Ti inan huesa dungu

Moisés feipifi ta faraon: “Huiñohuelayan. Huelu petu ñi amutunon, feipiayu chem ñi rupayal. Rangipunle, com pu hunenque fotüm mülelu Egipto mu layaingün, faraon ñi hunen fotüm ca pu esclavo ñi hunen fotüm cafei”.

Chau Jehová feipifi pu Israel che: “Pepicayafimün tüfachi iyael: cancatu ilo cordero ca fayümngenochi cofque engu. Ti cordero mülei ñi nieal 1 tripantu müten, fei marco puerta mu püteftuafimün pichin mollfüñ cordero. Pepicaucüleaimün tamün tripayal, tucutuucüleaimün tamün ocota mu. Tüfachi pun lifrecünuhuaiñ”. ¿Rume ayüucülepelai pu Israel che? ¿Chem pimi?

Rangipunlu, Chau Jehová huercüfi quiñe cüme püllü fill ruca Egipto mu. Fei nienolu mollfüñ marco puerta mu, langümfi ti hunen fotüm. Huelu, ti puerta nielu mollfüñ, langümngelai ti fotüm. Com pu familia Egipto mu, ülmen-ngefule ca pofrengefule rume, perdeingün tañi hunen fotüm. Huelu, pu Israel che ñi hunenque fotüm montutripaingün.

Faraon ñi hunen fotüm lai. Fente ñi huesa duamcülen feipifi ta Moisés ca Aarón: “¡Tripamün! ¡Amumün tamün poyeafiel tamün Dios! ¡Yefimün tamün culliñ, fei tripamün!”.

Apon cüyen mu, tripaingün pu Israel che. Cüme adcünungeingün ñi tripayal fillque familia tañi troquiñche mu. Tripaingün 600 mil huentru ca tañi domo ca pichiqueche engün. Fentren ca tuhunche quiñehuingün pu Israel che ñi poyeafiel ta Chau Jehová. ¡Feulaque lifrelefuingün pu Israel che!

Fill tripantu mülefui ñi pepicayal engün feichi iyael ñi feipieteu Chau Jehová, femngechi ñi loncontucual tañi montuleteu. Pascua pingequefui feiti fiesta.