TROKIÑ 17
Jesu kimeltuy Ngünechen ñi Ngünenien mu
Jesu kimeltufi tañi pu inaniekeetew fentren dungu, welu doy kimeltufi Ngünechen ñi Ngünenien
¿CHUMNGELU (chemu) Jesu küpay tüfachi Mapu mew? Kidu feypi: “Iñche müley tañi kimelafiel Ngünechen ñi küme dungu tati kakelu waria mew kafey, ñi femngechi femael am werküngelu ta iñche” (Luka 4:43). Ngüneduamafiyiñ meli rüf dungu kimeltukelu Jesu tüfachi Ngünenien, doy falin-ngechi dungu ñi amuldungun.
1. Jesu Longko Ülmen-ngeay (Rey). Kidu küme kimuwi ñi Mesia ngen (Juan 4:25, 26). Jesu pengeli ñi Longko Ülmen-ngen kiñe pewma mew, Daniel ñi peel. Feypifi tañi pu apostol kiñe antü ñi anüleal “afmafalchi ülmen mülewe mew” ka fey engün koneltuay kiñe pichin trokiñche ñi ngünenieal ñi afkadi mew (Matew 19:28). Tüfachi trokiñ üytufi ‘pu pichi kechan ufisa’. Ka feypi müleay “ti kakelu ufisa” koneltulenolu tüfachi trokiñ mu (Luka 12:32; Juan 10:16).
2. Ngünechen ñi Ngünenien küpalalu rüfngechi nor dungu. Jesu feypi ti Ngünenien ñi küme elngetual ti norngenochi dungu: ¿Chumngechi femay? Yamngetuay ka liftungetuay kom wedake dungu Satana femfilu Ngünechen ñi üy mew wentruwlu Eden mu (Matew 6:9, 10). Jesu mülepalu tüfachi mapu mew, turpu dullilafi (ngümintulabi) ñi kimeltuafiel wentru ka domo, pu ülmenkülelu ka fillalelu, femngechi pengeli ngünenietule ngewelayay dullingen (ngümintun) chi che. Fey werküngefuy ñi amuldunguafiel tati pu israelche, welu ka kellufi tati pu samariache ka kakelu pu che mülekefulu kake mapu mu, Jesu trürlay tati pu longkolechi religioso feychi antü mu, fey engün illamkefingün che ka dullikelu kakelu che mu.
3. Ngünechen ñi Ngünenien reyükonkelay tüfachi mapu, ngünenielu ti weküfü. Jesu mülekefuy Judio ñi antü mu, chew mülekefuy wedake dungu, tüfachi trokiñche ñi ngünenieetew kakelu mapu mu. Welu chumkawnorume (chumngechi no ume) reyükonkelafuy ti politiko dungu mu (Juan 6:14, 15). Dungufilu kiñe longko ülmenkülelu, feymu feypifi: ‘Iñche ñi Ngünenien tuwlay tüfachi mapu mew’ (Juan 18:36). Ka feypifi tañi pu inaniekeetew: “Iñche dulliwiyiñ ta eymün rangi ti feyentunochi pu che mew” (Juan 15:19). Ka fey, eluñmalafi ñi nünieal ti wayki, ñi ingkayaetew rume (Matew 26:51, 52).
‘Ruparkey rume fentren waria püle ka lof mapu püle, wewpiyeniey ka kimeltuniey Ngünechen ñi ngünenien.’ (Luka 8:1)
4. Kristo ngünenieay piwkeyen mu. Jesu feypikünuy ñi entuñmafiel kom tati pu fanetulelu ñi mongen mew (Matew 11:28-30). Femngechi femi. Elufi kümeke ngülam ñi rakiduamkülenoal, ti diñmawün plata mew, welukentu ñi kümelkaleal ka ti ayüwün mew (Matew, kapitulo 5 pual 7). Jesu pengeli ñi piwkeyechen-ngen, feymew tati pu che, pu pichikeche ka pu fillalelu rume ñi fülkonaetew engün, kimi engün, Jesu ñi kümelkayaetew ka yamnieaetew. ¿Iney am ayükelay ñi nieal tüfachi longkolelu?
Chumngechi pengeli ñi femal Ngünechen ñi Ngünenien, Jesu ka femi fentren afmatun dungu. ¿Chumgechi diturpuy tüfa mu? Peafiyiñ.