Moyse trawawfi ti lil fütra kura

RUPACHI alün tripantu... ¡mari tripantu, epu mari tripantu, küla mari tripantu, küla mari aylla tripantu! Ka tati pu Israel che petu müleyngün ti wellin mapu mew. Welu kom feychi tripantu mu Jewba küme ngüneytufi ñi pu che. Yafütulkefi mana mew. Antü mu ngüyülkefi kiñe tromü alüpürachi orkon (poste) reke, ka pun mu kiñe kütral alüpürachi orkon reke. Ka afkelafuy ñi takun engün, alülkelafuy ka kutrankelafuy ñi namun engün.

Tripapatulu Egipto mu engün rupay meli mari tripantu, wünelechi küyen mew. Tati pu Israel che wiño mületuyngün Kade mapu mew. Faw mülefuyngün amulu pu mari epu ellka-ngüneduammapufe ñi ngüneduammapufiel Kanaan mapu mu, epe meli mari tripantu kuyfi mu. Lay Miriam Moyse ñi deya Kade mu. Ka femngechi kuyfi reke mülekefuy fentren wedake dungu.

Tati pu che pekelafuy ko. Fey mew lladkütufi engün Moyse: ‘Doy kümeafuy ta laliyiñ. ¿Chumngelu (chemu) entumuyiñ Egipto mew, taiñ küpalmuafiel tüfachi wedake mapu mew, chem rume tremkelay? Tüfa mew ngelay kachilla, igo, ufad (ofad), ka granada. Ka ngelay ko rume taiñ pütokoal.’

Moyse ka Aaron amulu ti fütra tolto ruka mew ñi llellipual, Jewba feypifi ta Moyse: ‘Trawülfinge tati pu che. Fey mew puñma mew kom engün dungufinge feychi lil fütra kura mülelu üye mew. Feymu alün ko tripayay tati pu che ñi pütokoal, ka kom tañi pu kulliñ.’

Feymew Moyse trawülfi ta pu che, ka feypi: ‘¡Allkümün, che ta maneluwkülenolu Ngünechen mew! ¿Aaron iñchiw entuleluwaiñ ko tüfachi fütra lil kura mew?’ Feymew, Moyse trawawnakümfi ti lil fütra kura epu rupa ñi retrü mew, kiñe fütra witrunko tripay feychi mu. Niey ko kom che ka kom pu kulliñ mülelu üye mew.

Welu Jewba illkutufi (lladkütufi) Moyse engu Aaron. ¿Kimimi chumngelu (chemu)? Moyse ka Aaron am pingu ta kidu engu entulelafi ko ti lil fütra kura mew. Welu rüftu mu Jewba ta femfuy. Moyse ka Aaron feypirkelay tüfachi rüf dungu, Jewba feypi ñi kastigayafiel (kutrankayafiel) engu. ‘Eymu yelayafimu tañi pu che ñi konal Kanaan mapu mu,’ pi ta Chaw Ngünechen Jewba.

Pürüm (pür) tati pu Israel che tripayngün Kade mapu mew. Pichiñma mu wüla akuyngün Or fütra wingkul mew. Üye mew, Aaron lay wechun ti fütra wingkul mew. Lalu niefuy kiñe pataka epu mari küla tripantu. Tati pu Israel che müna weñangküleyngün, feymu lle ngümayngün küla mari antü Aaron mu. Eleasar, Aaron ñi fotüm, longko saserdote ngerpuy ti Israel chi pu che mu.