Chi Fütra Mangiñ Ko

WEKUN chi fütra wampo ruka mew, pu che amuley ñi mongen chumngechi ngen kuyfi. Petu feyentukelayngün akual chi Fütra Mangiñ Ko. Chumngechi chi ayekawpelayngün. Welu pichin antü wüla, ayewelayngün.

Fütra mawünmarumey. Nagi wenu mu chumngechi waychüfrupachi kiñe metawe ko reke. ¡Rüfngerkey ñi pin Noe! Welu iney no rume pepi konwelay ponwi fütra wampo ruka mew. Chaw Ngünechen Jewba küme rakümkünuy ti wülngiñ.

Pürüm (pür) itrokom nag mapu takun ngey. Ti ko fütrake lewfü reke ngetuy. Wenküfentufi pu anümka, ka nengümfi fütrake kura, ka yafawkülen tranarupay. Tati pu che llükayngün. Pürayngün doy fütrapürachi wingkul mapu. ¡Awem kay, müna duamtupelafuyngün ñi küme allkütuafiel Noe, ka konpual chi fütra wampo ruka petu nülaniefuy chi wülngiñ! Welu fewla iney no rume pepi konwelay.

Amulerkey ti ko ñi püralerpun. Meli mari antü ka meli mari pün mawüni. Püralerpuy fütra wingkul mew, ka müchay müten kom fütra wingkul takungey. Chumngechi feypikünuy Ngünechen, kom pu che ka pu kulliñ mülelu wekun chi fütra wampo ruka layngün. Welu kom mülelu ponwi mu montuyngün.

Noe ka ñi pu fotüm küme küdawingün ñi dewmafiel tati fütra wampo ruka. Ko witranpüramfi, ka kenayi wente ko mu. Feymew, kiñe antü mawünwenolu, alofi Antü. ¡Afmatungey ñi adkintungen! Mülewey kiñe fütra lafken müten kom püle mu. Ka chi fütra wampo ruka müten pengen ngey, kenaykeawi wente ko.

Ngewelay fütrake wentru. Wiñowelayayngün ñi wedalkamekeafiel ta che. Itrokom layngün, ñi pu ñuke ka kakelu wedake che engün. Welu ¿chumi tañi chaw engün?

Feychi pu fütrake wentru ñi chaw, iñchiñ trürlay, che no engün kay tati. Werken püllü ngefuyngün, nagpalu engün Mapu mu ñi mongeleam wentru reke. Fey mu, akulu chi Fütra Mangiñ Ko, larkelayngün kakelu che reke. Pünewetulayngün ñi che kuerpu, dewmafulu engün, ka wiñotuyngün wenu mapu werken püllü reke. Welu koneltuwelaeyew Ngünechen ñi konal ñi pu werken püllü reñmawen. Satana ñi werken püllü ngetuyngün. Biblia mu tüfachi pu püllü, weküfü pingey.

Ngünechen fey wüla küpali kiñe kürüf, ka tati fütra mangiñ ko ñochingey ñi nagün. Rupachi kechu küyen, chi fütra wampo ruka mülenagi wente kiñe fütra wingkul. Alün antü rupay, ka mülelu ponwi mu pepi adkintuyngün wekun mu, ka pefingün wechun wingkul. Ko amulerpuy ñi nagkülen.

Feymu Noe neykünufi kiñe kurü üñüm tripalu wampo ruka. Tüfachi üñüm pichi (püchü) müpüyawi, welu wiñoketuy penolu chew ñi küme anüpual. Femngen femngen tüfa, fey wiñoy, anükey wente wampo ruka.

Noe ayüfuy ñi pemeafiel ti ko ñi arkün mapu mu, feymu werküfi kiñe palluma wampo ruka mu. Feyta ka wiñotuy, penolu am chew ñi mülen-nagpual. Noe ka kiñe rupa werküfi, ka wiñoy kiñe olifu tapül ñi wün mew küpalnietuy. Tati ko dew nagi. Noe werküfi chi palluma küla rupa mu, ka fey wüla tüfachi üñüm pey kiñe angkün mapu chew ñi mongeleal.

Fewla Ngünechen dungufi ta Noe. Feypifi: ‘Tripange wekun wampo ruka mew. Yenieaymi eymi engün kom tami pu reñma (pu che) ka kom kulliñ.’ Mülepufuyngün chi wampo ruka doy kiñe tripantu. ¡Pellelnieymi müna ayüwküleyngün ñi ka mülen wekun, ka ñi mongelen!