¿Ayülafuymi kimal tati rüf dungu?

¿CHEM anta ti rüf dungu? Kiñeke ramtun dungun, tañi niel ta pu che. Eymi ramtukeymi chi:

• ¿Duamniepeyiñmu Chaw Dio may?

• ¿Afpeay may kiñe antü, itrokom wedake dungu?

• ¿Chumleketuy layüm che, mülelu eltun mu?

• ¿Ka pepetuafiyiñ may tati lachi pu che?

• ¿Chumgechi ngütramkafun Chaw Dio tañi allküñmayatu?

• ¿Chumgechi chi ayüwküleafun iñche?

¿Chew peafuymi llowdungun tami ramtun? Eymi ramtuafiñ pilmi doy kim chi che, kake rumey tami feypiatu. Feychi llowdungu üyepülemu duamgewelay, che welukey ñi rakiduam.

Welu müley kiñe chillka, mupin llowdungun nielu. Jesukristo ta feypi, tañi ngütramkan tañi Chaw engu: “Eymi tami rüfngechi dungu mew” (Juan 17:17). Fachantü kimgey feychi Dungu, Biblia pingelu mew. Amulelu tüfa pichi kintulkunuafiyu llowdungun, mangelfalu tañi wülniel ta Biblia, tati wüne ramtun.

¿Duamniepeyiñmu Chaw Dio may?

¿CHUMGELU TÜFACHI RAMTUN? Müleyiñ tüfachi mapu mew, chew fentreley kutrankawün, wedake che, weñekeyngün, langümukeyngün. Alün religion kimelkelu, müley wedake dungu: “Dio tañi femkunuel”, pikeyngün.

BIBLIA FEYPI. Chaw Dio wülkelay wedake dungu. “¿Feychi dungu mew anta feypiaiñ Ngünechen [Chaw Dio] tañi nienon ta nor dungu? ¡Feypilayaiñ llemay!” (Romanu 9:14). Chaw Dio ta piwkeyeniefi kom pu che, feymu küpa kellunieyiñmu taiñ kümelkaleal. Dio duamniey kom che manelukuleal ñi müleal afnoachi mongen tati küme rumel mülewe mew. Fentren duamniefiel ta che, Dio wüli tañi fotüm mapu mew, tañi layal femgechi montulafiel che, femgechi taiñ pengelatu chumgechi duamniepeyiñmu Chaw Dio (Juan 3:16).

Ka kintulnge Génesis 1:26-28; Santiaw 1:13, ka 1 Pedro 5:6, 7.

¿Afpeay may kiñe antü, itrokom wedake dungu?

¿CHUMGELU TÜFACHI RAMTUN? Awkan (weychan) mu, lakonküley che. Kafey itrokom kutrankawküleiñ.

BIBLIA FEYPI. Chaw Dio feypikünuy, küpalal kümelen kom mapu mu. Kidu ngünenietualu wenu mapu mu kom che nag mapu mülelu, feymu kom pu che “kimwelay awkan (weychan)”, kafey “tañi fütra kuchillu engün, ta araw ngetuay”, fewla, niekefeleyngün tañi nalküm, küdawtualueyngün feymu (Isaías 2:4). Kafey, Dio apümay wedake dungu ka kutrankawün, feymu Biblia feypi: “[Dio] angkümüñmangetuay engün tañi külleñu, fey ngewelayay ta lan, ngüman no rume, eyütun no rume, kutrantun no rume. Itrokom tati mülekefulu am ta kuyfi dew ta mülewetunolu” (Apokalipsi 21:3, 4).

Ka kintulnge Salmo 37:10, 11; 46:9, ka Miqueas 4:1-4.

¿Chumleketuy layüm che, mülelu eltun mu?

¿CHUMGELU TÜFACHI RAMTUN? Epe kom religion feypi, lay ta che tripakey tañi püllü, kake mapu mongelepuketuy. Kakelu ka feypikey, tati lalu wiñotuken kümefempalu kam wedafempalu. Kiñeke feypikey, wedake che lay, amulekey tañi kutrankawkulen, “Dio tañi femgechinieyu”, pikeyngün.

BIBLIA FEYPI. Lay che niewelay mongen, pelowelay, allküwelay, kimlay chem no rume. Biblia feypi Eclesiastés 9:5 mu: “Tati lalechi che, turpu kimwetulay”. Kidu engün laletulu, pepi fill femwekelay chumgechi no rume, kellulafuy mongelelu (Salmo 146:3, 4).

Ka kintulnge Génesis 3:19 ka Eclesiastés 9:6, 10.

¿Ka pepetuafiyiñ may, tati lachi pu che?

¿CHUMGELU TÜFACHI RAMTUN? Kom küpa mongelekefuyiñ ka tayiñ ayüwkuleafel, ñi trawülukuleal kom chi che tayiñ piwkeyeniel. Feymu, küpa petuafiel tañi pu reñma, pu weni tati lalu.

BIBLIA FEYPI. Wiñotuay tañi mongen, lalechi che. Jesu feypi “tati pu layelu [...], fey tripapatuay engün ñi rüngan küfwe mew” (Juan 5:28, 29). Tati pu che mongeletualu ta mapu mu, rumel mongeleayngün, küme rumel mülewe mu, chumgechi tañi pin Dio, we dewmalu mapu (Luka 23:43). Feyti ka antü mu, kom norgechi che, Dio ta eluayu tañi rumel mongeleal ka ngewelayay kutran engün. Biblia feypi: “Tati pu norgechi che lloway ti mapu ñi ngen-ngeal engün, ka rumel müleayngün fey mu” (Salmo 37:29).

Ka kintulnge Job 14:14, 15; Luka 7:11-17, ka Hecho 24:15.

¿Chumgechi ngütramkafun Chaw Dio tañi allküñmayatu?

¿CHUMGELU TÜFACHI RAMTUN? “Ngillatukawken, welu iney rume llowdungulanu”, pikey ta che.

BIBLIA FEYPI. Allkütuñmayanu Dio piliñ, ngütramkafiyiñ chumgechi kidu tañi kümi pial. Biblia feypi 1 Juan 3:22 mu: “Fey kisu ta eluaeiñmew kom taiñ ngillatufiel, müngeltuñmafilu am iñchiñ kisu ñi werkün dungun ka femkeiñ kisu tañi ayükeelchi dungu”. Feymu müley tañi kimal, chuchingen tañi werkün dungun, ka ngütramkayafiel chumgechi tañi piel. Ka feymu, Jesu ngülameiñmu, ngütramkalmün Dio mu “ka wiñome feypikefilmün”, ka feypi, feypikonkülekelaymün (Matew 6:7).

Ka kintulnge Salmo 65:2; Juan 14:6, 14, ka 1 Juan 5:14.

¿Chumgechi chi ayüwküleafun iñche?

¿CHUMGELU TÜFACHI RAMTUN? Che feypikey, ñi nielmu küme ruka, alün kulliñ, küme üy, kom che kimatu, küme adgen, feymu ta müley rüf ayüwün. Welu kom nieyngün rume, pelay ñi ayüwün.

BIBLIA FEYPI. Jesu kimeli chumgechi küpalafel ayüwün, kidu feypi: “Ayüwün niey tati duamnielu ñi llowael Ngünechen [Chaw Dio] ñi küme dungu” (Matew 5:3). Rüf ayüwün niealyiñ, müley taiñ peal taiñ doy duamniel: tati rüf dungu, taiñ kimal iney ngen Dio ka taiñ chumal iñchiñ mu. Feychi rüf dungu, müley ta Biblia mu. Kimnolmi tami chumal, kintuaymi ngülam Biblia mew, ka feyentuaymi. Femgechi doy fali tami mongen ka doy ayüwkuleymi (Luka 11:28).

Ka kintulnge Proverbios 3:5, 6, 13-18 ka 1 Timotew 6:9, 10.

Kimfimi tüfachi llowdungu, Biblia tañi wülel kayu ramtun mu. ¿Doy küpa kimfuymi? Eymi nielmi feychi duamnielu, ‘ñi llowael Chaw Dio ñi küme dungu’, eymi doy küpa kimfuymi. Eymi ramtukeymi chi: “Chaw Dio duamnieiñmu pingekey, fütra kuyfi mu, müley wedake dungu ka kutrankawün ¿chumgelu Dio fentepupe, pikelay? ¿Chumgechi doy kümelkaleal, kom iñche ñi pu che?” Biblia kom feypi tüfachi ramtun dungu ka chem ramtun rume nielmi.

Welu fentren che ayülay ramtual tati Biblia mew. “Rume fütra chillka ka kimfalmalay ñi dungu”, pikeyngün. Eymi ka feypikeymi chi. ¿Ayülafuymi peal llowdungu wülün Biblia? Feymu, tati dungukelu iney ngen Jewba mu, nieleyu epu kellun.

Kiñe kellun, chillkatun müley fey pingey, Tati Biblia ñi rüf kimeltukeel. Dewmangey tañi kimam pu che rume duamgelu, tañi peam llowdungun wülniel tati Biblia, tami rume falin ramtun. Ka kiñe kellu müley, eymi ayülmi, pengemeafuymi tami ruka mu kam chuchi püle rume eymi tami pial, kimelngeafuymi chillkatun Biblia mu, kullilafuymi. Feymu, kiñe dungukelu iney ngen Jewba, kimlu Biblia mu, chuchi antü mu rume, re pichiken kimafuymi Biblia mu. Ka femgechi, fentren che kimelelngey tüfachi kimeltun, feymu feypikeyngün ayükulen: “¡Fewla pen tati rüf dungu!”

Eymi ka peafuymi rüf dungu, chemu rume trürumfalay. Kuyfi mu, Jesu feypi: “Kimafimün tati rüf dungu, fey ti rüfngechi dungu lifrekünutuaeymünmew” (Juan 8:32). Feley may, tati rüf dungu Biblia mu, tripangeaymi chem pi ta che llükantudungu, montulaymu koyla mu. Fewla llükawelafuymi chem no rume. Kafey, kimün Biblia mu, nieaymi maneluam ka kimaymi chew tami amual tami mongen ka rüf ayüwkuleymi.