluafiel caquelu domo mülelu fei mu. Femngechi doi 40 tratado elcünungei ca 30 tarjeta ñi doi quimal jw.org. Ca antü, ti adniefilu ti refugio feipi pu testigo ñi pengelelafiel pu domo mülelu refugio mu chumngechi estudiayal Biblia.
Stacy ca caquelu epu lamngen amuingün cangelu refugio mu, elcünuingün 5 tratado ca doi cüpalelmuchi pingeingün. Quiñe domo cüdauquelu ti refugio mu, feipi: “Feitachi papel rume quelluafi pu domo fau mülelu. Rume duamnieiñ femngechi quimeltun”. Ca antü huiñotulu taiñ pu lamngen, quiñeque domo mülelu ti refugio mu ayüfuingün ñi peal chumngechi quimeltuchequeiñ Biblia, ca epu domo feipingu ñi amual Trahunhue Ruca mu ca semana.
Taiñ lamngen Stacy feipi: “Afmatulehueiñ tati pu domo ñi ayühunquechi lloufiel tüfachi tratado. Entungen mu tüfachi articulo quiñe tratado reque, rume ayüfali ñi elungeal pu domo huesalcangequelu, femngechi ñi quimal Jehová tañi femal. Rume ayühun-ngei ñi fente cüme lloungen ti tratado. Rume ayünieiñ peal chumngechi adnieaiñmu Jehová ñi yelelafiel feitachi pu domo ti cümeque dungu”.