Feipicünufingün ta Chau Jehová

Pu Israel che tripaingün Egipto mu, fei rupalu 2 cüyen, puhuingün Sinaí huincul mu. Üyeu umañpuingün. Chau Jehová feipifi ta Moisés ñi pürayal feichi huincul, fei feipi: “Iñche montulfiñ pu Israel che. Fei femülmün tañi feipin, iñche tañi saquin troquiñchengeaimün”. Huiñotulu Moisés, feipifi pu Israel che Chau Jehová tañi feipiel. Fei, ¿chem huiñoldunguingün? “Femaiñ com ñi feipiel Chau Jehová” pingün.

Moisés ca huiño pürai ti huincul mu. Üye mu Chau Jehová feipieyu: “Rupale 3 antü, dunguafiñ pu Israel che. Feimu ngelai ñi pürayal Sinaí huincul mu”. Moisés huiñotui ca feipifi pu Israel che ñi pepicahual, fei ñi allcütuafiel ta Chau Jehová.

Rupalu 3 antü, pu Israel che pefingün curülechi tromü huente huincul mu ca relampago, llüfquen pingequelu. Cafei allcüingün tralcan ca quiñe cullcull. Fei hula, Chau Jehová cütral mu nagpai Sinaí huincul meu. Pu Israel che rume llicaingün. Fitrun mülefui huincul mu ca rume nüyüi ti mapu. Ti cullcull doi nehuentu dungui, fei Chau Jehová feipi: “Iñche ta Jehová. Poyelayafimün ca chem dios no rume”.

Moisés huiño pürai ti huincul mu, üyeu Chau Jehová elueyu fillque ley. Femngechi quimeltufi pu Israel che chumngechi ñi poyeaeteu ca chem rüpü tañi miyahual engün. Moisés huirintucui com ti ley, fei papeltulelfi pu Israel che. Feimu feipicünuingün: “Femaiñ com ñi feipin Chau Jehová”. Huelu, ¿rüf fempeingün mai tañi feipicünuel engün? Peafiyiñ.