QUIMELTUN 30
Rahab ellcafi pu huerquen
Feichi 2 huentru huercüngelu ñi ngüneduammeafiel Jericó umañpuingün quiñe domo tañi ruca mu, Rahab pingefui. Jericó ñi lonco ülmen feipingelu tüfa, huercüfi pu soltau Rahab tañi ruca mu. Huelu Rahab ellcafi pu huerquen tañi techo ruca mu, fei ngünencafi pu soltau ñi quintumeal cañpüle. Fei hula, Rahab feipifi pu huerquen: “Iñche cüme quimnien Chau Jehová ñi mülen eimün meu, fei ngen-ngeaimün tüfachi mapu. Feimu quelluhuaiñ. Huelu, fürenemuan, montulmuan tañi familia”.
Pu huerquen feipingu: “Traricünufilmi quiñe quelü llasu tami ventana mu, cüme feleai com tati pu che ruca mu mülelu. Femngechi montuai tami pu che”.
Rahab quellufi pu huerquen ñi tripayal tañi ruca mu. ventana mu nagingün quiñe llasu meu. Fei hula, ti pu huerquen ellcahuingu mahuidantu mu. Rupalu 3 antü, huiñotuingu cheu ñi mülen Josué. Feichi mu, pu Israel che rumeingün Jordán leufü mu ca pepicahuingün ñi ngen-ngeal feichi mapu. Fei Chau Jehová feipifi pu Israel che: “Fill antü hualloñmayafimün Jericó huaria 1 rupa”. Femngechi femingün 6 antü. Ca antü mu, mülefui ñi hualloñmafiel 7 rupa ti huaria 1 antü mu müten. Fentecünulu engün, pu sacerdote dungulfingün ti cullcull ca pu Israel soltau nehuentu huiraringün. Fei tranapuhui Jericó ñi cura malal. Feichi cura malal mu mülefui Rahab tañi ruca, huelu tranapuulai. Rahab maneluhui Chau Jehová mu, feimu montuingün tañi pu che engün.
“Rahab tañi femün mu nor che troquingei, ¿felelai? Felei llemai. Cüme lloufi tati pu huerquen ca quellufi ñi lefmahual, fei nor che troquingei” (Santiago 2:25).