Jeriko ñi wallmalechi kura malal

¿CHUMMEKEY am ñi trananagal Jeriko ñi fütrake kura malal? Kiñe awkan (weychan) reke rupalu, ka apümngelu trokiwingün. Welu felelay tati. ¡Fey Jewba ñi afmatun dungu! Peafiyiñ chumngechi rupan.

Allkütunge chem dungu Jewba ñi feypifiel ta Josue: ‘Eymi ka tami pu awkafe (weychafe) trekaleaymün wallon waria mew. Trekalen rupayaymün wall mu kiñe rupa müten antü mu, kayu antü femaymün. Yenieymün ti tukulpangepeyüm kakon. Regle saserdote müley ñi wüne amuleal kakon mew, ka ñi dungulal engün tañi kullkull.

‘Regle antü mu regle rupachi trekaleaymün ina waria mu. Fey mew alüntu dungulafimün tamün kullkull, ka kom eymün newen wiraraymün kiñe awkan wirarün. ¡Ka tati fütrake kura malal trananagay!’

Josue ka tati pu che femi engün chumngechi feypieyew Jewba. Petu trekaleyngün kom ta che dungulayngün. Kullkull ñi dungun, ka ñi trekalen fey müten allküngeay. Pu kayñe mülelu Jeriko mu, llükalepelayngün. ¿Pepi pefimi feychi kelü def pültruley kiñe fentana mu? ¿Iney ñi fentana tüfa? Fey llemay, Raab femi kom ñi feypietew ti epu ellka-ngüneduammapufe. Kom ñi reñma (pu che) müley ponwitu ruka, llüwatuleyngün.

Af mew, tati regle antü mu, fey wüla ñi regle rupachi trekayawün ina waria mu, dungulngey tati kullkull, wirari pu awkafe, ka tati fütrake kura malal trananagi. Josue feypifi engün: ‘Langümfimün kom che, ka lüpümfimün kom chi waria. Lüpümfimün kom. Elkünuymün müten plata, milla (oro), kofre, ka pañilwe, ka elelaymün ta Jewba ñi fütra tolto ruka ñi trawülechi falin chi yewün ellkanieel.’

Josue feypifi tati epu ellka-ngüneduammapufe: ‘Nentulelfimu Raab ka kom ñi reñma (pu che) engün ñi ruka mu.’ Montuyngün, chumngechi ñi feypikünuetew tati epu ellka-ngüneduammapufe.