KIMELTUN 3
Raab feyentuy Jewba mu
¿Ayüfuymi ta mongeleal rangiñ pu kuyfike che mew? Kuyfi mu mülefuy kiñe waria, Jeriko pingefulu, Kanaan pingechi mapu mu. Rakiduamnge mülepulmi üyew. Feychi waria mew tati pu che feyentukelay (mupitukelay) Jewba mu. Ka fey mew müley kiñe domo Raab pingelu.
Pichi malen-ngelu Raab, nütramelngey chumngechi Moyse wüdamfi ti Kelü Lafken, ka nentufi tati pu israelche Egipto mapu mew. Kafey kimi chumngechi Jewba kellufi tati pu israelche ñi wewafiel tañi pu kayñe fillke awkan (weychan) mew. Ka fewla allküy ñi fülkülepalu Jeriko waria mew llemay.
Raab feyentuy (mupituy) Jewba mu, feymu kellufi tati pu lloftufe
Kiñe pun (trafia) epu israelche konpuyngün Jeriko waria mu lloftumeal chi mapu. Akuyngu Raab mu, fey mangeleyew ñi umakayal kidu ñi ruka mu. Feychi pun Jeriko ñi longko ülmen allküy ñi akun kiñeke lloftufe mülelu Raab ñi ruka mew. Feymu werküy kiñeke wentru ñi yemeafiel. Welu ¿chem chumi Raab? Ellkakünufi tüfachi epu wentru wente ruka mu, ka feypifi ti longko ülmen ñi pu kona: ‘Pu lloftufe dew (chay no) amutuyngün. Welu inantukufilmün, dipuafimün tati’. Femngechi mu Raab kellufi feychi epu israelche. ¿Chumngelu am (chemu) kellufi?... Raab feyentuniefi (mupitubi) ta Jewba. Ka kimi Kidu ñi kelluniefiel tati pu israelche nürpualu (ñi yebel) Kanaan mapu ka Jeriko waria.
Epe amutulu ti epu lloftufe, feypikünufingu ta Raab: ‘Apümkangele Jeriko, eymi ka tami pu che montuaymün tamün mongen’. Welu ¿chumafuy Raab montulal tañi mongen?... Tüfachi epu wentru feypifi: ‘Müley tami pültrükünual tüfachi kelü def (trape) tami fentana mew, ka trapümfinge tami pu che tami ruka mew’. Raab femi kom ñi feypietew ti epu lloftufe. Fey wüla ¿kimimi chem dungu rupay?...
Jewba montulfi ta Raab ka tañi pu che
Pichiñ antü wüla, pu israelche kayu antü wallmeyngün kiñe rupa müten ta Jeriko waria mu. Ka chem pilayngün rume. Welu akulu chi regle antü, regle rupa wallmeyngün ti waria mu. Ka kom newentu wiraringün. Feymu Jewba trananagümfi Jeriko ñi fütra kura malal. Welu ¿Raab ñi ruka kay? Jeriko ñi fütra kura malal mu müley ñi ruka, welu ¡trananaglay rume! Pültrünielu may ti kelü def tañi fentana mu. ¿Peymi tüfachi kelü def chi adentun mew?... Feley tati, femngechi Raab ka tañi pu che montuy ñi mongen engün.
¿Chem dungu kimeleymu Raab ñi rupan mew?... Raab kimi fill afmatufalchi dungu Jewba mew, feymu feyentufi (mupitubi). Eymi ka petu kimimi fentren afmatufalchi dungu Jewba mu. ¿Feyentuafimi kay (mupituabimi), Raab reke?... Femaymi tati.