Femlaingün tañi feipicünuel

Chau Jehová feipifi ta Moisés: “Pürapange ti huincul meu cheu tañi mülen iñche. Huirintucuan tañi ley laf cura mu, fei eluayu”. Moisés umañpui üyeu 40 antü ca 40 pun. Petu ñi mülen fei mu, Chau Jehová huirintucui 10 ley dungu 2 laf cura mu, fei elufi ta Moisés.

Pichin antü rupalu, pu Israel che raquiduamingün ñi quisucünueteu Moisés. Feimu feipifingün ta Aarón: “¡Duamnieiñ quiñe lonco! ¡Deumalelmuiñ quiñe dios!”. Aarón huiñoldungui: “Cüpalelmuan tamün oro fillem”. Fei adentucünufi quiñe pichi culliñ feiti oro mu. Pu che eluhui ñi feipial: “¡Tüfa taiñ dios taiñ montuleteu Egipto mu!”. Fiestañmaingün ca püramyefingün feichi pichi culliñ. ¿Cümepei mai ñi femün? Femlai, feipicünufuingün ñi poyeafiel Chau Jehová müten, huelu femlaingün.

Chau Jehová adquintufi ñi femmequen pu Israel che, fei feipifi ta Moisés: “Amutunge, pu Israel che poyemequefingün quiñe coila dios, inalaingün iñche tañi feipin”. Moisés nagi ti huincul mu, yeniefui tati 2 laf cura tañi cuhu mu.

Epe puulu Moisés cheu ñi mülen pu Israel che, allcüi ñi ülcantumequen engün. Fei hula pefi ñi failamequen ca ñi poyefiel engün quiñe pichi culliñ. Rume huesa duami Moisés, ütrüfnacümfi ti 2 laf cura, fei trafolfi. Müchai müten apümfi ti pichi culliñ, fei ramtufi ta Aarón: “¿Chem dungu anta feipingeimi tami femal? ¿Chumngelu eluhuimi tami femal fente huesa dungu?”. Aarón huiñoldungueyu: “Tüngcülenge, eimi quimnieimi ñi chumngen engün. Ayüniefuingün quiñe dios, feimu cütral mu tucufiñ ti oro, fei huefrumei feichi pichi culliñ”. Müna huesa femi Aarón. Moisés ca huiño pürai huincul mu, llellipumefi ta Chau Jehová, fei ñi perdonayafiel pu Israel che.

Chau Jehová perdonafi pu Israel che ayünielu ñi poyeaeteu. Feimu rume falin-ngefui ñi femal engün tañi feipin Chau Jehová ca Moisés, ¿felei?